Dalam artikel nya, kitai belajar bisi siti pekara ti penting ke bisi kaul enggau semua mensia sereta bala melikat, iya nya nguduska nama Jehovah. Nama utai bukai ke disengkaum ba pekara tu? Kati chara Jehovah merintah nya chara ti pemadu badas? Kati mensia deka mengkang taluk ngagai Jehovah?

Nama kebuah diatu kitai ngumbai pekara ti pemadu penting nya bisi kaul enggau nama Jehovah sereta nguduska nama Iya? Kitai deka beratika tiga iti kebuah.

Kesatu, Sitan ngenyaika nama Jehovah tauka reputasi Iya ba taman Eden. Sitan ngena tanya ti licik lebuh berandau enggau Awa. Iya deka Awa ngumbai Jehovah nya Petara ti kedekut lalu pesan ke diberi Iya ngagai Adam seduai Awa enda adil. Udah nya, Sitan nyebut utai ti belaban enggau jaku Jehovah. Enggau nya, Sitan madahka Petara nya pemula. Nyadi, iya udah ngenyaika nama Jehovah. Iya nyadi “Iblis,” ke mai reti “orang ke ngenyaika nama manah orang bukai.” (Pem. 12:9; Jhn. 8:44, nota kaki) Awa pechayaka pemula Sitan. Nya kebuah iya enda ngasika Petara. Tu nunjukka iya enggai Jehovah nyadi pemerintah iya. (P-kal. 3:1-6) Nyentuk ngagai diatu, Sitan agi ngenyaika nama Petara, lalu ngerembaika pemula pasal Jehovah. Kesuah iya, sida ke pechayaka pemula Sitan enda ngasika Jehovah. Nyadi, ba nembiak Petara, lebuh nama Jehovah ti kudus dipejai, nya utai ti amat enda adil. Nya meh pun semua pemerinsa enggau penyai ba dunya tu.

Kedua, Jehovah keran deka nguduska nama Iya, lalu muai tiap iti jaku tuduh ke bisi kaul enggau nama Iya. Jehovah keran deka ngereja nya ke penguntung semua utai ti idup. Nya meh utai ti pemadu penting ba Jehovah. Nya kebuah Iya madahka: “Aku mandangka pengudus nama Aku ti besai.” (Esk. 36:23) Lalu Jesus enggau terang madahka utai ti pemadu penting ke patut disampika bala nembiak Jehovah, iya nya: “Apai kami ti ba serega, kudus meh nama Nuan.” (Mat. 6:9) Lalu Bup Kudus mayuh kali madahka kebuah nya penting ngemuliaka nama Jehovah. Peratika sekeda chunto: ‘Puji meh nama Jehovah ti bemulia.’ (1 Ban. 16:29; Mas. 96:8) “Belagu ngemuliaka nama Iya.” (Mas. 66:2) “Aku deka ngemesaika nama Nuan belama iya.” (Mas. 86:12, NWT) Bisi sekali, Jehovah bejaku ari serega. Utai tu nyadi ba Rumah Sembiang di Jerusalem. Dia Jesus madahka: “Apai, muliaka nama Nuan.” Jehovah lalu nyaut: “Aku udah ngemuliaka nama Aku, lalu deka ngemuliaka iya baru.”—Jhn. 12:28. a

Ketiga, tuju Jehovah seruran bisi kaul enggau nama Iya, tauka reputasi Iya. Perundingka tu: Nama deka nyadi pengudah penguji ti penudi ba pengujung Seribu Taun Kristus Merintah? Ba maya nya, nama asai ati bala melikat enggau bala mensia pasal nama Jehovah? Kati sida agi deka bepechah-belah ketegal utai tu? Kena nyaut tanya nya, perundingka baru dua utai bukai ke bisi kaul enggau pekara ti penting tu, iya nya penaluk mensia ngagai Jehovah sereta hak Jehovah merintah.  Kati mensia deka terus diuji kena nemu sekalika sida deka mengkang taluk ngagai Jehovah tauka enda? Enda. Maya nya, sida udah nyadi sempurna lalu Jehovah nemu sida endang taluk ngagai Iya. Sida mega udah bulih pengidup ti meruan belama iya. Pia mega, kati isu pasal hak Jehovah merintah deka terus ngasuh bala melikat enggau bala mensia bepechah-belah? Enda. Maya nya, semua bala melikat enggau bala mensia ba dunya deka beserakup lalu nyukung pemerintah Jehovah. Tang, baka ni enggau nama Jehovah deh? Kati iya agi penting?

Maya nya ila, semua orang deka nemu utai ti bendar pasal Jehovah, lalu nama Iya deka dikuduska. Nama Jehovah deka terus nyadi utai ti pemadu penting ke semua bala nembiak Iya, enda ngira ba serega tauka ba dunya. Nama kebuah? Laban sida deka meda Jehovah terus ngereja utai ti ngalitka ati. Peratika tu: Jesus enggau baruh ati deka nyerahka Perintah iya ngagai Petara Jehovah. Ketegal nya, Jehovah “siku aja ke deka nyadi pemerintah atas semua utai.” (1 Kor. 15:28) Pengudah nya, bala mensia ba dunya deka gaga ati laban sida “bulih pengelepas enggau mulia nyadi anak Petara.” (Rom. 8:21) Enggau nya, tuju Jehovah deka dikeamatka. Iya deka ngembuan siti ruang bilik ti beserakup. Ruang bilik nya deka nyengkaum semua bala melikat ba serega enggau bala mensia ba dunya.—Eps. 1:10.

Pengudah semua utai tu nyadi, baka ni asai ati ruang bilik Jehovah ba serega enggau ba dunya? Endang amat, kitai keran deka terus muji nama Jehovah. Nengah iring ari kuasa kudus, pemasmur David madahka: ‘Pujika Petara Jehovah. Pujika nama Iya ti bemulia belama iya!’ (Mas. 72:18, 19) Kitai deka terus tetemuka kebuah ti baru kena muji nama Jehovah belama iya. Endaka nya ngagitka ati?

Kitai ulih nemu semua utai pasal Jehovah ari nama Iya. Nama Iya ngingatka kitai pasal pengerindu Iya. (1 Jhn. 4:8) Ketegal pengerindu, Jehovah ngaga kitai. Ketegal pengerindu, Iya nyediaka kitai genselan tebus. Lalu ketegal pengerindu, Iya merintah kitai enggau chara ti lurus. Au, kitai deka seruran ingatka pengerindu ke diayanka Jehovah ngagai kitai. Tang kitai deka terus ngasaika pengerindu Jehovah ke kitai belama iya. Tu deka meransang kitai majak semak enggau Apai kitai, Jehovah, lalu belagu muji nama Iya belama iya.—Mas. 73:28.