1.‏ کیہڑی گل بارے جان کے سانوں بائبل دِیاں پیشین‌گوئیاں دا مطالعیا کرن چ مزہ آوے گا؟‏

 اِک جوان بھرا جدا ناں بین اے، اوہنے کہیا:‏ ”‏مینوں بائبل دِیاں پیشین‌گوئیاں دا مطالعیا کرنا بڑا چنگا لگدا اے۔“‏ کیہہ تُسی وی اِنج ای محسوس کردے او؟ یاں توانوں اِنج لگدا اے کہ تُسی ایہناں پیشین‌گوئیاں نُوں کدی نئیں سمجھ سکو گے؟ ہو سکدا اے کہ ایہناں پیشین‌گوئیاں دا مطالعیا کردے ویلے تُسی بور ہووو۔ پر جدوں تُسی ایس بارے ہور جانو گے کہ یہوواہ نے ایہناں نُوں اپنے کلام چ کیوں لکھوایا تے شاید توانوں وی ایہناں دا مطالعیا کرن چ مزہ آن لگ پووے۔‏

2.‏ ایس مضمون چ اَسی کیس بارے گل کراں گے؟‏

² ایس مضمون چ اَسی نہ صرف ایس بارے گل کراں گے کہ سانوں بائبل دِیاں پیشین‌گوئیاں دا مطالعیا کیوں کرنا چاہی دا اے سگوں ایہہ وی ویکھاں گے کہ اَسی اِنج کیویں کر سکنے آں۔ فیر اَسی دانی‌ایل دی کتاب چوں دو پیشین‌گوئیاں تے غور کراں گے تے ویکھاں گے کہ ایہناں نُوں چنگی طرحاں سمجھن نال سانوں ہُن کیہہ فائدہ ہوندا اے۔‏

3.‏ بائبل دِیاں پیشین‌گوئیاں نُوں سمجھن لئی سانوں کیہہ کرنا چاہی دا اے؟‏

³ بائبل دِیاں پیشین‌گوئیاں نُوں سمجھن لئی سانوں مدد دی لوڑ اے۔ ذرا ایس مثال تے غور کرو۔ فرض کرو کہ تُسی کسے ایہو جہی جگہ تے جا رہے او جدے بارے توانوں کجھ نئیں پتہ۔ پر تواڈا دوست اوس جگہ بارے چنگی طرحاں جان‌دا اے۔ اوہنوں پتہ اے کہ حالے اَسی کتھے آں تے کیہڑا رستہ کتھے جاندا اے۔ یقیناً توانوں بڑی خوشی ہوئے گی کہ تواڈا اوہ دوست تواڈے نال اے۔ یہوواہ وی اِک ایہو جہے دوست وانگوں اے۔ اوہ جان‌دا اے کہ اَسی وقت دے کیہڑے حصے چ آں تے زندگی دے سفر چ اَگے کیہہ کجھ ہون والا اے۔ ایس لئی بائبل دِیاں پیشین‌گوئیاں نُوں سمجھن لئی سانوں خاکساری نال یہوواہ کولوں مدد منگنی چاہی دی اے۔—‏دانی‌ایل 2:‏28؛‏ 2-‏پطرس 1:‏19، 20‏۔‏

4.‏ یہوواہ نے اپنے کلام چ پیشین‌گوئیاں کیوں لکھوائیاں؟ (‏یرمیاہ 29:‏11‏)‏ (‏تصویر نُوں وی ویکھو۔)‏

⁴ ماں پیو دی ایہہ خواہش ہوندی اے کہ اوہناں دے بچیاں دا مستقبل چنگا ہوئے تے یہوواہ وی ایہی چاہندا اے کہ اوہدے بچیاں دا مستقبل خوشیاں نال بھریا ہووے۔ ‏(‏یرمیاہ 29:‏11 نُوں پڑھو۔)‏  ماں پیو تے ایہہ نئیں دَس سکدے کہ مستقبل چ کیہہ ہوئے گا پر یہوواہ ایہہ دَس سکدا اے تے اوہدیاں دَسیاں ہوئیاں گلاں بالکل صحی ہوندیاں نیں۔ اوہنے اپنے کلام چ پیشین‌گوئیاں ایس لئی لکھوائیاں تاکہ سانوں پہلاں توں ای پتہ ہووے کہ مستقبل چ کیہہ ہون والا اے۔ (‏یسعیاہ 46:‏10‏)‏ بائبل دِیاں پیشین‌گوئیاں ساڈے اسمانی باپ وَلّوں نعمت نیں۔ پر تُسی ایس گل تے یقین کیویں رکھ سکدے او کہ ایہہ پیشین‌گوئیاں ضرور پوریاں ہون گیاں؟‏

5.‏ نوجوان میکس دے تجربے توں کیہہ سکھ سکدے نیں؟‏

⁵ سکول چ نوجواناں دے آلے دوالے ایہو جہے لوک ہوندے نیں جیہڑے بائبل دا بس تھوڑا بوہت احترام کردے نیں یاں فیر بالکل وی نئیں کردے۔ کدی کدار اوہناں دِیاں گلاں تے کماں دی وجہ توں شاید کسے نوجوان یہوواہ دے گواہ دے دل چ اپنے عقیدیاں بارے شک پیدا ہون لگ پووے۔ ذرا غور کرو کہ بھرا میکس نال کیہہ ہویا۔ اوہنے کہیا:‏ ”‏جدوں مَیں نوجوان ساں تے مینوں ایس گل تے شک ہون لگ پیا کہ میرے امی‌ابو مینوں جیہڑے مذہب دی تلیم دے رہے نیں، کیہہ اوہ واقعی سچا اے تے کیہہ بائبل واقعی خدا وَلّوں اے۔“‏ اوہدے امی‌ابو نے کیہہ کیتا؟ بھرا نے دَسیا:‏ ”‏مینوں پتہ سی کہ اوہ میرے لئی فکرمند نیں۔ پر فیر وی اوہ غصے چ نئیں آئے سگوں ٹھنڈے رہے۔“‏ بھرا میکس دے امی ابو نے اوہدے سوالاں دا جواب بائبل چوں دِتا۔ پر اوہنے آپ وی کجھ کیتا۔ اوہنے کہیا:‏ ”‏مَیں آپ بائبل چ لکھیاں پیشین‌گوئیاں دا مطالعیا کیتا۔ اِنج کرن نال مَیں جو کجھ سکھیا، اوہ دُوجے نوجواناں نُوں وی دَسیا۔“‏ ایہدا اوہنوں کیہہ فائدہ ہویا؟ بھرا میکس نے دَسیا:‏ ”‏اِنج مینوں یقین ہو گیا کہ بائبل واقعی خدا وَلّوں اے۔“‏

6.‏ جے تواڈے دل چ اپنے عقیدیاں بارے شک پیدا ہو رہیا اے تے توانوں کیہہ کرنا چاہی دا اے؟‏

⁶ بھرا میکس وانگوں جے تواڈے دل چ وی ایہہ شک پیدا ہو رہیا اے کہ کیہہ بائبل چ لکھیاں گلاں سچیاں نیں تے توانوں شرمندہ نئیں ہونا چاہی دا۔ پر توانوں چھیتی ای کجھ کرن دی لوڑ اے۔ شک زنگ وانگوں ہوندا اے۔ جے اَسی ایہنوں ہٹان لئی کجھ نئیں کردے تے ایہہ چیزاں نُوں ہولی ہولی خراب کر دیندا اے۔ اپنے ایمان تے لگے زنگ نُوں ہٹان لئی اپنے آپ کولوں پچھو:‏ ”‏بائبل چ مستقبل بارے جو کجھ وی دَسیا گیا اے، کیہہ مینوں یقین اے کہ اوہ پورا ہوئے گا؟“‏ جے توانوں ایس طرحاں محسوس نئیں ہوندا تے بائبل دِیاں اوہناں پیشین‌گوئیاں دا مطالعیا کرو جیہڑیاں پوریاں ہو چکیاں نیں۔ تُسی اِنج کیویں کر سکدے او؟‏

7.‏ دانی‌ایل نے پیشین‌گوئیاں دا مطالعیا کرن دے حوالے نال کیہو جہی مثال قائم کیتی؟ (‏دانی‌ایل 12:‏10‏)‏ (‏تصویر نُوں وی ویکھو۔)‏

⁷ دانی‌ایل نے پیشین‌گوئیاں دا مطالعیا کرن دے حوالے نال بڑی چنگی مثال قائم کیتی۔ اوہنے صحی مقصد نال پیشین‌گوئیاں دا مطالعیا کیتا تے اوہدا مقصد ایہہ سی کہ اوہ سچائی جانے۔ دانی‌ایل بوہت خاکسار وی سی کیونکہ اوہ ایہہ گل سمجھدا سی کہ جے اوہ یہوواہ دے نیڑے رہوے گا تے اوہدے پاک معیاراں دے مطابق چلے گا تے یہوواہ پیشین‌گوئیاں نُوں سمجھن چ اوہدی مدد کرے گا۔ (‏دانی‌ایل 2:‏27، 28؛‏ دانی‌ایل 12:‏10 نُوں پڑھو۔)‏ اوہنے پیشین‌گوئیاں نُوں سمجھن لئی یہوواہ تے بھروسا کر کے ثابت کیتا کہ اوہ خاکسار سی۔ (‏دانی‌ایل 2:‏18‏)‏ ایہدے علاوہ، دانی‌ایل پیشین‌گوئیاں دا گہرائی نال مطالعیا کردا سی۔ اوہدے کول اوس ویلے پاک کلام دے جیہڑے حصے موجود سن، اوہنے اوہناں تے تحقیق کیتی۔ (‏یرمیاہ 25:‏11، 12؛‏ دانی‌ایل 9:‏2‏)‏ تُسی دانی‌ایل دی مثال تے کیویں عمل کر سکدے او؟‏

8.‏ کجھ لوک ایہہ کیوں نئیں من‌دے کہ بائبل دِیاں پیشین‌گوئیاں پوریاں ہون گیاں پر سانوں کیہہ کرنا چاہی دا اے؟‏

⁸ اپنے مقصد دا جائزہ لوو۔‏ کیہہ تُسی بائبل دِیاں پیشین‌گوئیاں دا  مطالعیا ایس لئی کردے او کیونکہ تُسی سچائی جاننا چاہندے او؟ جے ایہہ گل اے تے یہوواہ تواڈی مدد ضرور کرے گا۔ (‏یوحنا 4:‏23، 24؛‏ 14:‏16، 17‏)‏ پر کجھ لوک بائبل دِیاں پیشین‌گوئیاں دا مطالعیا کیوں کردے نیں؟ شاید اوہ ایس گل دے ثبوت لبھنا چاہندے نیں کہ بائبل خدا دا کلام نئیں اے۔ اوہناں نُوں لگدا اے کہ جے اوہناں نُوں ایہو جہےکجھ ثبوت لبھ جان گے تے اوہ صحی تے غلط بارے اپنے معیاراں مطابق زندگی گزار سکن گے۔ پر سانوں بائبل دِیاں پیشین‌گوئیاں دا مطالعیا صحی مقصد نال کرنا چاہی دا اے۔ ایہدے علاوہ، بائبل دِیاں پیشین‌گوئیاں نُوں سمجھن لئی اِک خاص خوبی دا ہونا وی ضروری اے۔‏

9.‏ بائبل دِیاں پیشین‌گوئیاں نُوں سمجھن لئی کیہڑی خوبی دا ہونا ضروری اے؟ وضاحت کرو۔‏

⁹ خاکسار ہووو۔‏ یہوواہ نے وعدہ کیتا اے کہ اوہ خاکسار لوکاں دی مدد کرے گا۔ (‏یعقوب 4:‏6‏)‏ ایس لئی بائبل چ لکھیاں پیشین‌گوئیاں نُوں سمجھن لئی سانوں خاکساری نال دُعا چ اوہدے کولوں مدد منگنی چاہی دی اے۔ جے اَسی خاکسار ہوواں گے تے اَسی وفادار تے سمجھ‌دار غلام وَلّوں مِلن والی مدد نُوں قبول کراں گے جنہوں یہوواہ نے سانوں صحی وقت تے روحانی کھانا دین لئی مقرر کیتا اے۔ (‏لُوقا 12:‏42‏)‏ یہوواہ منظم خدا اے، ایس لئی ایہہ توقع کرنا بالکل صحی اے کہ اوہ اپنے کلام دِیاں سچائیاں نُوں سمجھن چ مدد کرن لئی اِک ای ذریعے نُوں استمال کرے گا۔—‏1-‏کُرنتھیوں 14:‏33؛‏ اِفسیوں 4:‏4-‏6‏۔‏

10.‏ تُسی بھین آستر دے تجربے توں کیہہ سکھیا اے؟‏

¹⁰ گہرائی نال مطالعیا کرو۔‏ کوئی ایہو جہی پیشین‌گوئی چُنو جیہڑی توانوں بڑی پسند اے تے اوہدے تے تحقیق کرو۔ بھین آستر نے وی ایہی کیتا۔ اوہنوں اوہ پیشین‌گوئیاں بڑیاں پسند سن جیہڑیاں مسیح دے آن بارے کیتیاں گئیاں سن۔ اوہنے کہیا:‏ ”‏جدوں مَیں 15 سال دی ساں تے مَیں ایس گل دے ثبوت لبھن لگ پئی کہ ایہہ پیشین‌گوئیاں یسوع مسیح دے زمانے توں پہلاں لکھیاں گئیاں سن۔“‏ اوہنے بحیرۂ مُردار چوں مِلن والے طوماراں بارے جو کجھ پڑھیا، اوہدے توں اوہنوں بڑا فائدہ ہویا۔ اوہنے کہیا:‏ ”‏اوہناں وچوں کجھ طومار مسیح دے زمانے توں پہلے لکھے گئے سن۔ ایس لئی مینوں یقین ہو گیا کہ اوہناں چ جیہڑیاں پیشین‌گوئیاں لکھیاں نیں، اوہ خدا وَلّوں نیں۔“‏ بھین آستر نے ایہہ وی کہیا:‏ ”‏مینوں کجھ گلاں نُوں سمجھن لئی وار وار اوہناں نُوں پڑھنا پیا۔“‏ پر اوہ بڑی خوش اے کہ اوہنے اِنج کیتا۔ کجھ پیشین‌گوئیاں دا گہرائی نال مطالعیا کرن توں بعد اوہنے کہیا:‏ ”‏ہُن مَیں صاف صاف ویکھ سکنی آں کہ بائبل چ لکھیاں گلاں واقعی سچ نیں۔“‏

11.‏ جدوں اَسی اپنے آپ نُوں ایس گل تے قائل کر لینے آں کہ بائبل چ لکھیاں گلاں سچ نیں تے سانوں کیہہ فائدہ ہوندا اے؟‏

¹¹ جدوں اَسی غور کرنے آں کہ خدا دے کلام دِیاں پیشین‌گوئیاں کیویں پوریاں ہوئیاں تے یہوواہ تے اوہدیاں ہدیتاں تے ساڈا بھروسا ودھ جاندا اے۔ ایہدے نال نال ایہہ پیشین‌گوئیاں ساڈی مدد کردیاں نیں کہ اَسی مشکلاں دے باوجود وی اپنا دھیان اوس چنگے مستقبل تے رکھیے جدے بارے بائبل چ دَسیا گیا اے۔ آؤ، ہُن دو ایہو جہیاں پیشین‌گوئیاں تے گل کرنے آں جیہڑیاں دانی‌ایل نبی نے لکھیاں تے جیہڑیاں اَج پوریاں ہو رہیاں نیں۔ ایہناں پیشین‌گوئیاں نُوں چنگی طرحاں سمجھن نال اَسی چنگے فیصلے کر سکاں گے۔‏

12.‏ مورت دے لوھے تے مٹی نال بنے پیر کدے وَل اشارہ کردے نیں؟ (‏دانی‌ایل 2:‏41-‏43‏)‏

¹² دانی‌ایل 2:‏41-‏43 نُوں پڑھو۔‏ دانی‌ایل نبی نے بادشاہ نبوکدنضر نُوں جیہڑے خواب دا مطلب دَسیا، اوہدے چ بادشاہ نے اِک وڈی مورت  ویکھی سی جدے پیر لوھے تے مٹی نال بنے سن۔ جدوں اَسی ایس پیشین‌گوئی دا مطالعیا مکاشفہ دی کتاب تے دانی‌ایل دی کتاب چ لکھیاں دُوجیاں پیشین‌گوئیاں نال کرنے آں تے اَسی ایہہ سمجھ جانے آں کہ مورت دے پیر امریکہ تے برطانیہ دی حکومت وَل اشارہ کردے نیں جیہڑی آخری عالمی طاقت اے۔ پیراں چ شامل مٹی عوام وَل اشارہ کردی اے۔ ایس عالمی طاقت بارے دانی‌ایل نبی نے کہیا کہ ایہہ حکومت کجھ مضبوط تے کجھ کمزور ہوئے گی۔ پر ایہہ کمزور کیوں اے؟ کیونکہ جیویں مٹی لوھے دی مضبوطی نُوں گھٹا دیندی اے اونویں ای ایہہ حکومت اپنی عوام دی وجہ توں کمزور اے۔‏ b

13.‏ ایس پیشین‌گوئی توں سانوں کیہڑیاں خاص گلاں پتہ چلدیاں نیں؟‏

¹³ دانی‌ایل نے وڈی مورت تے اوہدے پیراں بارے جو کجھ دَسیا، اوہدے توں اَسی بوہت ساریاں خاص گلاں سکھنے آں۔ اِک گل ایہہ کہ امریکہ تے برطانیہ دی عالمی طاقت نے کجھ معاملیاں چ ایہہ ثابت کیتا اے کہ اوہ کِنّی طاقت‌ور اے۔ مثال لئی، امریکہ تے برطانیہ اوہناں مُلکاں وچوں سن جنہاں نے پہلی تے دُوجی عالمی جنگ جتی سی۔ پر کیونکہ ایہناں دے شہری اِک دُوجے نال لڑدے نیں تے حکومت دے خلاف آواز چُک‌دے نیں، ایس لئی ایہہ کمزور وی اے تے ہور کمزور ہوندی جائے گی۔ دُوجی گل ایہہ کہ جدوں خدا دی بادشاہی ساریاں حکومتاں نُوں ختم کرے گی، اوہدوں امریکہ تے برطانیہ دی حکومت ای آخری عالمی طاقت ہوئے گی۔ بھانویں دُوجیاں قوماں ایس عالمی طاقت دے خلاف ای کیوں نہ کھلو جان پر اوہ ایہدی جگہ نئیں لے سکن گیاں۔ اَسی اِنج ایس لئی کہہ سکنے آں کیونکہ پتھر جیہڑا خدا دی بادشاہی وَل اشارہ کردا اے، اوہ مورت دے پیراں یعنی امریکہ تے برطانیہ دی عالمی طاقت نُوں ٹکڑے ٹکڑے کر دَوے گا۔—‏دانی‌ایل 2:‏34، 35،‏ 44، 45‏۔‏

14.‏ لوھے تے مٹی دے پیراں والی پیشین‌گوئی نُوں سمجھن نال سانوں چنگے فیصلے کرن چ مدد کیویں ملے گی؟‏

¹⁴ کیہہ توانوں ایس گل تے یقین اے کہ لوھے تے مٹی دے پیراں والی پیشین‌گوئی بالکل سچی اے؟ جے ایہہ گل اے تے ایہدا تواڈی زندگی تے وی اثر پووے گا۔ تُسی ایس دُنیا چ پیسے تے چیزاں جمع کرن دی کوشش نئیں کرو گے کیونکہ توانوں پتہ ہوئے گا کہ چھیتی ای ایہہ دُنیا ختم ہون والی اے۔ (‏لُوقا 12:‏16-‏21؛‏ 1-‏یوحنا 2:‏15-‏17‏)‏ ایس پیشین‌گوئی نُوں چنگی طرحاں سمجھن نال تُسی ایس گل نُوں وی سمجھ جاؤ گے کہ مُنادی کرنا تے تلیم دینا کِنّاں اہم اے۔ (‏متی 6:‏33؛‏ 28:‏18-‏20‏)‏ ایس پیشین‌گوئی دا مطالعیا کرن توں بعد اپنے آپ کولوں پچھو:‏ ”‏کیہہ میرے فیصلیاں توں ایہہ ظاہر ہوندا اے کہ مینوں ایس گل تے یقین اے کہ خدا دی بادشاہی چھیتی ای دُنیا دِیاں ساریاں حکومتاں نُوں ختم کر دَوے گی؟“‏

15.‏ اَج ساڈے زمانے چ شمال دا بادشاہ تے جنوب دا بادشاہ کون اے؟ (‏دانی‌ایل 11:‏40‏)‏

¹⁵ دانی‌ایل 11:‏40 نُوں پڑھو۔‏ دانی‌ایل 11 باب چ دو بادشاہواں یعنی سیاسی طاقتاں بارے دَسیا گیا اے جیہڑیاں اِک دُوجے دے خلاف نیں۔ جدوں اَسی ایس پیشین‌گوئی دا مطالعیا بائبل دِیاں دُوجیاں پیشین‌گوئیاں نال کرنے آں تے سانوں پتہ لگدا اے کہ شمال دا بادشاہ روس تے اوہدے ساتھی نیں تے جنوب دا بادشاہ امریکہ تے برطانیہ دی عالمی طاقت اے۔‏ c

16.‏ یہوواہ دے جیہڑے بندے شمال دے بادشاہ دی حکمرانی چ رہ رہے نیں، اوہناں نُوں کیہڑیاں مشکلاں دا سامنا کرنا پے رہیا اے؟‏

¹⁶ یہوواہ دے جیہڑے بندے شمال دے بادشاہ دی حکمرانی چ رہ رہے نیں، اوہناں نُوں ایس بادشاہ وَلّوں اذیت دا سامنا کرنا پے رہیا اے۔ یہوواہ دے کجھ گواہواں نُوں اوہناں دے ایمان دی وجہ توں ماریا کُٹیا گیا اے تے جیل چ پا دِتا گیا اے۔ پر اوہ ایہدی وجہ توں ڈردے نئیں نیں۔ سگوں ایس ظلم دی وجہ توں اوہناں دا یہوواہ تے اوہدے کلام تے ایمان ہور مضبوط ہو گیا اے۔ پر کیوں؟ کیونکہ ساڈے بھین بھرا جان‌دے نیں کہ جدوں اوہناں تے ظلم کیتا جاندا اے تے ایہدی وجہ توں اوہ پیشین‌گوئی پوری ہوندی اے  جیہڑی دانی‌ایل دی کتاب چ لکھی اے۔‏ d (‏دانی‌ایل 11:‏41‏)‏ ایہناں گلاں بارے جانن نال سانوں مدد ملدی اے کہ اَسی اپنی امید نُوں مضبوط رکھیے تے یہوواہ دے وفادار رہن دے اپنے عزم تے قائم رہیے۔‏

17.‏ جنوب دے بادشاہ دی حکمرانی چ رہن والے یہوواہ دے بندیاں نے کیہڑیاں مشکلاں دا سامنا کیتا اے؟‏

¹⁷ ماضی چ جنوب دے بادشاہ نے وی خدا دے بوہت سارے بندیاں تے ظلم کیتا۔ مثال لئی، بیسیویں صدی دے شروع چ ساڈے بوہت سارے بھراواں نُوں ایس وجہ توں جیل چ پا دِتا گیا کیونکہ اوہناں نے کسے دی طرف‌داری نئیں کیتی تے ایسے وجہ توں کجھ بچیاں دا ناں سکول توں وی کٹ دِتا گیا۔ پچھلے کجھ سالاں چ ایس بادشاہ دی حکومت چ رہن والے بوہت سارے یہوواہ دے بندیاں دی وفاداری دا ہور طریقیاں نال اِمتحان ہویا۔ مثال لئی، الیکشناں چ شاید اِک مسیحی تے ایہہ دباؤ پایا جائے کہ اوہ کسے سیاسی پارٹی دی حمایت کرے۔ شاید اوہ ووٹ پان تے نہ جاوے پر ہو سکدا اے کہ اوہ دل ای دل چ کسے سیاسی پارٹی دی حمایت کرن لگ پووے۔ ایہہ بوہت  ضروری اے کہ اَسی نہ صرف اپنے کماں توں سگوں اپنے دل چ وی کسے دی طرف‌داری نہ کریئے۔—‏یوحنا 15:‏18، 19؛‏ 18:‏36‏۔‏

18.‏ شمال دے بادشاہ تے جنوب دے بادشاہ وچ دُشمنی ویکھ کے سانوں کیہو جیہا محسوس ہوندا اے؟ (‏تصویر نُوں وی ویکھو۔)‏

¹⁸ جیہڑے لوک بائبل دِیاں پیشین‌گوئیاں تے ایمان نئیں رکھدے، اوہ شاید ایہہ ویکھ کے بوہت پریشان ہو جان کہ شمال دا بادشاہ تے جنوب دا بادشاہ اِک دُوجے نال بھڑ رہے نیں۔ (‏دانی‌ایل 11:‏40‏)‏ دونویں بادشاہواں کول اینے ایٹمی ہتھیار نیں کہ اوہ پوری زمین نُوں تباہ کر سکدے نیں۔ پر اَسی جاننے آں کہ یہوواہ اِنج نئیں ہون دَوے گا۔ (‏یسعیاہ 45:‏18‏)‏ ایس لئی جدوں اَسی شمال دے بادشاہ تے جنوب دے بادشاہ وچ دُشمنی ویکھنے آں تے اَسی پریشان نئیں ہوندےسگوں ایہدے توں ساڈا ایمان مضبوط ہوندا اے۔ نالے سانوں ایس گل دا پکا یقین ہو جاندا اے کہ شیطان دی ایس دُنیا دا خاتمہ بوہت نیڑے وے۔‏

19.‏ بائبل چ لکھیاں پیشین‌گوئیاں بارے سانوں کیہڑی گل یاد رکھنی چاہی دی اے؟‏

¹⁹ اَسی نئیں جان‌دے کہ بائبل چ لکھیاں کجھ پیشین‌گوئیاں کیویں پوریاں ہون گیاں۔ دانی‌ایل نبی وی اوہناں گلاں نُوں پوری طرحاں نئیں سمجھ سکیا سی جیہڑیاں اوہنے لکھیاں سن۔ (‏دانی‌ایل 12:‏8، 9‏)‏ پر جے سانوں ایہہ سمجھ نئیں آندی کہ بائبل دی کوئی پیشین‌گوئی کیویں پوری ہوئے گی تے ایہدا ایہہ مطلب نئیں اے کہ ایہہ پوری نئیں ہوئے گی۔ اَسی ایس گل دا پورا یقین رکھ سکنے آں کہ جیویں یہوواہ نے ماضی چ اپنے بندیاں نال کیتا اونویں ای آن والے وقت چ وی اوہ سانوں صحی وقت تے ہر اوہ گل دَسے گا جنہوں جاننا ساڈے لئی ضروری ہوئے گا۔—‏عاموس 3:‏7‏۔‏

20.‏ چھیتی ای بائبل چ لکھیاں کیہڑیاں پیشین‌گوئیاں پوریاں ہون گیاں تے سانوں کیہہ کردے رہنا چاہی دا اے؟‏

²⁰ بوہت چھیتی قوماں امن تے سلامتی دا اعلان کرن گیاں۔ (‏1-‏تھسلُنیکیوں 5:‏3‏)‏ فیر دُنیا دِیاں حکومتاں جھوٹھے مذہب تے چڑھائی کرن گیاں تے ایہنوں ختم کر دین گیاں۔ (‏مکاشفہ 17:‏16، 17‏)‏ فیر اوہ خدا دے بندیاں اُتے حملہ کرن گیاں۔ (‏حِزقی‌ایل 38:‏18، 19‏)‏ ایہدے بعد ہرمجدون دی جنگ شروع ہوئے گی۔ (‏مکاشفہ 16:‏14،‏ 16‏)‏ اَسی ایس گل دا یقین رکھ سکنے آں کہ ایہہ سب کجھ بوہت چھیتی ہون والا اے۔ پر اوس ویلے تک آؤ اَسی بائبل دِیاں پیشین‌گوئیاں تے دھیان دیندے رہیے تے دُوجیاں دی وی اِنج کرن چ مدد کریئے۔ اِنج اَسی اپنے آسمانی باپ لئی شکرگزاری ظاہر کراں گے۔‏