1. Ye mɛ lengbi ti zangɔ e ya, e sepala na mandangɔ aprɔfesi ti ya Ngbangɔ nɛ?

 NYITA kɔli kɔi mɛ ili lo la Ben atɛnɛ ya, “Mbi ndo ye mandangɔ aprɔfesi ti ya Ngbangɔ gba.” Mɔ ye tɛnɛ tɛ lo? Bere mɔ ndo hũ ya, gbɔ̃ngɔ nda aprɔfesi ti ya Ngbangɔ adu kpengbani? Ngoi mɛndɛ̃ mɔ ndo hũ ya, mandangɔ aprɔfesi ti ya Ngbangɔ alengbi ti hɛ̃ngɔ zo nzɛ̃ngɔ. Kanda se mɔ manda nda mɛ Yehova sundó na aprɔfesi niko kaya Ngbangɔ ko, mɔ nga na bandangɔ yengɔ ni gba.

2. Aye mɛ e na mandangɔ na ya tɛnɛ mɛ nɛ?

² Na ya tɛnɛ mɛ, e na bangɔ nda mɛ ayɔ ya, e manda aprɔfesi ti ya Ngbangɔ, nga na aye mɛ alengbi ti zangɔ e ya, e manda aprɔfesi ni. E na mandangɔ aprɔfesi sɛ mɛ kaya mbeti ti Daniel, wa e nga na hũngɔ se mɛ gbɔ̃ngɔ nda aprɔfesi niko alengbi ti zangɔ e ndɛ.

3. Se e ye gbɔ̃ngɔ nda aprɔfesi ti ya Ngbangɔ, ye mɛ ayɔ ya e li nɛ?

³ Se e ye gbɔ̃ngɔ nda tɛnɛ ti aprɔfesi ti ya Ngbangɔ ko, ayɔ ya, aza e. Binga li mɔ na ndo kpale mɛ, mɔ ye gwengɔ bangɔ ndo kɔi mɛ ta mɔ hĩnga ni ma, kanda kwa mɔ kɔi ahĩnga ndoni nzɔ̃ni nvɛ̃ni. Lo hĩnga na seni ndo mɛ ĩ ga gwe da, nga na alége kɔi na kɔi mɛ ĩ lengbi ti ɔngɔ ti da. Ta kitɛ dama ya, mɔ na yengɔ ya, kwa mɔ niko ga ĩ na lo ĩ gwe ka ndo niko! Yehova du mabere nzɔ̃ kwa niko ti ngaso, lo hĩnga nzɔ̃ni ngoi mɛ e da nga na akpale mɛ na singɔ na e na bi mɛ na gangɔ. Ni la, ti nɛngɔ ya e gbɔ̃ nda aprɔfesi ti ya Ngbangɔ ko, ayɔ ya, na zungɔ na tɛrɛ zu, e hũnda Yehova ya, lo za e.​—Da. 2:28; 2 Pet. 1:19, 20.

4. Nda mɛndó Yehova su atɛnɛ ti aprɔfesi kaya Ngbangɔ nɛ? (Yirimia 29:11) (Ba nga limɔ.)

⁴ Nga ma se tɛ awa dũngɔ ayangambi, Yehova ye ya, ayati lo zu adu na dungɔ lɛ ngɛ̃́ ti nzɔ̃ni na bi mɛ na gangɔ. (Di Yirimia  29:11.) Kanda ɔngbingɔ na awa dũngɔ ayangambi mɛ na tɛrɛ ti mi ko, Yehova lengbi ti tɛnɛngɔ hɛ̃ e ye mɛ na singɔ na e na bi mɛ na gangɔ, wa tɛnɛ tɛ lo ndo du lá kwɛ mbilimbili. Yehova pɔnandó azi ya, ala su aprɔfesi kaya Ngbangɔ ti nɛngɔ ya, e hĩnga akpale ti ngbondoni mɛ na singɔ na bi mɛ na gangɔ. (Yis. 46:10) Aprɔfesi ti ya Ngbangɔ adu aye ti ngbondoni mɛ To e ti ndozu ahɛ̃ e na songo zu. Kanda ngasia la, mɔ lengbi ti yengɔ na bɛ mɔ kɔi ya, tɛnɛ mɛndó Ngbangɔ pia tɛnɛ na tingɔ nvɛ̃ni na seni nɛ?

5. Wangɔ mɛ apalanga alengbi luangɔ na ndo se lɛlo tɛ Max nɛ?

⁵ Ka kalasi, apalanga mɛ ndo vɔrɔ Yehova ndo tengbi na azi mɛ ta ala ndo tɔndɔ tɛnɛ ti Ngbangɔ ma. Tɛnɛ tɛ la nga na aseliye tɛ la alengbi ti tongɔ apalanga mɛ Atɛmwɛ tɛ Yehova ya, ala ti na kitɛ ka bɛ la. E ba kpale mɛndó nyita kɔli Max atengbi na ni. Lo tɛnɛ ya, “Ngoi mɛndó mbi dɛ palanga ko, mbi bandandó dɛngɔ kitɛ ya, ta aye mɛndó awa dũngɔ mbi ndo ha na mbi adu ti sambela ti mbilimbili ma, wa ta asu nga Ngbangɔ na lége ti Nyingɔ vurú tɛ Nzapa ma.” Ye mɛndó awa dũngɔ lo ali nɛ? Max tɛnɛ ya, “Ala hɛ̃ndó gbinya na ndenge ti nzɔ̃ni abɛse mbi hĩngandó ya, ala na sɔngɔ bɛ.” Awa dũngɔ Max ahɛ̃ndó lo gbinya ti hũnda tɛ lo na lége ti Ngbangɔ. Ye mɛndó Max li nɛ? Lo tɛnɛ ya, “Mbi nvɛ̃ni mbi mandandó aprɔfesi ti ya Ngbangɔ, wa mbi ndo kambisa ngandó aye mɛ mbi manda hɛ̃ apalanga mɛndɛ̃.” Nzɔ̃ kpale mɛndó lo lua nɛ? Lo pa ya, “Ni zandó mbi ya, mbi ye ya asu Ngbangɔ na lége ti Nyingɔ vurú tɛ Nzapa!”

6. Se du ya, mɔ ti na kitɛ ka bɛ mɔ ko, ye mɛ ayɔ ya, mɔ li nɛ, wa na lo nɛ?

⁶ Nga ma Max, se du ya mɔ banda tingɔ na kitɛ ka bɛ mɔ ya ta Ngbangɔ ndo tɛnɛ mbilimbili ma ko, ta mɔ hɛ̃ tɛrɛ mɔ fotɛ ma. Kanda ni du ngbondoni ya, mɔ li kpale iɔ nvɛ̃ni. Kitɛ du nga ma ngbele. Se azia ni ko, yɛkɛ yɛkɛ ni lengbi ti gbɛ̃ngɔ aye mɛ ngbondoni. Se du ya, ngbele abanda gbɛ̃ngɔ loyengɔ tɛ mɔ ko, hã ni iɔ. Ti nɛngɔ ya, mɔ banda hãngɔ “ngbele” niko ko, hũnda tɛrɛ mɔ na ndo mɛ, ‘Mbi ndo kpã bɛ mbi na ndo tɛnɛ mɛ Ngbangɔ ndo tɛnɛ na lo ti bi mɛ na gangɔ?’ Se ta mɔ ndo ye ni na bɛ mɔ kɔi ma ko, ayɔ ya mɔ manda aprɔfesi ti ya Ngbangɔ mɛndó ati na seni. Ba se mɛ mɔ lengbi ti lingɔ ni.

7. Nzɔ̃ lɛlo mɛndó Daniel zia hɛ̃ e, na omɛ aba mandangɔ aprɔfesi nɛ? (Danyele 12:10) (Ba nga limɔ.)

⁷ Daniel zia se lɛlo ti nzɔ̃ni na omɛ aba se ti mandangɔ aprɔfesi. Daniel ndo mandandó aprɔfesi na dangɔ bɛ ti nzɔ̃ni. Hãngɔ ni zingɔ lo ngandó na seliye ti zungɔ na tɛrɛ, lo hĩngandó ya, Yehova na zangɔ lo ya, lo gbɔ̃ nda tɛnɛ ti aprɔfesi ti ya Ngbangɔ se du ya, lo du dã na Yehova wa lo tɔndɔ nga andia tɛ lo. (Da. 2:27, 28; di Danyele 12:10.) Daniel fandó ya, lo na zungɔ na tɛrɛ na ndenge mɛndó lo kpã bɛ lo zu na ndo Yehova. (Da. 2:18) Wa lo ndo manda ngandó aye na seni nvɛ̃ni. Lo ndo lindó bolukiluki kaya eteni ti Ngbangɔ mɛndó lo na ni. (Yir. 25:11, 12; Da. 9:2) Ngasia la elengbi ti landangɔ se lɛlo tɛ Daniel nɛ?

8. Nda mɛ ambanga azi mɛndɛ̃ ndo da bɛ la ya, ta aprɔfesi ti ya Ngbangɔ ndo ti na seni ma nɛ, kanda ye mɛ elengbi ti lingɔ nɛ?

 ⁸ Ba dangɔ bɛ tɛ mɔ. Gwɛ̃ ti hĩngangɔ mbilimbili ti ya Ngbangɔ la ndo to mɔ ya, mɔ manda aprɔfesi ti ya Ngbangɔ? Se adu ngaso ko, Yehova na zangɔ mɔ. (Yn. 4:23, 24; 14:16, 17) Kanda ambanga azi mɛndɛ̃ ndo manda aprɔfesi ti ya Ngbangɔ na lo nɛ? Ambanga azi ndo manda ni na dangɔ bɛ ti gingɔ aye mɛ ndo fa ya, ta Ngbangɔ ndo tɛnɛ mbilimbili ma. Ala ndo da bɛ la ya, se ta Ngbangɔ lo ka tɛ Nzapa ma ko, ala nvɛ̃ni lengbi ti mungɔ ekateli ti lingɔ ye mɛ nzɔ̃ni bere ye mɛ siɔni. Kanda ta elengbi ti dungɔ nga ma ala ma, ayɔ ya e manda Ngbangɔ na dangɔ bɛ ti nzɔ̃ni. Hãngɔ ni zingɔ, dungɔ na aseliye ti nzɔ̃ni adu ye kɔi mɛ ngbondoni ti nɛngɔ ya, e gbɔ̃ nda aprɔfesi ti ya Ngbangɔ.

9. Seliye ti nzɔ̃ni mɛ elengbi ti dungɔ na ni ti nɛngɔ ya, e gbɔ̃ nda aprɔfesi ti ya Ngbangɔ nɛ? Kambisa.

⁹ Du na zungɔ na tɛrɛ. Yehova kokapa ti zangɔ azi mɛ na zungɔ na tɛrɛ. (Zaki 4:6) Se e ye gbɔ̃ngɔ nda aprɔfesi ti ya Ngbangɔ ko, ayɔ ya, e yɔ ka ti lo ya, lo za e. Se e du na zungɔ na tɛrɛ ko, e nga na yengɔ lisalisi tɛ mbɛ ti mbilimbili mɛ Yehova ndo salela ti hɛ̃ngɔ e atɛ ti nyingɔ na ngoi mɛ alengbi. (Luka 12:42) Ta Yehova du Nzapa ti mɔbulu ma, adu nzɔ̃ni ya, e landa lége kɔi mɛ lo kpã so zangɔ na e ya, e gbɔ̃ nda mbilimbili mɛ kaya Ngbangɔ.​—1 Kɔr. 14:33; Ef. 4:4-6.

10. Wangɔ mɛ mɔ lua na ndo se lɛlo tɛ Esther nɛ?

¹⁰ Ndo manda aye na seni. Pɔna prɔfesi mɛ bɛ mɔ ndo ye ni gba, wa li bolukiluki na ndoni. Ye mɛndó nyita wali Esther li la. Lo yendó hĩngangɔ kpale gba na ndo prɔfesi mɛ ndo tɛnɛ tɛnɛ ti gangɔ tɛ Masiya. Lo tɛnɛ ya,“Ngoi mɛndó mbi na bulu 15 ko, mbi bandandó gingɔ aye mɛ ndo fa ya, asundó prɔfesi niko uzu ti ngoi tɛ Yezo.” Ye mɛndó lo manda na omɛ aba rulo mɛ alua kaya Tɛ ti hĩngɔ alindó ya, lo ye tɛnɛ ni. Lo di tɛnɛ ya, “Asundó ambanga [arulo] ka popo ni uzu ti ngoi tɛ Kristo. Aprɔfesi mɛ ka da alengbindó ti longɔ bo ka tɛ Nzapa. Mbi dindó ni fãni gba ti nɛngɔ ya, mbi gbɔ̃ ndani.” Kanda lo na dengɔ bɛ na lo ti ge ge ge mɛndó lo li. Na pɛ mandangɔ na seni nvɛ̃ni aprɔfesi gba ti ya Ngbangɔ ko, lo tɛnɛ ya, “Mbi nvɛ̃ni mbi hũ yangondo ya, tɛnɛ mɛ Ngbangɔ ndo tɛnɛ adu mbilimbili!”

11. Nda mɛ adu nzɔ̃ni ya, e nvɛ̃ni e gi hĩngangɔ bere Ngbangɔ du mbilimbili nɛ?

¹¹ Ngoi mɛ e ndo hũ se mɛ aprɔfesi ti ya Ngbangɔ ndo ti na seni ko, e na kpãngɔ bɛ e na ndo Yehova fãni mɛndɛ̃ gba, wa e nga na yengɔ se mɛ lo ndo tambwisa na e. Hãngɔ ni zingɔ, aprɔfesi ti ya Ngbangɔ ndo za e ya, e du na bingangɔ li ti nzɔ̃ni na ndo bi mɛ na gangɔ, abɛse akpengba kpale mɛ e ndo tengbi na ni adu ti ngasia. Zia e ba aprɔfesi sɛ mɛ atɛnɛ tɛnɛ ni kaya Daniel mɛ ni ndo li tɛrɛ lo ndɛ. Se e gbɔ̃ nda aprɔfesi niko sɛ na seni ko, ni na zangɔ e ya, e mu ekateli na ndara.

12. Gɛrɛ “ngbilondo mɛ ali ni na nwa nga na kpondo” ndo fa nɛ? (Danyele 2:41-43)

¹² Di Danyele 2:41-43. Na ya suma kɔi mɛndó Daniel kambisa ndani ko, gbia Nebukadanezare hũndó ngbilondo kɔi mɛ ali gɛrɛ ni na  “nwa nga na kpondo.” Se e haka prɔfesi mɛ kaya Daniel na omɛ kaya Suma ko, elengbi ti hĩngangɔ mbala kɔi ya, ni ndo fa lo-lengɔ gbia ti Anglo-Américaine mɛ adu lo-lengɔ gbia ti ngunu ti ndo lɛ gigi zu ti ngoi tɛ e. Na omɛ aba lo-lengɔ gbia niko ko, Daniel tɛnɛndó ya, ni na dungɔ “kpengbani” nga “woni.” Nda mɛ ni du woni nɛ? Na lo mɛ ya, azi mɛ ka gbɛ lo-lengɔ gbia ni mɛ ala fa tãnga gɛrɛ ngbilondo niko mɛ ali ni na kpondo ko, ala ndo li aye mɛ ndo gbanzi lo-lengɔ gbia ni ya, ali kwa nga ma nwa ti kpengbani.” b

13. Mbilimbili ti ngbondoni mɛ elengbi ti gbɔ̃ngɔ ndani na mandangɔ aprɔfesi mɛ nɛ?

¹³ Se mɛ Daniel kambisa kpale mɛ aba ngbilondo nga na gɛrɛ ni, aza e ya, e hĩnga mbilimbili ti ngbondoni. Ti uzu, anglo-américaine mɛ adu lo-lengɔ gbia ti lɛ gigi zu afa na azi fãni gba ya, lo na ngunu. Na ndakisa, na ngoi ti to ti uzu ná ti sɛ ti ndo lɛ gigi zu ko, ala fandó ngunu tɛ la na ndenge mɛndó ala nwɔ ato ni. Kanda ta ala di dɛ na ngunu gba nga ma omɛndó ala na ni uzu ma, wa ngunu tɛ ala adɛ bo wɛ na lo ti zangangɔ mangbi mɛ ka popo tɛrɛ azi ti kɔdɔrɔ nga na azi ti guvɛrnɛma. Ti sɛ, lo-lengɔ gbia ti anglo-américaine na dungɔ lo-lengɔ gbia ti ndani na ngoi mɛ gbanda Lo-lengɔ Gbia tɛ Nzapa na gangɔ gbɛ̃ngɔ lo-lengɔ gbia tɛ azi ti gigi, ta lo-lengɔ gbia mɛndɛ̃ na gangɔ na pɛko lo ma. Abɛse du ya, akɔdɔrɔ mɛndɛ̃ ndo tiri to na lo ko, ta ala na mungɔ gbanda pɛnda lo ma. E hĩnga ni na lo mɛ ya, “tɛ̃nɛ” mɛ afa Lo-lengɔ Gbia tɛ Nzapa na kalangɔ gɛrɛ ngbilondo mɛ ndo fa lo-lengɔ gbia ti anglo-américaine.​—Da. 2:34, 35, 44, 45.

14. Nda mɛ gbɔ̃ngɔ nda prɔfesi ti gɛrɛ ngbilondo mɛ ali ni na nwa nga na kpondo alengbi ti zangɔ e ya, e mu ekateli ti ndara nɛ?

¹⁴ Mɔ ye na bɛ mɔ kɔi ya, prɔfesi tɛ Daniel mɛ atɛnɛ tɛnɛ ti gɛrɛ ngbilondo mɛ ali ni na nwa nga na kpondo, adu biani? Se mɔ ye ni ko, ni na zangɔ mɔ na se mɛ mɔ ndo tambwisa na dungɔ lɛ ngɛ̃́ tɛ mɔ. Ta mɔ na mungɔ ngoi tɛ mɔ ti nɛngɔ ya, mɔ gi luangɔ falanga ná aye ti mi gba ma na lo mɛ ya, mɔ hĩnga ya, angbã yakere gigi mɛ ti siɔni wɛ. (Luka 12:16-21; 1 Yn. 2:15-17) Gbɔ̃ngɔ nda aprɔfesi niko na zangɔ nga mɔ, mɔ hĩnga ya, kwa ti fangɔ tɛnɛ ná hangɔ ni adu ngbondoni. (Mat. 6:33; 28:18-20) Na pɛ mandangɔ aprɔfesi mɛ ko, hũnda tɛrɛ mɔ na ndo mɛ ‘Ekateli mɛ mbi ndo mu, ando fa ya mbi ndo ye ya, Lo-lengɔ Gbia tɛ Nzapa na gbɛ̃ngɔ lo-lengɔ gbia tɛ azi?’

15. Gbia ti “nɔrdi” ná ti “sudi” ndɛ la ana? (Danyele 11:40)

¹⁵ Di Danyele 11:40. Daniel shapitrɛ ti 11 atɛnɛ tɛnɛ tɛ agbia ti politikɛ sɛ mɛ na ngunu gba, kanda ta ala na mangbi ka popo tɛ la ma. Hakangɔ prɔfesi mɛ na aprɔfesi mɛndɛ̃ ti ya Ngbangɔ aza e, e hĩnga ya, ndɛ lo mɛ ko “gbia ti nɔrdi” adu Russie ná azi tɛ lo, wa “gbia ti sudi” adu anglo-américaine mɛ adu lo-lengɔ gbia mɛ na ngunu na ndo lɛ gigi zu. c

16. Akpengba kpale mɛ awa kwa tɛ Yehova mɛ ndo du ka gbɛ lo-lengɔ gbia tɛ “gbia ti nɔrdi” ndo tengbi na ni ndɛ nɛ?

¹⁶ Awa kwa tɛ Nzapa mɛ ndo du ka ndo mɛ “gbia ti nɔrdi” ndo le na gbia tɛ lo ko, ala ndo tengbi na botemɛli mɛ kpengbani. Ando hɛ̃ ambanga Atɛmwɛ̃ tɛ Yehova pɛnɔ, wa abi nga ambageni ka bɔlɔkɔ na lo ti loyengɔ tɛ la. Na se lɛ lingɔ ya, ala nzɛ̃ ko, botemeli mɛ ndo lo ka tɛ “gbia ti nɔrdi” ndo li ya, loyengɔ tɛ la ati kpengbani. Na lo nɛ? Botemeli niko ndo li ya, aprɔfesi mɛ aba azi tɛ Nzapa mɛ atɛnɛ tɛnɛ ni  kaya mbeti ti Daniel ati na seni. d (Da. 11:41) Hĩngangɔ ni alengbi ti zangɔ e ya, e bata nzɔ̃ dangɔ bɛ tɛ e, wa e ngbã nga mbilimbili na mbage tɛ Yehova.

17. Kpengba kpale mɛ awa kwa tɛ Yehova mɛ ndo du ka gbɛ lo-lenngɔ Gbia tɛ gbia ti sudi ndo tengbindó na ni nɛ?

¹⁷ Na ngoi ti gã, “gbia ti sudi” ahɛ̃ ngandó awa kwa tɛ Yehova pɛnɔ. Na ndakisa, na ya siɛklɛ ti 20, asandó ayata gba ka da bɔlɔkɔ, wa afala ngandó ayangambi mɛ adu Atɛmwɛ̃ tɛ Yehova ka kalasi na lo mɛ ya, ala kɛ̃ndó yɔrɔngɔ tɛrɛ la na ya kpale ti politikɛ. Kanda na ya bulu mɛ aɔ ko, mbilimbili tɛ Atɛmwɛ̃ tɛ Yehova mɛndo du kaya lo-lengɔ gbia ti sudi atengbi mbalasi na tara na ndenge mɛndɛ̃. Na ndakisa, na ngoi ti kapanyɛ ti pɔnangɔ zo mɛ na tingɔ gbia ti kɔdɔrɔ ko, wa kristo kɔi lengbi ti tengbingɔ na tara, lo lengbi ti tingɔ na gwɛ̃ ti hɛ̃ngɔ ti kaya parti kɔi ti politikɛ, bere pɔnangɔ zo kɔi mɛ aye tingɔ gbia nga na kɛ̃ngɔ omɛndɛ̃. Ngoi mɛndɛ̃, ta lo na gwengɔ tee na lingɔ vɔtɛ ma, kanda kaya bingangɔ li tɛ lo bere kaya bɛ lo ko,  ta lo ndo hɛ̃ ti lo hɛ̃ parti kɔi ma? Adu ngbondoni ya, ta e yɔrɔ tɛrɛ e na ya kpale ti politikɛ ma, ta bo na ya kwa ma, kanda nga na ya bingangɔ li ná se mɛ e do ma na tɛrɛ e!​—Yn. 15:18, 19; 18:36.

18. Ye mɛ kɛ̃ngbingɔ mɛ na popo tɛ “gbia ti nɔrdi” nga na gbia ti sudi ndo si na ni na ndo e nɛ? (Ba nga limɔ.)

¹⁸ Azi ko la ta la na loyengɔ na ndo aprɔfesi ti ya Ngbangɔ ma ko, ala lengbi ti dungɔ na sɔngɔ bɛ ti kpengbani na ngoi mɛ ala ndo hũ “gbia ti sudi ‘ndo tiri to’ na “gbia ti nɔrdi.” (Da. 11:40) Agbia niko zu sɛ na abɔmbe mɛ alengbi ti gbɛ̃ngɔ dungɔ lɛ ngɛ̃́ tɛ azi ge lɛ sese. Kanda e hĩnga ya, ta Yehova na ziangɔ ya kpale niko li tɛrɛ lo ma. (Yis. 45:18) Ni la, ta zangangɔ mangbi mɛ ka popo tɛ “gbia ti nɔrdi” na ti “sudi” ando hɛ̃ e mbɛtɔ ma, kutu ni ndo li ya, loyengɔ tɛ e ati kpengbani. Ni du ye mɛ ndo fa ya, nda gigi olo adɛ dã.

19. Se ta e hĩnga se mɛ prɔfesi kɔi ti ya Ngbangɔ na tingɔ na seni ma, ye mɛ ta bɛ elengbi ti lingɔ na ni ma nɛ?

¹⁹ Ta e hĩnga se mɛ gbanda ambanga prɔfesi ti ya Ngbangɔ na tingɔ na seni ma. Abɛse profeta Daniel nvɛ̃ni ko, ta lo hĩngandó nda akpale zu mɛndó lo su ma. (Da. 12:8, 9) Kanda, se du ya ta e hĩnga se mɛ prɔfesi kɔi na tingɔ na seni ma ko, afa ya, ta ni na tingɔ na seni ma? Ta seni la ma, ta tingɔ ti prɔfesi na seni aba hĩngangɔ ndo tɛ e ma. Elengbi ti yengɔ na bɛ e kɔi ya, na ngoi mɛ alengbi, Yehova na zangɔ e ya, e hĩnga aye mɛ ngbondoni na ndo aprɔfesi niko nga ma se mɛndó lo li ni na ngoi ti gã.​—Am. 3:7.

20. Prɔfesi ti ya Ngbangɔ mɛ angbã yakere ati na seni nɛ, wa ye mɛ ayɔ ya, e ngbã lá kwɛ lingɔ nɛ?

²⁰ Agbia na pangɔ ya ‘siriri ta ye ti kpɛngɔ da ma.’ (1 Tɛs. 5:3) Na pɛni agbia ti politikɛ ti lɛ gigi mɛ na gbɛ̃ngɔ sambela ti nvɛ̃nɛ. (Suma 17:16, 17) Na gesi, ala nga na bingɔ to tɛrɛ awa kwa tɛ Yehova. (Ezk. 38:18, 19) Ni na lingɔ ya, to ti Armagedona abanda. (Suma 16:14, 16) Elengbi ti yengɔ na bɛ kɔi ya, angbã yakere kpale niko ali tɛrɛ lo. Uzu ti nɛngɔ ya, kpale niko ali tɛrɛ lo ko, e ngbã lá kwɛ kpãngɔ bɛ e na ndo To e ti ndozu mɛ wa songo, kpãngɔ lɛ e na ndo aprɔfesi ti ya Ngbangɔ, nga na zangɔ azi mɛndɛ̃ ya, ala li nga ngaso.