Ti reiakinna n te kaongora anne bwa bon tii teuana te bwai ae rangi ni kakawaki ae a irekereke iai aomata nako ao anera, ae katabuan aran Iehova ae kakannato. E irekereke aron Iehova n tautaeka ma te bwai ae rangi ni kakawaki ae katabuan arana. N aron anne, e rangi n irekereke naba ana kakaonimaki n te aro ae eti te aomata temanna, ma te bwai ae rangi ni kakawaki ae katabuan aran Iehova.

Bukin tera bwa ti a kamataataa riki ngkai ae te bwai ae rangi ni kakawaki bon aran Iehova ao katabuana? Ti na nori bukina aika tenua.

Te moan, e kabuakakaa Tatan aran Iehova ke taekana n te onnaroka are i Eten. E bukibuki Tatan n tein ana titiraki nakon Ewa, bwa Iehova bon te Atua ae ribuaka ao a riao ana kaetieti nakoia Ana aomata. Imwina ao Tatan e a kauntabaa ana taeka Iehova n arona ni bukinna bwa te Atua ngaia ae te tia kewe. Ngaia are e uaraoa aran Iehova. E a riki iai bwa “te Riaboro,” ae nanona “te tia uarao.” (Ioa. 8:44) Ibukina bwa e kakoauaa ana kewe Tatan Ewa, e a aki ongeaba iai iroun te Atua ao ni kaitaraa riaina n tautaeka. (KBwaai 3:​1-6) E teimatoa n uaa ngkai Tatan n uaraoa aran te Atua, n arona ni kabutiinako keewe ibukin Iehova. A aki naba ongeaba iroun Iehova naake a kakoauai keewe akanne. Ngaia are irouia ana aomata te Atua, uaraoan aran Iehova ae tabu bon te mwakuri n ribuaka ae riao. Anne raoi bukin taabangakin te rawawata ni kabane ma te buakaka n te aonnaba aei.

Te kauoua, e motikia Iehova bwa e na katabua arana, ao ni kaitiakia mani kabuakakaana ibukini kakabwaiaaia ana karikibwai. Anne bon te bwai ae rangi ni kakawaki iroun Iehova. E kangai: “N na boni katabua arau ae kakannato.” (Etek. 36:23) Ao e katerea Iesu bwa tera ae riai ni moani kakawaki n aia tataro ana toro aika kakaonimaki ni kabane Iehova, ngke e kangai: “E bia katabuaki aram.” (Mat. 6:9) E okioki te Baibara ni katuruturua kakawakin neboan aran Iehova. Iangoi katoto aikai: “Neboa Iehova ibukin arana.” (1Rong. 16:29; TaiAre. 96:8) “Anene n neboa arana ae mimitong.” (TaiAre. 66:2) “N na neboa aram n aki toki.” (TaiAre. 86:12) N te taina ngke e taetae Iehova mai karawa n te tembora are i Ierutarem, ao e kangai Iesu: “Tamau, neboa aram.” Ao Iehova e kaeka ni kangai: “I a tia n neboia ao N na manga neboia riki.”​—Ioa. 12:28. a

Te katenua, e irekereke ana moani kantaninga Iehova ma arana, ke taekana. Iangoia: Tera ae e na riki imwin te kabanea ni kataaki n tokin Ana Tautaeka Kristo ae Maanna Tenga te Ririki? E na tera aia iango anera ma aomata n te tai anne ni kaineti ma te bwai ae rangi ni kakawaki ae katabuan aran Iehova? Ibukini buokara ni kaekaa te titiraki anne, ti na kauringi moa baika kakawaki aika  uoua, ae ana kakaonimaki n te aro ae eti te aomata ao riain te Atua n tautaeka i aoni bwaai ni kabane. A na teimatoa aomata aika kakaonimaki n te tai anne, ni kangaanga irouia kateimatoaani kakaonimakia n te aro ae eti? A aikoa. A nang kororaoi ao n tia raoi ni kataaki. E a reke irouia te maiu are aki toki. E na teimatoa n uneakinaki riain te Atua n tautaeka i aoni bwaai ni kabane, ao ni karekea te kakaokoroaki irouia aomata ma anera? E na aki. E nang aki manga kabarekaaki riain Iehova n tautaeka. Ma tera aron aran Iehova?

E nang katabuaki n te tai anne aran Iehova ao e nang aki manga uaraoaki. Ma e nang riki bwa te bwai ae moan te kakawaki irouia ana toro ni kabane aika i karawa ao i aon te aba. Bukin tera? Ibukina bwa a nang nora Iehova n teimatoa ni karaoi baika kamimi. Iangoa aei: Ibukina bwa e nang kaoka te mwaaka n tautaeka Iesu ma te nanorinano nakon Iehova, e nang riki ngkanne te Atua bwa “bwaninin bwaai ni kabane nakoia aomata nako.” (1Kor. 15:28) Imwin anne, a nang bane aomata aika i aon te aba ni karekea “te inaomata ae rianako arona ae reke irouia natin te Atua.” (IRom 8:21) Ao Iehova e nang kakoroa nanon ana kantaninga are a nang katiteuanaaki natina aika i karawa ao i aon te aba bwa tii te utuna.​—IEbe. 1:10.

E na tera aron rotakia ana utu Iehova aika i karawa ao i aon te aba imwin rikini baikai ni kabane? Ni koauana e na teimatoa ni korakora nanora ni kani karaoiroa aran Iehova ae tamaroa. E kairaki te tia areru are Tawita bwa e na korea aei: “Ke e karaoiroaki Iehova ae te Atua . . . Ke e karaoiroaki n aki toki arana ae mimitong.” (TaiAre. 72:​18, 19) Ti na teimatoa n aki toki ni karekei bukina aika boou ma ni kamimi, ae ti na karaoa iai anne.

Ngaia are aran Iehova e kaotii bwaai ni kabane ibukina. Ae kakawaki riki, ti kauringaki ana tangira man arana. (1Ioa. 4:8) Ti na teimatoa n uringnga ae e karikira Iehova ibukin ana tangira, e katauraoa te karea ni kaboomwi ibukin ana tangira, ao e tautaeka ma te raoiroi ibukin ana tangira. Ma ti na teimatoa n nora aron Iehova ni kaotiota tangiraia ana karikibwai n aki toki. Ao ti nang kaaniaki riki nakoina bwa kaanga Tamara ao n anene ni karaoiroa arana ae mimitong n aki toki.​—TaiAre. 73:28.