1. Cossa che pol giutarne a piaserne studiar le professie dela Bìblia?

 UN FRADEL gióveno de nome Ben el ga dito: “Me piase tanto studiar le professie dela Bìblia.” Anca ti te piase studiarle o te fà massa fadiga capirle? Pol esser che sìpia fin una roba che te assa stufo. Magari, se te capissi parché Geovà el ga metesto queste professie nela so Parola, pol esser che te piaserà studiarle.

2. Cossa che ndaremo veder in questo stùdio?

² In questo stùdio, ndaremo veder parché che l’è importante imparar dele professie dela Bìblia e anca come che podemo studiarle. Dopo, ndaremo veder come che due professie del libro de Daniel le pol giutarne ancoi.

3. Cossa che ne toca far par capir le professie dela Bìblia?

³ Se volemo capir le professie dela Bìblia, ghemo de esser ùmili e domandarghe el aiuto de Geovà. (Dan. 2:28; 2 Pie. 1:19, 20) Metemo dir che te sì drio viaiar e te ciapi una strada che no te cognossi mia. No te restarissi contento de gaver un amigo insieme che el cognosse tanto ben la strada e che el sa ndove te ghè de ndar? Sicuro che si! Geovà l’è come questo amigo parché el sa ben in che època semo drio viver e el cognosse ben el nostro futuro. Par quela che ghemo de domandarghe el so aiuto par capir le professie dela Bìblia.

4. Parché che Geovà el ga volesto che le professie le fusse scrite nela so Parola? (Geremia 29:11) (Varda anca el ritrato.)

⁴ Sicuro che un pare e una mare i vol che i so fioi i sìpia felici. Anca Geovà el vol che so fioi i sìpia contenti e i gàpie  un bel futuro. (Ledi Geremia 29:11. b) Lu el ga volesto che le professie le fusse scrite nela so Parola parché el vol contarne robe importante che le ndarà suceder. (Isa. 46:10) Geovà el sa cossa che sucederà nel futuro e tuto quel che lu el dise l’è vera. Alora, podemo dir che le professie dela Bìblia le ze un presente del nostro Pare. Ma come che podemo esser sicuri che quel che la Bìblia la dise ndarà pròpio suceder?

5. Cossa che i gióveni i pol imparar de Max?

⁵ Nela scola, tanti no i ga mia rispeto par la Bìblia. Dele volte, lori i dise tante robe che le pol far i gióveni che i serve a Geovà gaver dubi sora quel che i crede. Varda cossa che un fradel de nome Max el ga dito: “Quando ero gióveno, go scominsià a domandarme se quel che me pare e me mare i me insegnea l’era pròpio la verità e se la Bìblia la era pròpio de Dio.” Cossa che so pare e so mare de Max i ga fato? Lori i ga rispondesto a tute le domande che Max el gavea sora la Bìblia. Lu el ga dito: “Anca se i era preocupadi, lori i ze restadi calmi. Alora, mi stesso go tacà a studiar la Bìblia e go discoresto sora quel che imparea con altri gióveni. Cossita, son restà sicuro che la Bìblia la vien pròpio de Dio!”

6. Cossa che te ocore far se te ghè dubi, e parché?

⁶ Se anca ti no te sì ben sicuro che la Bìblia la ze vera, no stà sentirte in colpa. Ma te ocore far qualcossa suito parché i dubi i ze come la rùsine, che pin pianeto la pol rovinar robe de valor. Alora, par finir fora i dubi che i pol rovinar la to fede, domandate: ‘Credo pròpio in quel che la Bìblia la dise sora el futuro?’ Se no te sì mia pròpio sicuro, te toca studiar le professie dela Bìblia che le ga belche sucedesto. Varda come che te pol studiarle.

7. Cossa che ga giutà Daniel a studiar le professie? (Daniel 12:10) (Varda anca el ritrato.)

⁷ Daniel el ga assà un bel esémpio de come studiar le professie. Lu el gavea la voia giusta, o sia, el studiea parché el volea saver la verità. Daniel anca el ga mostrà che l’era ùmile parché el se ga fidà nel aiuto de Geovà. (Dan. 2:18) Lu el savea che Geovà el ndaria giutarlo a capir le professie se el ghe obedisse e se el seitesse a esser so amigo. (Dan. 2:27, 28; Ledi Daniel 12:10. c) Daniel anca el studiea ben tute le parte dela Bìblia che ghen’era nela so època. (Ger. 25:11, 12; Dan. 9:2) Come che noantri podemo far compagno a lu?

8. (a) Parché che tante persone no le vol creder nele professie dela Bìblia? (b) Cossa che noantri ghemo de far?

⁸ Pensaghe sora parché che te sì drio  studiar le professie dela Bìblia. Ancoi, tanti i stùdia le professie par proar mostrar che la Bìblia no la vien de Dio. Lori i pensa che se i ze boni de provar che no la ze la Parola de Dio, i podarà dessider lori stessi cossa che l’è giusto o sbalià. Magari, quando noantri studiemo, ghemo de farlo cola voia de saver la verità. Cossita, Geovà el ndarà giutarne. (Gioani 4:23, 24; 14:16, 17) Ndemo veder adesso una qualità importante che ne ocore gaver par capir le professie dela Bìblia.

9. Che qualità te ocore gaver par capir le professie dela Bìblia? Spiega.

⁹ Sìpia ùmile. Geovà el promete che el ndarà giutar quei che i ze ùmili. (Tia. 4:6) Alora, ghemo de domandar el so aiuto par capir le professie dela Bìblia. Come Geovà l’è un Dio de òrdine, lu el dopera sol el schiavo fedele e prudente par farne capir quel che la Bìblia la dise. (1 Cor. 14:33; Efe. 4:4-6) Cossita, se semo ùmili, noantri ndaremo acetar el aiuto che Geovà el dà par meso del schiavo fedele e prudente, che ne dà tuto quel che ne ocore nela ora giusta. — Luc. 12:42.

10. Cossa che podemo imparar con Esther?

¹⁰ Stùdia ben. Stùdia una professia che te piase de pi e va in serca dele publicassion che le spiega questa professia. L’è stà cossita che una sorela de nome Esther la ga fato. Ela la volea capir meio le professie che le parlea de quando el Messia el vegnaria. Esther la ga dito: “Quando mi gavea 15 ani, go scominsià a ndar in serca de prove che queste professie le era pròpio state scrite vanti che Gesù el vegnesse ala Tera.” Studiar i Roli del Mar Morto ga giutà Esther a esser sicura de questo. Ela la ga dito: “Arquanti de questi roli i ze stati scriti vanti che Gesù el vegnesse ala Tera. Par quela, le professie che ghen’è lì le ze pròpio de Dio. Me ga tocà lederle diverse volte par capirle, ma son restada pròpio sicura che la Bìblia la ze vera.” Esther la ze restada tanto contenta dopo che la ga capio meio quele professie.

11. Parché che l’è importante esser sicuri che la Bìblia la ze vera?

¹¹ Dopo che studiemo come arquante professie dela Bìblia le ga sucedesto, se fidemo ancora de pi in Geovà e nele orientassion che lu el ne dà. Le professie dela Bìblia anca le ne giuta a pensar de pi nele robe bone che le ndarà suceder nel futuro e nò nele nostre dificoltà. Adesso, ndaremo veder due professie de Daniel che le ze drio suceder nei nostri giorni e come che le pol giutarne a far bone dessision.

12. Cossa che i ze i pié de fero e de baro? (Daniel 2:41-43)

¹² Ledi Daniel 2:41-43. d El rè Nabucodonosor el se ga insognà con una granda stàtua che la gavea ‘i pié de fero e de baro’. Daniel el ga dito che i pié i volea dir un regno che el gavaria ‘una parte forte e nantra parte fiaca’. Dopo de vardar le  professie del libro de Daniel e de Apocalisse, capimo che i pié i ze la Potensa Anglo-Americana, o sia, i Stati Unidi e la Gran Bretagna. Questi due governi i laora insieme e i ze i pi poderosi dei nostri giorni. Ma parché che una parte de questo regno la saria fiaca? Parché le persone, o sia, el baro, no le assaria che questi governi i fesse tuto quel che i vol. e

13. Che altre robe importante podemo imparar con questa professia?

¹³ Dopo de capir quel che Daniel el ga dito sora i pié dela stàtua, podemo imparar anca altre robe importante. Prima, vedemo che la Potensa Anglo-Americana la mostra che la ga tanto poder de diverse maniere. Par esémpio, i Stati Unidi e la Gran Bretagna i era intrà i paesi che i ga vinsesto la Prima e la Seconda Guera Mondial. Ma questi governi i mostra che i ze drio deventar fiachi, parché le persone no le ze mai intese una colaltra e le seita a vegner contra lori. Seconda, la Potensa Anglo-Americana la sarà la ùltima a governar vanti che el Regno de Dio el finissa fora tuti i governi dei òmini. Ancora che tanti altri governi i vien contra la Potensa Anglo-Americana, no i sarà mia boni de tor el so poder. Parché? Parché la Bìblia la mostra che sarà el Regno de Dio, o sia, “el sasso”, che el ndarà spacar i pié dela stàtua e finir fora la Potensa Anglo-Americana. — Dan. 2:34, 35, 44, 45.

14. Parché che capir ben la professia sora i pié de fero e de baro ndarà giutarte a far bone dessision?

¹⁴ Sito sicuro che la professia de Daniel sora i pié de fero e de baro la ze vera? Alora, te ndarè far bone dessision. Come cossita? Ti no te ndarè mia in serca de ciapar pi soldi o far su capital parché te sè che suito questo mondo el sarà finio fora. (Luc. 12:16-21; 1 Gio. 2:15-17) Se te capissi ben questa professia, te saverè che l’è tanto importante predicar e insegnar i altri. (Mat. 6:33; 28:18-20) Alora, dopo che te studi questa professia, proa domandarte: ‘Sarà che le dessision che fao le mostra che son sicuro che el Regno de Dio suito el ndarà finir fora i governi dei òmini?’

15. Chi che l’è el rè del nort e el rè del sud nei nostri giorni? (Daniel 11:40)

¹⁵ Ledi Daniel 11:40. f El capìtolo 11 de Daniel el parla de due rè, o governi, che i va un contra quelaltro par veder chi che l’è pi poderoso. Dopo de vardar altre professie dela Bìblia, capimo che el “rè del nort” l’è la Rùssia e quei che i la giuta e el “rè del sud” l’è la Potensa Anglo-Americana. g

16. Come che el rè del nort el trata i servi de Dio?

¹⁶ I servi de Dio che i vive ndove el  rè del nort el governa i sofre tanta perseghission. Par causa dela so fede in Geovà, arquanti fradei i ze drio esser metesti in preson e i ze drio ciapar bote. Ma, invesse de restar spauradi, la so fede la resta ancora pi forte. Parché? Lori i cognosse le professie dela Bìblia, come quela de Daniel, e i capisse che le ze belche drio suceder. h (Dan. 11:41) Cognosser queste professie giuta anca noantri a gaver una forte speransa e a seitar leai a Geovà.

17. Che dificoltà i servi de Dio che i vive ndove el rè del sud el governa i infronta?

¹⁷ Nel passà, anca “el rè del sud” el ga perseghio tanto i servi de Dio. Par esémpio, nela època dela Prima e dela Seconda Guera Mondial, tanti fradei i ze stati metesti in preson e arquanti tosatei i ze stati fin paradi via dela scola. Ma nela  nostra època, el rè del sud el va contra i servi de Dio de una maniera difarente. Par esémpio, quando le persone le va scòlier un governante, pol esser fadiga par i servi de Dio seitar leai al so Regno de Dio e no meterse nela polìtica. Se noantri pensemo che un governo l’è meio de quelaltro l’è come se fùssino drio scòlier un governante. Alora, par seitar leai al Regno de Dio, ne ocore star atenti a quel che femo, pensemo e sentimo. — Gio. 15:18, 19; 18:36.

18. Come che noantri se sentimo quando vedemo i urtoni intrà el rè del sud e el rè del nort? (Varda anca la ilustrassion.)

¹⁸ El “rè del sud e el rè de nort” i ze drio “urtarse un al altro” nei nostri giorni. (Dan. 11:40) Par causa dele so arme e bombe, tuti due i gavaria poder che basta par finir fora la Tera. Par quela, quei che no i ga fede nele professie dela Bìblia i resta pròpio spauradi. Magari, noantri no restemo spauradi parché savemo che Geovà no’l ndarà assarli finir fora la Tera. (Isa. 45:18) Pitosto, la nostra fede la resta ancora pi forte parché savemo che el fin de questo mondo l’è darente.

19. Cossa ghemo de ricordarse sora le professie dela Bìblia?

¹⁹ El profeta Daniel no’l ga mia capio tute le professie che el ga scrito. (Dan. 12:8, 9) Compagno a lu, anca noantri no savemo mia come che tute le professie dela Bìblia le ndarà suceder. Ma no l’è par quela che no le ze vere. Invesse, podemo esser sicuri che Geovà el ndarà giutarne a capir queste professie nela ora giusta, compagno lu el ga belche fato nel passà. — Amòs 3:7.

20. (a) Che professie dela Bìblia suito le ndarà suceder? (b) Cossa ghemo de seitar a far?

²⁰ Suito scoltaremo le persone dir: “Vivemo in pace e sensa paura.” (1 Tes. 5:3) Dopo, i governanti del mondo i ndarà finir fora con tute le religion false e i ndarà contra i servi de Dio. (Eze. 38:18, 19; Apo. 17:16, 17) Cossita, scominsiarà la guera del Armagedon. (Apo. 16:14, 16) Noantri podemo esser sicuri che presto queste robe le ndarà suceder. Ma, par intanto, seita a darghe valor ale professie dela Bìblia e giuta i altri a scoltar quel che Geovà el ne ga contà!