Bi nga yeghe été naa, môra nsili ézing ô ne édedèè éban, wa name boan be-bôt besese ya b’angele : a ve é môra éyôla Jehôva nfuban. É môra nsili wa daghe nge aval Jehôva a djié éde da dang mbeng nge ki kaa, é tsii y’a ve éyôla Jehôva nfuban. Aval té fe, adzô da tsinan é sôsôe moan môt asu Nzame, daa fe é tsii ébe môra nsili té.

Amu dzé bia bira kobe adzô éyôla Jehôva y’a ve de nfuban ? N’fasghane mekalgha melal.

Ôsusua, afup Éden Satan a nga luman éyôla nge ki éwogha Jehôva. Ya nsili Satan a nga ve Eva, a nga kômô lere naa, Jehôva a ne é Nzame éé se ki akap ye naa, metsing a nga ve Adan ba Eva méé mbe ki sôsôe. Éde, Satan a nga dzô é dzam da selan y’édi Jehôva a nga dzô. Bebela a ne naa, Satan a nga dzô naa Nzame a ne minèè. Ya mboane té, a nga ve éyôla Jehôva mvin. Ane a nga sughlane « Debele » da yili naa, « é môt a bôr bôt mam » (Jean 8:44). Amu Eva a nga bèè minèè Satan, ane a ng’a bo Nzame melo ye lere naa, aa kômô ki fe naa, Nzame éñ’a djié ñe (Atar. 3:1-6). Ya zu kuiñ ému, Satan a tsini naa, a wua éyôla Nzame mvin ye miamane minèè nfa aval môt Jehôva a ne. É bôt ba bèè minèè mité, ébe ba dang ébubu a bo Jehôva melo. A wua nfufub éyôla Jehôva mvin éde da dang ékoar-koat dzam akal ayong Nzame. A ne akalgha ôsua da ve naa, minzukh y’abé mi bo édedèè abuiñ a si va.

Édi bèè, nfa ye naa, avele ngura é ñong abuan, Jehôva a bele naa, a kame ye fubu éyôla dèñ ébe minèè misese be va bo ñe. Adzô té, éde da dang éban akal Jehôva. Éde, é dzam di éd’a dzô : « Bebela a ne naa, ma ye fubu é môra éyôla dam » (Ézéch. 36:23). Éde, Yésu a nga tugha lere é dzam da yiène tebe ôsu meyaghlane besôsôe be-bo bisèñ besese Jehôva, éyong a nga dzô naa : « Éyôla duè é boghe nfufup » (Mat. 6:9). Bible a ne mban a ngône éban é ne, a lughu éyôla Jehôva. N’yeneghan ayôm bifônane bi : « Vakh Jehôva é duma da yiène éyôla dèñ » (1 Mila. 16:29 ; Bya 96:8). « Yièghe bia bi ôlughu akal é môra éyôla dèñ » (Bya 66:2). « Ma ye ve éyôla duè duma mbèmbèè » (Bya 86:12). Éyong évoo ye biyong Jehôva émièn a nga kobe atéé y’a dzôp, é nga boban a templo ya Jerusalén, éyong Yésu a nga dzô naa : « Ésaa wom, vakh éyôla duè duma. » Nfa wèñ, Jehôva a nga yalane naa : « Me ve-hang de duma, éde ma ye fe tsini naa, ma ve de duma »—Jean 12:28 a.

Édi lal, nkôman Jehôva wa ye tsini naa wa bo, a fubu éyôla dèñ, nge ki éwogha dèñ. Fasghan é dzam di : Niène é toyini mimbu y’Édjié Christ da man, ye naa, sugha nvaghan a lôr-hang, za dzam afe da ye boban ? Za ôsimane b’angele ya boan be-bôt ba ye bele nfa éyôla Jehôva tam té ? Nfa ya vole bia a yalane nsili té, n’simaneye  é mam mebèñ me bele élat ; é sôsôe boan be-bôt y’éto sugha ndjié. Niène mevaghle ma sughlan ma man, é bôt ba ye bo sôsôe tam té, ye ba yiène tsini naa, ba lere é sôsôe deba ? Kaa. Amu naa, tam té da ye kôane naa bôt beté be ntoo kaa fe nsem, ye lere naa, ba ye tsini naa ba tobe sôsôe asu Jehôva. A kôane be mbele éning é ne mbèmbèè. Y’avele se ngura da ye tsini naa, da kobe adzô y’éto sugha ndjié Jehôva ? Kaa. Daa ye ki fe bo éban naa, be lere naa, aval Jehôva a djié éde da dang mbeng. Tam té dzôp ye si ése ngura da ye tobe élat ye yebe édjié Jehôva. Ve, za dzam ki bi ne dzô nfa éyôla Jehôva ?

Tam té, môt ase a ye yem é bebela a tsinan éyôla Jehôva ye naa, éyôla dèñ da ye tobe nfuban. Ve, da ye tsini naa, da tobe é dzam da dang éban akal be-bo bisèñ bèñ besese, a dzôp y’a si va. Amu dzé ? Amu, be-bo bisèñ Jehôva ba ye yen ane a k’ôsu ye bo bibibiñ bi-mam. Fasghan é dzam di : Amu Yésu y’asili ñuu a ye bulane Jehôva édjié ésese, éde Nzame a ye « bo mam mesese akal môt ase » (1 Becor. 15:28). A kôre ye vèè, boan be-bôt bese be ya si, ba ye bele mevakh ya ñong « mbemba éto fili y’é boan Nzame » (Bero. 8:21). Éde, Jehôva a ye tugha dzale n’nôm nkômane wèñ ya ve naa avele ése ngura a dzôp y’a si é bo é nda-bôt é ne élat—Beéph. 1:10.

Niène mam meté ma ye mane boban, za dzam é nda-bôt Jehôva a dzôp été y’a si va ba ye wôran ? Bebela a ne naa, bia ye wôran nkôman ô ne ngu’u ya k’ôsu ye tsini naa bia lughu mbeng éyôla Jehôva. Ya nsisim Nzame, n’yiè bya David a nga tsili naa : « Ôlughu ébe Jehôva Nzame [. . .] Duma ébe nfufub éyôla dèñ mbèmbèè » (Bya 72:18, 19). Bia ye k’ôsu ye dzeng mbemba minféféñ mekalgha ya tsini naa bia lughu ñe mbèmbèè.

Bebela a ne naa, éyôla Jehôva da tugha lere é môt a ne. Éde, ôsusua éyôla dèñ da simane bia édzing dèñ (1 Jean 4:8). Bia ye k’ôsu y’a simane naa, Jehôva a nga vele bia akal édzing, a nga ve atungha akal édzing ye naa, aval a djié é ne sôsôe ye ndzalane y’édzing. Ve, bia ye tsini bia wôran édzing Jehôva a bele akal dèè mbèmbèè. N’nem wèè, wa ye bia tsini naa, bi yit ñe bebèñ ane Ésaa waa, ye yiè bya bi ôlughu akal é mbemba éyôla dèñ mbèmbèè—Bya 73:28.