E nlô ajô ôte, bi nga yé’é na bone be bôte bese a beéngele ba yiane fo’o bo ve beta jame wua: e fubu beta jôé Yéhôva. Ngule Yéhôva a bili na a jôé​—nge ki aval a jôé​—é ne fo’o ve beta zene wua ya fubu beta éyôlé wé. Ajô te, ntyi’ane mone môt a nyoñe na a kabetan a Yéhôva nge momo, ô tii fe a mfubane jôé Yéhôva.

Amu jé bia dañe ngôné mfi ya fubu jôé Yéhôva a ve de étyi? Bi tame zu yene beamu belal.

Amu ôsu, Satan a nga ve jôé Yéhôva vit afup Éden. Satan a nga bôôn Ève nsili njoñ asu ya liti nye na Yéhôva a ne afom, a na a sili bebo bisaé Bé mame ma lôte be nkôñ. Mvuse ya valé, Satan a nga kate nye mame me mbe me sela’ane a ma Yéhôva a nga jô be. A nga kate nye na Zambe a ne nlaane minsos. Éyoñ a nga bo nalé, a nga ve jôé Yéhôva mvit. Ane a nga bo “Diable,” nnye ate a tinane na “nlaa minsos.” (Jean 8:44) Mbôl Ève a nga buni minsose Satan a nga laane nye, a nga bo Zambe melo a nalé a nga liti na a nji yi na Zambe nnye a jôé nye. (Mett. 3:1-6) Melu ma, Satan a ke ôsu a ve éyôlé Yéhôva mvit, a kate’e bôte na Yéhôva a nji bo mbamba môt. Bôte ba buni minsose mite be ne bo Yéhôva melo tyi’ibi. Ve asu bebo bisaé be Yéhôva, é ne angôndô ya ékotekote jame na be kobô jôé Yéhôva abé. A bia kôme yene na mboon ôte ñwô wo telé émo ése minjuk été.

Amu baa, asu mfi bitétéa bié bise, Yéhôva a nyoñeya ntyi’ane na a zu fubu éyôlé jé mvit ése be nga wo’o je. Jam éte nde da dañe mfi asu Yéhôva. A jô na: “Ma ye tune beta Jôé wom.” (Ézé. 36:23) Nde fe Yésus a nga liti jame da dañe mfi éyoñe bitôtôlô bebo bisaé be Yéhôva bia ye’elan éyoñ a nga jô na: “Jôé dôé é bo’o étyi.” (Matt. 6:9) Kalate Zambe a wô’ô jaé ngôné mfi ya fubu jôé Yéhôva. Bi tame nyoñe fo’o ve bone bive’an: “Va’ane [jôé] Jehova duma.” (1 Mka. 16:29; Bsa. 96:8) “Yi’an étôto’o ya jôé dé bia.” (Bsa. 66:2) “Ma ye wumulu jôé dôé nnôm éto.” (Bsa. 86:12) Éyoñ éziñe Yéhôva émien a nga kobô temple ya Jérusalem a too yôp été éyoñe Yésus a nga jô na: “A Ésa wom, va’a éyôlé jôé duma.” Ane Yéhôva a nga yalane nye a jô’ô na: “Me veya je duma a ma ye beta ve je duma.”​—Jean 12:28. a

Amu lale, nsôñane Yéhôva ô ne na bi ve éyôlé jé é ne étyi duma nnôm éto a nnôm éto. Tame ve’ele simesan abim avé éyôlé Yéhôva ja ye bo mfi éyoñe meve’ele ma su’ulane ma ye lôt, memane ya toyini mimbu Krist a ye jôé. Aval avé beéngele bese a bone be bôte ba ye yen éyôlé Yéhôva éyoñ éte? Asu na bi yalane nsili ôte, bia yiane beta simesane  beta be mame ba bebaé: mewô’ô bone be bôte ba bo Yéhôva a beta éto njôane Yéhôva. Éyoñ éte da ye beta sili na bone be bôte be liti nge ba kabetane Yéhôva nge momo, amu ba ye bo be too ne seleñe teke ayeñe ya abé, nde fe ba ye bo be maneya dañe meve’ele ma su’ulan. Ba ye bo be maneya bi ényiñe ya melu mese. Nde fe bia ye beta sili biabebiene nge fatane njôane Yéhôva nje ja dañ abeñ. Éyoñ éte, bitétéa ya yôp a bi ya si bia ye bo bi ntoo jôme jia a bia ye kañese njôane Yéhôva. Ve ye jôé Yéhôva ja ye beta bo jôme ja dañe mfi asu bebo bisaé bé?

Éyoñ éte, môt ase a ye bo a kômeya mane yeme benya mejôô a lat a Yéhôva, a éyôlé jé ja ye bo é ntoo mfuban. Ve éyôlé Yéhôva ja ye bo jôme ja dañe mfi asu bebo bisaé bé bese ya yôp a si. Amu jé? Amu ba ye ke ôsu a yen ane Yéhôva a bo bitua bi mam. Tame ve’ele simesan: Mbôle Yésus a ye bulane Yéhôva éjôé a éjote nyul ése, Zambe a ye “bo jôm ése asu bôte bese.” (1 Cor. 15:28) Mvuse ya valé, bôte bese ya si va ba ye bi meva’a ya “nyoñe mbamba éto fili ya bone be Zambe.” (Rom. 8:21) A Yéhôva a ye tôé nsôñan a mbe a bili aso atata’a na a tôkane bitétéa bise ya yôp a bi ya si asu na bi bo nda bôt é ne nlatan.​—Éphé. 1:10.

Éyoñe mame mete me maneya boban, aval avé nda bôte Yéhôva ya yôp a nyi ya si ja ye wô’ôtan? Teke bisô na bia ye bi ngule nkômbane ya ke ôsu a ve beta éyôlé Yéhôva duma. David a nga tili a ngule ya mfufube nsisim na: “Ébotan é bo’o be Yéhôva Zambe . . . étôto’o jôé jé é bo’ ébotan nnôm éto.” (Bsa. 72:18, 19) Bia ye ke ôsu a bi mbamba beamu ya wumulu jôé Yéhôva nnôm éto a nnôm éto.

Éyôlé Yéhôva ja kate avale môt a ne. Ve éyôlé Yéhôva ja dañe bo na bi simesane nye’ane wé. (1 Jean 4:8) Bia ye simesan éyoñ ése na Yéhôva a nga té bia amu a nye’e bia, nye’an ôte fe ñwô ô nga tindi nye na a ve bia ntañ. A bia yiane fe simesan éyoñ ése na fatane njôane Yéhôva nje ja dañe zôsô a nye’an. Ve bia ye ke ôsu a yene nye’ane Yéhôva a nye’e bia nnôm éto a nnôm éto. Bia ye ke ôsu a bi nkômbane ya subu Ésa wongane bebé, a yia nye bia, a wumulu étôto’o jôé jé nnôm éto a nnôm éto.​—Bsa. 73:28.