Dɛm adzesua no mu no, yehun dɛ asɛnhia bi da nyimpa na abɔfo nyina enyim. Dɛm asɛnhia no nye dɛ, nyimpa na abɔfo nyina wɔ biribi yɛ ama Jehovah ne dzin kɛse no ho aatsew. Gye a nyimpa na abɔfo bɛgye ato mu dɛ kwan a Jehovah fa do dzi tum no, ɔno na ɔyɛ papa kyɛn biara anaa wɔrenngye nnto mu no fa dɛm asɛnhia no ho. Dɛmara so na nokwar a nyimpa bedzi ama Jehovah ɔmmfa ho ɔhaw biara a wobehyia no so fa Jehovah ne dzin a no ho bɛtsew no ho.

Ebɛnadze ntsi na ndaansa yi yɛreka dɛ Jehovah ne dzin a no ho bɛtsew no nye asɛnhia a ɔda hɔ? Hom mma yɛnhwɛ siantsir ebiasa bi ntsi a yɛreka dɛm.

Odzi kan, Satan sɛɛ Jehovah ne dzin wɔ Eden ture no mu. Sɛ yɛhwɛ asɛm a Satan bisaa Eve no a, nna ɔrepɛ akyerɛ dɛ Jehovah yɛ Nyankopɔn otsirmɔdzenfo bi a n’asɛm yɛ dzen, ntsi obiara runntum nndzi ne mbra do. Afei so, asɛm a Jehovah kae no, Satan daan no koraa ma ɔkɛyɛɛ dɛ Jehovah mbom na ɔyɛ ɔtorfo. Dza ɔyɛe yi nyina, ɔdze ɔsɛɛ Jehovah ne dzin. Iyi ntsi, ɔbɛyɛɛ “Abɔnsam” a dza ɔkyerɛ nye “otwirfo” anaa obi a ɔsɛɛ nkorɔfo dzin. (John 8:44) Eve so yɛɛ Jehovah do asoɔdzen, osiandɛ otsiee akɔhwisɛm a Satan kae no. Dza ɔyɛe no kyerɛ dɛ, nna ɔmmpɛ dɛ Jehovah kyerɛ no dza ɔnyɛ. (Gen. 3:1-6) Ndɛ na ndɛ nyina, Satan da ho ara ka nsɛm a ɔnnyɛ nokwar fa Jehovah ho dze sɛɛ ne dzin. Na hɔn a wɔgye akɔhwisɛm a ɔtse dɛm dzi no so, ɔnnyɛ dzen dɛ wɔbɛyɛ Jehovah do asoɔdzen. Nyankopɔn n’asomfo dze, wohu dɛ esisisɛm kɛse paa a bi nnsii da nye Jehovah ne dzin krɔnkrɔn a wɔasɛɛ no no. Ɔno na wɔakɛfa ɔhaw na bɔn a woebu do wɔ wiadze yi mu nyinara no aba.

Otsia ebien, Jehovah esi no bo dɛ ɔbɛtsew ne dzin no ho na oeyi fi biara a wɔaba ho no efi hɔ korakora ma abɔdze nyina enya do mfaso. Iyi nye adze a ohia Jehovah paa. Ntsi ɔaka dɛ: ‘Mebɛtsew me dzin kɛse a woegu ho fi no ho.’ (Ezek. 36:23) Afei so, aber a Jesus kaa dɛ: “Wo dzin ho ntsew” no, nna ɔrema Jehovah n’asomfo anokwafo nyina ehu dɛ, ɔsɛ dɛ wɔma iyi yɛ asɛntsitsir paa wɔ hɔn mpaabɔ mu. (Matt. 6:9) Sɛ ehwɛ Bible mu a, wɔaka hia a ohia dɛ wɔhyɛ Jehovah ne dzin no enyimnyam no ho asɛm mpɛn pii. Iyi ho nhwɛdo kakraabi nye yi: ‘Hom mma Jehovah enyimnyam a ɔsɛ ne dzin.’ (1 Mber. 16:29; Ndw. 96:8) “Hom ntow ndwom mma ne dzin n’enyimnyam.” (Ndw. 66:2) “Mebɛhyɛ wo dzin enyimnyam daa daa.” (Ndw. 86:12) Ber bi a Jehovah nankasa fii sor kasae wɔ Jerusalem asɔrfi hɔ no, Jesus kaa kyerɛɛ no dɛ: “Egya, hyɛ wo dzin enyimnyam,” nna Jehovah so kaa dɛ: “Mahyɛ no enyimnyam dada, na mebɛhyɛ no bio.”​—John 12:28. a

Otsia ebiasa, Jehovah ne dzin na dza ɔabɔ ne tsirmu dɛ ɔbɛyɛ no, kor nnkɔ nngya kor. Ɔwodze, dwen ho hwɛ: Aber a Christ dze Mfrenhyia Apem edzi hen ewie, na nsɔhwɛ a otwa tun no so abɛsen kɔ no, ehwɛ a no ho behia dɛ abɔfo na nyimpa kɔ do ara yɛ biribi dze tsew Jehovah ne dzin  no ho anaa? Dza ɔbɔboa ma yeeyi dɛm asɛmbisa yi ano no, hom mma yensusu nokwar a ɔsɛ dɛ nyimpa dzi ma Jehovah, nye no tumdzi a yɛbɛkyerɛ dɛ ɔfata no ho kakra. Dɛm aber no, no ho rinnhia dɛ adasamba kɔ do ara kyerɛ dɛ wobedzi Jehovah nokwar anaa worinndzi no nokwar. Ebɛnadze ntsi na yɛreka dɛm? Osiandɛ dɛm aber no dze, nna wɔasɔ hɔn ahwɛ na bɔn biara so nnyi hɔnho. Ntsi, hɔn nsa bɛka daa nkwa. Dɛmara so na no ho rinnhia dɛ nyimpa na abɔfo bɛyɛ biribi dze akyerɛ dɛ kwan a Jehovah fa do dzi tum no na ɔyɛ papa. Osiandɛ dɛm aber no, nna hɔn a wɔwɔ sor na asaase do nyinara agye ato mu dɛ Jehovah no tumdzi na ɔfata. Naaso, Jehovah ne dzin no so ɛ, ɔbɛda ho ara ayɛ adze tsitsir ama n’asomfo anaa?

Dɛm aber no dze, nna Jehovah ne dzin ho atsew korakora, na obiara so ehu dɛ dza Satan kae no nyinara yɛ akɔhwisɛm. Naaso, Jehovah ne dzin no ho bɔkɔ do ara ayɛ adze tsitsir ama n’asomfo a wɔwɔ sor na asaase do no. Ebɛnadze ntsi a? Osiandɛ wobohu dɛ Jehovah da ho ara reyɛ ndzɛmba a ɔyɛ nwanwa. Dwen ho hwɛ o: Dɛm aber no, Jesus bɛsan dze ahendzi no ama Jehovah, na Nyankopɔn bɛyɛ ‘adze nyina ama obiara.’ (1 Cor. 15:28) Ɔno ekyir no, nyimpa a wɔwɔ asaase do no benya dza Bible frɛ no “Nyankopɔn mba enyimnyam adehyedzi no.” (Rom. 8:21) Afei, dza nna osi Jehovah n’enyi do dɛ ɔbɛma ne mba a wɔwɔ sor na asaase do nyina aka abɔ mu ayɛ ebusua kɛse kor no bɛba mu.​—Eph. 1:10.

Sɛ Jehovah n’ebusua a wɔwɔ sor na asaase do no nyina hu nsɛm a obesisi yi a, wɔbɛyɛ hɔn adze dɛn? Yebotum aka dɛ, yɛbɛpɛ paa dɛ yeyi Jehovah ne dzin krɔnkrɔn no ayɛw da biara. Jehovah no sunsum kaa David ma ɔkaa dɛ: ‘Nhyira nka Jehovah Nyankopɔn. Na nhyira nka n’enyimnyam dzin no daa daa.’ (Ndw. 72:18, 19) Dɛm aber no, da biara yebenya biribi fofor egyina do eyi Jehovah ne dzin no ayɛw, na yɛbɛyɛ dɛm afebɔɔ.

Biribiara a ɔfa Jehovah ho no, ɔnye ne dzin no wɔ biribi yɛ. Adze tsitsir a sɛ wɔbɔ Jehovah ne dzin a ɔba hɛn tsirmu nye no dɔ. (1 John 4:8) Aber biara, yɛbɛkaa dɛ ɔdɔ a Jehovah wɔ ma hɛn ntsi na ɔbɔɔ hɛn, na ɔnam ɔdɔ kor yi ara do ntsi na ɔmaa Jesus bowui maa hɛn. Afei so, hɛn werɛ rimmfir da dɛ kwan a ɔfa do dzi hɛn do hen no tsen, na ofi ɔdɔ mu so na ɔyɛ dɛm. Naaso nnyɛ ɔno nko, daa daa, yɛbɔkɔ do ehu ndzɛmba a Jehovah bɛyɛ ama hɛn dze akyerɛ dɛ ɔdɔ hɛn. Iyi bɛma yɛabɛn hɛn sor Egya no paa na yaatow ayɛyi ndwom ama ne dzin krɔnkrɔn no afebɔɔ.​—Ndw. 73:28.