Na disolo yango, beto longukaka ti yakele na diambu mosi ya mfunu mpenza yina kele na bupusi na bantu nionso mpe bambasi: diambu yango kele, kukumisa nkumbu ya nene ya Yehova nlongo. Diambu metadila ngiadulu​—yazola monisa, mutindu ya Yehova ya kuyadila kele mbote kuluta—​yakele mosi ya diambu yina meluta mfunu mpenza. Mutindu mosi, diambu metadila kukuikama ya bantu kele diambu yankaka ya diambu yango yina meluta mfunu mpenza.

Ntangu yayi samu na yinki beto kena kubula nsoso na kutuba ti diambu meluta mfunu kele nkumbu ya Yehova mpe kukumisa yau nlongo? Beto tadila bamfunu tatu.

Ya ntete, Satana sambuisaka nkumbu ya Yehova, to lokumu na yandi, na bilanga ya Edeni. Kiuvu yina Satana yuvusaka Eva monisaka ti Yehova vuandaka Nzambi ya muyimi mpe ti bansiku yina yandi pesaka na Adamu mpe Eva bongaka ve. Na manima Satana balulaka mambu yina Yehova tubaka, yandi tubaka mpenza ti Nzambi kele muntu ya luvunu. Na yau, yandi sambuisaka nkumbu ya Yehova. Yandi kumaka “Diabulu,” yina zola monisa “muntu ya luvunu.” (Yoa. 8:44) Lokola Eva ndimaka luvunu ya Satana, yandi zitisaka ve Nzambi, yandi teleminaka ngiadulu na yandi. (Kuy. 3:1-6) Bubu yayi, Satana kena kutatamana kusambuisa nkumbu ya Nzambi, na kumuangaka luvunu samu na Kimuntu ya Yehova. Bantu yina kendimaka luvunu yango, yakevuandaka pete samu bamanga kuzitisa Yehova. Na yau samu na bisadi ya Nzambi, kusambuisa nkumbu ya nlongo ya Yehova kele diambu yina mekondua mpenza lunungu. Yakele mfunu mosi ya ngudi yina kena kusala ti bampasi mpe mambu ya yimbi vuanda mingi na Yinza.

Ya zole samu na mambote ya bisemua nionso, Yehova kenungisa nkumbu na yandi, yandi kesukula yau na doti nionso. Yau nde kele diambu meluta mfunu samu na Yehova. Yau yina yandi metuba: ‘Munu kekumisa mpenza nkumbu na munu ya nene nlongo.’ (Eze. 36:23) Mpe Yesu monisaka puelele diambu yina meluta mfunu na bisambu ya bisadi nionso ya Yehova ya kukuikama ntangu yandi tubaka: ‘Bika nkumbu na nge vuanda nlongo.’ (Mat. 6:9) Biblia kebulaka mbala na mbala nsoso na mfunu ya kupesa nkumbu ya Yehova nkembo. Beto tadila kaka mua bifuani yayi: ‘Beno pesa Yehova nkembo yina mefuana na nkumbu na yandi.’ (1 Bs. 16:29; Nk. 96:8) ‘Beno yimbila miyimbu samu na kukumisa nkumbu na yandi ya nkembo.’ (Nk. 66:2) ‘Munu kepesa nkumbu na nge nkembo samu na mvimbamvimba.’ (Nk. 86:12) Mosi ya bambala yina Yehova yandi mosi tubaka kukatuka na dizulu salamaka na tempelo ya Yerusaleme kuna Yesu tubaka: ‘Tata, pesa nkumbu na nge nkembo.’ Na manima, Yehova, vutulaka : ‘Munu mepesaka yau nkembo mpe munu kepesa yau diaka nkembo.’​—Yoa. 12:28. a

Ya tatu, lukanu ya Yehova kevuanda ntangu nionso na nguizani na nkumbu na yandi, to lokumu na yandi. Beto tadila diambu yayi: Na manima ya kumekama ya nsuka yina kesalama na manima ya Luyalu ya bamvula 1 000 ya Klisto, yinki kesalama? Yinki mutindu bantu nionso mpe bambasi kekukimona samu na  nkumbu ya Yehova na ntangu yango? Samu na kupesa mvutu na kiuvu yango, beto zimbakana ve mambu zole ya mfunu mingi yina beto metubila​—kukuikama ya bantu mpe ngiadulu ya yinza ya mvimba. Na ntangu yango, yakevuanda diaka ve na mfunu bantu monisa ti bakele ya kukuikama. Bakevuanda bantu ya kukoka mpe yina memekama mpenza. Bakebaka luzingu ya mvula na mvula. Diaka, yakevuanda na mfunu ve kumonisa kana mutindu ya Yehova ya kuyadila meluta mbote. Na ntangu yango, bisemua nionso na dizulu mpe na ntoto kevuanda na bumosi. Mpe bakendima luyalu ya Yehova. Na ntangu yango, nkumbu ya Yehova kevuanda diambu yina meluta mfunu samu na bisadi na yandi.

Na ntangu yango, konso muntu kezaba kedika samu na Yehova mpe nkumbu na yandi kekuma mpenza nlongo. Kasi, nkumbu ya Yehova ketatamana kuvuanda diambu yina meluta mfunu samu na bisadi na yandi nionso. Samu na yinki? Samu bakemona Yehova ketatamana kusala mambu ya kukamua. Beto tadila diambu yayi: Lokola Yesu kevutula na kumikitisa nionso luyalu nionso, Nzambi ‘kevuanda bima nionso samu na bantu nionso.’ (1 Bk. 15:28) Na manima na yau, bantu na ntoto kebaka ‘kimpuanza ya nkembo ya bana ya Nzambi.’ (Bar. 8:21) Mpe Yehova kekokisa lukanu na yandi ya kusangisa bisemua nionso ya dizulu mpe ya ntoto samu basala dibuta mosi ya nene, yina kevuanda na bumosi.​—Efe. 1:10.

Na manima ya kusala mambu yango nionso, yinki mutindu dibuta ya Yehova yina kele na dizulu mpe awa na ntoto kekukimona? Kondua ntembe, beto ketatamana kuvuanda na nsatu ya ngolo ya kukumisa nkumbu ya Yehova. Davidi nsoniki ya nkunga, sonikaka na yinsi ya lutuadusu ya mpeve ya nlongo ti: ‘Bika Yehova Nzambi baka lokumu . . . Bika bakumisa nkumbu na yandi ya nkembo samu na mvimbamvimba.’ (Nk. 72:18, 19) Samu na mvimbamvimba, beto ketatamana kumona bamfunu ya yimpa mpe ya kitoko ya kusala yau.

Nkumbu ya Yehova kena kumonisa mambu nionso yina metadila yandi. Ntangu beto kekanisaka na zulu ya nkumbu ya Yehova, beto kekanisaka nde nzola na yandi. (1 Yn. 4:8) Beto kebambuka ntangu nionso ti Yehova salaka beto na nzola, yandi pesaka nkayilu ya nkudulu na nzola, mpe beto kebambuka ntangu nionso ti mutindu na yandi ya kuyadila kele ya nzola mpe ya lunungu. Kasi beto ketatamana kumona mutindu Yehova kena kumonisina bisemua na yandi nzola mingi. Beto ketatamana kupusana penpene na yandi lokola yandi kele Tata na beto, mpe kuyimbila samu na kukumisa nkumbu na yandi ya nkembo samu na mvula na mvula.​—Nk. 73:28.