1. ¿Toni techpaleuis maj tikuelitakan timomachtiskej tein Biblia achto kijtojka ke mochiuaskia?

 SE TOKNIUJ telpoch akin monotsa Ben kijtoua: “Semi nikuelita nimomachtis tein Biblia achto kijtojka ke mochiuaskia”. Uan tejuatsin, ¿no semi tikonuelita tionmomachtis? ¿Oso tikonnemilia ke semi ouij se kiajsikamatis tein achto moijtojka ke mochiuaskia uan ke amo kualtsin? Xa amo ijkon tiontanemilisok komo okachi tikonajsikamati keyej Jehová kikauak maj moijkuilo itech iTajtol tein achto moijtojka ke mochiuaskia.

2. ¿Toni tikitaskej itech nejin tamachtilis?

² Itech nejin tamachtilis tikitaskej keyej moneki maj kuali tikajsikamatikan tein Biblia achto kijtojka ke mochiuaskia uan toni techpaleuis maj ijkon tikchiuakan. No tikitaskej ome taman tein moijtojka itech amatajkuilol Daniel uan keniuj techpaleuia komo tikajsikamatij.

3. ¿Toni moneki tikchiuaskej komo tiknekij tikajsikamatiskej tein Biblia kijtojka ke mochiuaskia?

³ Moneki maj aksa techpaleui para tikajsikamatiskej tein Biblia achto kijtojka ke mochiuaskia. Xikonnemili ke tionajsik itech se xolal kampa amo keman tionyani, sayoj ke mouan youi se motasojikniuj akin kuali ixmati. Yejua kuali kimati kani nanyetokej uan kani teajxitia sejse ojti. ¡Semi kuali ke motasojikniuj kinekik yas mouan! No ijkon, Jehová kuali kimati kani timoajsij uan no kimati toni panos satepan. Yejua ika moneki tiktajtaniskej maj techpaleui maj tikajsikamatikan tein Biblia kijtojka ke mochiuaskia (Dan. 2:28; 2 Ped. 1:19, 20).

4. ¿Keyej Jehová kinekik maj moijkuilo itech iTajtol tein achto moijtojka ke mochiuaskia? (Jeremías 29:11; no xikonita taixkopin).

⁴ Ijkon kemej se tepopaj akin kineki maj kuali yetokan ikoneuan, Jehová no kineki maj tiyolpakikan satepan (xikonixtajtolti  Jeremías 29:11). Sayoj ke tetatmej amo ueli kichiuaj tein Jehová kemaj ueli, yejuatsin ueli senkis kijtoua tein mochiuas satepan. Kinixpejpenak takamej para maj kijkuilouanij itech iTajtoltsin tein mochiuaskia satepan, ijkon tejuan ueliskia achtook tikmatiskej toni mochiuas (Is. 46:10). ToTajtsin semi techtasojta, yejua ika achtook techmatiltia toni mochiuas satepan. Sayoj ke, ¿keniuj tikmatij ke yekmelauj mochiuas?

5. ¿Toni kinmachtia telpochmej tein kichiuak Max?

⁵ Itech kaltamachtiloyan, tokniuan telpochmej nochipa moajsij iniuan akin sayoj tepitsin kipoujkaitaj tein kijtoua Biblia oso nion tepitsin. Tein kichiuaskej oso tein kijtoskej akin iniuan yetoskej xa uelis kichiuas maj se toknitsin amo semi kineltokaok tein Biblia tamachtia. Maj tikitakan tein kipanok se tokniuj takat akin monotsa Max. Yejua kijtoua: “Keman katka nitelpoch peuak amo semi nikneltokaok tein nechmachtiayaj notatuan nion ke Biblia yekmelauj katka iTajtol Dios”. ¿Toni kichiujkej itatuan? Max kijtoua: “Nikmatia ke noka motekipachouayaj, sayoj ke amo yolijsiujkej”. Itatuan kikuikej Biblia para kinankiliskej tein Max amo kiyekajsikamatia, sayoj ke yejua no kichiuak teisa. Yejua kijtoua: “Peuak nimomachtia tein Biblia achto kijtojka ke mochiuaskia, uan nikiniluiaya okseki telpochmej itech nechikol tein nimomachtiaya”. ¿Keniuj kipaleuij? Max kijtoua: “Satepan ke nikchiuak nejon nikneltokak ke Biblia yekmelauj iTajtol Dios”.

6. ¿Toni moneki tikchiuaskej komo amo semi tikneltokajok tein Biblia tamachtia, uan keyej?

⁶ Komo tejuatsin amo no semi tikonneltokaok ke Biblia kijtoua tein melauak, ijkon kemej kipanok Max, amo xionmopinaujmati uan niman xikonchiua tein mitsonpaleuis oksepa xikonneltoka. Keman peua tiomeyolouaj tamati kemej keman teisa peua palani. Keman peua palani teisa tein kipia ipatiuj uan amo niman tikchipauaj, ijsiujka nochi palani. ¿Toni uelis mitsonpaleuis maj kemej yeskia amo palani tein tikonneltoka? Yekinika xionmotajtani nejin: “¿Nikneltoka tein Biblia kijtoua ke mochiuas satepan?”. Komo amo semi tikonneltoka, xionmomachti tein Biblia achto kijtojka ke mochiuaskia uan mochiuakya. ¿Toni uelis mitsonpaleuis xikonchiua nejon?

7. ¿Toni kipaleuij Daniel maj momachtiani tein Biblia achto kijtojka ke mochiuaskia? (Daniel 12:10; no xikonita taixkopin).

⁷ Tinochin uelis tikchiuaskej kemej Daniel keman timomachtiskej tein Biblia achto kijtojka ke mochiuaskia. Yejua momachtiaya porin yekmelauj kinekia kimatis tein melauak. Daniel no katka yolyemanik, kimatia ke Jehová kipaleuiskia maj kiajsikamati tein Biblia achto kijtojka komo amo kikauaya uan nochipa kitakamatia (Dan. 2:27, 28; xikonixtajtolti Daniel 12:10). No kinextij ke katka yolyemanik keman kitajtanij Jehová maj kipaleui (Dan. 2:18). Uan no, tel kuali momachtiaya iTajtol Dios. Kitemouaya tamachtilismej itech amatajkuilol tein moajsia itech nejon tonalmej (Jer. 25:11, 12; Dan. 9:2). ¿Keniuj no uelis tikchiuaskej kemej Daniel?

8. ¿Keyej sekin momachtiaj tein Biblia achto kijtojka ke mochiuaskia, uan toni moneki tikchiuaskej tejuan?

 ⁸ Xikonita keyej tionmomachtia. ¿Keyej tionmomachtia tein Biblia achto kijtojka ke mochiuaskia? ¿Porin yekmelauj tikonneki tikonmatis tein melauak? Komo ijkon, Jehová mitsonpaleuis (Juan 4:23, 24; 14:16, 17). Sekin momachtiaj Biblia porin kinekij kinextiskej ke amo iTajtol Dios. Kinemiliaj ke komo Biblia amo iTajtol Dios uelis yejuan kiixtaliskej tein kuali yetok uan tein amo kuali yetok uan kichiuaskej tein kinekiskej. Tejuan tiknekij timomachtiskej tein achto moijtojka ke mochiuaskia porin yekmelauj tiknekij tikajsikamatiskej. Sayoj ke moneki tiknextiskej se taman tein motelneki.

9. ¿Toni moneki tiknextiskej para tikajsikamatiskej tein Biblia achto kijtojka ke mochiuaskia, uan keyej?

⁹ Xionyolyemanik. Jehová motenkaua kinpaleuis akin yolyemankej (Sant. 4:6). Yejua ika, komo tiknekij tikajsikamatiskej tein Biblia achto kijtojka ke mochiuaskia, moneki tiktataujtiskej maj techpaleui. Komo tiyolyemankej no tikauaskej maj techpaleui takeual takuaujtamach uan tamatkej akin Jehová kiixtalij maj techmaka tamachtilis keman moneki (Luc. 12:42). Jehová kineki maj nochi moyekchiua, yejua ika sayoj kinixtalij sekin maj techpaleuikan maj tikajsikamatikan tamachtilismej tein kipia Biblia (1 Cor. 14:33; Efes. 4:4-6).

10. ¿Toni mitsonmachtia tein kichiuak Esther?

¹⁰ Kuali xionmomachti tein kijtoua Biblia. Peua xionmomachti seki taman tein Biblia achto kijtojka ke mochiuaskia tein okachi tikonuelita. Yejua nejon tein kichiuak se tokniuj siuat akin monotsa Esther. Yejua kinekia okachi kimatis toni moijtojka ke mochiuaskia keman ejkoskia Mesías. Esther kijtoua: “Keman nikpiaya 15 xiujmej, nejua niknekia nikmatis ox tein Biblia achto kijtojka ke mochiuaskia yekmelauj moijkuilojka achto ke Jesús ualaskia nikan taltikpak”. ¿Toni kichiuak? Peuak kiixtajtoltia Rollos del mar Muerto, uan tein ompa kiajsik kipaleuij maj amo omeyolouaok. Yejua kijtoua: “Seki nejon rollos moijkuilojkaj achto ke Jesús ualaskia nikan taltikpak. Yejua ika tein ompa ijkuiliujtoya, Dios kichiujka maj moijkuilo”. Sayoj ke kijtoua: “Seki taman monekik miakpa nikixtajtoltis para nikajsikamatis”. Maski ijkon, yolpaki porin mochikauak kitemos. Satepan ke kuali momachtij miak taman tein Biblia achto kijtojka ke mochiuaskia, Esther kijtoua: “Noselti niktemoj tamachtilismej uan nikitak ke Biblia kijtoua tein melauak”.

11. ¿Keniuj techpaleuia komo tiktemouaj tikitaskej ox Biblia kijtoua tein melauak?

¹¹ Keman tikitaj ke mochiuania seki taman tein Biblia achto kijtojka ke mochiuaskia amo tiomeyolouaj ika tein Jehová technauatia uan okachi titakuaujtamatij iuan. Uan no, tein Biblia achto kijtojka ke mochiuaskia, techmatiltia toni uelis tikseliskej satepan, yejua ika keman timomachtiaj techpaleuia maj tiyolpakikan maski tikpiaj ouijkayomej. Tikitatij ome taman tein amatajkuilol Daniel kijtojka ke mochiuaskia uan axkan mochiujtokya. Komo tikajsikamatij tein kijtosneki techpaleuis maj kuali titaixpejpenakan.

12. ¿Toni kiixnextia imetsuan tein tachijchiuj ika ‘tepos maneliujtok ika sokit kuechauak’? (Daniel 2:41-43).

¹² (Xikonixtajtolti Daniel 2:41-43). Tekiuaj Nabucodonosor kikochitak se ueyi takat tamachijchiuj uan imetsuan katkaj de “tepos maneliujtoya ika sokit kuechauak”. Keman tikitaj nejin tein Biblia achto kijtojka ke mochiuaskia iuan okseki tein kijtoua amatajkuilol Daniel uan Apocalipsis, tikajsikamatij ke imetsuan nejon ueyi takat kinixnextia akin tekiuajtij Estados Unidos uan Reino Unido, nejin yejuan okachi uejueyi taixyekananij itech nejin tonalmej. Daniel kiluij Nabucodonosor toni kijtosnekia tein kikochitaka, kiluij keniuj yeskia: “Yeski tepitsin chikauak uan tepitsin amo”. ¿Keyej amo semi chikauak yeskia? Porin miakej akin kinixnextia sokit tein kuechauak amo mouikaj iniuan akin kinixnextia tepos. b

13. ¿Toni tein motelneki techpaleuia maj tikajsikamatikan tein achto moijtojka?

¹³ Tein Daniel kijtoj keman kimelauak toni kijtosnekia tein kikochitak Nabucodonosor, uan okachiok imetsuan nejon ueyi takat tamachijchiuj techmachtia miak taman tein moneki. Yekinika, akin taixyekanaj Reino Unido uan Estados Unidos kinextianij ke semi chikaujkej. Nejin ome altepemej yejuan akin tatankej itech Yekinika uan Ojpatika Ueyi Neteuilis. Sayoj ke kemej nochin amo kuali mouikaj uan sekin kiixnamikij tekiuaj, amo semi uelijok taixyekanaj uan kisentokaskej amo ueliskejok taixyekanaskej. Ojpatika, yejuan nejin altepemej taixyekantoskej keman iTaixyekanalis Dios kinixpolos nochin oksekin tekiuanij. Maski kemansa xa oksekin xolalmej kiixnamikiskej amo uelis kiixpataskej. Uan tikmatij nejin porin Daniel achto kijtojka ke “tet” oso iTaixyekanalis Dios kiixpolos imetsuan ueyi takat tamachijchiuj (Dan. 2:34, 35, 44, 45).

14. ¿Keniuj techpaleuia maj kuali titaixpejpenakan komo tikajsikamatij tein kijtosneki imetsuan ueyi takat tamachijchiuj?

¹⁴ ¿Tikonneltoka tein Daniel kijtoj keman kimelauak toni kijtosneki imetsuan ueyi takat tamachijchiuj? Komo ijkon, nesis ika tein tikonchiua. Amo tikontemos tikonpias miak tomin oso miak taman tein kipia ipatiuj porin tikonmati ke amo uejkaua nochi ixpoliuis (Luc. 12:16-21; 1 Juan 2:15-17). Uan no, komo tikonajsikamati tein achto moijtojka ke mochiuaskia, mitsonpaleuis xikonita ke motelneki xiontanojnotsa uan xiontamachti (Mat. 6:33; 28:18-20). Axkan ke tikmatijya toni kijtosneki imetsuan ueyi takat tamachijchiuj, maj timotajtanikan: “¿Kinextia tein nikixpejpena nikchiuas ke nikneltoka ke amo uejkaua iTaixyekanalis Dios kinixpolos akin taixyekanaj nikan taltikpak?”.

15. ¿ Akonimej axkan “tekiuaj akin taixyekana norte” uan “tekiuaj akin taixyekana sur”? (Daniel 11:40).

¹⁵ (Xikonixtajtolti Daniel 11:40). Itech amatajkuilol Daniel capítulo 11 ika tajtoua ome tekiuanij akin moixnamikij porin kinekij taixyekanaskej. Keman tikitaj nejin uan okseki taman tein Biblia achto kijtojka ke mochiuaskia, tikajsikamatij ke axkan “tekiuaj akin taixyekana norte” yejua Rusia uan akin kipaleuiaj, uan “tekiuaj akin taixyekana sur” yejua Reino Unido uan Estados Unidos. c

16. ¿Keniuj “tekiuaj akin taixyekana norte” kintajyouiltia itekitikauan Dios?

 ¹⁶ “Tekiuaj akin taixyekana norte” kintajyouiltijtok itekitikauan Dios akin nemij kampa yejua taixyekana. Sekin itekitikauan Jehová kinmaganij uan kintsakuanij porin kiueyichiuaj yejuatsin. Sayoj ke tokniuan amo mokauaj maj kinmojmoujti tein kichiua “tekiuaj akin taixyekana norte”, d ta okachi takuaujtamatij. ¿Keyej? Porin kimatij ke itech amatajkuilol Daniel ipa moijtojkaya ke techtajyouiltiskiaj (Dan. 11:41). Komo tikelnamikij ke mochiujtokya tein achto moijtojka, techpaleuis maj amo tikelkauakan tein tikchiuaj uan maj amo tikauakan Jehová.

17. ¿Toni ouijkayomej kiixnamikij itekitikauan Dios akin nemij kampa tekiuajti “tekiuaj akin taixyekana sur”?

¹⁷ Ne uejkauj “tekiuaj akin taixyekana sur” no kintajyouiltij itekitikauan Jehová. Ijkon panok keman mochiuak Yekinika uan Ojpatika Ueyi Neteuilis keman miakej tokniuan kintsakkej porin amo kinekkej yaskej moteuitiuij, uan miakej konemej kinkixtijkej de tamachtiloyan  porin amo kinekkej kitajpaloskej bandera. Sayoj ke itech nejin tonalmej, itekitikauan Jehová akin nemij kampa tekiuajti “tekiuaj akin taixyekana sur” kipanouanij okseki taman ouijkayomej. Xa keman tayoleujtinemij maj se tapaleui maj aksa mochiua tekiuaj, xa se tokniuj kinemilis ke semej okachi kuali taixyekanas maski amo yas kiixpejpenatiuj, sayoj ke xa kinemilis oso kinejnekis maj aksa tatani. Para amo tikpaleuiskej nion se moneki semi tikitaskej tein tikchiuaj, tein tiknemiliaj uan tein tikmachiliaj (Juan 15:18, 19; 18:36).

18. ¿Keniuj timomachiliaj keman tikitaj ke moteuiaj nejon ome tekiuanij? (No xikonita taixkopimej).

¹⁸ Xa akin amo kineltokaj tein Biblia achto kijtojka ke mochiuaskia semi motekipachouaj keman kiitaj ke “tekiuaj akin taixyekana sur” mocuernojuijtok iuan “tekiuaj akin taixyekana norte” (Dan. 11:40, nota). Nochin ome tekiuanij kipiaj bombas tein chikaujkej tein ika ueliskiaj kinixpoloskej nochin. Sayoj ke tejuan tikmatij ke Jehová amo kinkauas maj kichiuakan nejon (Is. 45:18). Yejua ika amo timotekipachouaj nion timomoujtiaj keman tikitaj keniuj moteuiaj “tekiuaj akin taixyekana norte” uan “tekiuaj akin taixyekana sur”, ta okachi titakuaujtamatij porin tikitaj ke amo uejkaua ixpoliuisya nochi tein amo kuali.

19. ¿Toni moneki tikajsikamatiskej keman timomachtiskej tein Biblia achto kijtojka ke mochiuaskia?

¹⁹ Seki taman tein Biblia achto kijtojka ke mochiuaskia amo tikmatij keniuj mochiuaskej. Nion tanauatijkej Daniel kuali kiajsikamatia nochi tein kijkuilouaya (Dan. 12:8, 9). Sayoj ke maski amo senkis tikajsikamatiskej keniuj mochiuas amo kijtosneki ke amo mochiuas. Tikyekmatij ke Jehová kisentokas techmatiltis tein kineki maj tikmatikan keman okachi monekis, ijkon kemej kichiuak ne uejkauj (Amós 3:7).

20. ¿Toni tein kijtojka Biblia ke mochiuaskia mochiuas amo uejkaua, uan toni moneki tiksentokaskej tikchiuaskej?

²⁰ Itech altepemej motematiltis “¡Axkan tiyolseujkanemijya uan amo timouijok!” (1 Tes. 5:3). Tekiuanij niman kinixnamikiskej taneltokalismej tein amo melaujkej uan kinixpoloskej (Apoc. 17:16, 17). Uan ompa kinixnamikiskej itekitikauan Dios (Ezeq. 38:18, 19). Satepan peuas ueyi neteuilis Armagedón (Apoc. 16:14, 16). Senkis tikmatij ke amo uejkaua mochiuas nochi nejin. Maj tiksentokakan tikitstiakan keniuj mochiujtiuj tein Biblia achto kijtojka ke mochiuaskia, uan maj tikinpaleuikan oksekin maj no ijkon kichiuakan, ijkon tiknextiskej ke tiktasojkamatiliaj toTajtsin.