Yezumanlɩ wɔ odwokɔ mɔɔ ɩɣalɩ ɔzɔ Ɔwɩɛnɩlɛ Aɣanɩ yɩ nu kɛɛ, odwokɔ ɔkʋ̃ la yɛ nwʋmɔ ihyinyia paa mɔɔ ɩkã enii nɩɩ awɔvʋlɔ munwala a. Mɛyɩ yɛ lɛ Gyehova yi dima kezile mɔɔ bɛkɛdɩ nwʋmɔ nɩ. Eyi falɩ Gyehova yi tumililɛ nwʋ, kile kɛɛ, sɛ Gyehova di tumi bʋwɔ o, iáli yi bʋwɔ o, ɩkã yi dima. Ɔzɔ la sʋ̃ yɛ, sɛ enii di Nyamɩnlɩ nɔhʋanlɛ anzɛnyɩɩ iádi yi nɔhʋanlɛ po a, ɩkã dɩyɛ mɔɔ nwʋmɔ hyinyia baaba paa mɔɔ mɛyɩ yɛ lɛ Gyehova yi dima mɔɔ nwʋmɔ kɛdɩ nɩ.

Mɩnla ti mɔɔ kakɩ yɩ, yesi zʋlɔ owudo kɛɛ, odwokɔ mɔɔ nwʋmɔ hyinyia paa yɛ lɛ Gyehova yi dima mɔɔ nwʋmɔ kɛdɩ nɩ a? Bɛmá yezunzu sianti asã be nwʋ.

Mɔɔ ili bɔmʋnlɩ, Setanɩ dɩndɛlɩ diyialɩ Gyehova yi dima wɔ Ɛdɩnɩ toolo yɩ nu. Odwokɔ mɔɔ Setanɩ ɣizialɩ Yifi nɩ, nɩ ɩpɛɛ ikehile kɛɛ Nyamɩnlɩ ti nu yɛ sɩ na mmɛla mɔɔ ɩva ɩmanlɩ bɛ nɩ kile kɛɛ ɩádwɩnɩ bɔ nwʋ. Akʋ̃ Setanɩ lanɩnlɩ Gyehova yɩ odwokɔ yɩ ma ɩɣa ɩyɛlɩ kɛɛ Nyamɩnlɩ dɩ awohwivʋlɔ. Meti ɩzɩkɛlɩ Gyehova yi dima. Na ɩɣa ɩyɛlɩ “ Abɔnsamɩ,” mɔɔ ikile “dimazɩkɛlɛvʋlɔ.” (Dwɔ. 8:44) Iluwakɛɛ Yifi leli Setanɩ yɩ awohwi yi lili nɩ ti, idwodwuli idiyialɩ Nyamɩnlɩ yi tumililɛ iluwa sutiye mɔɔ ɩáyɛ nɩ zʋ. (Gyn. 3:1-6) Babʋmɩ nnɛ munwala, Setanɩ ɩkɔ zʋlɔ ɩsɩkɛ Nyamɩnlɩ yi dima na idi awohwi ɩfalɩ enii kʋ̃ mɔɔ Gyehova dɩ nɩ nwʋ. Bɛzabɛ mɔɔ bede yɩ awohwi ndwokɔ yɩ bedi nɩ, mbɔmɩ sʋ̃maa nɩ bɛádiye Gyehova. Meti Nyamɩnlɩ yɩ mmenii mɛyɩ, Gyehova yi dima nwanzanwanza mɔɔ bogua nwʋmɔ evinli nɩ, yɛ ɩdɩ tanɩ kezile mɔɔ ɩtɛla ebiyela a. Mɛyɩ yɛ ɩhɔ ɩva amanɩyɛnwʋnlɛ nɩɩ tanɩyɛlɛ azʋlɔtʋ munwala ɩɣa oyuwadɩ a.

Mɔɔ ɩtɔ zʋlɔ anwɩ̃, Gyehova izi yɩ kɛnɣa kɛɛ ɩkɛdɩ yi dima mɔɔ bogua nwʋmɔ evinli nɩ nwʋ, ama abɔdɩ munwala bɛanyia zʋlɔ mfasʋ. Mɛyɩ yɛ ɩdɩ dɩyɛ mɔɔ nwʋmɔ hyinyia Gyehova baaba paa. Eyi ti yɛ ɩhanlɩ kɛɛ: “Mɩkɛdɩ mi dima kezile yɩ nwʋ wɔ ɔhʋanɩ bela zʋ.” (Izi. 36:23) Gyisɛsɩ manlɩ numɔ lalɩ kɛnɩ kɛɛ, eyi yɛ lɛ dɩyɛ mɔɔ nwʋmɔ hyinyia paa mɔɔ ɩsɛ kɛɛ Gyehova azʋ̃mɩvʋlɔ nɔhʋanlɛmaa bɔ nwʋmɔ mpayɩ a. Ɩhanlɩ kɛɛ: “Wu dima nwʋ ɩdɩ́.” (Mt. 6:9, NWT) Bayɩbʋlʋ yɩ si zʋlɔ owudo mbɔmɩ sʋ̃maa ma yɛnwʋ sianti mɔɔ nwʋmɔ hyinyia kɛɛ Nyamɩnlɩ yi dima nwʋ tɩ nɩ. Kila nwʋmɔ ndianwʋ ɛgyɩkɩ̃ɩ̃ be: “Bɛvá animinyiamɩ mɔɔ ɩfata Gyehova yi dima nɩ bɛma yɩ.” (1 Mm. 16:29; Ndw. 96:8) “Bɔdʋ́ ayɛlɛyɩlɛ ndwomi bɛma yi dima nwanzanwanza nɩ.” (Ndw. 66:2) “Mɩkɛyɩ wu dima ayɛlɛ daabaa.” (Ndw. 86:12) Mmɩlɩ mɔ Gyehova yɩzayɩ ɩzʋ̃ sʋlɔ ɩhanlɩ yi dima yɩ nwʋ odwokɔ nɩ, numɔ ɔkʋ̃ zili wɔ Gyelusalamɩ asɔlɩ aliyia yɩ nu, ɛkɛnɩ yɛ Gyisɛsɩ hanlɩ kɛɛ: “Ɛzɩlɛ, hyɛ wʋ dima nɩ animinyiamɩ!” Gyehova sʋ̃ leli zʋlɔ kɛɛ: “Mɩhyɛ yɩ animinyiamɩ dadampɔ, na mɩbahyɛ yɩ ebiyekʋ̃.”—Dwɔ. 12:28. a

Mɔɔ ɩtɔ zʋlɔ asã, Gyehova yi tile nu pɔkɔ munwala kã yi dima. Sunzú eyi nwʋ kila: Wɔ odwohilalɛ mɔɔ itualɩ yɩ tʋ wɔ Kɩlayɩsɩ Yɩ Ɔlʋbɔ Abʋmɩ  Tumililɛ yɩ mɛda nɩ, mɩnla yɛ ikezi a? Asʋ̃ awɔvʋlɔ nɩɩ adasamaa bo nu kɔhɔ zʋlɔ kɛhyɩhyɛ wɔ odwokɔ kezile eyi mɔɔ ɩfalɩ Gyehova yi dima mɔɔ nwʋmɔ kɛdɩ nɩ nwʋ a? Mɔɔ ɩkɛyɛ na yeanyia odwokɔɣizialɛ eyi nwʋ munwalɩyɛ nɩ, bɛmá yezunzu odwokɔ yɩ ɔfʋã anwɩ̃ mɔɔ ɩha nɩ nwʋ. Mɛyɩ yɛ lɛ enii yɩ nɔhʋanlɛlilɛ nɩɩ amansɔnɩ tumililɛ yɩ nwʋ odwokɔ yɩ. Wɔ odwohilalɛ mɔɔ itualɩ yɩ tʋ yɩ mɛda nɩ, asʋ̃ ikehyinyia kɛɛ bokodwe enii yi nɔhʋanlɛlilɛ bekehila dɔkʋ̃ a? Anhã. Iluwakɛɛ ɔzɔ mmɩlɩ nɩ, nɩ bodwe bɛ behila bowie na beli munli. Bɔkɔwʋwa azɩ daabaa. Asʋ̃ ɔzɔ mmɩlɩ nɩ, amansɔnɩ tumililɛ nwʋ odwokɔ yɩ kɛva nkyɩkyɛmi kɛɣa mmenii nɩɩ awɔvʋlɔ bo nu a? Anhã. Iluwakɛɛ ɔzɔ mmɩlɩ nɩ, nɩ mmenii nɩɩ awɔvʋlɔ munwala bɛyɛ ɔkʋ̃, na bele Gyehova yi tumililɛ bediã nu. Na odwokɔ mɔɔ ɩfalɩ Gyehova yi dima yɩ nwʋ sʋ̃ ɛ?

Ikodwu ɔzɔ mmɩlɩ nɩ, nɩ Gyehova yi dima mɔɔ bogua nwʋmɔ evinli nɩ, nwʋmɔ ɩdɩ kʋlaa kʋlaa. Naasʋ̃ yi dima nwʋ kɔhɔ zʋlɔ kehyinyia yɩ azʋ̃mɩvʋlɔ nɔhʋanlɛmaa mɔɔ bɔwɔ sʋlɔ nɩɩ azɩlɛ yɩ zʋ nɩ. Mɩnla ti a? Iluwakɛɛ bɔkɔnwʋ kɛɛ Gyehova ɩlanwʋ la ɩyɛɛ nnwʋánlɩ nninyeni. Mɔwʋ sunzú eyi nwʋ kila: Gyisɛsɩ ɩkɛlanɩ tumililɛ yɩ nɩ ɩkɛma Gyehova na Nyamɩnlɩ “iali nninyeni munwatĩĩ bɔ zʋ bulombunli.” (1 Kɔl. 15:28) Mɛyɩ mɛda nɩ, mmenii mɔɔ bɔwɔ azɩlɛ yɩ zʋ munwala kenyia, “fanwʋdi sʋnʋnkʋ̃ nɩ mɔɔ Nyamɩnlɩ mmalɛ benyia yɩ nɩ.” (Wul. 8:21) Na Gyehova yi tile nu pɔkɔ mɔɔ mɛyɩ yɛ lɛ kɛɛ, ɩkɛhã mmenii mɔɔ bɔwɔ azɩlɛ yɩ zʋ nɩɩ awɔvʋlɔ ɩkɔwɔ numɔ kɛɛ abusunwa ɔkʋ̃ nɩ kɛɣa numɔ.—Ɛfɩ. 1:10.

Mɩnla ɔhʋanɩ zʋ yɛ nninyeni eyi mɔɔ ikezizi nɩ kɛhã Gyehova yɩ abusunwa mɔɔ ɩwɔ sʋlɔ nɩɩ azɩlɛ yɩ zʋ nɩ a? Ɩkɛma yɛkɔhɔ zʋ yekenyia ɛpɛ kezile kɛɛ yɛkɛyɩ Gyehova yi dima kezile yɩ ayɛlɛ. Sunzuma yɩ hanlɩ ndwomidʋlɛvʋlɔ Devidi ma ɩhɛlɛlɩ kɛɛ: ‘Bɛyɩ́ Gyehova Nyamɩnlɩ ayɛlɛ. Bɛyɩ́ yi dima kezile yɩ nɩ ayɛlɛ daabaa.’ (Ndw. 72:18, 19) Yekenyia sianti mɔɔ ɩyɛ anyɩnlɩlelɛ sʋ̃maa yekegyina zʋ yɛkɛyɩ Gyehova yi dima yɩ ayɛlɛ daabaa.

Gyehova yi dima yɩ ɩma yɛnwʋ enii kʋ̃ mɔɔ ɩdɩ. Titili, yi dima yɩ kakɛ yɛ kɛɛ ɩdɔ yɛ. (1 Dwɔ. 4:8) Yɛkɔhɔ zʋlɔ yɛkɛhakɛ kɛɛ Gyehova ɩwɔlɩ yɛ iluwakɛɛ ɩdɔ yɛ, ɩvalɩ elelɛdɩyɛ afɔlɩ yɩ ɩmanlɩ yɛ iluwakɛɛ ɩdɔ yɛ, na idi tumi wɔ ɛdɩnɣɛlɛ nu iluwakɛɛ ɩdɔ yɛ. Na yɛkɔhɔ zʋlɔ yɛkɔnwʋ kezimɔ Gyehova dɔ yɛ nɩ daabaa. Na kɛ yɛ Zɩ nɩ, yɛkɔhɔ zʋ yɛkɔhwɩ̃ yekeɣike yɩ na yɛadʋ ayɛlɛyɩlɛ ndwomi yɛayɩ yi dima kezile yɩ ayɛlɛ daabaa.—Ndw. 73:28.