Саде статьяште ме пален налынна: чынже денак икте гына ӱчашымаш йодыш уло, кудыжо чыла суксылан да айдемылан влиятла, — тиде Иегован куатле лӱмжым святитлымаш. «Иегован вуйлатымыже эн сай мо?» да «Еҥ-влак Иеговалан ӱшанле кодыт мо?» йодыш-влак ӱчашымаш йодышыш пурат веле.

Иегован лӱмжӧ да тудын лӱмжым святитлымаш — тӱняште эн тӱҥ. Молан ме тыге кызыт каласен кертына? Айста кум амалым лончылен налына.

Икымше, Эдем садыште Сатана Иегован лӱмжым, але репутацийжым, амыртен. Тиде осал суксо Евам шонаш таратынеже ыле, пуйто Иегова опкын да Адам ден Евалан тӱрыснек эрыкан лияш огеш пу. Вара Сатана Иегован мутшым савырен да Юмо шояче улеш манын шонаш таратен. Тыге тудо Иегован лӱмжым амыртен да Диавол лияш тӱҥалын (тиде мут «шояче» манмым ончыкта) (Иоан. 8:44). Ева шояжлан ӱшанен да Юмым колыштмым чарнен. Тыге тудо Юмын вуйлатымыже ваштареш шогалын (Тӱҥ. 3:1—6). Иегова нерген шоям шаркален, Сатана тачысе кече марте Юмын лӱмжым амырта. Айдеме тиде шоялан ӱшана гын, тудо, очыни, Иеговам колышташ огеш тӱҥал. Теве молан Юмын служитлышыже-влак Иегован лӱмжӧ нерген шояклымым эн кугу несправедливостьлан шотлат. Иегован лӱмжым амыртымаш — тиде тӱҥ амал, молан тӱняште тынар шуко орланымаш.

Кокымшо, суксо ден еҥ-влаклан пайдам кондашлан ончыкыжым Иегова шке лӱмжым чыла титаклымаш деч арала. Тудлан тиде эн тӱҥ. Сандене тудо каласен: «Кугу лӱмем святой лийже манын ыштем» (Иез. 36:23). Иисусат раш ончыктен, мо нерген ме, Юмын ӱшанле служитлышыже-влак, эн ончыч кумалшаш улына. Тудо каласен: «Лӱмет мокталтше [святитлыме лийже]» (Матф. 6:9). Библийыште ик гана огыл возымо, мыняр чот Иегован лӱмжым чапландараш кӱлеш. Икмыняр примерым кондена. «Иеговалан тудын лӱмжылан келшен толшо чапым пуыза» (1 Лет. 16:29; Пс. 95:8). «Юмылан мурыза, Тудын лӱмжым чапландарыза» (Пс. 67:5). «Тыйын лӱметым курымеш чапландарем» (Пс. 85:12). Икана иерусалимысе храмыште лийме годым Иисус Юмым йодын: «Ачай, шке лӱметын чапшым ончыкто!» Тидлан Иегова кава гыч шкеже каласен: «Мый тудын [лӱмемын] чапшым ончыктенам да адак ончыктем» (Иоан. 12:28) a.

Кумшо, Иегован шонен пыштымыже тудын лӱмжӧ, але репутацийже, дене кылдалтеш. Айста шоналтена, мо лиеш, кунам Христосын тӱжемле ий вуйлатымыже пыта да еҥ-влак пытартыш тергымашым эртат. Тугодым чыла суксо ден еҥ-влакын Иегован лӱмжӧ деке могай отношенийышт  лиеш? Вашмутым пален налашлан тиде лӱмым святитлымаш дене кылдалтше ӱчашымаш йодышым шарналтена, кудышкыжо кок йодыш пура: 1) еҥ-влак Юмылан ӱшанле кодыт мо; 2) тудын вуйлатымыже эн сай улеш мо? Тунам еҥ-влаклан Юмылан ӱшанле улмыштым ончыкташ кӱлеш лиеш мо? Уке. Нуно язык деч посна лийыт да пытартыш тергымашым уже эртат. Нуно курымеш илаш тӱҥалыт. Иегован вуйлатымыже эн сай улеш манын, доказатлаш кӱлеш лиеш мо? Уке. Иегован вуйлатымыже эн сай улеш манын, ту жапыште уже палдарыме лиеш. А Иегован лӱмжӧ нерген мом каласаш лиеш?

Ту жапыште мландыште кажныже Иегова нерген чыным пален налеш да Иегован лӱмжӧ тӱрыснек святитлыме лиеш. Но кавасе да мландысе Юмын ӱшанле служитлышыже-влаклан Иегован лӱмжӧ садак эн тӱҥ лиеш. Молан? Молан манаш гын, нуно ужыт, кузе Иегова ӧрыктарыше пашажым умбакыжат шукта. Кунам Иисус властьшым Иеговалан ӱҥышын пуа, тунам Юмо «чылаштлан чыла лиеш» (1 Кор. 15:28, УТ). Тидын деч вара мландыште илыше еҥ-влак «Юмын икшывыже» лийыт (Рим. 8:20, 21). Иегова шонен пыштымашыжым шукта — чыла суксо ден еҥ-влак ик кугу ешыш ушымо лийыт (Еф. 1:10).

Тидын деч вара Иегован ешыштыже чыланат мом ышташ кумылаҥдыме лийыт? Мутат уке, мемнан умбакыжат Иегован чапле лӱмжым чапландараш кугу кумылна лиеш. Псаломым мурышо Давид теве мом возаш кумылаҥдыме лийын: «Господь Юмыжо моктымо... Тудын чапланыше лӱмжӧ курымеш, курым-курымеш моктымо» (Пс. 71:18, 19). Курым мучко Иегова мемнам ӧрыктараш огеш чарне, да тудым чапландарашлан мемнан эре шуко амална лиеш.

Иегован лӱмжӧ тудын могай улмыжым ончыкта. Кунам ме Юмын лӱмжӧ нерген шонена, ме, очыни, тудын йӧратымашыже нерген шарналтена (1 Иоан. 4:8). Ме нигунамат она мондо Иегован кугу йӧратымашыжым, кудыжым тудо мыланна ончыктен, кунам мемнам ыштен, мемнам язык деч тӱлен налын да тудын вуйлатымыже эн сай улеш манын доказатлен. Тыгак ме умбакыжат ужына, мыняр чот Иегова мемнам йӧрата. Ме курым мучко кавасе Ачана деке лишемаш да тудын чапле лӱмжым чапландараш кумылаҥдыме лийына (Пс. 72:28).