1. Nitwehurira tuta twayega aha bunabi bwa Baibuli?

 “NINKUNDA kwega aha bunabi bwa Baibuli,” nikwo ow’eishe-emwe muto orikwetwa Ben arikugira. Naiwe nikwo orikwehurira otyo? Nari noogumirwa kwetegyereza obunabi bwa Baibuli? Noobaasa kuba otarikukunda kwega aha bunabi bwa Baibuli. Kwonka, emiteekateekyere yaawe neebaasa kuhinduka waayongyera kumanya ahabw’enki Yehova yaabuhandiikiise omu Kigambo kye.

2. Nituza kugamba ahari ki omu kicweka eki?

² Ekicweka eki nikiza kworeka ahabw’enki twine kwega aha bunabi bwa Baibuli n’oku turikubaasa kubwegaho. Nituza n’okureeba oku turikugasirwa hati twayetegyereza obunabi bubiri oburi omu kitabo kya Danieli.

3. Twine kukora ki kubaasa kwetegyereza obunabi bwa Baibuli?

³ Twine kushaba obuhwezi kubaasa kwetegyereza obunabi bwa Baibuli. Teekateeka aha ky’okureeberaho eki. Ka tugire ngu waaza kutaayaaya omu mwanya ogu otarikumanya gye, kwonka munywani waawe owaagyenda naiwe naamanya gye omwanya ogwo. Naamanya ei murikuza n’ahu buri muhanda gworekyereire. Hatariho kubangaanisa noobaasa kushemererwa ahabw’okugyenda na munywani waawe ogwo! Nikyo kimwe, Yehova naamanya obwire obu turimu n’embeera ezi tworekyereire omu biro by’omu maisho. N’ahabw’ekyo kubaasa kwetegyereza obunabi bwa Baibuli, twine kuba abacureezi tukashaba Yehova kutuhwera.—Dan. 2:28; 2 Pet. 1:19, 20.

4. Ahabw’enki Yehova yaahandiikiise obunabi omu Kigambo kye? (Yeremia 29:11)

⁴ Yehova ari nk’omuzaire murungi, naayenda ngu abaana be bagire nyentsya nungi. (Shoma Yeremia 29:11.) Kwonka okutashushana n’abazaire baitu, Yehova naagamba ebiraabeho  omu biro by’omumaisho kandi bihikiirira omu bwijwire. Akahandiikisa obunabi omu Kigambo kye kugira ngu tumanye ebintu bitari bimwe bitakabaireho. (Isa. 46:10) N’ahabw’ekyo obunabi bwa Baibuli n’ekiconco kuruga ahari Tataitwe ow’omu iguru. Kwonka shi noobaasa kuhamya ota ngu buzima obunabi bwa Baibuli nibwija kuhikiirira?

5. Abato nibabaasa kwegyera ki ahari Max?

⁵ Aha ishomero, abato nibakira kuba beetooroirwe abantu abarikuhakanisa Baibuli kandi abatarikugiha ekitiinisa. Ebi barikugamba n’ebi barikukora nibibaasa kureetera abato kubangaanisa. Yetegyereze ekyahikire aha w’eishe-emwe orikwetwa Max. Naagira ati: “Obu naabaire ndi omushogoyo, nkatandika kubangaanisa yaaba abazaire bangye baabaire nibanyegyesa ediini ey’amazima na yaaba Ruhanga niwe yaahandiikiise Baibuli.” Abazaire be bakakora ki? Naagira ati: “Bakaguma baikaikaine n’obu naabaire nindeeba ngu beerarikiriire.” Abazaire ba Max bakagarukamu ebibuuzo bye barikukoresa Baibuli. Max nawe haine eki yaakozire. Naagira ati: “Nkeeyegyesa obunabi bwa Baibuli kandi naagambira ab’orwingano rwangye ebi naayegire.” Hakarugamu ki? Max naagira ati: “Nkahamiza kimwe ngu Ruhanga niwe yaahandiikiise Baibuli!”

6. Oine kukora ki waaba noobangaanisa, kandi ahabw’enki?

⁶ Nka Max, noobaasa kutandika kubangaanisa yaaba ebi Baibuli erikwegyesa bihikire, ekyo kyabaho oteehurira kubi. Kwonka haine eki oine kukora. Okubangaanisa kuri nk’omukyeerenyo. Waagwehuzya nigubaasa kushiisha ekintu ky’omuhendo. Kubaasa kusingura okubangaanisa okurikubaasa kushiisha okwikiriza kwawe, nooba oine kwebuuza oti: ‘Niinyikiriza eki Baibuli erikugamba aha biro by’omumaisho?’ Waaba noobangaanisa, nooba oine kwega aha obunabi bwa Baibuli obwaherize kuhikiirira. Ekyo noobaasa kukikora ota?

7. Danieli akataho ky’okureeberaho ki aha kwega obunabi? (Danieli 12:10)

⁷ Danieli akatuteeraho eky’okureeberaho kirungi aha kwega obunabi. Akeega obunabi aine ekigyendererwa kirungi, eky’okumanya amazima. Kandi Danieli akaba ari omucureezi, arikumanya ngu Yehova naahwera abarikumumanya kandi bakagyendera aha mitindo ye eshemeire. (Dan. 2:27, 28; shoma Danieli 12:10.) Akooreka ngu n’omucureezi arikwesiga Yehova kumuhwera. (Dan. 2:18) Danieli akaba naateeraho kwetegyereza gye obunabi. Akaba naashwijuma Ebyahandiikirwe ebyabaire biriho omu bwire obwo. (Yer. 25:11, 12; Dan. 9:2) Noobaasa kutooreza ota Danieli?

8. Ahabw’enki abamwe nibeega obunabi bwa Baibuli, kwonka itwe twine kukora ki?

⁸ Shwijuma ebigyendererwa byawe by’okwega obunabi. Mbwenu shi nooyega aha bunabi oine ekigyendererwa ky’okumanya amazima? Kyaba nikwo kiri, Yehova naaza kukuhwera. (Yoh. 4:23, 24; 14:16, 17) Bamwe nibeega obunabi ahabw’enshonga ezindi. Nibabaasa kukora ekyo barikwenda kutunga obuhame  ngu Ruhanga tiwe yaahandiikiise Baibuli. Omu muringo ogwo, nibaba nibenda kushagika emitindo yaabo erikukwata aha kihikire n’ekigwire kandi bagigyendereho. Kwonka, twine kwega n’ekigyendererwa kirungi. Hariho omutwarize mukuru ogundi ogu twine kugira kubaasa kwetegyereza obunabi bwa Baibuli.

9. Ni mutwarize ki ogurikwetengyesa kubaasa kwetegyereza obunabi? Shoboorora.

⁹ Ba omucureezi. Yehova naaraganisa kuhwera abacureezi. (Yak. 4:6) N’ahabw’ekyo twine kumushaba kutuhwera kwetegyereza obunabi bwa Baibuli. Kandi, twine kwikiriza omuringo ogu Yehova arikukoresa kutuha eby’okurya by’omwoyo omu bunaku obuhikire. (Luk. 12:42) Yehova ni Ruhanga w’obuteeka, n’ahabw’ekyo nikyetegyerezibwa yaakoresa omuhanda gumwe kutuhwera kwetegyereza amazima agari omu Kigambo kye.—1 Kor. 14:33; Efe. 4:4-6.

10. Nitwegyera ki ahari Esther?

¹⁰ Yetegyereze gye obunabi. Tandika orikwega aha bunabi oburikukushemeza kandi obucondoozeho. Ekyo nikyo munyaanyazi-itwe orikwetwa Esther yaakozire. Akaba naayenda kwetegyereza gye obunabi oburikukwata aha kwija kwa Mesia. Naagira ati: “Obu naabaire nyine emyaka 15, nkatandika kusherura obuhame oburikworeka ngu obunabi obwo bukahandiikwa Yesu atakazairwe.” Ebi yaayegire arikushoma aha muzingo gwa Dead Sea bikamuhamiza. Naagira ati: “Bimwe aharibyo bikahandiikwa Yesu atakazairwe, n’ahabw’ekyo obunabi oburimu bwine kuba bwabaire niburuga ahari Ruhanga.” Naayongyeraho ati: “Nkaba nyine kubishoma emirundi mingi kubaasa kubyetegyereza.” Kandi ashemereirwe ahabw’okuteeraho kwetungira obuhame. Bwanyima y’okwetegyereza gye obunabi bwa Baibuli bwingi, naagira ati: “Nkaba nimbaasa kwereebera butunu ngu Baibuli ehikire.”

11. Nitugasirwa tuta twayetungira obuhame ngu Baibuli ehikire?

¹¹ Ku turikureeba oku bumwe aha bunabi bw’omu Kigambo kya Ruhanga buhikiriire, nitwongyera kwesigira kimwe Yehova n’omuringo ogu arikukoresa kutuhabura. Ekindi, obunabi bwa Baibuli nibutuhwera kuguma twine amatsiko aha biro by’omumaisho na twahikwaho okugyezibwa. Ka tugambe omu bugufu aha bunabi bubiri obu Danieli yaahandiikire oburiyo nibuhikiirira hati. Twayetegyereza obunabi obu nikibaasa kutuhwera kucwamu omu muringo gw’obwengye.

12. Ebigyere ‘by’ekyoma ekijwangire n’eibumba’ nibijwekyera ki? (Danieli 2:41-43)

¹² Shoma Danieli 2:41-43. Omu Kirooto eki Danieli yaashobororoire Omugabe Nebukadeneeza, ebigyere by’ekishushani eki omugabe yaareebire bikaba biri ‘eby’ekyoma kijwangire n’eibumba.’ Waagyeragyeranisa obunabi obu n’obunabi obundi oburi omu kitabo kya Danieli n’Okushuuruurwa, nituhamiza kimwe ngu ebigyere nibijwekyera obutegyeki kirimaani obw’amakwatane obwa Bungyereza  n’Amerika oburiho hati. Aha bikwatiraine n’obutegyeki obwo, Danieli akagira ati: ‘Nikwo n’obwo bugabe burikwija kuba, ekicweka kyabwo nikiija kuba kigumire, n’ekindi kibe ekirikwatwa busha.’ Ahabw’enki ekicweka kyabwo kyabaire nikiija kuba ekirikwatwa busha? N’ahabw’okugira ngu gavumenti eziri ahansi y’obutegyeki obwo tizirikwija ‘kuguma hamwe’ zirikukwatanisa. b

13. Ni mazima ki makuru agu turikwega omu bunabi obu?

¹³ Kurugiirira aha ku Danieli yaashobooroire ekirooto ky’ekishushani na munonga ebigyere byakyo, nitukyegyeraho amazima makuru. Ag’okubanza, obutegyeki kirimaani obwa Bungyereza n’Amerika bworekire ngu bwine amaani omu miringo etari emwe. Nk’eky’okureeberaho, bukakora kihango omu kusingura Orutaro rw’Ensi Yoona I n’orwa II. Kwonka, obutegyeki kirimaani buhwaire amaani kandi nibugumizamu kucweka busha ahabw’emihondano y’abatuuzi baayo. Aga kabiri, obutegyeki obwo kirimaani obw’amakwatane nibwo buraabe nibukitegyeka Obukama bwa Ruhanga ku buraije kwihaho obutegyeki bw’abantu. N’obu amahanga agamwe garikubaasa kuhakanisa obutegyeki kirimaani obwa Bungyereza na Amerika, tiburikwija kuza omu mwanya gwabwo. Ekyo nitukimanya ahabw’okuba “eibaare” eririkujwekyera Obukama bwa Ruhanga niriija kwatagura ebigyere by’ekyo kishushani, ebirikujwekyera Bungyereza na Amerika.—Dan. 2:34, 35, 44, 45.

14. Okwetegyereza obunabi oburikukwata aha bigyere by’eibumba n’ekyoma nikituhwera kita kucwamu gye?

¹⁴ Noohamiza kimwe ngu obunabi bwa Danieli oburikukwata aha bigyere by’ekyoma n’eibumba buhikire? Kyaba nikwo kiri, nikiija kukuhiga kushwijuma oku orikutwaza. Torikwija kuta omutima aha kugira ebintu bingi omu nsi egi eri haihi kucwekyerezibwa. (Luk. 12:16-21; 1 Yoh. 2:15-17) Kandi okwetegyereza obunabi obwo nikiija kukuhwera kumanya obukuru bw’omurimo gw’okubuurira n’okwegyesa. (Mat. 6:33; 28:18-20) Bwanyima y’okwega obunabi obwo, ahabw’enki otarikwebuuza ekibuuzo eki, ‘Ebi ndikucwamu nibyoreka ngu nimpamiza kimwe ngu Obukama bwa Ruhanga buri haihi kucwekyereza gavumenti z’abantu zoona?’

15. ‘Omugabe wa bukiizi-bwa-bumosho’ ‘n’owa bukiizi-bwa-buryo’ ni baahi obunaku obu? (Danieli 11:40)

¹⁵ Shoma Danieli 11:40. Danieli eshuura 11 neegamba aha bagabe babiri, nari obutegyeki kirimaani, oburikuhayahayana. Ku turikugyeragyeranisa obunabi obu n’obundi oburi omu Baibuli, nitumanya ngu ‘omugabe wa bukiizi-bwa-bumosho’ ni Russia n’abashagiki baayo kandi ‘omugabe wa bukiizi-bwa-buryo’ n’obutegyeki kirimaani obwa Bungyereza na Amerika. c

16. ‘Omugabe wa bukiizi-bwa-bumosho’ naatwariza ata abarikutuura omu bicweka ebi arikutegyeka?

¹⁶ Abaheereza ba Yehova abarikutuura omu bicweka ebirikutegyekwa ‘omugabe wa bukiizi-bwa-bumosho’ nibagumisiriza okuhiiganisibwa kw’omugabe ogwo. Bamwe aha Bajurizi ba Yehova nibabateera kandi babata omu kihome ahabw’okwikiriza kwabo. Ebikorwa ‘by’omugabe wa bukiizi-bwa-bumosho’, nibihamya okwikiriza kw’ab’eishe-emwe bagyenzi baitu omu mwanya gw’okubareetera kutiina. Ahabw’enki? Ahakuba ab’eishe-emwe nibamanya ngu okuhiiganisa abaheereza ba Ruhanga nikihikiiriza obunabi oburi omu kitabo kya  Danieli. d (Dan. 11:41) Okumanya ekyo nikibaasa kutuhwera kuhamya amatsiko gaitu n’okwongyera kuhamira ahari Yehova.

17. ‘Omugabe wa bukiizi-bwa-buryo’ naatwariza ata abarikutuura omu bicweka ebi arikutegyeka?

¹⁷ ‘Omugabe wa bukiizi-bwa-buryo’ nawe akahiiganisa abaheereza ba Yehova butunu. Nk’eky’okureeberaho, omu Rutaro rw’Ensi Yoona I n’orwa II, ab’eishe-emwe baingi bakateebwa omu bihome ahabw’okutejwanzya omu by’obutegyeki kandi abaana b’Abajurizi ba Yehova bakabingwa omu ishomero ahabw’enshonga niyo emwe. Omu myaka ehwaire, abaheereza ba Yehova abarikutuura omu bicweka ebi omugabe ogwo arikutegyeka bagyeziibwe omu miringo etarikureebwa butunu kutahamira aha Bukama bwa Ruhanga. Nk’eky’okureeberaho, omu bwire bw’oburuuru, Omukristaayo naabaasa kugyezibwa kushagika ekibiina ky’obutegyeki nari omwe aha beetsimbireho. Naabaasa kutateera akaruuru,  kwonka omu biteekateeko bye n’omu mutima, naaba aine ou arikushagika. Ni kikuru kwetantara kugwera orubaju omu by’obutegyeki omu bikorwa, omu biteekateeko, n’omu nyehurira.—Yoh. 15:18, 19; 18:36.

18. Nitutwaza tuta ‘omugabe wa bukiizi-bwa-bumosho’ yaaba naaharangatana n’omuzigu we?

¹⁸ Abatarikwikiririza omu bunabi bwa Baibuli nibabaasa kwerarikirira munonga bareeba ‘omugabe wa bukiizi-bwa-buryo’ arikutsindikana ‘n’omugabe wa bukiizi-bwa-bumosho.’ (Dan. 11:40.) Abagabe bombi baine eby’okurwanisa by’amaani ebirikubaasa kucwekyereza byona ebiine amagara omu nsi. Kwonka nitumanya ngu Yehova taraikirize ekyo kubaho. (Isa. 45:18) N’ahabw’ekyo titwine kutiina, emihondano eri aha gati ‘y’omugabe wa bukiizi-bwa-bumosho’ ‘n’omugabe wa bukiizi-bwa-buryo’ eshemereire kuhamya okwikiriza kwaitu. Neetuhamiza ngu entebeekanisa y’ensi egi eri haihi kuhendera.

19. Twine kwetegyereza ki aha bunabi bwa Baibuli?

¹⁹ Titurikumanya oku obunabi bumwe bwa Baibuli buraahikiirire. Nabi Danieli nawe akaba atarikwetegyereza amakuru ga buri kimwe eki yaahandiikire. (Dan. 12:8, 9) Kwonka ahabw’okugira ngu titurikumanya gye oku obunabi buraahikiirire tikirikumanyisa ngu tiburaije kuhikiirira. Hatariho kubangaanisa, twine obwesigye ngu Yehova naija kutushuuruurira ebi twine kumanya omu bwire obuhikire, nk’oku yaakikozire ira.—Amo. 3:7.

20. Ni bunabi ki oburikushemeza oburi haihi kuhikiirira kandi twine kugumizamu nitukora ki?

²⁰ Nihaija kubaho okurangirira ngu “n’obusingye tihariho kabi.” (1 Tes. 5:3) Reero obutegyeki kirimaani nibwija kwehindukana ediini z’ebishuba buzicwekyereze. (Kush. 17:16, 17) Bwanyima nibwija kutaahirira abaheereza ba Ruhanga. (Ezk. 38:18, 19) Egyo niyo eraabe entandikiro y’orutaro rw’aha muheru orwa Haramagedoni. (Kush. 16:14, 16) Twine obwesigye ngu ebi byona biri haihi kubaho. Ekyo kitakabaireho, ka tugumizemu nitworeka ngu nitusiima Tataitwe ow’omu iguru owa rukundo turikwega obunabi bwa Baibuli kandi tuhwere n’abandi kukora nikyo kimwe.