Ilo kar katak eo, jaar katak bwe ewõr juon wõt men elukkuun aorõk me ej jelõt aolep armej ekoba enjel̦ ro ilañ. Men in ej: bwe en kwõjarjar ãt eo etan Jeova. Ikijjeen irooj bõtata eo an—ak bwe wãween an irooj em̦m̦antata—ej bareinwõt m̦õttan an aikuj kokkwõjarjar etan Jeova. Im bar juon men me ej ekkejell̦o̦k ippãn men in ej an armej ro maroñ tiljek ñan Anij.

Etke kiiõ jej ba bwe men eo elukkuun aorõk ilõñin men otemjej ej etan Jeova im bwe en kwõjarjar etan? Eokwe jen etale jilu un ko.

Kein kajuon, Setan ear kõnanaik etan Jeova ak wãween an ro jet watõke ilo jikin kallibin Iden. Ilo kajjitõk eo etao an Setan ñan Iv, ear ãinwõt ñe ej ba bwe Jeova ej dãpij men ko rem̦m̦an jãn Adam im Iv, im bwe etarjen joñan men ko ej kõtmãne jãn er. Innem Setan ear bareinwõt ukotl̦o̦k naan ko an Jeova im ba bwe Jeova ej juon ri-riab. An kar ãindein, ear kõnanaik ak ruruweik etan Jeova. Innem ekar erom “Tepil̦ eo,” me ej mel̦el̦ein “ri-ruruwe.” (Jon 8:44) Kõn an kar Iv tõmak naanin riab ko an Setan, ekar jab pokake Anij im ear jum̦ae irooj bõtata eo an. (Jen. 3:1-6) Ejjañin jem̦l̦o̦k an Setan ruruweik im kõnanaik etan Jeova tok ñan rainin, im ej kajeeded men ko reriab kõn E. Ro me rej tõmak naanin riab kein an Setan emaroñ pidodol̦o̦k aer jab pokake Jeova. Kõn men in, ippãn armej ro an Anij, aer ruruwe n̦ae ãt eo eokkwõjarjar etan Jeova ej men eo enanatata ilañ im lal̦. Eñin men eo ej kõm̦m̦an bwe en wal̦o̦k aolep eñtaan im men ko renana ilo lal̦ in.

Kein karuo, ñan em̦m̦an eo an aolep menin kõm̦anm̦an ko, em̦õj an Jeova jek ippãn make bwe enaaj kokkwõjarjar ãt eo etan, im kõm̦m̦an bwe en lukkuun jako an ro jet kattoone. Eñin ej men eo eaorõktata ippãn Jeova. Eñin unin ej ba: “Inaaj kokkwõjarjar [ãt eo] Eta el̦ap.” (Ezk. 36:23) Jesus ear bareinwõt kaalikkar ta men eo ej aikuj aorõktata ilo jar ko an ri-karejar ro retiljek an Jeova ke ear ba: “En kwõjarjar im utiej etam̦.” (Matu 6:9) Elukkuun lõñ alen an Baibõl̦ eo kaalikkar aorõkin ad kaiboojoj im kokkwõjarjar ãt eo etan Jeova. Jouj im lale jejjo waanjoñak ko: “Kom̦win lel̦o̦k ñan Jeova aiboojoj ekkar ñan etan.” (1 Kro. 16:29; Sam 96:8) “Kom̦win al im kwal̦o̦k an etan aiboojoj.” (Sam 66:2) “Inaaj kaiboojoj etam̦ ñan indeeo.” (Sam 86:12) Juon iaan iien ko Jeova ear make kõnono lal̦tak jãn lañ ej ilo tampel̦ eo ilo Jerusalem ke Jesus ear ba: “Jema, kwõn kaiboojoj etam̦.” Innem Jeova ear uwaak im ba: “Iar kaiboojoje im inaaj bar kaiboojoje.”—Jon 12:28. a

Men eo kein kajilu ej bwe aolep iien ankilaan im karõk ko an Jeova renaaj ekkejel ippãn ãt eo etan. L̦õmn̦ak m̦õk kõn aorõkin ãt eo etan Jeova ãlikin wõt naaj mãlejjoñ eo ãliktata ilo jem̦l̦o̦kin Juon To̦ujin Iiõ ko in an Christ Irooj. Ewi wãween an nãj enjel̦ ro im armej l̦õmn̦ak kõn ãt eo etan Jeova ilo iien en̦? Ñan uwaake kajjitõk in, jen bar keememej m̦õttan ko ruo me rej ekkejell̦o̦k ippãn an aikuj kokkwõjarjar  etan Jeova—tiljek eo an armej im irooj bõtata eo an Jeova. Ilo iien en̦, eban menin aikuj bwe armej ren bar kam̦ool aer tiljek ñan Anij. Renaaj weeppãn im em̦õj an alikkar aer tiljek. Em̦õj aer kiiõ bõk mour indeeo. Innem irooj bõtata eo an Anij enaaj ke wõnm̦aanl̦o̦k wõt im juon menin kõnnaan, im juon men me ej kõm̦m̦an an enjel̦ ro im armej jenolo̦k jãn doon? Jaab. Bareinwõt, ejjab nãj bar menin aikuj ñan kam̦ool im lale el̦aññe wãween an Jeova irooj ej wãween eo em̦m̦antata. Ilo iien en̦, aolep menin kõm̦anm̦an ko ilañ im ioon lal̦ renaaj lukkuun bõrokuk ippãn doon im renaaj l̦oore wãween an Jeova tõl. Ak kiiõ, ta kõn ãt eo etan Jeova?

Ilo iien en̦, ãt eo etan Jeova enaaj lukkuun kwõjarjar, im lukkuun jako an ettoon jãn jabdewõt men ko rej kattoone. Ãt eo etan Jeova enaaj wõnm̦aanl̦o̦k wõt im men eo eaorõktata ippãn aolep ri-karejar ro an ilañ im bareinwõt ioon lal̦. Etke? Kõnke renaaj loe an Jeova wõnm̦aanl̦o̦k wõt im kõm̦m̦ani men ko rekabwilõñlõñ. L̦õmn̦ak m̦õk kõn men in: Kõnke Jesus enaaj kõttãik e im kõjepl̦aakl̦o̦k Aelõñ eo ñan Jeova, Anij enaaj erom “men otemjej ñan armej otemjej.” (1 Kor. 15:28) Ãlikin men in, armej ro ijin ioon lal̦ renaaj m̦õn̦õn̦õ in “bõk anemkwõj eo eaiboojoj ãinwõt ke rej ajri ro nejin Anij.” (Rom 8:21) Innem Jeova enaaj lukkuun kajejjet ankilaan bwe en wõr juon wõt an baam̦le me rej bõrokuk ippãn doon im ej ejaakin ajri ro nejin ilañ im bareinwõt ioon lal̦.​—Eps. 1:10.

Ãlikin an aolep men kein wal̦o̦k, ewi wãween an naaj baam̦le eo an Jeova ilañ im ilo lal̦ eñjake? Ejjel̦o̦k pere bwe enaaj wõr wõt ippãd juon kõn̦aan elukkuun kajoor ñan nõbar im kaiboojoj ãt eo etan Jeova. Kar kõm̦m̦akũt ri-jeje sam eo Devid ñan jei im ba: “Nõbar Jeova Anij . . . En utiej etan eaiboojoj ñan indeeo.” (Sam 72:18, 19) Innem, jenaaj lo un ko rekãitoktoklimo unin ad aikuj wõnm̦aanl̦o̦k wõt im nõbar etan Jeova ñan indeeo.

Ãt eo etan Jeova ej kwal̦o̦k kõn kain Anij rot e. Im ñe jej l̦õmn̦ak kõn etan Jeova, men eo el̦ap ad l̦õmn̦ak kake ej yokwe eo an. (1 Jon 4:8) Aolep iien jenaaj keememej yokwe eo Jeova ear kwal̦o̦k ke ear kõm̦anm̦an kõj im ke ear letok nejin Jesus bwe en mej kõn kõj. Im aolep iien jenaaj bareinwõt keememej bwe wãween an tõl ej kaalikkar an wãnõk im yokwe. Bõtab, jenaaj wõnm̦aanl̦o̦k wõt im lo wãween an Jeova kwal̦o̦k yokwe eo an ñan kõj ñan indeeo. Aet, jenaaj kõn̦aan epaakel̦o̦k wõt Jeova ãinwõt Jemãdwõj ilañ, im al alin nõbar ko kõn ãt eo etan eaiboojoj ñan indeeo.​—Sam 73:28.