• «Xtachuna la komo kinchixku xtatalakgxtumima atanu puskat».

• «Xakmakgkatsi pi xkimaktuju, pi ni lilakgatit xakwanit chu pi nitu xaklitaxtu».

• «Lu nitlan xakmakgkatsi. Nitila xaklitachuwinan uma».

• «Asta klakpuwa pi Jehová ni xkililakgaputsa».

Umakgolh tachuwin limasiya la patinan chatum puskat akxni xchixku akxilha pornografía. Chu komo akglhuwata papa’ o lhuwata kata tsekg tlawama uma, max xapuskat namakgkatsi pi nialhla katilipawampa xchixku. Chatum puskat wa: «Xakmakgkatsi pi nialh xaklakgapasa kinchixku. Xaklilakpuwan komo xwi atanu tuku xkimatsekgnima».

¿Akxilha minchixku pornografía? a Uma artículo katlawanika natalan lakpuskatin tiku chuna titaxtumakgo. K’uma artículo nalichuwinanaw makgapitsi xtastakyaw Biblia nema namakgtayayan tlan namakgkatsiya, namalakapastakayan pi Jehová makgtayaman chu namakgtayayan nialh lu nalakgaputsaya chu namatliwakglha mintakanajla. b

Xlikana pi wix nila nalaksaka tuku natlawa minchixku, pero wi tuku tlan natlawaya xlakata nialh lu nalakgaputsaya. Umakgolh tastakyaw lu namakgtayayan.

Ni kalakpuwanti pi wix lipina kuenta. Max chatum puskat natsuku makgkatsi pi wa lin kuenta xlakata xchixku akxilha pornografía. Akgtum li’akxilhtit, Alicia c xlakpuwan pi max ni lilakgatit xwanit chu wa xlakata xchixku xʼakxilha pornografía. Chu xmin kilhtamaku xlakpuwan: «¿Tuku xlakata kinchixku tlakg lakgati kaʼakxilha amakgapitsin lakpuskatin nixawa akit?». Chu makgapitsi lakpuskatin lakpuwankgo pi akxni nitlan limakgkatsikgo tuku lama, tlakg nitlan kitaxtu, chu lakpuwankgo pi xkuentajkan tuku lama. Daniela wan: «Lu xaklisitsi pi kinchixku chuntiya xʼakxilha pornografía. Putum xaklisitsi, chu xakmakgkatsi pi akit xaklakxtlawama kintamakgaxtokgat xlakata nitlan xaklimakgkatsi tuku xlama».

Komo chuna makgkatsiya, kalakapastakti pi Jehová ni lakpuwan pi wix lipina kuenta xlakata tuku tlawama minchixku. Santiago 1:14 wan: «Tuku chatunu  chatunu lu lakgati litaxtuni chuna la liʼakgsiyat» (Rom. 14:12; Filip. 2:12). Uma limasiya pi Jehová ni limawakayan kuenta, wata xla xtapalh liʼakxilha xlakata ni makgxtakga (2 Crón. 16:9).

Komo minchixku akxilha pornografía ni wamputun pi wix ni lilakgatit o wi tuku tsankganiyan. Lu namakgtayayan komo naʼakgatekgsa uma. Tiku lu katsinikgo xlakata uma, wankgo pi tiku akxilhkgo pornografía lhuwa tuku tlawaputunkgo xlakata talakgxtumit, pero ni anan nipara chatum puskat tiku tlan natlawa putum tuku xlakan lakpuwankgo.

Ni kajwatiya kalilakpuwantawila. Catarina wan pi putum kilhtamaku xlilakpuwan pi xchixku xʼakxilha pornografía. Nila xpatsankga uma. Francisca wan: «Akxni ni kkatsi niku wi kinchixku, lu klilakgaputsa. Tantaku lu nitlan kmakgkatsi». Amakgapitsin natalan lakpuskatin wankgo pi lu maxanankgo akxni akxtum katawilakgo natalan tiku max katsikgo pi xchixku akxilha pornografía. Amakgapitsin lakpuwankgo pi nitila kamakgtaya xlakata niti akgatekgsa tuku titaxtumakgo.

Ni talakgalhin chuna namakgkatsiya, pero komo kajwatiya nalilakpuwantawilaya tlakg nitlan katimakgkatsi. Tlakg tlan komo wa nalilakpuwana la talalipina Jehová, xlakata wa uma tuku namaxkiyan litliwakga xlakata natayaniya (Sal. 62:2; Efes. 6:10).

¿La namakgtayayan komo nalikgalhtawakgaya Biblia chu nalilakpuwana? Anta kalichuwinankan lakpuskatin tiku titaxtukgolh tuku lu tuwa chu tlakg tlan makgkatsikgolh akxni litachuwinankgolh Jehová tuku xtitaxtumakgo. Maski Jehová ni kalakkaxtlawanilh xtaʼakglhuwitkan, kamaxkilh takaksni. Kalilakpuwaw xliʼakxilhtit Ana, tiku «lu xlakgaputsama». Xla lu lhman «tlawanilh oración Jehová» chu kgalhilh takaksni maski ni xkatsi tuku xʼama kitaxtuni (1 Sam. 1:10, 12, 18; 2 Cor. 1:3, 4).

Kakaskini tamakgtay lakgkgolotsin xalak congregación. Xlakan litaxtukgo chuna «la putatsekgni akxni min un, akgtum putatsekgni akxni lipekua senan» (Is. 32:2). Max nawanikgoyan pi katachuwinanti chatum tala puskat tiku lu tlan namamakgkatsiniyan chu tiku tlan nalitachuwinana tuku titaxtupat (Prov. 17:17).

Max lilakpuwana komo tlan namakgtayaya minchixku nialh naʼakxilha pornografía. Max tlan chuna natlawaya. Biblia wan pi akxni lakkaxtlawaputunkan akgtum taʼakglhuwit o wi tuku makgatlajaputunkan, «tlakg tlan chatiy nixawa kaj chatum» (Ecl. 4:9-12). Tiku lakputsananikgo uma, wankgo pi tiku akxilha pornografía tlakg tlan namakgxtakga uma  talismanin komo xchixku o xpuskat namakgtaya, chu uma nakamakgtaya nalalipawamparakgo kxtamakgaxtokgatkan.

Pulaktum tuku mililakapastakat wa komo minchixku xlikana makgxtakgputun pornografía chu liwana lakkaxwilinit pi chuna natlawa. ¿Katsiya komo tasaskininit Jehová kamaxkilh litliwakga chu putsanit xtamakgtaykan lakgkgolotsin? (2 Cor. 4:7; Sant. 5:14, 15). ¿Tlawama tuku talakaskin xlakata nialh naʼakxilha pornografía? Akgtum liʼakxilhtit, ¿nialh lu maklakaskin dispositivos electrónicos chu lakgmakgan tuku xtlawalh pi naʼakxilhpara pornografía? (Prov. 27:12). ¿Makgamakglhtinan mintamakgtay chu lakkaxwilinit pi nitu katimatsekgnin? Komo chuna, max tlan namakgtayaya.

¿Pero la tlan namakgtayaya? Kaʼakxilhti tuku tlawa Felicia. Xla tamakgaxtokga Iván, tiku tsukulh akxilha pornografía lata aktsujku xwanit. Felicia tlawa putum tuku matlani xlakata xchixku ni tuwa namakgkatsi natachuwinan akxni xla akxilhputumpara pornografía. Iván wan: «Tlan putum klitachuwinan kimpuskat chu ni kmaxanani. Xla tlan kilikatsini. Kimakgtaya ni nakʼakxilhpara pornografía, chu ni xmakgasni kinkgalhskin la kinkitaxtunima. Nachuna, kimakgtaya ni lu lhuwa kilhtamaku nakmaklakaskin internet». Pero maski chuna, Felicia nitlan limakgkatsi pi xchixku akxilhputun pornografía. Pero xla wan: «Maski lu klisitsi chu lu nitlan klimakgkatsi, kkatsi pi uma ni katimakgtayalh kinchixku namakgxtakga xtalismanin. Wa xlakata, pulana klichuwinanaw tuku xla titaxtuma, chu alistalh klichuwinanaw tuku nakimakgtaya nialh lu naklakgaputsa chu nialh lu naklipuwan».

Akxni tiku makgaxtokgkgo kgalhchuwinankgo, ni kajwatiya xachixku makgtaya xlakata nialh naʼakxilha pornografía. Nachuna makgtaya xapuskat nalipawampara xchixku. Akxni chatum chixku ni matsekgni xpuskat tuku nitlan tlawaputun, tuku tlawama o niku kilanit, xpuskat lipawampara.

¿Na tlan xtlawa tuku lichuwinanitaw xlakata xmakgtaya minchixku? Komo akxilha pi tlan xmakgtaya, max tlan akxtum xlikgalhtawakgatit uma artículo. ¿Tuku lakgchan natlawa minchixku xlakata tlan namakgtayaya? Liwana xlilakkaxwilit nialh naʼakxilha pornografía chu lu naliskuja xlakata nalipawamparaya. Ni xlisitsit akxni nalitachuwinamputuna uma, wata xliskujat naʼakgatekgsa pi uma na nitlan mamakgkatsiniyan. ¿Chu wix? ¿Tuku militlawat? Xlakaskinka namakgtayaya minchixku namakgxtakga uma nixatlan talismanin chu namaxkiya talakaskin nalimasiyaniyan pi tlan nalipawamparaya. Lu xlakaskinka pi minchatiykan nakatsiyatit tuku tlawa pi latamanin naʼakxilhputunkgo pornografía chu tuku tlan natlawayatit xlakata minchixku namakgxtakga uma nixatlan talismanin. d

Komo lakpuwana pi tuwa nakakitaxtuniyan nalikgalhchuwinanatit  uma chu ni nalamakgasitsiyatit, max tlan nawan naskiniyatit chatum kgolotsin xalak congregación pi anta nakatatawilayan chu wa napulalin akxni nakgalhchuwinanatit. Komo chuna, kalaksaktit chatum kgolotsin tiku minchatiykan lipawanatit. Kalakapastakti pi maski minchixku namakgxtakga uma nixatlan talismanin, max wix namaklakaskina lhuwa kilhtamaku xlakata tlan nalipawamparaya. Ni kataxlajwani. Kaʼakxilhti tuku tlan nakitaxtutilha kmintamakgaxtokgat. Kalipawanti pi chuna la natitaxtu kilhtamaku chu komo lu naliskuja, mintamakgaxtokgat tliwakga nawampara (Ecl. 7:8; 1 Cor. 13:4).

Komo minchixku naʼakxilhpara pornografía, ¿kilhchanima uma pi nipara tsinu nitlan limakgkatsi tuku tlawama chu nikxni katimakgxtakgli uma xtalismanin? Nichuna. Komo uma lu smanipasanit, max natalakaskin pi kputuminika xlatamat lu naliskuja xlakata namakgxtakga. Asta maski lhuwa kata titaxtunit nawan max namin kilhtamaku naʼakxilhpara pornografía. Xlakata nichuna naʼakgspulapara, talakaskin wi atanu tuku natlawa chu max natalakaskin lhuwa kilhtamaku lu naliskuja uma maski tasiya pi makgxtakgnita xtalismanin (Prov. 28:14; Mat. 5:29; 1 Cor. 10:12). Natalakaskin pi nalakgpali xtalakapastakni chu naxkajni «tuku nitlan»; uma kilhchanima pi na nalakgmakgan pornografía chu atanu nixatlan talismanin, chuna la akxni wi tiku xama xlichixku o xlipuskat xlakata namakgkatsi pi wi tiku tatalakgxtumima (Efes. 4:23; Sal. 97:10; Rom. 12:9). ¿Lakgmakgamputun putum uma? Komo chuna, limasiya pi max tlan natalakgpali. e

¿Chu komo minchixku nitu tlawaputun xlakata namakgxtakga uma nixatlan talismanin? Komo chuna, max wix makglhuwa nalilipuwana chu namakgkatsiya pi akgskgawikanita, chu uma max lu nalisitsiya. Kalitachuwinanti Jehová putum tuku lilakgaputsaya, chu xla namaxkiyan takaksni (1 Ped. 5:7). Chuntiya kalikgalhtawakga Biblia, katlawa oración chu kalilakpuwanti tuku likgalhtawakgaya xlakata uma namakgtayayan tlakg natalakatsuwiniya Jehová, chu naʼakxilha pi xla na natalakatsuwiniyan. «Jehová lakatsu katawi tiku lu lipuwamakgolh» chu lakaskin pi kapaxuwaparakgolh (Sal. 34:18). Katlawa putum tuku namatlaniya xlakata chuntiya lu xatlan kstalanina Cristo nalitaxtuya, kaputsa xtamakgtaykan lakgkgolotsin chu kalakapastakti pi max namin kilhtamaku minchixku natalakgpali (Rom. 2:4; 2 Ped. 3:9).