Iina da paat de, wi did lorn se a riili wan big ting aal a di ienjel dem an evribadi we de pan ort afi du, an dat a fi rispek Jeuova niem. An wan neda likl paat a it a dat evribadi afi ansa an shuo se dem biliiv se Jeuova av di rait fi ruul, an im a di bes sumadi fi ruul uova evribadi an evriting. An wan neda likl ting we av fi du wid dis a ef piipl a-go du wa Jeuova waahn dem fi du kaa dem waahn fi dwi’it.

Wa mek wi se di big ting av fi du wid Jeuova niem an ef piipl a-go big it op? Mek wi luk pan chrii riizn wa mek wi se so.

Di fos ting a dat iina di gyaadn a Iidn, Sietan tel lai pan Jeuova an chrai fi mash op im gud niem. Di kwestiyan we Sietan did aks Iiv iina di gyaadn a Iidn a did fi mek Jeuova luk laik se Im a no wan Gad we kain tu piipl an se im no fier wid di sitn we im aks Adam an Iiv fi no du. Den Sietan tel Iiv sitn difrant fram wa Jeuova tel ar. Dat miin tu se im a se Jeuova a laiyad. So a da taim de im ton Sietan ‘di Devl’ kaa im tel lai pan Jeuova. (Jan 8:44) An kaa Iiv biliiv wa Sietan se, shi no du wa Gad se. So shi shuo se shi neehn biliiv se a Jeuova av di rait fi ruul ar. (Jen. 3:1-6) An fram da taim de til nou, Sietan no tap tel lai pan Jeuova. An di piipl dem we biliiv Sietan, muor taim a dem naa du wa Jeuova waahn dem fi du. Jeuova piipl fiil se fi tel lai pan Jeuova a di wos ting sumadi kuda du. An a dem lai ya mek wi av so moch wikidnis iina di worl ya nou.

Di sekan ting a dat Jeuova a-go mek evribadi nuo di chuut bout im an im niem we a-go mek tingz wok out gud fi evribadi an evriting we im mek. An dis a wan big ting we Jeuova waahn du rait ya nou. An a das wai im mek wi nuo se im a-go mek piipl av nof rispek fi im niem. (Izii. 36:23) An Jiizas mek wi nuo se dis a wan a di big sitn dem we wi fi prie bout wen im did se: “Mek piipl av nof rispek fi yu an yu niem.” (Mat. 6:9) An a muor dan wan taim di Baibl mek wi si se a wan big ting fi big op Jeuova niem. Laik it tel wi se wi fi gi Jeuova niem di big op we it fi get. (1 Kr. 16:29; Sa. 96:8) An di Baibl mek wi nuo se wi fi sing an big op Jeuova niem. (Sa. 66:2) An wan a di man dem we did rait wan a di Saamz se: “Mi a-go big op yu niem fi eva.” (Sa. 86:12) Wan a di taim wen Jiizas did ier Jeuova a taak tu im fram evn a wen im did iina Gad ous iina Jeruusilem. Jiizas se: “Faada, big op yuself an yu niem!” An Jeuova ansa im an se: “Mi big it op aredi, an mi gweehn big it op wan neda taim.”​—Jan 12:28. a

Di tord wan a dat evriting we Jeuova plan fi du iina di fyuucha av fi du wid im niem tu ar wid wa piipl av fi se bout im. Yu tingk se afta di Touzn Ier don an di laas tes gwaan, piipl a-go de big op Jeuova niem an som  naa go de big it op? Fi ansa da kwestiyan ya, wi afi tingk bout tuu sitn we wi taak bout aredi. Di tuu ting we wi taak bout aredi a ef piipl a-go du wa Jeuova waahn dem fi du no mata wa, an tuu, ef Jeuova a di bes sumadi fi ruul uova piipl. Wi nuo se bai di taim di laas tes don, evribadi a-go porfek, so piipl a-go de du wa Jeuova waahn dem fi du. An dem du tingz aredi we shuo se dem tingk se Jeuova a di bes ruula. An dem taim de, nobadi na’afi go de taak bout a uu a di bes sumadi fi ruul wi, evribadi a-go don nuo aredi se Jeuova a di bes sumadi fi ruul uova wi. Yu tingk se piipl a-go tap big op Jeuova niem dem taim de? Dem taim de evribadi pan di ort a-go de big op Jeuova niem, nobadi naa go tel no lai pan im. Bot wa mek piipl a-go stil a taak bout Jeuova niem?

Dem a-go stil a taak bout Jeuova niem kaa dem a-go si Jeuova a du som uol iip a nais sitn fi dem. Da taim de, Jiizas a-go gi bak di Kindom govament tu Jeuova. An Gad a-go “ruul uova evriting.” (1 Kor. 15:28) An afta dat, Gad a-go frii evribadi we de pan di ort “an gi dem aal a wa im av pudong fi im pikni dem.” (Ruo. 8:21) An da taim de Jeuova a-go get fi du wa im did waahn fi du fram lang taim, dat a fi mek evribadi we de pan ort an we iina evn bi wan big api fambili.​—Ifii. 1:10.

Afta aal a dem sitn ya apm, wa a-go apm tu Jeuova piipl dem we de iina evn an we de pan ort? Wi a-go aalwiez waahn fi big op Jeuova niem. Jeuova did mek Dievid rait an se im waahn Jeuova fi get big op, an im waahn piipl fi big op Im niem fi eva. (Sa. 72:18, 19) Wen wi a liv fi eva, wi a-go aalwiez av riizn fi a big op Jeuova niem.

Wen wi tingk bout it, Jeuova niem av fi du wid evriting bout im. An wan ting we it mek wi memba bout Jeuova a ou im lov wi. (1 Jan 4:8) Wi a-go aalwiez memba se Jeuova mek wi kaa im lov wi. An wi a-go memba se im sen im son Jiizas fi kom ded fi wi, an wi a-go aalwiez memba se di wie ou im a ruul uova wi a kaa im lov wi an im a du wa rait. An wi a-go gwaan si se im a du tingz we shuo se im lov wi an evriting we im mek. An fi eva an eva wi a-go a jraa niera an niera tu wi Faada Jeuova, an wi a-go sing an big op im niem.​—Sa. 73:28.