Sanebimɔi Ni Jɛ Kanelɔi Adɛŋ
Mɛɛ gbɛ nɔ sane ni yitso ji, “Hã ‘Ogbɛ́i Lɛ He Atse’” ni je kpo yɛ June 2020 Buu-Mɔɔ lɛ mli lɛ hã wɔná shishinumɔ hee yɛ Yehowa gbɛ́i lɛ kɛ hegbɛ ni eyɔɔ akɛ eyeɔ jeŋ muu lɛ fɛɛ nɔ lɛ he?
Yɛ nakai nikasemɔ lɛ mli lɛ, wɔkase akɛ sane ni he hiaa waa ni kã adesai kɛ ŋwɛibɔfoi fɛɛ ahiɛ ji, Yehowa gbɛ́i kpeteŋkpele lɛ he ni abaatse lɛ. Dani abaanyɛ atse Yehowa gbɛ́i lɛ he lɛ, saji komɛi yɛ ni esa akɛ ana naa. Nomɛi ji, esa akɛ ana kɛji e-Nɔyeli lɛ nɔ bɛ, ni lɛ ji mɔ ni sa akɛ eyeɔ jeŋ muu lɛ fɛɛ nɔ. Agbɛnɛ hu, esa akɛ ana kɛji adesa ko yɛ ni baaye Yehowa anɔkwa kɛyawula shi.
Mɛni hewɔ bianɛ lɛ, wɔkɛɔ akɛ Yehowa gbɛ́i lɛ kɛ egbɛ́i lɛ he ni abaatse lɛ ji sane ni he hiaa fe fɛɛ yɛ je lɛ mli? Naa yiŋtoi etɛ komɛi ahewɔ ni wɔkɛɔ nakai.
Kɛjɛ be ni atse atua yɛ Eden abɔɔ lɛ mli nɛɛ, Satan etee nɔ ewo Nyɔŋmɔ gbɛ́i lɛ he muji
Klɛŋklɛŋ nɔ lɛ ji, yɛ Eden abɔɔ lɛ mli lɛ, Satan gbe Yehowa he guɔ loo ewo egbɛ́i lɛ he muji. Yɛ sane ni Satan bi Hawa lɛ naa lɛ, eetao etsɔɔ akɛ Yehowa yitsoŋ wa, ni mlai ni ewo Adam kɛ Hawa lɛ yɛ kpɛŋŋ tsɔ. Agbɛnɛ hu, Yehowa kɛɛ amɛ akɛ kɛ́ amɛku emla lɛ mli lɛ amɛbaagboi, shi Satan kɛɛ amɛ akɛ amɛgboiŋ. Yɛ gbɛ ko nɔ lɛ, eetsɔɔ akɛ Yehowa elaka amɛ. Nɛkɛ fee ni Satan wo Yehowa gbɛ́i lɛ he muji. Enɛ hewɔ lɛ ebatsɔ “Abonsam,” ni shishi ji “mɔ ni wieɔ mɔ he efɔŋ.” (Yoh. 8:44) Hawa he Abonsam amale lɛ eye, ni egbo Nyɔŋmɔ nɔ toi. Enɛ ni efee lɛ tsɔɔ akɛ, esumɔɔɔ ni ehiɔ Nyɔŋmɔ nɔyeli lɛ shishi. (1 Mo. 3:1-6) Kɛbashi ŋmɛnɛ lɛ, Satan miimale Yehowa he lolo ni ekɛ miiwo Yehowa gbɛ́i lɛ he muji. Bei pii lɛ, mɛi ni heɔ Satan amalei lɛ amɛyeɔ lɛ gboɔ Yehowa nɔ toi. Enɛ hewɔ lɛ, Nyɔŋmɔ webii lɛ naa Yehowa gbɛ́i krɔŋkrɔŋ lɛ he muji ni awo lɛ akɛ sane fɔŋ ni fe fɛɛ ni akɛye lɛ. Ni no nɔŋŋ ji nɔ ni hɔ naagbai kɛ nibii fɔji fɛɛ ni yaa nɔ yɛ je lɛ mli ŋmɛnɛ lɛ asɛɛ.
Nɔ ni ji enyɔ lɛ, Yehowa etswa efai shi akɛ ebaatse egbɛ́i lɛ he, ni ehã ana akɛ nibii fɔji fɛɛ ni awie yɛ ehe lɛ bɛ mli, ejaakɛ ele akɛ kɛ́ efee nakai lɛ, ŋwɛibɔfoi kɛ adesai fɛɛ baaná he sɛɛ. Enɛ he miihia Yehowa fe nɔ fɛɛ nɔ. Enɛ hewɔ lɛ, ewie akɛ: ‘Bɔ fɛɛ bɔ ni fee lɛ, mafee migbɛ́i kpeteŋkpele lɛ krɔŋkrɔŋ.’ (Eze. 36:23) Agbɛnɛ hu, Yesu hã Yehowa tsuji anɔkwafoi fɛɛ na akɛ, kɛ́ amɛmiisɔle lɛ, nibii ni he hiaa waa ni esa akɛ amɛtsĩ tã lɛ ekome ji, ni amɛbaabi ni Nyɔŋmɔ ‘gbɛ́i lɛ he atse.’ (Mat. 6:9) Biblia lɛ ewie nibii pii ni hãa wɔnaa akɛ, esa akɛ wɔwo Yehowa gbɛ́i lɛ hiɛ nyam. Akɛ nɔkwɛmɔnɔ lɛ, ewieɔ akɛ: “Nyɛkɛ anunyam ni sa Yehowa gbɛ́i lɛ ahãa lɛ.” (1 Kro. 16:29; Lala 96:8) “Nyɛláa kɛjiea enunyam gbɛ́i lɛ yi.” (Lala 66:2) “Mawo ogbɛ́i lɛ hiɛ nyam kɛya naanɔ.” (Lala 86:12) Be ko be ni Yesu yɔɔ Yerusalem sɔlemɔ shĩa lɛ, ewie akɛ: “Ataa, wo ogbɛ́i lɛ hiɛ nyam.” Kɛkɛ ni Yehowa diɛŋtsɛ wie kɛjɛ ŋwɛi ekɛɛ: “Miwo ehiɛ nyam, ni mawo ehiɛ nyam ekoŋŋ.”—Yoh. 12:28. a
Nɔ ni ji etɛ lɛ, kɛ́ Yehowa yiŋtoo lɛ ba mli po lɛ, egbɛ́i lɛ nɔŋŋ baafee nɔ titri ni kã wɔtsui nɔ. Yɛ Kristo Afii Akpe Nɔyeli lɛ sɛɛ be ni aka adesai nɔ ni ji naagbee nɔ kwraa lɛ, te mɛi fɛɛ ni yɔɔ ŋwɛi kɛ shikpɔŋ lɛ nɔ lɛ baana Yehowa amɛhã tɛŋŋ? Ani ehe baahia ni atse Yehowa gbɛ́i lɛ he lolo? Kɛ́ obaakai lɛ, wɔwie akɛ ja ana saji enyɔ komɛi anaa dani abaanyɛ akɛɛ akɛ atse Yehowa gbɛ́i lɛ he. Nomɛi ji, klɛŋklɛŋ lɛ, esa akɛ aná adesa ko ni baaye Yehowa anɔkwa kɛyawula shi. Ni nɔ ni ji enyɔ lɛ, esa akɛ ana akɛ Yehowa nɔyeli lɛ nɔ bɛ, ni lɛ ji mɔ ni sa akɛ eyeɔ jeŋ muu lɛ fɛɛ nɔ. Kɛ́ okwɛ lɛ, ani ebaawa kɛhã adesai ni baafo naagbee kaa lɛ akɛ amɛbaaya nɔ amɛye Yehowa anɔkwa? Dabi. Nakai beiaŋ lɛ, amɛye emuu, aka amɛ akwɛ ni ana akɛ amɛbaaye anɔkwa, ni ahã amɛ hegbɛ akɛ amɛhi shi kɛya naanɔ. Agbɛnɛ hu, ani mɔ ko baanu he akɛ gbɛ ni Yehowa tsɔɔ nɔ eyeɔ nɔ lɛ ejaaa? Dabi. Nakai beiaŋ lɛ, mɛi fɛɛ ni yɔɔ ŋwɛi kɛ shikpɔŋ lɛ nɔ lɛ baafee ekome ni amɛbaakpɛlɛ nɔ akɛ Yehowa nɔyeli lɛ nɔ bɛ. No hewɔ lɛ, yɛ nakai beiaŋ lɛ, mɔ fɛɛ mɔ ena mɔ ni Yehowa ji diɛŋtsɛ, ni atse egbɛ́i lɛ he kwraa.
Kɛ́ nakai lɛ, mɛni hewɔ wɔkɛɔ akɛ yɛ nakai beiaŋ po lɛ, Yehowa gbɛ́i lɛ baafee nɔ ni kã ewebii lɛ atsui nɔ fe nɔ fɛɛ nɔ lɛ? Nɔ hewɔ lɛ ji akɛ, Yehowa baaya nɔ efee nibii ni wɔjwɛŋmɔ shɛɛɛ he po. Bo lɛ susumɔ enɛ he okwɛ: Akɛni Yesu baajɛ heshibaa mli ekɛ nɔyeli lɛ ahã Yehowa hewɔ lɛ, Nyɔŋmɔ baatsɔ “nibii fɛɛ ahã mɔ fɛɛ mɔ.” (1 Kor. 15:28) No sɛɛ lɛ, adesai ni yɔɔ shikpɔŋ lɛ nɔ lɛ baaná “Nyɔŋmɔ bii lɛ anunyam heyeli lɛ.” (Rom. 8:21) Ni enɛ baahã Yehowa yiŋtoo akɛ ebaahã mɛi ni yɔɔ ŋwɛi kɛ mɛi ni yɔɔ shikpɔŋ lɛ nɔ lɛ afee ekome akɛ weku kome lɛ aba mli.—Efe. 1:10.
Te enɛ baahã mɛi ni yɔɔ ŋwɛi kɛ shikpɔŋ lɛ nɔ lɛ anu he amɛhã tɛŋŋ? Enɛ baahã wɔnu he akɛ wɔya nɔ wɔjie Yehowa gbɛ́i ni nɔ bɛ lɛ yi. Akɛ mumɔ tsirɛ lalatsɛ David ni eŋma akɛ: ‘Ajie Yehowa Nyɔŋmɔ yi. Ajie enunyam gbɛ́i lɛ yi kɛya naanɔ.’ (Lala 72:18, 19) Wɔbaana nibii hei kɛ nibii ni yɔɔ naakpɛɛ ni baahã wɔjie Yehowa gbɛ́i lɛ yi kɛya naanɔ.
Yehowa gbɛ́i lɛ hãa wɔnaa mɔ ni eji diɛŋtsɛ. Ehãa wɔnaa akɛ, eyɛ suɔmɔ. (1 Yoh. 4:8) Be fɛɛ be lɛ, wɔbaakai akɛ suɔmɔ ni Yehowa yɔɔ kɛhã wɔ lɛ hewɔ ebɔ wɔ, ehã e-Bi lɛ bagbo kɛkpɔ̃ wɔ, ni eyeɔ wɔnɔ yɛ gbɛ ni nɔ bɛ kwraa nɔ lɛ. Agbɛnɛ hu, akɛni Yehowa baaya nɔ efee nibii ehã wɔ kɛya naanɔ hewɔ lɛ, wɔbaaya nɔ wɔna akɛ esumɔɔ wɔ. Wɔbaaya nɔ wɔsumɔ lɛ akɛ wɔ-Tsɛ, ni wɔbaalá kɛjie egbɛ́i ni yɔɔ nyam lɛ yi kɛya naanɔ.—Lala 73:28.
