Na disolo yina, beto longukaka nde kele ti kima mosi ya mfunu mingi sambu na bigangwa yonso ya mayele: kusantisa zina ya nene ya Yehowa. Luyalu ya Yehowa kele ya kuluta mbote. Yo kele mpi na kati ya kima yina ya kuluta mfunu. Kwikama ya bantu na Yehowa kele mpi na kati na yo.

Ntangu yai, sambu na nki beto ke bula munsonso nde zina ya Yehowa mpi kusantisa yo kele mambu ya kuluta mfunu? Beto tadila bikuma tatu ya ke monisa yo.

Ya ntete, na kilanga ya Edeni, Satana vwezaka zina ya Yehowa to bebisaka lukumu na yandi. Ngiufula yina Satana yulaka Eva vandaka kumonisa bonso nde, Yehowa kele Nzambi yina ke kabaka ve mpi nde bansiku na yandi kele ve ya mbote. Na nima, Satana buyaka mambu yina Yehowa tubaka mpi yandi tubaka nde Yehowa kele luvunu. Yandi tubaka mambu ya luvunu sambu na zina ya Nzambi. Yandi kumaka “Diabulu,” disongidila “muntu yina ke kusilaka bantu ya nkaka makambu.” (Yoa. 8:44) Eva ndimaka mambu ya luvunu yina Satana tubaka, yo yina yandi lemfukilaka ve Nzambi. Yo monisaka nde yandi buyaka luyalu ya Nzambi. (Kuy. 3:1-6) Tii bubu yai, Satana ke landaka kutuba mambu ya luvunu sambu na Yehowa. Bantu yina ke landaka mambu ya luvunu yina Satana ke tubaka ke lemfukilaka ve Yehowa. Sambu na bansadi ya Nzambi, mambu ya luvunu yina bo ke tubaka sambu na zina ya santu ya Yehowa kele kima ya kuluta mbi. Yo kele na kisina ya bampasi yonso mpi ya mambu yonso ya mbi yina ke salama na ntoto.

Ya zole, sambu na mambote ya bima yonso yina yandi me salaka, Yehowa ta santisa zina na yandi disongidila yandi ta katula mambu yonso yina ke vwezaka yo. Yo kele kima ya kuluta mfunu sambu na Yehowa. Yo yina yandi ke tuba nde: “Mono ta santisa kibeni zina na mono ya nene.” (Ezek. 36:23) Yezu mpi tubilaka kima ya kuluta mfunu yina bansadi yonso ya kwikama ya Yehowa fwete samba sambu na yo. Yandi tubaka nde bo fwete samba nde: “Zina na nge kuvanda ya santu.” (Mat. 6:9) Mbala mingi Biblia ke tubilaka mfunu ya kukumisa zina ya Yehowa. Beto tadila mwa bambandu: “Beno pesa Yehowa nkembo yina me fwana na zina na yandi.” (1 Bans. 16:29; Nk. 96:8) “Beno yimba bankunga sambu na kukumisa zina na yandi ya nkembo.” (Nk. 66:2) “Mono ta pesa zina na nge nkembo kimakulu.” (Nk. 86:12) Kilumbu mosi na tempelo ya Yeruzalemi, Yezu tubaka nde: “Tata, pesa zina na nge nkembo.” Yehowa yandi mosi vutudilaka yandi katuka na zulu nde: “Mono me pesaka yo nkembo mpi mono ta pesa yo diaka nkembo.”​—Yoa. 12:28. a

Ya tatu, lukanu ya Yehowa ke wakana ti zina na yandi to lukumu na yandi. Beto tadila ngiufula yai: Inki ta salama na nima ya kumekama ya bantu na nsuka ya Luyalu ya Bamvula Funda ya Kristu; keti bawanzio mpi bantu ta landa kuvanda ya kukabwana na mambu ya me tala kusantisa zina ya Nzambi? Sambu na kupesa mvutu na ngiufula  yina, beto tadila diaka mambu zole ya mfunu ya me tala kusantisa zina ya Nzambi: kwikama ya bantu na Yehowa mpi luyalu na yandi. Na ntangu yina, yo ta vanda diaka ve mfunu sambu bantu kumonisa nde bo kele ya kwikama na Yehowa. Bantu ta vanda ya kukuka mpi bo ta vanda dezia ya kumekama mbote-mbote. Bo ta zinga mvula na mvula. Diaka, yo ta vanda ve mfunu na kumonisa nde mutindu ya Yehowa ya kuyala kele ya kuluta mbote. Na ntangu yina, bantu yonso na ntoto mpi na zulu ta vanda na bumosi mpi ta ndima luyalu ya Yehowa. Ebuna, nki ta kumina zina ya Yehowa?

Zina ya Yehowa ta vanda kibeni ya santu mpi bantu yonso ta zaba kieleka ya me tala yandi. Kansi, yo ta landa kuvanda kima ya kuluta mfunu sambu na bansadi ya Yehowa yonso na zulu mpi na ntoto. Sambu na nki? Sambu bo ta mona mutindu Yehowa ta landa kusala mambu ya kuyituka. Beto tadila diambu yai: Na kudikulumusa yonso, Yezu ta vutula Kimfumu na maboko ya Yehowa mpi Yehowa ta ‘vanda bima yonso sambu na bantu yonso.’ (1 Bak. 15:28) Na nima na yo, bantu yonso na ntoto ta baka “kimpwanza ya nkembo ya bana ya Nzambi.” (Bar. 8:21) Mpi Yehowa ta lungisa lukanu na yandi ya kuvukisa bana na yandi yonso na ntoto mpi na zulu sambu bo vanda dibuta mosi ya nene mpi ya ke zinga na bumosi.​—Baef. 1:10.

Kana mambu yina yonso me salama, nki mutindu dibuta ya Yehowa na ntoto mpi na zulu ta wa? Ya kieleka, beto ta vanda ti nzala ya ngolo ya kukumisa zina ya kitoko ya Yehowa. Na lusadisu ya mpeve santu, muyimbi-bankunga Davidi sonikaka nde: “Bika Yehowa Nzambi kubaka lukumu . . . Bika bo kumisa zina na yandi ya nkembo kimakulu.” (Nk. 72:18, 19) Ntangu yonso yina beto ta zinga mvula na mvula, beto ta landa kuvanda ti bikuma ya mbote mpi ya mpa yina ta sadisa beto na kukumisa Yehowa.

Zina ya Yehowa ke tendula mambu yonso sambu na yandi. Diaka, zina ya Yehowa ke yibusaka beto zola na yandi. (1 Yoa. 4:8) Beto ta landa kuyibuka nde Yehowa me salaka beto, yandi me pesaka kimenga ya Mwana na yandi mpi yandi me monisaka nde mutindu na yandi ya kuyala kele ya kuluta mbote sambu yandi ke zolaka beto. Beto ta landa kumona mutindu Yehowa ta zolaka beto mvula na mvula. Sambu yandi kele Tata na beto, beto ta landa kukwenda pene-pene na yandi mpi beto ta yimbila yandi sambu na kukumisa zina na yandi mvula na mvula.​—Nk. 73:28.