1. Nyen la apeut ti aidé e ti ye ti manda aprophétie ti Bible?

 ITA-KOLI BEN, so ade maseka, atene: “Mbi ye mingi ti manda aprophétie ti Bible.” Mo kue mo bâ tongaso? Wala mbeto ti mandango aprophétie asara mo? Mo peut même ti bâ so mandango aprophétie ayeke ye ti songo li. Ye oko, tongana mo hinga ndani so Jéhovah asara si a sû ni na yâ ti Bible, mo peut ti changé bango ndo ti mo.

2. Article so ayeke sara tënë na ndö ti nyen?

² Na yâ ti article so, e yeke sara tënë na ndö ti ndani so a yeke nzoni e manda aprophétie ti Bible nga tongana nyen la e peut ti manda ni. Na pekoni, e yeke sara tënë na ndö ti aprophétie use na yâ ti mbeti ti Daniel ti bâ tongana nyen la tongana e mä yâ ni apeut ti aidé e laso.

3. Tongana e ye ti mä yâ ti aprophétie ti Bible, nyen la e doit ti sara?

³ Tongana e ye ti mä yâ ti aprophétie ti Bible, e doit ti hunda mungo maboko. Bâ tapande so. Imaginé so mo gue ti bâ mbeni ndo so mo hinga ni ape, me mbeni kamarade ti mo so ahinga ndo ni nzoni ayeke na terê ti mo. Lo hinga mbilimbili ndo so ala yeke dä nga lo hinga ndo so lege oko oko kue ayeke gue dä. Kite ayeke dä ape so a yeke nzere na mo so kamarade ti mo ni ayeda ti tene mo na lo ague. Jéhovah ayeke tongana nzoni kamarade so, lo hinga nzoni mingi ye so ayeke si na e kekereke. Tongaso, ti mä yâ ti aprophétie ti Bible, e doit ti sara terê ti e kete e hunda lo ti aidé e.—Dan. 2:28; 2 Pi. 1:19, 20.

4. Ngbanga ti nyen la Jéhovah asara si a sû aprophétie na yâ ti Bible? (Jérémie 29:11). (Bâ nga foto.)

⁴ Tongana ti mbeni nzoni babâ, Jéhovah aye ti tene kekereke ti amolenge ti lo aduti nzoni. (Diko Jérémie 29:11.) Me  nde na ababâ so ayeke azo, Jéhovah apeut ti fa na e tâ na lege ni ye so ayeke si kekereke. Lo sara si a sû na yâ ti Bible aprophétie tongaso si e peut ti hinga ye na ndö ti akota ye so ayeke si kozo si asi (És. 46:10). Aprophétie ti Bible ayeke tongana acadeau so Babâ ti e ti yayu amû ni na e na ndoye. Me tongana nyen la e peut ti hinga biani so aye so Bible asara tënë ni ayeke si biani?

5. Nyen la mbeni maseka apeut ti manda na lege ti ye so asi na Max?

⁵ Na yâ ti akodro mingi, mingi ni, amaseka so ayeke na ekole ayeke na popo ti azo so ane Bible mingi ape wala oko ape. Tënë ti yanga ti ala nga na sarango ye ti ala apeut ti dü kite na bê ti mbeni maseka so ayeke Témoin. Bâ ye so asi na mbeni ita-koli so iri ti lo Max. Lo tene: “Na ngoi so mbi ngbâ na ekole, mbi komanse ti duti na kite na ndö ti aye so babâ na mama ti mbi ayeke fa na mbi na ndö ti tâ bungbi ti vorongo Nzapa nga mbi yeke na kite so Bible alondo na Nzapa.” Nyen la babâ na mama ti lo asara lani? Lo tene: “Ala sara ye yeke atâa so mbi hinga so ala gi bê ti ala.” Babâ na mama ti Max akiri tënë na ahunda ti lo na lege ti Bible. Max nga kue asara mbeni ye. Lo tene: “Mbi wani mbi manda aprophétie ti Bible nga mbi sara lisoro na amba ti mbi na ndö ti ye so mbi manda.” Ye ti peko ni ayeke nyen? Max atene: “Na pekoni, mbi hinga biani so Bible alondo na Nzapa.”

6. Tongana mo yeke na kite nyen la mo bezoin ti sara? Ngbanga ti nyen?

⁶ Legeoko tongana Max, tongana mo komanse ti duti na kite so atënë ti Bible ayeke tâ tënë, sara kamene ape. Me mo doit ti sara mbeni ye ndali ni. Kite ayeke tongana rouille. Tongana a sara sanka ni, yeke yeke a peut ti buba mbeni ye ti ngangu ngere. Ti komanse ti zi “rouille” kue so apeut ti woko mabe ti mo, mo doit ti hunda terê ti mo na hunda so: ‘Eskê mbi mä na bê na tënë so Bible atene na ndö ti kekereke?’ Tongana mo bâ so mo mä na bê na ni ape, mo bezoin ti manda ye na ndö ti aprophétie ti Bible so aga tâ tënë awe. Mo peut ti sara ni tongana nyen?

7. Nyen la a-aidé lani Daniel ti manda aprophétie? (Daniel 12:10). (Bâ nga foto.)

⁷ Daniel azia na e mbeni nzoni tapande na ndö ti fason ti mandango aprophétie. Lo manda aprophétie ndali ti mbeni nzoni raison: ti hinga tâ tënë. Nga, Daniel asara terê ti lo kete, lo hinga so Jéhovah ayeke aidé lo ti mä yâ ti aprophétie tongana lo ngbâ nduru na lo nga lo mä yanga ti lo. (Dan. 2:27, 28; diko Daniel 12:10.) Lo fa so lo sara terê ti lo kete na lege so lo zia bê ti lo na Jéhovah ti aidé lo (Dan. 2:18). Daniel amanda nga ye lani nzoni. Lo gi nda ti ye na yâ ti mbage ti Mbeti ti Nzapa so ayeke lani dä na ngoi ti lo (Jér. 25:11, 12; Dan. 9:2). Mo peut ti mû tapande ti Daniel tongana nyen?

8. Ngbanga ti nyen la ambeni zo ayeke manda aprophétie ti Bible? Nyen la a yeke nzoni e sara?

⁸ Gi ti hinga ndani so mo yeke manda aprophétie. Eskê kota nzara so mo yeke na ni ti hinga tâ tënë la apusu mo ti manda aprophétie? Tongana a yeke ni la, Jéhovah  ayeke aidé mo (Jean 4:23, 24; 14:16, 17). Mbeni raison nde wa la ndali ni mbeni zo apeut ti manda aprophétie? Ambeni zo amanda ni ndali ti so ala ye ti gi ti fa so Bible ayeke tënë ti yanga ti Nzapa ape. Tongaso, ala pensé so tongana Bible ayeke tënë ti yanga ti Nzapa ape, ala peut ti mû desizion ala wani na ndö ti ye so ayeke na lege ni nga na ye so ayeke na lege ni ape. Me, nzoni raison la adoit ti pusu e ti manda aprophétie. Na ndö ni, ti mä yâ ti aprophétie ti Bible, e doit ti duti na mbeni sarango ye so ayeke kota mingi.

9. Sarango ye wa la e bezoin ni ti mä yâ ti aprophétie ti Bible? Fa ndani so mo tene tongaso.

⁹ Sara terê ti mo kete. Jéhovah amû zendo ti aidé azo so asara terê ti ala kete (Jacq. 4:6). Tongaso, e bezoin ti sambela lo ti aidé e ti mä yâ ti aprophétie ti Bible. E doit nga ti hinga so e bezoin mungo maboko ti ngbâa be-ta-zo so Jéhovah ayeke sara kua na ni ti mû na e kobe ti yingo na ngoi so alingbi (Luc 12:42). Jéhovah ayeke Nzapa ti wusuwusu ape, tongaso a yeke na lege ni so lo yeke sara kua gï na ngbâa so ti aidé e ti mä yâ ti atâ tënë so ayeke na yâ ti Bible.—1 aCor. 14:33; aÉph. 4:4-6.

10. Nyen la mo manda na lege ti ye so Esther asara?

¹⁰ Manda ye nzoni. Soro mbeni prophétie so anzere na mo na sara recherche na ndö ni. A yeke ye so mbeni ita-wali so iri ti lo Esther asara. Lo ye lani ti hinga ye mingi na ndö ti aprophétie so asara tënë ti gango ti Messie. Lo tene: “Na ngoi so mbi yeke na ngu 15, mbi komanse ti gi ti hinga aye so afa so a sû aprophétie so kozo si a dü Jésus.” Ye so lo manda na lege ti aye so lo diko na ndö ti arouleau ti Mer Morte asara si lo yeda so a sû aprophétie so kozo si a dü Jésus. Lo tene: “So a sû ambeni rouleau so kozo si a dü Jésus, aprophétie so ayeke na yâ ni adoit ti londo na Nzapa.” Esther akiri atene: “Mbi doit lani ti diko aye so mbi wara fani mingi si mbi mä yâ ni.” Me lo yeke na ngia so lo sara lani effort. Na peko ti so lo manda nzoni gbâ ti aprophétie ti Bible, lo tene: “Mbi peut ti bâ polele so atënë ti Bible ayeke tâ tënë.”

11. Tongana e wani e gi ti hinga so atënë ti Bible ayeke tâ tënë ayeke aidé e tongana nyen?

¹¹ Tongana e bâ tongana nyen la ambeni prophétie ti Bible aga tâ tënë, e yeke sara confiance mingi na Jéhovah nga na fason so lo yeke fa lege na e. Na ndö ni, aprophétie ti Bible ayeke aidé e ti duti na nzoni bango ndo na ndö ti kekereke atâa akpale wa la e wara laso. Zia e sara tënë kete na ndö ti aprophétie use so ayeke na yâ ti mbeti ti Daniel so ayeke ga tâ tënë laso. Tongana e mä yâ ni, a yeke aidé e ti mû anzoni desizion.

12. Agere so ayeke na ‘wen nga na popoto ti sarango na ta so awoko nzoni so a mélangé ni’ aye ti sara tënë ti nyen? (Daniel 2:41-43).

¹² Diko Daniel 2:41-43. Na yâ ti bango li so Daniel afa ndani na Gbia Nébucadnezzar, agere ti statue so gbia ni abâ a sara ni na ‘wen nga na popoto ti sarango na ta so awoko nzoni so a mélangé ni’. Tongana e haka prophétie  so nga na ambeni so ayeke na yâ ti mbeti ti Daniel nga na ti Apocalypse, e peut ti tene so agere ni aye ti sara tënë ti Grande-Bretagne na États-Unis, so ayeke na ngangu komandema na yâ ti dunia laso. Na ndö ti akodro so, Daniel atene so “royaume ni ayeke duti ande na mbeni ngangu ti wen me nga ayeke woko.” Ngbanga ti nyen la a yeke woko? Ngbanga ti so asenge zo, so ayeke tongana popoto ti sarango na ta so awoko, asara si royaume ni alingbi pëpe ti sara ye tongana wen so ayeke ngangu. b

13. Akota tâ tënë wa la e manda na lege ti prophétie so?

¹³ Na lege ti aye so Daniel afa na ndö ti statue ni, mbilimbili agere ni, e manda akota tâ tënë mingi dä. Kozo ni, na yâ ti ambeni ye, Grande-Bretagne na États-Unis afa so ala yeke na ngangu mingi. Na tapande, ala yeke na popo ti akodro so asö benda na yâ ti Kozo nga na Use bira so amû sese kue. Ye oko, ngangu komandema so awoko nga ayeke ngbâ ti woko ndali ti azo ti kodro ti ala so ayeke tiri na popo ti ala nga na gouvernement ti ala. Use ni, Grande-Bretagne na États-Unis ayeke duti andangba kodro so ayeke na ngangu komandema na yâ ti dunia na ngoi so Royaume ti Nzapa ayeke futi aroyaume kue ti azo. Atâa so ambeni kodro apeut ti gi ti kanga lege na komandema ti ala, ala yeke mû place ni ape. E hinga ni ndali ti so “tênë”, so aye ti sara tënë ti Royaume ti Nzapa, ayeke futi agere ti statue ni, so aye ti sara tënë ti Grande-Bretagne na États-Unis.—Dan. 2:34, 35, 44, 45.

14. Tongana e mä yâ ti prophétie na ndö ti agere ni so ayeke na wen nga na popoto ti sarango na ta, a peut ti aidé e tongana nyen ti mû anzoni desizion?

¹⁴ Eskê mo hinga biani so prophétie ti Daniel so asara tënë ti agere ti statue ni so ayeke na wen nga na popoto ti sarango na ta ayeke tâ tënë? Tongana mo hinga so a yeke tâ tënë, a yeke aidé mo na yâ ti fason so mo yeke vivre na ni. Mo yeke gi pëpe ti wara gbâ ti nginza wala gbâ ti aye ti sese ndali ti so mo hinga so fafadeso a yeke futi sioni dunia so (Luc 12:16-21; 1 Jean 2:15-17). So mo mä ya ti prophétie so, a yeke aidé mo nga ti bâ so a yeke kota ye ti sara kua ti fango tënë nga na ti fango ye (Mat. 6:33; 28:18-20). Na peko ti so mo manda prophétie so, hunda terê ti mo na hunda so: ‘Eskê adesizion so mbi yeke mû afa so mbi hinga biani so fafadeso Royaume ti Nzapa ayeke futi agouvernement kue ti azo?’

15. Laso, zo wa la ayeke “gbia ti nord” nga na “gbia ti sud”? (Daniel 11:40).

¹⁵ Diko Daniel 11:40. Daniel chapitre 11 asara tënë ti agbia use, wala agouvernement use, so ayeke sara mandako na mba. Tongana e haka prophétie so na ambeni so ayeke na yâ ti Bible, e peut ti tene so “gbia ti nord” ayeke Russie na akodro so ayeke mû maboko na lo nga “gbia ti sud” ayeke Grande-Bretagne na États-Unis so ayeke na ngangu komandema na yâ ti dunia. c

16. Akpale wa la awakua ti Nzapa so ayeke na yâ ti kodro so “gbia ti nord” ayeke lë gbia dä ayeke wara?

¹⁶ Awakua ti Nzapa so alango na ando so “gbia ti nord” ayeke na komandema na ndö ni ayeke gbu ngangu na yâ ti aye ti ngangu so gbia so ayeke sara na ala. A pika ambeni Témoin nga a bi ala na da ti kanga ndali ti mabe ti ala. Aye so “gbia ti nord” ayeke sara na aita ti e akpengba mabe ti ala me azia mbeto na yâ ti ala ape. Ngbanga ti nyen? Ngbanga ti so  aita ti e ahinga so aye ti ngangu so a sara na ala asara si prophétie ti Daniel aga tâ tënë (Dan. 11:41). d Tongana e hinga ni, a peut ti aidé e ti ngbâ ti duti na kpengba beku nga ti ngbâ be-ta-zo.

17. Akpale wa la awakua ti Nzapa so ayeke na yâ ti kodro so “gbia ti sud” ayeke lë gbia dä awara?

¹⁷ Ândö, “gbia ti sud” asara nga aye ti ngangu na awakua ti Jéhovah. Na tapande, ye so asi lani na ngoi ti Kozo nga na Use bira so amû sese kue, na ngoi so a kanga gbâ ti aita ndali ti so ala ye ti sara kua ti turugu ape nga a tomba ambeni molenge ti aTémoin na ekole ndali ti so ala ke ti bara drapeau. Me na yâ ti angu so ahon ade ti ninga ape, awakua ti Jéhovah so alango na ando so “gbia ti sud” ayeke na komandema na ndö ni awara akpale so ayeke polele ape, so na yâ ni ala doit ti fa so ala yeke be-ta-zo na Royaume ti Nzapa. Na tapande, na ngoi ti avote, bê ti mbeni Chrétien apeut ti pusu lo ti mû mbage ti mbeni parti wala ti mbeni zo ti poroso. Lo yeke sara vote ape,  me na yâ ti li ti lo nga na bê ti lo, lo peut ti mû mbage ti mbeni zo. Ye oko, ti tene e yôro terê ti e na yâ ti poroso ape, e doit ti sara hange na sarango ye ti e, apensé ti e nga na atënë ti bê ti e.—Jean 15:18, 19; 18:36.

18. E yeke sara ye tongana nyen na ngoi so agbia use so ayeke sara mandako na mba? (Bâ nga foto.)

¹⁸ Azo so ayeke na mabe pëpe na aprophétie ti Bible apeut ti gi bê ti ala mingi na ngoi so ala bâ “adidi” ti “gbia ti sud” na ti “gbia ti nord” “ayeke gbu terê.” (Dan. 11:40, kete tënë na gbe ni). Agbia so use kue ayeke na angangu bombe so apeut ti futi aye kue so ayeke na fini na ndö ti sese. Me e hinga so Jéhovah ayeke zia lege ape ti tene a si (És. 45:18). Tongaso, kengo terê so ayeke na popo ti “gbia ti nord” na “gbia ti sud” asara si e gi bê ti e ape me akpengba mabe ti e. A fa so Nzapa aga nduru awe ti futi dunia so.

19. Nyen la a yeke nzoni e hinga na ndö ti aprophétie ti Bible?

¹⁹ E hinga ape tongana nyen la ambeni prophétie ti Bible ayeke ga tâ tënë. Même prophète Daniel amä lani yâ ti aye kue so lo sû ape (Dan. 12:8, 9). Me gï so e hinga mbilimbili ape tongana nyen la mbeni prophétie aga tâ tënë, a ye ti tene ape so a yeke ga tâ tënë ape. Kite ayeke dä ape so e peut ti duti na confiance so Jéhovah ayeke fa na e ye so e bezoin ti hinga na tâ ngoi ni, tongana ti so lo sara ândö.—Amos 3:7.

20. Apendere prophétie wa la aga nduru ti ga tâ tënë awe? A yeke nzoni e ngbâ ti sara nyen?

²⁰ Azo ayeke tene ande so “siriri na nzoni duti ayeke dä!” (1 aThes. 5:3). Na pekoni, agouvernement ti dunia ayeke sara bira na abungbi ti vorongo nzapa ti wataka, na ala yeke futi ni (Apoc. 17:16, 17). Na pekoni, ala yeke sara bira na awakua ti Nzapa (Ézéch. 38:18, 19). Ye so ayeke sara si Harmaguédon so ayeke ndangba bira ayeke komanse (Apoc. 16:14, 16). E peut ti duti sûr so aye ni so ayeke komanse fafadeso. Juska ti si kâ, zia e ngbâ ti kiri singila na Babâ ti e ti yayu so asara ye na ndoye na lege so e ngbâ ti bâ tongana nyen la aprophétie ti Bible ayeke ga tâ tënë nga e aidé amba ti e ti sara tongaso.