Һәмин мәгаләдә өјрәнмишдик ки, бүтүн инсанлара аид бир мүһүм мәсәлә вар: Јеһованын адынын мүгәддәс тутулмасы. Һакимијјәт мәсәләси, јәни Јеһованын идарәетмә тәрзинин ән али олмасы бу мүһүм мәсәләнин бир јөнүдүр. Һәмчинин инсанларын Јеһоваја садиг галыб-галмамасы да бу мәсәләнин јөнләриндән биридир.

Нәјә ҝөрә дејә биләрик ки, ән мүһүм мәсәлә Јеһованын ады вә онун мүгәддәс тутулмасыдыр? Ҝәлин бунун үч сәбәбинә бахаг.

Биринҹиси, Әдән бағында Шејтан Јеһованын адыны бәднам етди. О, Һәвваја һијләҝәр бир суал верди: «Доғруданмы, Аллаһ сизә дејиб ки, бағдакы һәр ағаҹын мејвәсиндән јемәјәсиниз?» (Јар. 3:1). О бунунла демәк истәјирди ки, Јеһова сәхавәтли дејил вә бәндәләринә јерсиз мәһдудијјәтләр гојуб. Шејтан Јеһованын һәр дедијинин әксини сөјләјиб бир нөв Ону јаланчы адландырды. Бунунла да о, Јеһованын адына бөһтан атды вә нәтиҹәдә «бөһтанчы» мәнасыны верән «Иблис» адланмаға башлады (Јәһ. 8:44). Һәвва Шејтанын јаланларына инандығы үчүн Јеһоваја итаәтсизлик етди вә бунунла да Онун һакимијјәтинә гаршы чыхды (Јар. 3:2—6). Шејтан бу ҝүнә кими Јеһованын неҹә бир Варлыг олдуғу илә бағлы јаланлар јајараг Онун адына гара јахыр. Бу јаланлара инананларын Јеһоваја итаәтсизлик етмәк еһтималы даһа чохдур. Буна ҝөрә дә Јеһованын мүгәддәс адына атылан бөһтанлар Онун халгы үчүн ән бөјүк һагсызлыгдыр. Дүнјадакы әзаб-әзијјәтин вә пислијин көкүндә елә бу дурур.

Икинҹиси, бүтүн шүурлу варлыгларын хејри наминә Јеһова Өз адына бәраәт газандыраҹаг, ону бүтүн бөһтанлардан тәмизләјәҹәк. Бу, Јеһова үчүн ән үмдә мәсәләдир. Елә буна ҝөрә дә О дејир: «Улу адымын мүгәддәслијини ҝөстәрәҹәјәм» (Һизг. 36:23). Һәмчинин Иса демишди: «Гој адын мүгәддәс тутулсун» (Мәт. 6:9). Бу заман ҝөстәрмишди ки, бу, Јеһованын садиг хидмәтчиләринин дуасынын әсас мөвзусу олмалыдыр. Мүгәддәс Китабда Јеһованын адынын уҹалмасынын ваҹиблији дәфәләрлә вурғуланыр. Һәмин ајәләрдән бәзиләри бунлардыр: «Јеһоваја адына лајиг шәрәф верин!» (1 Салн. 16:29; Зәб. 96:8). «Онун шанлы адына нәғмәләр оху» (Зәб. 66:2). «Әбәдијјән адыны мәдһ едәҹәјәм» (Зәб. 86:12). Бир дәфә Јерусәлимдә мәбәддә Иса Јеһоваја белә демишди: «Ата, Өз адыны уҹалт». Јеһова да ҝөјдән шәхсән Өзү данышараг белә ҹаваб вермишди: «Уҹалтмышам, јенә дә уҹалдаҹағам» (Јәһ. 12:28) a.

Үчүнҹүсү, Јеһованын нијјәти одур ки, мүгәддәс ады әбәдијјәт боју уҹа тутулсун. Ҝәлин дүшүнәк: Мәсиһин миниллик һакимијјәти вә сонунҹу сынаг битәндән сонра вәзијјәт неҹә олаҹаг? Ән мүһүм мәсәләјә, Јеһованын адынын мүгәддәс тутулмасы мәсәләсинә ҝөрә шүурлу варлыглар арасында јенә дә һачаланма олаҹаг? Бу суала ҹаваб вермәк үчүн ҝәлин бу мүһүм мәсәләнин ики јөнүнү јадымыза салаг: инсанларын сәдагәти вә  али һакимијјәт мәсәләси. Артыг Јеһоваја садиг олдуғуну сүбут етмиш инсанлар јенә дә сәдагәтләрини сынајан вәзијјәтләрлә үзләшәҹәкләр? Хејр. Онлар артыг камил вә там сынанмыш олаҹаглар. Гаршыда онлары әбәди һәјат ҝөзләјәҹәк. Бәс али һакимијјәт мәсәләси барәдә нә демәк олар? Бу мәсәлә дә өз һәллини тапаҹаг. Чүнки ҝөјдә вә јердә бүтүн хилгәт арасында бирлик олаҹаг. Аллаһын идарәетмә тәрзинин адил вә али олдуғу бирдәфәлик сүбут олунаҹаг. Бәс һәмин вахт Јеһованын ады илә бағлы мәсәлә һәлә дә ән мүһүм мәсәлә олараг галаҹаг?

Јеһованын ады она атылан ләкәдән бирдәфәлик тәмизләнәҹәк. Амма Јеһованын ҝөјдә вә јердә олан бүтүн хидмәтчиләри үчүн Онун адынын мүгәддәслији јенә дә мүһүм мәсәлә олаҹаг. Чүнки Јеһова мөһтәшәм ишләр ҝөрмәјә давам едәҹәк. Бир дүшүнүн: Иса тәвазөкарлыгла бүтүн һакимијјәти Јеһоваја верәҹәк вә Јеһова «һәр кәс үчүн һәр шеј» олаҹаг (1 Кор. 15:28). Бундан сонра јер үзүндәки бүтүн инсанлар «Аллаһын өвладларынын шанлы азадлығына» говушаҹаг (Ром. 8:21). Нәһајәт, Јеһованын ҝөјдә вә јердә олан хидмәтчиләрини бир аиләдә бирләшдирмәк нијјәти тамамилә ҝерчәкләшәҹәк (Ефес. 1:10).

Бүтүн бу баш верәнләрдән сонра Јеһованын ҝөјдәки вә јердәки аиләси һансы һиссләри кечирәҹәк? Сөз јох ки, биз даима Аллаһын о ҝөзәл адыны шәрәфләндирмәк истәји илә алышыб-јанаҹағыг. Мәзмурчу Давуд јазмышды: «Алгыш олсун, Јеһова Аллаһа… Алгыш олсун, даима Онун уҹа адына» (Зәб. 72:18, 19). Бүтүн әбәдијјәт боју Јеһованын адыны уҹалтмаг үчүн һәмишә јени, бизи ҹуша ҝәтирән сәбәбләримиз олаҹаг.

Јеһованын ады Онун һагда һәр шеји еһтива едир. Демәли, Јеһованын ады һагда дүшүнәндә илк олараг ағлымыза Онун мәһәббәти ҝәлир (1 Јәһ. 4:8). Биз һәмишә хатырлајаҹағыг ки, Јеһова мәһәббәтдән ирәли ҝәләрәк бизи јарадыб, мәһәббәтдән ирәли ҝәләрәк фидјә гурбанлығы вериб вә мәһәббәтдән ирәли ҝәләрәк идарәетмә тәрзинин әдаләтли олдуғуну сүбут едиб. Бунунла јанашы, биз Јеһованын мәһәббәтини үзәримиздә һисс етмәјә давам едәҹәјик. Әбәдијјәт боју бизим үрәјимиздә Атамыза јахынлашмаг вә Онун шанлы адына нәғмәләр уҹалтмаг истәји олаҹаг (Зәб. 73:28).