▪ Umu cipande cii twasambilile ukuti kwaya umulandu onga ucindame uwakuma antu na ya malaika, umulandu uu u wa kulenga izina lyakwe Yeova ukucindikwa. Ilyasi ilikalanda pali ukateeka wapapelapela, kuli kuti Yeova u walinga ukuteeka, lyalemana sana nu kucindika izina lyakwe. Ucisinka uno antu yakwata kuli Leza nao ukalenga izina lyakwe ukucindikwa.

U mulandu ci uno tukulandila sana api zina lyakwe Yeova alino nu kulicindika? Lekini tulande apa vintu vitatu.

Icakutandikilako, Satana walenzile izina lyakwe Yeova ukuzewanyiziwa, umu calo ca Edeni. Iuzyo lino Satana uzizye Eva lyalangililanga ukuti Yeova ataya na ukapekape nupya isunde lino wayapeezile litali ningo. Satana walanzile ivipusaneko na vino Yeova walanzile nu kulanda ukuti Leza u wa ufi. Fwandi wazewanyizye izina lyakwe Yeova. Wizile aya “Ciwa,” cikapiliula ukuti “kazewanya.” (Yoa. 8:44) Pa mulandu wakuti Eva uvwilile Satana, wakanyile ukuvwila Leza nu kupondokela ukateeka wakwe uwapapelapela. (Utan. 3:1-6) Na ndakai kwene, Satana akazewanya izina lyakwe Leza lino akulanda amalyasi aufi pali aliwe. Yayo akauvwila ufi wakwe Satana yasiuvwila Leza. Antu yakwe Leza yasiuvwa ningo vino Satana akazewanya izina lwakwe Yeova ilya muzilo. Umuzewanya uu u walenga kuye ukucula alino ni vintu ivipe.

Cakwe ciili, Yeova akalondesya ukucindika izina lyakwe nu kufumyapo umuzewanya onsi pakuti iviumbwa vyonsi viye nu mutende . Cii ali cintu icicindame sana kuli Yeova. Walanzile ukuti: ‘Ndalanga antu ya mitundu yuze vino nemo naya uwamuzilo.’ (Ezek. 36:23) Nupya Yesu walanzile na pa cintu cimwi icilinzile ukuya icicindame sana umu mapepo ya yaomvi yakwe Yeova yonsi lino walanzile ukuti: “Leka izina lyako licindikwe.” (Mate. 6:9) Baibo ikalanda sana pa mulandu uno cacindamila ukucindika izina lyakwe Yeova. Lekini tulande sile pa malembo anono: “Lumbanyini izina lyakwe Yawe ilya lulumbi.” (1 Mila. 16:29; Masa. 96:8) “Imbini ulwimbo lwakulumbanya izina lyakwe lya lulumbi.” (Masa. 66:2) “Mwene we Leza wane, namakucindikanga pee.” (Masa. 86:12) Pa nsita yonga pa miku ino Yeova walandanga ukufuma ukwi yulu pali api tempele uku Yelusalemu lino Yesu walanzile ukuti: “Tata, cindika izina lyako.” Yeova waswike ukuti: “Indicindika, nupya kwene ndalicindika.”—Yoa. 12:28. a

Cakwe citatu, Vino ukulonda kwakwe Yeova kwalemana ni zina lyakwe, nanti ukateeka wakwe uwa papelapela. Elenganyini pali cii: I vyani ivilalondelelapo pa cisila ca wezyo wa kusyalikizya ulayako pa cisila ca myaka 1000 iya Kuteeka Kwakwe  Klistu? Uzye ya malaika na antu yalauvwa uli api zina lyakwe Yeova lino insita iya ilafika? Pakuti twasuke amauzyo yaa, lekini tulande apa milandu iili ikolane na ino itulandapo, kuli kuti ucisinka uwa antu alino na ukateeka wakwe Yeova uwapapelapela. Uzye antu aalatwalilila ukulanga ucisinka yalakwata intazi izilalenga ciyatalile ukutwalilila ukulanga ucisinka? Awe foo. Pano yalaya amalilike. Lyene pa cisila yalapokelela umi wa mande pe. Pa nsita ii kutalaya aalatwisika ndi cakuti Yeova u walinga ukuteeka nanti foo, pa mulandu wa kuti pa nsita iya ya malaika alino na antu yalalemana nupya antu yonsi yalazumila ukuti Yeova u walinga ukuteeka. Nomba pa nsita iyo, uzye antu yalatwalilila ukulola ukuti ukucindika izina lyakwe Yeova ali cintu cicindamisye

Apa nsita iya antu yonsi yalamanya icisinka nupya izina lyakwe Yeova lilacindikwa. Nomba, izina lyakwe Yeova lilaya ali cintu icicindame sana uku aomvi yakwe yonsi acumi aa kwi yulu alino na pano nsi. U mulandu ci? Apa mulandu wa kuti yalatwalilila ukulola ivisuma ivingi vino Yeova alayacitila. Elenganyini pali cii: Pa mulandu wakuti Yesu alawezezya Uwene kuli Yeova, Leza alaya “vyonsi kuli yonsi.” (1 Kol. 15:28) Pa cisila cakwe vii, antu pano nsi yalaipakizya “untungwa wa yana yakwe Leza.” (Loma 8:21) Nupya Yeova alafikilizya ukulonda kwakwe ukwakulenga antu pano nsi alino nu kwi yulu ukuya alemane.—Efes. 1:10.

Uzye antu pano nsi nu kwi yulu yaluvwa uli lino ivintu vii vilacitika? Cumi kwene tulalondesya ukulumbanya Yeova. Kalemba wa masamu Devedi walemvile ukuti: ‘Lumbanyini Yeova Leza . . . Mwamulumbanya pee.’ (Masa. 72:18, 19) Tulatwalilila ukumulumbanya amande pe.

Izina lya kuti Yeova likasenula ukuti angaya vyonsi vino akulonda ukuya. Ilingi, nga twelenganya pi izina ilyakuti Yeova, tukaiusya pa kutemwa kuno wakwata. (1 Yoa. 4:8) Lyonsi tulaiusya ukuti Yeova watupanzile pa mulandu wakuti watutemwa, wapeezile nu umwana wakwe ukwiza tukulula, vyonsi vii vino watucitila vikatulangilila vino ukateeka wakwe ulaya umalilike nupya usuma. Nomba, tulatwalilila ukulola vino Yeova watutemwa amanda pe. Amanda yonsi, tulalondesya ukupalama kuli Tata witu nu kulumbanya izina lyakwe ilya muzilo.—Masa. 73:28.