1. ¿Mitspaktia timomachtis tlajtolpanextili?

 TOIKNI Ben, katli nojua telpokatl, kiijtoua: “Tlauel nechpaktia nimomachtis tlajtolpanextili”. ¿Nojkia kiampa tijyolmati? ¿O timoiljuia tlauel ouij timomachtis uan tijkuesijkaita? Tlaj kiampa mitspano, tlauel mitspaleuis tlaj tijkuamachilis kenke Jehová kinejki ma moijkuilo tlajtolpanextili ipan Biblia.

2. ¿Tlake tikitasej ipan ni tlamachtili?

² Ipan ni tlamachtili tikitasej kenke moneki tijkuamachilisej nopa tlajtolpanextili tlen eltok ipan Biblia uan tlake techpaleuis ma timomachtikaj. Teipa tikitasej ome tlajtolpanextili tlen amochtli Daniel uan kenijkatsa techpaleuia kema tijkuamachiliaj.

3. ¿Tlake moneki tijchiuasej tlaj tijnekij tijkuamachilisej tlajtolpanextili?

³ Tlaj tijnekij tijkuamachilisej tlajtolpanextili, moneki ma techpaleuikaj. Se neskayotl, ximoiljui tipaxaloua ipan se altepetl kampa amo titlaixmati. Pero yaui mouaya se mouampo katli kuali tlaixmati. Ya kimati kanke initstokej uan kiixmati sejse calle. Tlauel kuali pampa nemi mouaya. Sanse kej nopa mouampo, Jehová kuali kimati ipan tlake tonali tiitstokej uan tlake panos teipa. Uajka, tlaj tijnekij tijkuamachilisej tlajtolpanextili, moneki amo timoueyimatisej uan tijtlajtlanisej Jehová ma techpaleui (Dan. 2:28; 2 Ped. 1:19, 20).

4. ¿Kenke Jehová kinejki ma moijkuilo tlajtolpanextili? (Jeremías 29:11; nojkia xikita tlaixkopinkayotl).

⁴ Jehová eli kej se tetaj, pampa kineki ikoneuaj kuali ma itstokaj teipa (xijpoua Jeremías 29:11). Uan ya ueli kiita tlen  panos teipa uan tetajmej amo uelij kichiuaj nopa. Jehová kinejki ma moijkuilo tlajtolpanextili pampa kineki ma tijmatikaj tlake tlamantli panos (Is. 46:10). Tlajtolpanextili eli kej se regalo tlen Jehová techmakatok pampa tlauel techiknelia. ¿Kenke uelis timotemachisej nelia moaxitis?

5. ¿Tlake uelis kiyekosej telpokamej ika tlen kichijki Max?

⁵ Miakej toikniuaj telpokamej kimatij kintetsopaj kampa momachtiaj pampa miakej amo kitlepanitaj tlen Biblia kiijtoua. Tlen kiniljuisej o tlen kinchiuilisej uelis kichiuas ayokmo kuali ma tlaneltokakaj. Ma tikitakaj tlen kipanok toikni Max. Ya kiijtoua: “Kema nieliyaya nitelpokatl, pejki nimotlajtlania tlaj nelia melauak nopa religión kampa nechuikayayaj notatauaj uan tlaj toTeotsij nelnelia kichijki ma moijkuilo Biblia”. ¿Tlake kichijkej itatauaj? Max kiijtoua: “Maske nijmatiyaya motekipachouayayaj, amo kualankej”. Itatauaj kitekiuijkej Biblia uan kiixtomilijkej nochi tlen kinekiyaya kimatis, uan Max nojkia kichijki kampeka momachtis. Ya kiijtoua: “Pejki nimomachtia tlajtolpanextili uan nikinixtomiliyaya sekinok telpokamej tlen notlanechikol”. ¿Kenijkatsa kipaleuik? Max kiijtoua: “Nopa nechpaleuik ma nimotemachi toTeotsij nelnelia kichijki ma moijkuilo Biblia”.

6. ¿Tlake uelis tijchiuasej tlaj timoiljuiaj amo melauak se tlamantli, uan kenke?

⁶ ¿Nojkia tijmati ouij timotemachis ipan Biblia kej Max? Amo ximotekipacho, xijchiua tlen mitspaleuis. Kema amo kuali tijneltokaj se tlamantli eli kej kema se tepostli moxixa. Tlaj se tepostli peua moxixa uan amo tleno tijchiua, teipa tlaminempoliuis. ¿Kenijkatsa uelis tijkixtis tlen kinempoloua motlaneltokilis? Achtoui ximotlajtlani: “¿Nijneltoka tlen Biblia kiijtoua panos teipa?”. Tlaj amo kuali tijneltoka, uajka moneki kuali timomachtis nopa tlajtolpanextili tlen ya moaxitijtok. ¿Tlake mitspaleuis kema timomachtis?

7. ¿Tlake kipaleuik Daniel kema momachtiyaya tlajtolpanextili? (Daniel 12:10; nojkia xikita tlaixkopinkayotl).

⁷ Tlauel techpaleuis kema timomachtisej tlajtolpanextili tlaj tijchiuaj kej Daniel. Ya momachtiyaya tlajtolpanextili pampa nelia kinekiyaya kimatis tlen melauak, uan tlauel kipaleuik pampa amo moueyimatiyaya. Kimatiyaya Jehová kinmaka tlalnamikilistli katli kitekipanouaj uan kineltokaj (Dan. 2:27, 28; xijpoua Daniel 12:10). Daniel amo moueyimatiyaya, yeka kiiljuik Jehová ma kipaleui (Dan. 2:18). Nojkia momachtiyaya toTeotsij iTlajtol ika yolik uan kuali momachtiyaya amatlajkuiloli tlen eltoya ipan nopa tonali (Jer. 25:11, 12; Dan. 9:2). ¿Kenijkatsa uelis tijchiuasej kej ya?

8. ¿Kenke momachtiaj tlajtolpanextili se keskij maseualmej uan tlake moneki tijchiuasej tojuantij?

⁸ Xikita kenke tijchiua. ¿Kenke timomachtia tlajtolpanextili? ¿Timomachtia pampa nelia tijneki tijmatis tlen melauak? Tlaj kiampa tijchiua, Jehová mitspaleuis (Juan 4:23, 24; 14:16, 17). Pero se keskij maseualmej  momachtiaj Biblia pampa kinekij kinextisej toTeotsij amo kichijki ma moijkuilo. San kinekij kipantisej se tlamantli tlen ika motechtisej uan kiampa kichiuasej tlen inijuantij kinekij. Kema timomachtisej tlajtolpanextili, moneki tijchiuasej pampa nelia tijnekij tijmatisej tlen melauak. Uan tlaj tijnekij tijkuamachilisej, moneki tijnextisej se tlamantli tlen tlauel ipati.

9. ¿Tlake moneki tijnextisej tlaj tijnekij tijkuamachilisej tlajtolpanextili, uan kenke?

⁹ Amo ximoueyimati. Jehová kiijtoua kinpaleuis katli amo moueyimatij (Sant. 4:6). Yeka tlaj tijnekij tijkuamachilisej tlajtolpanextili, moneki timomaijtosej uan tikiljuisej ma techpaleui. Nojkia tijkauasej ma techyakana nopa Tlatekipanojketl katli temachtli uan tlalnamiki, pampa Jehová kitekiuia ma techmaka tlamachtili kema kinamiki (Luc. 12:42). Jehová kichiua nochi kej kinamiki, yeka san inijuantij kintekiuia uan kiampa techpaleuia ma tijkuamachilikaj tlen Biblia tlamachtia (1 Cor. 14:33; Efes. 4:4-6).

10. ¿Tlake mitsmachtia tlen kichijki Esther?

¹⁰ Ximomachti Biblia ika yolik. Ximoiljui ipan se tlajtolpanextili tlen mitspaktia uan nopaya peua ximomachti. Ya nopa kichijki se tosiuaikni katli itoka Esther, ya tlauel kipaktiyaya tlajtolpanextili kampa kiijtouayaya asiskia Mesías. Ya kiijtoua: “Kema nijpixtoya 15 xiuitl, nijnekiyaya nijmatis tlaj nopa tlajtolpanextili nelia moijkuilok kema ayamo ualayaya Jesús ipan Tlaltipaktli”. ¿Tlake pejki kichiua? Pejki kipoua amatlajkuiloli kampa kamanalti tlen Rollos del mar Muerto, uan tlauel kipaleuik tlen kipantik. Esther kiijtoua: “Se keski tlen nopa amatlajkuiloli moijkuilo kema ayamo ualayaya Jesús. Uajka toTeotsij kichijki ma moijkuilo nopa tlajtolpanextili”. Nojkia kiijtoua: “Se keski tlamantli monejki miakpa nijpouas para nijkuamachilis”. Maske kiampa kichijki, tlauel kipaleuik. Ya kiijtoua kenijkatsa kiyolmatki kema momachtik se keski tlajtolpanextili: “Tlen nijchijki nechpaleuik ma nikita Biblia nelia kiijtoua tlen melauak”.

11. ¿Kenijkatsa techpaleuia kema tikitaj Biblia nelia kiijtoua tlen melauak?

¹¹ Kema tikitaj kenijkatsa moaxitijtok se keski tlajtolpanextili, techpaleuia ma timotemachikaj ipan Jehová uan ipan nopa tlanauatili tlen techmaka. Nojkia techpaleuis ma timotemachikaj teipa kuali tiitstosej uan ma tiyolpakikaj maske tikixnamikij tlaouijkayotl. Nama, tikitasej ome tlajtolpanextili tlen amochtli Daniel tlen moaxitijtok ipan ni tonali. Tlaj tijkuamachilisej tlen kiijtosneki, techpaleuis kuali ma tijtlapejpenikaj tlen tijchiuasej.

12. ¿Tlake kiixnextia iikxi nopa ueyi teteyotl? (Daniel 2:41-43).

¹² (Xijpoua Daniel 2:41-43). Tlanauatijketl Nabucodonosor kitemijki se ueyi teteyotl uan iikxi kipiayaya kanaktsi hierro maneltik ika sokitl. Kema tikitaj sekinok tlajtolpanextili tlen eltok ipan Daniel uan Apocalipsis,  tikitaj iikxi nopa teteyotl kiixnextia altepemej Reino Unido uan Estados Unidos, tlen elij nopa uejueyij altepemej katli tlayakanaj ipan ni tonali. Kema Daniel kiixtomilik Nabucodonosor tlake kiijtosnekiyaya tlen kitemijki, kiijtok tlen ni altepemej: “Kanaktsi kipias chikaualistli, pero nojkia kanaktsi axtle”. ¿Kenke kemantika amo kipiaskiaj chikaualistli? Pampa maseualmej katli elij kej nopa sokitl, amo kinkauaj ma tlanauatikaj. Yeka nopa tlanauatianij amo kipiaj chikaualistli kej hierro. b

13. ¿Tlake tlamantli tlen tlauel ipati techpaleuia ma tijkuamachilikaj ni tlajtolpanextili?

¹³ Tlen kiijtoua Daniel tlen nopa ueyi teteyotl uan iikxi, techpaleuia ma tijkuamachilikaj se keski tlamantli tlen tlauel ipati. Se, nopa uejueyij altepemej Reino Unido uan Estados Unidos kinextijtokej kipiaj miak chikaualistli. Kiampa tikijtouaj pampa tlatlankej ipan Achtoui uan ipan Ompa Ueyi Tlauilankayotl. Pero ika yolik kipolojtiasej chikaualistli, pampa maseualmej katli nopaya itstokej mokualaniaj uan moteuiaj. Ome, ni elisej nopa iyojtsi uejueyij altepemej katli tlayakanasej ipan Tlaltipaktli, uan teipa toTeotsij iTlanauatijkayo kintsontlamiltis nochi tlanauatianij. Maske kemantika sekinok altepemej kinijixnamikisej, amo kema kintekipatlasej ni omej altepemej. Kiampa tikijtouaj pampa nopa tlajtolpanextili kiijtoua “nopa tetl”, tlen kiijtosneki toTeotsij iTlanauatijkayo, kitsontlamiltis iikxi nopa ueyi teteyotl (Dan. 2:34, 35, 44, 45).

14. ¿Kenijkatsa techpaleuis tlaj tijkuamachilisej nopa tlajtolpanextili tlen iikxi nopa teteyotl?

¹⁴ ¿Timotemachia nelia melauak tlen kiijtok Daniel tlen iikxi nopa teteyotl? Tlaj kena, uajka tijnextis ipan monemilis uan amo timosentlalis titlapijpias, pampa nechka kitsontlamiltisej tlen amo kuali (Luc. 12:16-21; 1 Juan 2:15-17). Nojkia tlaj tijkuamachilis nopa tlajtolpanextili, mitspaleuis tijnekis tikinmachtis sekinok ika Biblia (Mat. 6:33; 28:18-20). Ya tikitakej tlake kiijtosneki ni tlajtolpanextili, yeka ximotlajtlani: “¿Ika tlen nijtlapejpenia nijnextia nelnelia nijneltoka toTeotsij iTlanauatijkayo nechka kintsontlamiltis nochi tlanauatianij?”.

15. ¿Ajkia inijuantij elij “tlanauatijketl tlen norte” uan “tlanauatijketl ika sur”? (Daniel 11:40).

¹⁵ (Xijpoua Daniel 11:40). Daniel capítulo 11 kamanalti tlen omej tlanauatianij katli moteuiaj pampa kinekij san inijuantij tlanauatisej. Kema tikitaj ni uan sekinok tlajtolpanextili, tikitaj “nopa tlanauatijketl tlen norte” kiixnextia Rusia uan katli kipaleuiaj. Uan “nopa tlanauatijketl ika sur” kinixnextia altepemej Reino Unido uan Estados Unidos. c

16. ¿Tlake kiixnamikij toikniuaj katli itstokej kampa tlanauatia “tlanauatijketl tlen norte”?

¹⁶ Nopa “tlanauatijketl tlen norte” kintlatsakuiltia toTeotsij itekipanojkauaj katli itstokej kampa tlanauatia. Se keskij toikniuaj kinmakilijtokej uan kintsaktokej pampa tlaneltokaj ipan Biblia. Pero toikniuaj amo kinmajmatia tlen kichiua nopa “tlanauatijketl tlen norte”. Inijuantij kichiuaj kampeka kuali tlaneltokasej pampa kimatij tlen kinpano ipa ijkuilijtoya ipan amochtli Daniel (Dan. 11:41). d Kema tijmatij ni tlamantli, techpaleuia ma timotemachikaj teipa kuali tiitstosej uan amo ma tijtlauelkauakaj Jehová.

17. ¿Tlake kiixnamikij toikniuaj katli itstokej kampa tlanauatia “tlanauatijketl ika sur”?

 ¹⁷ Uejkajkia nopa “tlanauatijketl ika sur”, nojkia kintlatsakuiltik toTeotsij itekipanojkauaj. Kema mochiuayaya nopa Achtoui uan Ompa Ueyi Tlauilankayotl, kintsajkej se keskij toikniuaj pampa amo kitlauelkajkej Jehová uan se keskij konemej kinkixtijkej escuela. Pero ipan se keski xiuitl tlen panotok, Jehová itlajtoltemakauaj nojua monektok kinextisej san kipaleuiaj toTeotsij iTlanauatijkayo. Se neskayotl, kema kintlapejpeniaj tlanauatianij, uelis se toikni kinekis kipaleuis se akajya. Maske amo yas kampa tlavotaroti, uelis ipan iyolo kinekis se akajya ma tlatlani. Tlaj amo tijnekij timokalakisej ipan política, moneki tijmokuitlauisej tlen tijchiuaj, tlen timoiljuiaj uan tlen tijyolmatij (Juan 15:18, 19; 18:36).

18. ¿Tlake tijyolmatij kema tikitaj mokualaniaj nopa omej tlanauatianij? (Nojkia xikita tlaixkopinkayomej).

¹⁸ Uelis katli amo kineltokaj tlajtolpanextili, tlauel motekipachouaj kema kiitaj “tlanauatijketl ika sur” mokualania iuaya “tlanauatijketl  tlen norte” (Dan. 11:40). Ika nochi nopa bombas uan sekinok tlamantli tlen kipiaj ueliskia kintsontlamiltisej nochi maseualmej. Pero Jehová amo kikauas kiampa ma kichiuakaj (Is. 45:18). Yeka amo timotekipachouaj yon timajmauij. Tojuantij tijchiuaj kampeka kuali titlaneltokasej kema tikitaj nopa tlanauatianij mokualaniaj, pampa nopa kinextia toTeotsij ya nechka kitsontlamiltis tlen amo kuali.

19. ¿Tlake moneki tikilnamiktosej?

¹⁹ Amo tijmatij kenijkatsa moaxitis se keski tlajtolpanextili. Teokamanalojketl Daniel nojkia amo kikuamachiliyaya se keski tlamantli tlen kiijkuilouayaya (Dan. 12:8, 9). Maske amo tijkuamachiliaj, amo kiijtosneki amo moaxitis. Timotemachiaj Jehová techiljuis tlen moneki tijmatisej kema kinamikis, kej kichijki uejkajkia (Amós 3:7).

20. ¿Tlake tlajtolpanextili nechka moaxitis, uan tlake nojua moneki tijchiuasej?

²⁰ Maseualmej nechka kiijtosej: “Ya onka tlaseuilistli uan ya itstokej ika kuali” (1 Tes. 5:3). Ipan nopa tonali, tlanauatianij kitsontlamiltisej nochi religiones tlen amo melauak (Apoc. 17:16, 17). Teipa kintlatsakuiltisej toTeotsij itekipanojkauaj (Ezeq. 38:18, 19). Uan nojkia peuas Armagedón (Apoc. 16:14, 16). Timotemachiaj ni tlamantli nechka mochiuas, yeka ma timomachtikaj tlajtolpanextili uan ma tikinpaleuikaj sekinok ma kikuamachilikaj. Tlaj kiampa tijchiuasej, tijnextisej tijtlaskamatiliaj Jehová.