Feichi troquiñ pengeli quiñe dungu müten doi falin-ngei: ñi yamniengeal Jehová tañi üi. ¿Chem dungu coneltulei ñi yamniengetual Jehová tañi üi? Mülei ñi quimfalcünungeal epu dungu. Quiñe, Jehová tati doi cüme ngüneniequelu. Ca epu, pu che ca pu cümeque püllü ñi cüme serfiquefiel Jehová nor piuque mu.

¿Chumngelu doi falintuquefiyiñ ñi yamniengeal Jehová tañi üi? Peafiyiñ cüla dungu.

Quiñe dungu, Edén pingechi lof mu Satanás huesa dunguyefi Jehová ñi üi, femngechi ñi huesa acordangeal. Huecüfü raquiduamelfi ta Eva Jehová ñi cüme piuquengenon ca cümelai com tañi huercüeteu ta Jehová pifi. Huecüfü feipi Chau Dios ñi coilatufengen, femngechi illamcafi Jehová ñi üi. Feimu Satanás “Huecüfü” pingei, tüfa feipi “coilatufe” (Juan 8:44). Eva allcütufi ta Huecüfü, fei feyentulafi ta Chau Dios. Femngechi eluulai ñi ngünenieaeteu Jehová (Gén. 3:1-6). Famülque mu, Huecüfü petu coila dalluntucuquefi Jehová tañi üi. Pu feyentuquefilu feitachi coilaque dungu, feyentulafingün ta Jehová. Jehová tañi üi ñi coila dalluntucungen mu, feimu mülei cutrancahun ca huesaque dungu. Feimu iñchiñ, Jehová ñi pu chengen ayüquelaiñ ñi coila dalluntucungeal Jehová tañi üi.

Epu dungu, Jehová liftuafi tañi üi, femngechi tañi yamniengetual. Jehová mu doi falin-ngei ta tüfa. Feimu feipi: ‘Iñche quimfalcünuan fente ñi yamfalngen tañi fütra üi’ (Ezeq. 36:23). Ca Jesús quimfalcünui chem dungu mu doi falin-ngei taiñ llellipual, feipi: “Rume yamniengepe tami üi” (Mat. 6:9). Tati Biblia fentren rupa feipi ñi püramyengeal Jehová ñi üi. Peafiyiñ quiñeque ejemplo: “Jehová ñi üi mülei ñi püramyengeal, feimu püramyefimün” (1 Crón. 16:29; Sal. 96:8). “Ülcantun mu püramyeafimün quisu tañi fütra üi” (Sal. 66:2). “Com tañi mongen mu püramyeñmayayu tami üi” (Sal. 86:12). Quiñe rupa Jesús mülefui ti templo Jerusalén mu mülelu, fei feipifi ta Jehová: “Chau püramyefinge tami üi”. Fei Jehová feipieyu: “Deu femün llemai, fei ca quiñe rupa püramyeafiñ” (Juan 12:28). a

Cüla dungu, Jehová tañi ayüqueel nüucülei quisu tañi üi mu. Raquiduamnge tüfa: afle huaranca tripantu ñi ngünenieel Jesús, Huecüfü neicümngetuai. Rupale hula feichi antü, ¿chem rupayai? Fei pu che culpan chengehuelayai, pengelaingün  ñi püntütripaquenon Jehová mu ca llohuaingün rumel mongen. Feimu inei no rume ramtulayafui pu che ñi rüf piuqueyefiel ta Chau Dios. Cafei quimfalcünungeai Chau Dios fei tati doi cüme ngüneniequelu, feimu inei no rume feipilayafui Chau Dios ñi cüme ngüneniequenon. Com pu che ca pu cümeque püllü eluhuaingün ñi ngünenieaeteu Jehová. Huelu feichi antü mu, ¿ca falin-ngepeai mai Jehová ñi üi?

Feichi mu, Jehová ñi üi deu yamniengeai ca huesa dunguyengehuelayai. Pu che ca pu cümeque püllü falintunieafingün Jehová tañi üi. Fei engün peaingün Jehová ñi femal afmatun dungu. Afle ti huaranca tripantu, Jesús elutuafi tañi Chau ñi ngünenieal, fei “Chau Ngünechen müten ngünenietuai itrocom dungu” (1 Cor. 15:28). Fei com pu mületualu mapu mu “lifreletuai engün Chau Dios ñi pu yall reque, fei tüfa afmatufali” (Rom. 8:21). Femngechi femtripayai Jehová ñi ayüqueel: müleai quiñe fütra familia quiñeucülelu huenu mu ca mapu meu (Efes. 1:10).

Fei com pu che ca pu cümeque püllü com piuque mu eluhuaingün ñi püramyeafiel Jehová tañi falin üi. Ti salmista David feipi: ‘Püramyengepe Chau Dios Jehová. Rumel püramyengepe tañi fütra üi’ (Sal. 72:18, 19). Rumel afmatuleaiñ Jehová mu, feimu turpu fentecünulayaiñ taiñ püramyeafiel.

Jehová ñi üi pengeli ñi chumngen. Feimu raquiduamliyiñ ñi üi mu, raquiduamiyiñ fente ñi piuqueyechequen (1 Juan 4:8). Rumel acordayaiñ com ñi femquen Jehová fente taiñ piuqueyenieteu: deumaeiñmu, huli tañi Fotüm taiñ montulaeteu ca pengelcünui tañi cüme ngüneniequen. Cüpalechi antü mu, Jehová ca pengelnieaiñmu fente taiñ piuqueyenieteu. Fentecünulayaiñ taiñ fülmanieafiel Jehová ca taiñ püramyeafiel ñi fütra üi ülcantun mu (Sal. 73:28).