Ke ibuotikọ oro, ima ikpep ke akpan n̄kpọ kiet emi enen̄erede ebehe mme angel ye mme owo edi ndinam akwa enyịn̄ Jehovah asana. Ndiwụt ke Jehovah enyene unen ndikara, oro edi, ke ukara esie ọfọn akan asan̄a n̄kpọ ye ndinam enyịn̄ esie asana. N̄kpọ en̄wen emi asan̄ade n̄kpọ ye ndinam enyịn̄ Jehovah asana edi mme owo ndiwụt m̀mê iyọsọn̄ọ ida ye Jehovah.

Ntak ndien idọhọde idahaemi ke se inen̄erede ibehe mme angel ye mme owo edi enyịn̄ Jehovah ye ndinam enyịn̄ oro asana? Ẹyak ise ntak ita.

Akpa, Satan ama abiat enyịn̄ Jehovah m̀mê utọ owo emi Jehovah edide ke In̄wan̄ Eden. N̄kari mbụme emi Satan okobụpde Eve akanam etie nte Jehovah Abasi edi ibụk, ke mme ewụhọ emi enye ọkọnọde Adam ye Eve ẹkefep. Ekem Satan ama etịn̄ se idide ata isio ye se Jehovah eketịn̄de. Oro ọkọwọrọ ke enye okokot Jehovah osu nsu. Nte enye akasan̄ade abiat Jehovah enyịn̄ edi oro. Enye ama akabade edi “Devil,” emi ọwọrọde “ọdọk-edidọk” m̀mê enye emi abiatde owo en̄wen enyịn̄. (John 8:44) Sia Eve ekenịmde nsu Satan oro onyụn̄ ọsọn̄de ibuot ye Jehovah, oro okowụt ke enye iyomke Jehovah akara imọ aba. (Gen. 3:1-6) Satan ke ababiat Jehovah enyịn̄ tutu emi, ke onyụn̄ asuan nsu aban̄a Jehovah. Mbon emi ẹnịmde nsu esie ẹsiwak ndisọn̄ ibuot ye Jehovah. Ke ntak oro, ke enyịn ikọt Jehovah, nte ẹbiatde edisana enyịn̄ Jehovah edi akakan idiọkn̄kpọ, enye onyụn̄ edi ata akpan ntak emi ufen ye ibak ẹkponde ntem ke ererimbot.

Ọyọhọ iba, Jehovah ebiere ndinam enyịn̄ esie asana nnyụn̄ ntre kpukpru esuene emi ẹsuenede enyịn̄ esie. Se idide akpan n̄kpọ inọ enye ikan edi oro, enye ndinam oro edinyụn̄ edi ke ufọn mme owo ye mme angel. Enye ọdọhọ ete: “Nyanam akwa enyịn̄ mi asana.” (Ezek. 36:23) Ini Jesus ọkọdọhọde: “Yak ẹnam enyịn̄ fo asana,” enye akanam ẹkụt se ikpedide ata akpan n̄kpọ ke akam kpukpru nti ikọt Abasi. (Matt. 6:9) Bible etịn̄ ufọn edinọ enyịn̄ Jehovah ubọn̄, idịghe inikiet m̀mê ikaba. Se ndusụk uwụtn̄kpọ mi: “Ẹnọ Jehovah ubọn̄ enyịn̄ esie.” (1 Chron. 16:29; Ps. 96:8) “Ẹkwọ edinem ikwọ ẹnọ ubọn̄ enyịn̄ esie.” (Ps. 66:2) “[Nyọnọ] enyịn̄ fo ubọn̄ ke nsinsi.” (Ps. 86:12) Ini kiet ke otu mme ini emi Jehovah ke idemesie eketiede ke heaven etịn̄ ikọ ekedi ini Jesus ọkọdọhọde ete: “Ete, nọ enyịn̄ fo ubọn̄.” Jesus eketịn̄ ikọ oro ke temple ke Jerusalem. Jehovah ama ọbọrọ enye ete: “Mma nnọ enye ubọn̄, nyonyụn̄ ntọn̄ọ ntak nnọ enye ubọn̄.”​—John 12:28. a

Ọyọhọ ita, se Jehovah akaduakde tọn̄ọ ke ntọn̄ọ asan̄a n̄kpọ ye enyịn̄ esie m̀mê utọ owo emi enye edide. Kere ise: Tọsịn isua kiet emi Christ edikarade ama okụre yak ẹdomo mme owo akpatre udomo ẹma, n̄kpọ editie didie? Ndi ndinam enyịn̄ Jehovah asana, emi edide akpan n̄kpọ mfịn, oyosụk  edi n̄kpọ mfịna ọnọ mme angel ye mme owo? Man ikeme ndibọrọ mbụme oro, ẹyak ise n̄kpọ iba emi ẹsan̄ade n̄kpọ ye ndinam enyịn̄ Jehovah asana, oro edi, m̀mê mme owo ẹyesụk ẹsọn̄ọ ẹda ye Jehovah, ye m̀mê Jehovah enyene unen ndikara. Ndi eyedi se mbon emi ẹma ẹkesọsọn̄ọ ẹda ye Abasi ẹkade iso ẹwụt ke isụk ida ye enye? Ihih. Mmọ ẹma ẹbebe akpatre udomo ẹnyụn̄ ẹfọn ẹma. Mmọ ẹdidu uwem ke nsinsi nsinsi. Ndi Jehovah ndinyene unen ndikara oyosụk edi n̄kpọ emi ẹdikade-ka iso ineme, onyụn̄ anamde ubon Abasi ke heaven ye ke isọn̄ ẹkûdiana kiet? Ihih-o. Ini oro, kpukpru nditọ Abasi ke heaven ye ke isọn̄ ẹyediana kiet, Jehovah onyụn̄ akara mmọ, kpukpru n̄kpọ onyụn̄ owụt ke nte Jehovah akarade ọfọn akan. Nso kaban̄a enyịn̄ Jehovah?

Ẹyenam enyịn̄ Jehovah asana ofụri ofụri, ẹyenyụn̄ ẹtre kpukpru se isuenede enyịn̄ oro. Edi enyịn̄ Jehovah edisụk ikaka iso idi ata akpan n̄kpọ inọ mme asan̄autom Jehovah ke heaven ye ke isọn̄. Ntak edi ke mmọ ẹyekụt nte Jehovah edikade iso inam mme utịben̄kpọ. Se n̄kpọ mi: Sia Jesus edisụhọrede idem iyak kpukpru n̄kpọ inọ Jehovah Abasi, Jehovah ayakabade “kpukpru n̄kpọ ọnọ kpukpru owo.” (1 Cor. 15:28) Ke oro ebede, mme owo ke isọn̄ ẹyenyene “ubọn̄ ubọn̄ ifụre nditọ Abasi.” (Rome 8:21) Se Jehovah akaduakde tọn̄ọ ke ntọn̄ọ ndinam kpukpru nditọ esie ke heaven ye ke isọn̄ ẹdiana kiet oyosu.​—Eph. 1:10.

Kpukpru se isụk itịn̄de mi ama etịbe, editie nditọ Abasi ke heaven ye ke isọn̄ didie ke idem? Imenịm ke edisụk ikaka iso idọn̄ nnyịn ndika iso ntoro Jehovah. David emi Abasi ọkọnọde spirit etiene ewet psalm ekewet ete: “Itoro enyene Jehovah Abasi . . . Itoro onyụn̄ enyene ubọn̄ ubọn̄ enyịn̄ esie ke nsinsi.” (Ps. 72:18, 19) Ke nsinsi nsinsi, idisụk ikaka iso ikụt mbufa ntak nditoro Jehovah.

Enyịn̄ Jehovah aban̄a kpukpru se enye edide ye kpukpru se enye anamde. Akpan n̄kpọ emi enyịn̄ esie esitide nnyịn edi nte enye amade nnyịn. (1 John 4:8) Nnyịn idifreke ke ima akanam Jehovah obot nnyịn, oro okonyụn̄ anam enye ọnọ Eyen esie edikpa afak nnyịn. Nnyịn idinyụn̄ ifreke ke Jehovah akara nnyịn ke ima, ke nte enye akarade ọfọn. Edi idikaka iso ikụt nte Jehovah amade nnyịn. Editetịm ọdọn̄ nnyịn ndida enye nte Ete nnyịn, inen̄ede ikpere enye, inyụn̄ ikwọ ikwọ itoro utịbe utịbe enyịn̄ esie.​—Ps. 73:28.