Sa artikulong iyan, nanudan niyato na igwa sana talaga nin sarong isyu na napapaatubang sa gabos na tawo asin anghel: an pagpakangbanal kan dakulang pangaran ni Jehova. An isyu dapit sa soberaniya—na an paagi ni Jehova nin pamamahala iyo an pinakamarahay—sarong aspekto kan sarong dakulang isyu. Siring man, an isyu dapit sa integridad nin tawo saro pang aspekto kan sarong dakulang isyung iyan.

Taano ta pigduduon ta ngunyan na an pinakadakulang isyu nakasentro sa pangaran ni Jehova asin sa pagpakangbanal kaiyan? Hilingon ta an tulong dahilan.

Inot, pinuntirya ni Satanas an pangaran, o reputasyon, ni Jehova sa hardin nin Eden. Pinapaluwas kan tusong hapot ni Satanas ki Eva na si Jehova sarong maimot na Diyos na nagbubugtak nin bakong makatanusan na mga pagbabawal sa Saiyang mga nasasakupan. Dangan direktang kinontra ni Satanas an mga tataramon ni Jehova, na garo man sana sinabi niyang putikon an Diyos. Kaya pinakaraot niya an pangaran ni Jehova. Nagin siyang “Diyablo,” na nangangahulugan na “parapakaraot.” (Juan 8:44) Huling nagtubod si Eva sa mga kaputikan ni Satanas, sinuway niya an Diyos, asin nagrebelde siya sa saiyang soberaniya. (Gen. 3:1-6) Sagkod ngunyan, pinapakaraot ni Satanas an pangaran nin Diyos, asin nagpapalakop siya nin mga kaputikan manungod sa kun anong klaseng persona si Jehova. An mga nagtutubod sa siring na mga kaputikan mas dakula an posibilidad na suwayon si Jehova. Kaya para sa mga lingkod nin Diyos, an pagpakaraot sa banal na pangaran ni Jehova iyo an pinakagrabeng inhustisya. Iyan an panginot na dahilan kan gabos na kasakitan asin karatan sa kinaban.

Ikaduwa, para sa kapakinabangan kan gabos niyang linalang, determinado si Jehova na ibindikar an saiyang pangaran, na hinahali an gabos na katuyawan diyan. Iyan an pinakamahalaga ki Jehova. Kaya sinabi niya: “Papabanalon ko nanggad an sakuyang dakulang pangaran.” (Ezek. 36:23) Asin lininaw ni Jesus kun ano an dapat na magin pinakapanginot sa mga pamibi kan gabos na maimbod na lingkod ni Jehova kan sabihon niya: “Pakangbanalon an pangaran mo.” (Mat. 6:9) Pauruutrong idinuduon kan Bibliya an kahalagahan kan pagpamuraway kan pangaran ni Jehova. Pag-isipan an pira sana sa mga halimbawa: “Itao nindo ki Jehova an kamurawayan na maninigo sa pangaran niya.” (1 Cron. 16:29; Sal. 96:8) “Magkanta nin mga pag-umaw sa mamuraway na pangaran niya.” (Sal. 66:2) “Papamurawayon ko sagkod lamang an pangaran mo.” (Sal. 86:12) An saro sa mga pagkakataon na nagtaram mismo si Jehova hali sa langit nangyari sa templo sa Jerusalem kan sinabi ni Jesus: “Ama, pamurawaya an saimong pangaran.” Bilang simbag sinabi ni Jehova: “Pinamuraway ko na iyan asin papamurawayon ko giraray.”—Juan 12:28. a

Ikatulo, an katuyuhan ni Jehova pirming may koneksiyon sa saiyang pangaran, o reputasyon. Pag-isipan: Pagkatapos kan pangultimong pagbalo na masunod pagkatapos kan Sangribong Taon na Paghadi ni Cristo, ano an sunod na mangyayari? Ano daw an sabuot kan gabos na tawo asin anghel sa panahon na iyan manungod sa dakulang isyu, an pagpakangbanal  kan pangaran ni Jehova? Para matabangan kitang masimbag an hapot na iyan, girumdumon ta an duwang magkakonektar na aspekto—an integridad nin tawo asin an unibersal na soberaniya. An mga tawo daw na napatunayan nang maimbod padagos pang mapapaatubang sa angat na papagdanayon an saindang integridad? Dai na. Magigin perpekto na sinda asin lubos nang nabalo. Maaako na ninda an buhay na daing katapusan. An isyu daw manungod sa unibersal na soberaniya magigin tema pa nin mga urulay-ulay, o magigin dahilan pa ngani nin pagkabaranga, kan mga tawo asin anghel? Dai na. Biyo nang mapapatunayan na si Jehova talaga an may deretso na mamahala asin na an saiyang paagi nin pamamahala iyo an pinakamarahay. Pero, kumusta man kun manungod sa pangaran ni Jehova?

Sa panahon na iyan, lubos nang napakangbanal an pangaran ni Jehova, asin mayo nang mapakaraot kaiyan. Imbes, an pangaran ni Jehova iyo an magigin pinakamahalaga sa gabos na lingkod niya. Taano? Huling mahihiling ninda si Jehova na padagos na naggigibo nin makangangalas na mga bagay. Pag-isipan: Huling mapakumbabang ibabalik ni Jesus ki Jehova an gabos na pamamahala, an Diyos ‘magigin gabos na bagay sa lambang saro.’ (1 Cor. 15:28) Pakatapos kaiyan, ikakaugmang marhay kan mga tawo sa daga an “mamuraway na katalingkasan bilang mga aki nin Diyos.” (Roma 8:21) Asin lubos na uutubon ni Jehova an saiyang katuyuhan na pagkasararuon an gabos na linalang sa langit asin sa daga para magin sarong dakula asin nagkakasararong pamilya.—Efe. 1:10.

Paano an mga pangyayaring ini magkakaigwa nin epekto sa pamilya ni Jehova sa langit asin sa daga? Siguradong makakamati pa man giraray kita nin pangangaipo—nin makusog na pagmawot—na padagos na umawon an magayon na pangaran ni Jehova. An salmistang si David pinasabngan na magsurat: “Pag-umawon lugod an Diyos na Jehova . . . Pag-umawon lugod an saiyang mamuraway na pangaran sagkod lamang.” (Sal. 72:18, 19) Sa bilog na panahon na daing sagkod, padagos kitang magkakaigwa nin bago asin nakakaugmang mga dahilan para gibuhon iyan.

An pangaran ni Jehova nagrerepresentar kan gabos na bagay manungod sa saiya. Sa panginot, an pangaran niya nagpapagirumdom sa sato kan saiyang pagkamuot. (1 Juan 4:8) Pirmi tang gigirumdumon na linalang kita ni Jehova huli sa pagkamuot, na itinao niya an atang na pantubos huli sa pagkamuot, asin na ipinahiling niya an matanos na paagi nin pamamahala huli sa pagkamuot. Alagad padagos tang mahihiling kun paano ipapamati ni Jehova an pagkamuot niya sa saiyang mga linalang. Sa bilog na panahon na daing sagkod, mapapahiro kita na mas rumani sa saiya bilang satong Ama asin mag-awit nin pag-umaw sa saiyang mamuraway na pangaran.—Sal. 73:28.