Késyon moun-yan ka pozé
Kouman artik « Que ton nom soit sanctifié ! » annan La Tour de Garde jwen 2020 ka chanjé sa nou té ka èspliké parapòrta non Jéova-a ké so souvérènté ?
▪ Annan sa artik-a, nou anprann ki a rounsèl bagaj enpòrtan ki ka touché tout moun ké tout zanj-ya : sanktifikasyon non Jéova-a. É sanktifikasyon non Jéova-a ka maché ké zafè savé si a fason i ka dirijé ki pi bon. I ka maché osi ké zafè savé si moun-yan ké rété fidèl.
Poukisa nou ka di aprézan ki sa ki pi enpòrtan, a non Jéova-a ké so sanktifikasyon ? Annou bay trwa rézon.
Dipi Adan ké Èv tounen yé do bay Bondjé annan jarden Édèn-an, Satan ka sali non Bondjé.
Prémyèrman, annan jarden Édèn-an, Satan ataké non Jéova-a, sa lé di so répitasyon. Késyon i doumandé Èv, a té roun késyon anba anba, i té ka di ki Jéova pa té kontan bay é ki lalwa i té bay Adan ké Èv té tro rèd. Apré sa, i kontrédi Jéova karéman é i di ki i té ka manti. A konsa i sali so non. É i divini « Djab-a », sa lé di « moun ka palé moun mal pou sali yé répitasyon » (Jean 8:44). Kou Èv krè manti Satan té di, i dézobéyi Bondjé é lò i fè sa, i montré ki i pa té lé ki Bondjé sa so chèf ankò (Gen. 3:1-6). Dipi sa jou-a, Satan pa jen arété sali non Bondjé ; jik jòdla, i ka kontinyé manti asou ki kalité moun Bondjé sa. Akoz di sa, sa pi fasil pou sa-ya ki ka krè sa manti-ya dézobéyi Bondjé. Pou sa-ya ki ka sèrvi Jéova, i pa gen anyen ki pi mové pasé tout manti Satan ka di asou non Jéova-a ki sen. A sa èspésyalman ki ka fè ki i gen roun patché soufrans ké méchansté asou latè-a.
Dézyèmman, pou tout so kréyasyon trapé bénédiksyon, Jéova byen désidé sanktifyé so non, sa lé di lavé li di tout mové bagaj yé di asou l’. A roun bagaj ki vréman enpòrtan pou li. A pou sa i di : « Mo ké sanktifyé mo non ki gran, […] asiré pa pitèt » (Ézéch. 36:23). É Jézi byen montré pou ki bagaj tout sa ki ka sèrvi Jéova divèt priyè an prémyé lò i di : « A pou to non sanktifyé » (Mat. 6:9). A pa dé fwa Labib-a ka di ki sa enpòrtan pou bay non Bondjé laglwar. Men déztrwa vèrsé ki ka montré sa : « Bay non Jéova laglwar i mérité » (1 Chron. 16:29 ; Ps. 96:8), « Chanté pou louwé so non ki plen ké laglwar » (Ps. 66:2) é « Mo lé bay to non laglwar pou tout-tan » (Ps. 86:12). Roun jou, Jéova palé dipi laro syèl-a, a té annan Tanp Jérizalèm-an. Pou réponn so Pitit ki té di li : « Papa, glorifyé to non », i di : « Mo ja glorifyé l’ é mo ké glorifyé l’ ankò » (Jean 12:28) a.
Trwazyèmman, projè Jéova-a ké toujou alé ansanm ké so non. Réfléchi asou sa : Kisa ki ké rivé apré dèrnyé éprèv-a, lò 1 000 lannen-yan Jézi ké dirijé ké bout ? Ès zafè sanktifikasyon non Jéova-a ké toujou divizé ni zanj-ya, ni moun-yan asou latè-a ? Pou nou réponn sa késyon-yan, annou sonjé dé bagaj-ya ki ka maché ké yé : fidélité moun-yan ké drwa Jéova gen di dirijé tout inivèr-a. Ès moun-yan ki montré Jéova ki yé fidèl ké divèt kontinyé fè l’ ? Non. Yé ké parfè é yé ké ja montré ki yé fidèl. Yé ké ja rousouvwè lavi pou tout-tan, a ké yé rékonpans. É ès nou ké toujou doumandé nou kò si Bondjé gen drwa dirijé tout inivèr-a ? Ès sa késyon-an ké toujou kontinyé divizé ni zanj-ya, ni moun-yan asou latè-a ? Non. Bondjé ké ja montré ki a fason i ka dirijé-a ki pi bon, é i pa ké gen pou montré sa ankò. Mé, é pou so non ?
Menm si tout moun ké konnèt lavérité asou non Jéova-a é ki so non ké sanktifyé konplètman, sa non-an ké toujou rété sa ki pi enpòrtan pou so sèrvitèr fidèl, ki annan syèl-a, ki asou latè-a. Poukisa ? Paské yé ké wè tout bèl bagaj Jéova ké kontinyé fè. Imajiné sa : Lò Jézi ké viré bay so Papa dominasyon-an ké imilité, ‘Bondjé ké sa tout bagaj pou tout moun’ (1 Cor. 15:28). Atò, moun-yan ké gen « libèrté ké laglwar pitit Bondjé-ya » (Rom. 8:21). A sa moman-an, projè Jéova-a ké ja bout : tout so timoun ki ka rété annan syèl-a ké asou latè-a ké fè roun bèl gran fanmi ki ké rété ansanm ansanm (Éph. 1:10).
Lò tousa ké fèt, kouman fanmi Jéova-a ki ké annan syèl-a ké asou latè-a ké santi so kò ? A pa ti anvi nou ké anvi louwé non Jéova-a ki bèl toubonnman. Men sa David ékri gras a lèspri sen Bondjé : « A pou tout moun louwé Bondjé Jéova […]. A pou tout moun louwé so non ki plen ké laglwar, pou tout-tan » (Ps. 72:18, 19). Wi, nou ké louwé li pou tout-tan paské nou ké toujou gen roun nouvo bagaj ki ké bay nou anvi fè l’.
Non « Jéova »-a ka réprézanté tousa nou Bondjé sa, ké tousa i ka fè. A pou sa, prémyé bagaj sa non-an ka fè nou sonjé, a so lanmou (1 Jean 4:8). Nou pa ké janmen bliyé ki a paské i kontan nou i fè nou, i bay ranson-an é i montré ki a fason i ka dirijé-a ki pi bon. Mé nou ké kontinyé wè l’ ka montré so kréyasyon ki i kontan li. Donk nou ké anvi vin pi pròch ké nou Papa nou kontan é nou ké anvi louwé so non ki plen ké laglwar, pou tout-tan ! (Ps. 73:28).
