Ipu ikpɛyi ɛlā ɔɔma, alɔ nwu ka ó lɛ ɛlā ocɛgbá nɛhi éyi nōo lɛ abɔ kwu ɛjɛɛji alɛɛcɛ mla aalelekwu otɛhɔ a. Ó lɛ ō ya mla ō lɛ iye ku Ujehofa ya tiihɔ. Ɔdaŋ ka ɔwɛ ō lé ɔcɛ́ ku Ujehofa lɔhi amāŋ ka ó lɔhi ŋ, tɛɛma kwu ō tiihɔ ku iye ku nu a. Ɔwɛ ekponu ɔɔma, ɔdaŋ ka ɔcɛ hayi kpaakpa lɛ Ujehofa amāŋ ka ó hayi kpaakpa lɛ ɔ ŋ, tɛɛma kwu ɛlā ocɛgbá nōo lɛ ō ya mla ō lɛ iye ku Ujehofa ya tiihɔ a duu.

Ɔdiya nɛ alɔ yɔ i ka babanya ka ɛlā ocɛgbá fiyɛ duu a, lɛ ō ya mla iye ku Ujehofa mla ō lɛ ɔ ya tiihɔ a? Alɔ leyi yɛ aɔdā ɛta nōo ya a.

Aflɛyi, ipu iga ku Idɛn, Usetan lɛ iye ku Ujehofa biya klla lɛ ɛkɛmgbɛ ka lɛyikwu ɛdɔ ɔcɛ nɛ ó wɛ a. Ɔka nɛ Usetan da Iifu a yɔ i mafu ka Ujehofa i wɛ ɔcɛ o nwula abɔ ŋ, ka ɔdā nɛ ó klla da Adam mla Iifu kéē ya a i wɛ ɔdā okpaakpa ŋ. Usetan klla lɛ ɛlā nōo wɛ ɛyɛɛyi gwu ɛlā nɛ Ujehofa ka a da uwa. Ó yɔ i ka ɔkwɔɔkwɛyi ka Ɔwɔico wɛ ɔcɛ o kɛmgbɛ. Ohigbu ɛnyā, ó lɛ ɛkɛmgbɛ ka lɛyikwu ɛdɔ ɔcɛ nɛ Ujehofa wɛ a. Ó kwu piya “Ebilíi,” nɛ ɛyi nu wɛ u ‘ɔcɛ o kɛmgbɛ a.’ (Ujɔ́n. 8:44) Ohigbu ka Iifu kpɔtuce aɛlā ɛkɛmgbɛ ku Usetan nyā a, ó lɛ íne ku Ɔwɔico biya nōo mafu ka ó dɔka ku Ɔwɔico kóō wɛ ɔcɛ́ ku nu ŋ ma. (Ohút. 3:1-6) Jaa kwu icɛ, Usetan gɔbu yɔ i kɛmgbɛ lɛyikwu ɛdɔ ɔcɛ nɛ Ujehofa wɛ a. Ācɛ nōo gē jahɔ tu aɛlā ɛkɛmgbɛ ɛgɛnyā a lɔfu ta ō lɛyitaajɛ lɛ Ujehofa. Ohigbu ɛnyā, lɛ ācɛ ɔlɛ Ɔwɔico iye otiihɔ ku Ujehofa néē biya a wɛ ɔdobɔbi nōo fiyɛ duu a. Ɔɔma ya ɛɛ nɛ alɔ yɔ i má owe nɛɛnɛhi icɛ, nɛ ɔdobɔbi klla kpɔ ipu ɛcɛ ku alɔ nyā a.

Ɔmpa, o ya ɛɛ ku ɛjɛɛji aɔdā nɛ Ɔwɔico ya a kéē lɛ itene ofluflu alɛɛcɛ mla aalelekwu otɛhɔ, Ujehofa géē lɛ iye ku nu ya tiihɔ ŋma ɛjɛɛji uweyi néē je lɛ iye ku nu a. Ɔɔma wɛ ɔdā nōo cɛgbá lɛ Ujehofa fiyɛ duu a. Ɔɔma ya ɛɛ nɛ ó ka kahinii: ‘N géē lɛ iye ku um ya tiihɔ piii’ a. (Isík. 36:23) Ujisɔsi kē lɛ ɔ teyi peee ɔdā nōo cika ō cɛgbá fiyɛ duu ipu ɔkɔ ō gba ku ɛjɛɛji ācɛ nōo gē gba Ujehofa ɛ̄gbā kpaakpa a. Ó kahinii: “Yá ká ācɛ kéē lɛ ojīlīmā ce iyē otīihɔ kú uwɔ.” (Umát. 6:9) Ubáyíbu kɛla igbalɛwa lɛyikwu ɔdā nōo ya nōó cɛgbá ku alɔ yɔ i cɛtra iye ku Ujehofa a. Leyi yɛ aocabɔ ōhī: “Aá cɛ̄tra ɛ́gɛ́nɛ̄ Óndú tū ɛgahi lɛ ā.” (1 Uklɔ. 16:29; Aíjē 96:8) “Aá gwíijē kú ɛgahi kú iyē kú nū.” (Aíjē 66:2) ‘N géē cɛtra iye ku uwɔ piyoo.’ (Aíjē 86:12) Ɛpleeko éyi nɛ Ujehofa abɔyi nu kɛla ŋma ɔkpanco a, ya ipu agbliihɔ nōo yɔ Ujɛrusalɛm ɛga nɛ Ujisɔsi kahinii: “Ádā, cɛ̄tra iyē kú uwɔ.” Ujehofa toohi kahinii: “N le cɛ̄tra anú ɛɛ́, n klla géē cɛ̄tra anú ɔhá kpɔ́.”—Ujɔ́n. 12:28. a

Ɔmɛta, ococɛ ku Ujehofa géē tɛɛma kwu iye ku nu eko doodu, amāŋ ɛdɔ ɔcɛ nɛ ó wɛ a. Leyi yɛ ɛgɛ nɛ iye ku Ujehofa géē cɛgbá nɛhi lɛ igbihi ku ojama amoomɛ oŋmɛyi ku Ihayi Ula Ɛpa Ce Ofu Igwo Nɛ Ukraist Géē Lé Ɔcɛ́ a. Ɛgɛnyá nɛ ɔtu gáā ya ɛjɛɛji aalelekwu otɛhɔ mla alɛɛcɛ lɛyikwu iye ku  Ujehofa eko ɔɔma a? O ya ɛɛ ku alɔ cila ɔka ɔɔma, alɔ leyi yɛ aɔdā ɛpa nōo cɛgbá nɛhi a. Ō hayi kpaakpa ku alɛɛcɛ mla íkwu nɛ Ujehofa lɛ ō lé ɔcɛ́ ku oduudu ɛcɛ a. Ɛpleeko ɔɔma, ó gáā cɛgbá ku alɛɛcɛ kéē mafu ɔdaŋ ka é géē hayi kpaakpa lɛ Ujehofa gɛ ŋ. É géē jila iyē mɛɛlɛ klla géē cika jɛ ipu aya doodu. É klla géē lɛ ɛhi ku oyeeyi opiyoo miyɛ duu ɛ. Ó klla gáā wɛ ɔdā ocɛgbá ō mafu ɔdaŋ ka ɔwɛ ō lé ɔcɛ́ ku Ujehofa wɛ ɛ̄nɛ̄ o lɔhi fiyɛ duu a gɛ ŋ. Ɛpleeko ɔɔma, ɛjɛɛji ācɛ nōo yɔ ɔkpanco mɛmla ɛcɛ nyā géē piyatɔha klla géē cɛ ku Ujehofa kóō wɛ ɔcɛ́ ku uwa. Amáŋ eko ɔɔma, iye ku Ujehofa klla géē wɛ ɔdā ocɛgbá fiyɛ duu lɛ ācɛ ɔlɛ nu?

Ɛpleeko ɔɔma, ɛjɛɛji ācɛ géē jé ɔkwɛyi lɛyikwu Ujehofa, iye ku nu klla géē le ya tiihɔ aya doodu. Amáŋ, iye ku Ujehofa géē gɔbu wɛ ɔdā nōo cɛgbá fiyɛ duu lɛ ācɛ ɔlɛ nu nōo yɔ ɔkpanco mɛmla ɛcɛ a. Ɔdiya a? Ohigbu ka é géē má Ujehofa gɔbu yɔ i ya aɔdā ohidaago. Leyi yɛ ɛlā nyā: Ohigbu ka Ujisɔsi géē tu iyi nu waajɛ i je ɛjɛɛji íkwu ku ɔcɛ́ ō lé a lɛ Ujehofa a, Ɔwɔico géē “lé ɔcɛ́ kú odúúdú ɔdā dóódu.” (1 Ukɔ́r. 15:28) Igbihi ɔɔma, alɛɛcɛ nōo yɔ ipu ɛcɛ nyā géē jɔɔnyɛ ohɛta “ɔwɛ ohéyī fuú nɛ̄hi kú ayí Ɔwɔicō ā.” (Uróm 8:21) Ujehofa klla géē ya okonu ō ce ku nu jila ō lɛ apɔlɛ ekponu nōo piyatɔha nōo lɛ ō ya mla ayi nu nōo yɔ ɔkpanco mɛmla ɛcɛ a.—Āfi. 1:10.

Igbihi nɛ ɛjɛɛji aɔdā nōo ba nyā le ya, ɛgɛnyá nɛ ɔtu gáā ya apɔlɛ ku Ujehofa nōo yɔ ɔkpanco mɛmla ɛcɛ a? Ó lɛ aafu ŋ, alɔ géē lɛ unwu nɛhi ō cɛtra iye ku Ujehofa kpɔ. Udefidi nōo wɛ ɔcɛ éyi nōo ta ɔkpá ku Aíjē Kú Ɛ̄gbā a kahinii: “Aá cɛ̄tra Óndú ā . . . Aá cɛ̄tra anú piyóó kóō lɔfú tōōtɔ̄ɔ̄.” (Aíjē 72:18, 19) Jaa gā ogboogbo ɛcɛ, alɔ géē gɔbu yɔ i má aɔdā ɛpɛpɛ mla aɔdā ō he alɔ ɔtu nōo ya nɛ alɔ cika ō cɛtra iye ɔɔma.

Da ma, iye ku Ujehofa kwɛyi ɛjɛɛji ɔdā doodu lɛyikwu ɔ. Eko duuma nɛ alɔ gbɛla lɛyikwu iye ku Ujehofa, alɔ gē gbɛla lɛyikwu ihɔtu ku nu. (1 Ujɔ́n. 4:8) Alɔ géē gɔbu yɔ i bla eko doodu lɛyikwu ihɔtu nɛ Ujehofa mafu lɛ alɔ eko nɛ ó ya alɔ a, mla ihɔtu nɛ ó mafu lɛ alɔ eko nɛ ó je Ɔyinɔnyilɔ ku nu gwɛɛya ohigbu alɔ a. Alɔ klla géē bla eko doodu ka ɔwɛ ō lé ɔcɛ́ ku nu le kpaakpa klla gē lé ɔcɛ́ ɔwɛ ku ihɔtu. Jaa gā ogboogboo ɛcɛ, ó géē lɛ abɔ kwu alɔ ɔtu ō tubla Adā alɔ ajaajɛ klla gwiije ō cɛtra iye otiihɔ ku nu a.—Aíjē 73:28.