E sulano, ne wapuonjore ni nitie wach moro maduong’ momako chuech duto, ma en miyo nying Jehova obed maler. Penjo moro mosegabetie kendo motudore gi wachno en ni, ‘Be Jehova e jaloch maberie mogik?’ Wach machielo ma bende otudore gi keto nying Jehova obed maler en ka be dhano nyalo rito timgi matir.

Ang’o momiyo tinde wajiwo ni nying Jehova kod keto nyingno obed maler e wach maduong’ mogik? Wanon ane weche moko adek momiyo wawacho kamano.

Mokwongo, Satan noketho nying Jehova e puodho mar Eden. Miriambo ma ne Satan owacho ne Hawa nonyiso ni Jehova en Nyasaye ma tuono joge gik mabeyo kendo ma ridonegi chike. Bende, Satan nowacho weche mopogore gi ma Jehova nowacho kendo mano nomiyo Jehova onenore ka jamiriambo. Kuom timo kamano, noketho nying Jehova. Noluonge ni “Jachien,” tiende ni “jaketh nying.” (Joh. 8:44) Hawa notamore winjo Nyasaye kuom yie gi miriambo ma Satan nowacho, kendo mano nomiyo okwedo loch mar Jehova. (Cha. 3:1-6) Nyaka chil kawuono, Satan osebedo ka ketho nying Jehova kaachiel gi kido mabeyo ma en-go. Joma oyie gi miriambo ma Satan wachogo ok luwga chike mag Jehova. Kuom mano, jo Jehova nenoga ni ketho nyinge maler e gima rachie mogik. Wachno e momiyo ji chandore malit ahinya, kendo e momiyo piny opong’ gi gik maricho.

Mar ariyo, nikech Jehova dwaro ne chuechne duto ber, oseng’ado ni obiro pwodho nyinge kendo golo miriambo duto mosewach kuome. Mano en wach maduong’ ahinya ne Jehova. Mano e momiyo owacho kama: “Abiro miyo nyinga ma nigi duong’ . . . obed maler.” (Eze. 36:23) Yesu bende nonyiso maler wach maduong’ monego jotich Jehova oket motelo sama gilemo ka nowacho niya: “Nyingi mondo obed maler.” (Mat. 6:9) Muma wuoyo nyading’eny e wi miyo nying Jehova duong’. Ne ane ranyisi moko: “Miuru Jehova duong’ mowinjore gi nyinge.” (1 We. 16:29; Zab. 96:8) “Weruru kupako nyinge maduong’.” (Zab. 66:2) “Abiro miyo nyingi duong’ nyaka chieng’.” (Zab. 86:12) Nitie kinde moko ma dwond Jehova owuon nowinjore koa e polo kowuoyo e wi wachno. Kuom ranyisi, dwonde nowinjore e hekalu bang’ ka Yesu nokwaye kama: “Wuora, mi nyingi duong’.” Jehova nodwoke niya: “Asemiye duong’, kendo abiro miye duong’.”​—Joh. 12:28. a

Mar adek, dwach Jehova otudore gi nyinge. Par ane wachni: Bang’ tem mogik e giko Loch Kristo mar Higni Aluf Achiel, ang’o ma biro timore? Be chuech duto biro bedo gi paro mopogore  opogore e wi miyo nying Jehova obed maler? Mondo wayud dwoko mar penjono, wapar ane e wi weche moko ariyo, ma gin: Ka be dhano nyalo rito timgi matir kod ka be Jehova nigi ratiro mar locho e wi gik moko duto. Be joma biro makore gi Jehova bang’ giko Loch Kristo mar Higni Aluf Achiel biro yudo pek e rito timgi matir? Ooyo. Gibiro bedo joma kare mosetem yiegi e okang’ moromo chuth. Gibiro yudo ngima ma nyaka chieng’. Be pod kiawa ma dhano kod malaike moko noketo e wi ratiro ma Jehova nigo mar locho e wi gik moko duto biro betie? Ooyo. Wachno ibiro tiek chuth. To nade nying Jehova?

Kindeno biro yudo ka ji duto oseng’eyo nying Jehova kendo nyingeno koro osebedo maler. Kata kamano, jotich Jehova duto pod biro dhi nyime miyo nyinge duong’. Nikech ang’o? En nikech gibiro dhi nyime neno tije madongo mag Jehova. Par ane wachni: Nikech Yesu biro dwoko ne Jehova loch duto, Nyasaye koro biro ‘bedo gik moko duto ne ji duto.’ (1 Kor. 15:28) Bang’ mano, ji duto manie piny biro bedo mamor yudo “thuolo ma nigi duong’ mar bedo nyithind Nyasaye.” (Rumi 8:21) Kae to Jehova biro chopo dwache mar miyo malaike manie polo kod dhano manie piny odag kaka joot achiel.​—Efe. 1:10.

Malaike kod dhano biro winjo nade nikech wechego? Onge kiawa ni gibiro gombo dhi nyime pako nying Jehova ma jaber. Daudi ma ne en jandik-zaburi nowacho kama: “Mad Jehova . . . yud pak . . . Mad nyinge maduong’ opak nyaka chieng’.” (Zab. 72:18, 19) Wabiro dhi nyime fwenyo gik mabeyo ma biro miyo wapak nying Jehova nyaka chieng’.

Nying Jehova nyiso gima en. Nyinge paronwa herane. (1 Joh. 4:8) Kinde duto, wiwa ok bi wil ni Jehova nochuewa nikech herane, nochiwonwa rawar nikech herane, kendo nonyiso ni lochne en loch makare nikech herane. To pod wabiro dhi nyime neno kaka Jehova nyiso herane matut ne chuechne. Wabiro dhi nyime sudo machiegni kode kaka Wuonwa moherowa, kendo miyo nyinge duong’ nyaka chieng’.​—Zab. 73:28.