Bihula bya Baka-kutanda
Cilongesa ca mutwe wa ‘Bajelese Lizina Lyobe’ cije cinakele mu Kaposhi ka Kukengela ka June 2020 cinamwesele bati mwamubwa byuma bitwakulahela ha lizina lya Yehova na ciyulo cendi?
Omu mu cilongesa twalilongesele ngwetu kuli ñanda imolika ije inakundama banu boshe. Ei ñanda ya kujelesa lizina lya Yehova. Co ñanda ya ciyulo ca Yehova ya kumwesa ngwabo ciyulo cendi cikeco cacibwa manene inapu mutamba wa kujelesa lizina lyendi. Ñanda ya kulongwa kwa banu nayo inapu mutamba wayo.
Bika bitulingisa twendeke ngwetu ñanda yakama manene inapu lizina lya Yehova na kulijelesa? Tusimutwiyeniko ha byuma bitatu bitulingisa ngoco.
Yehova akalingisa lizina lyendi bakalyane bumpau myaka yoshe
Cakulibanga, Satana wabiisile Yehova lizina mu citungu ca Edeni. Cihula cehwile Eva Satana camwesele ngwe Yehova wakala na litsita, co lalo kashakele ngwendi banu baje bakele mwisi yendi bayoye mwamubwa mu kuzituka. Kutundaho, Satana walwisile byendekele Yehova na kumwesa ngwe Njambi wakala na makuli. Ngeci, wabiisile Yehova lizina. Co wapwile “Liyabolo,” kulumbununa ‘muka-kubiisa lizina.’ (Iwano 8:44) Eva mwatabele makuli a Satana kononokele Njambi, co watengulukilile ciyulo cendi. (Kusha 3:1-6) Na matangwa ano Satana acili na kubiisa Yehova lizina kwitila mu kushandola biñanda bya makuli hali Ikeye. Co baje bakatolilila ku makuli endi kubesi kwononoka Yehova. Banu ba Njambi bamona kumubiisa lizina kupwa mulonga wakama manene. Kukekwo kunanene byuma byoshe byabibi na kayando kabali na kumona banu mu kaye.
Camucibali, Yehova ashaka kujelesa lizina lyendi na kumanesa biñanda byoshe bya makuli bibanamukutiiya mwafwa ashaka ngwendi byuma byoshe byanatanga bikale mwamubwa. Eci cikeco cuma ca seho manene kuli ikeye. Mukemwo nendeka ngwendi: “Njisholola kujela kwa lizina lyange lyakama.” (Ezeki 36:23) Kutundaho, Yesu wamwesele cuma cinapande kupwa ca seho manene mu malombelo a bangamba ba Yehova boshe omwo wendekele ngwendi: “Lizina lyobe balijelese.” (Mate 6:9) Kuli majwi abanelukila-elukila mu Mbimbiliya aje amwesa seho ya kwana bumpau lizina lya Yehova. Cakumwenako, kuli majwi endeka ngwawo: “Shangazaleni lizina lyendi lya bumpau.” (1 Mizi 16:29; Myaso 96:8) “Imbeni mwanuke bukama bwa lizina lyendi.” (Myaso 66:2) ‘Njikashangazala lizina lyobe ku myaka yoshe.’ (Myaso 86:12) Simbu imo yendekele Yehova kutundilila mwilu yapwile ku Tempele mu Jelusalema, omwo Yesu wendekele ngwendi: “Tate, ana lizina lyobe bumpau.” Ngeci, Yehova wakumbulwile ngwendi: “Njinana lizina lyange bumpau, co njilyana lalo bumpau.”—Iwano 12:28. a
Camucitatu, cizango ca Yehova cinambateselela na kujelesa lizina lyendi. Tumoneni bikalingiwa munima ya Ciyulo ca Kristu ca Myaka 1000. Tungelo na banu bakaliziba bati ha simbwoyo kutalesa ku lizina lya Yehova? Mangana tukumbulule eci cihula, tusimutwiyeni ha biñanda bibali, kulongwa kwa banu na ciyulo cendi. Kuma banu baje banamwesa kulongwa banapande kukatwalelelaho kulinga ngoco ndi? Embwe. Mwafwa bakapwa bakulumbunuka. Co bakatambula cikandelela ca kuyoya myaka yoshe. Kuma tungelo bakatwalelelaho kuuwasana indi Yehova ikeye napande kuyula byuma byoshe ndi? Embwe. Kukukakala lalo seho ya kumwesa indi Yehova ikeye napande kuyula byuma byoshe. Ha simbwoyo, tungelo na banu bakalikwatasana na kukundwiya ciyulo ca Yehova. Kuma lizina lya Yehova anga licikapwa cuma ca seho manene ku banu bendi ndi?
Ha simbwoyo, Yehova akajelesa lizina lyendi, co banu boshe bakazibuka busunga hali ikeye. Nameme ngoco, lizina lya Yehova likatwalelelaho kupwa lya seho ku bangamba bendi ba kulongwa ba mwilu na hasi. Mwafwa bika? Bakalimwena Yehova mwakatwalelelaho kubalingila byuma byabibwa. Co lalo Yesu akalikehesa na kwilwisa bumwene kuli Yehova, co Njambi akapwa “byuma byoshe ku banu boshe.” (1 Kori 15:28) Kutundaho, banu boshe mu kaye bakabwahelela mwafwa ya “bumpau bwa kupatuka kwa bana ba Njambi.” (Loma 8:21) Co Yehova akashulisilila biyongola byendi, bangamba bendi bakalikwatasana na kupwa naanga imo.—Efeso 1:10.
Munima yebi byuma, baje bakakala mu naanga ya Yehova mwilu na hano hasi bakaliziba bati? Twakulahela ngwetu bakashaka manene kumulemesa. Muka-kwimba Devidi bamuhwiminine asoneke ngwendi: “Shangazaleni Shukulu Kalunga . . . Shangazaleni lizina lyendi lya bumpau ku myaka yoshe!” (Myaso 72:18, 19) Co kukakala byuma byabiha byabingi byabibwa bikatulingisa tukashangazale Yehova myaka yoshe.
Lizina lya Yehova limanena byoshe binamukundama. Maneneni, eli lizina likatwanukisa cizemo cakala naco. (1 Iwa 4:8) Tukatwalelelaho kwanuka ngwetu cizemo cikeco calingisile Yehova atutange, ane ndando ya kutupatula na kumwesa ngwendi ciyulo cendi capwa ca kusungama. Tukatwalelelaho kumona Yehova mwakamweselamo cizemo ku byuma byoshe byanatanga. Co ku myaka yoshe, tukatwalelelaho kushwenya kuli ikeye ha kupwa Tate yetu na kukemba myaso ya kushangazala lizina lyendi lya bumpau.—Myaso 73:28.
