▪ ǁNā ǁkhāǁkhāǃâs ǃnâ da ge ge ǁkhāǁkhāsen ǀgui xū-i kaise a ǂhâǂhâsa i hâsa hîna hoa khoen. Tsî ǀhomǃgān tsîna ra tsâǀkhā-e, nēs ge Jehovab di kai ǀonsa ǃanuǃanuhesa. ǁNās ge Jehovab ra ǂgaeǂgui ǀgaub a ǂhânusa. Jehovab ra ǂgaeǂgui ǀgaub a ǃgâis tamas ka io ǃgâi tamas ge ǁîb di ǀons di ǃanuǃanuhes ǀkha a ǃgaeǀhaosa. Khoesib Elob aiǃâ ǂhauǃnâse nî hâs tsîn ge ǁnās ǃnâ ǃgaeǀhaosa.

Tae-i ǃaroma da ra mî ǃgōsase i hoa xūna Elob ǀons nî ǃanuǃanuhes ai a ǃgaoǃgaosa sa? Hā re i da ǃnona ǃaromade ôaǃnâ.

ǂGurose, ǁGâuab ge Jehovab ǀonsa ge ǃkhāǃkhā, Edenni ǃhanab ǃnâ. ǁGâuab ge Evasa a dî dîs ge ge mûsen kai Jehovab ǀgâixasa tsî Adammi tsî Eva harab ge mā daoǁgaun ge ǂhanuoǃnâ isa. Tsîb ge ǁGâuaba Jehovab ge mîs xa ǀkhara xū-e ge mî. ǁÎb ge Elob a ǂhûmi-ao ti ge mî. ǁNās ǃnâ-ūb ge Jehovab ǀonsa ge ǃkhāǃkhā. ǁNāpaxub ge “ǁGâuab” ti ge ǂgaihe hîna “ǃkhāǃkhā-aob” ti ra ǂâibasensa. (Jhn. 8:44) Evas ge ǁGâuab di ǂhûmiba a ǂgom amagas ge Eloba ǁnâuǀnam tama ge i. ǁNā ǀgaub ǃnâ-ūs ge ge ǁgau Jehovabas ǁîs ǂgaeǂgui-aob ase ǂgao tama hâsa. (Gen. 3:1-6) Nētsēs kōseb ge ǁGâuaba Jehovab di ǀgaub xa ra ǂhûmi. ǁNān hîna ǁnā ǂhûmiba ra ǂgoman ge Jehovaba ǁnâuǀnam tama hâ. ǁNā-amagan ge Elob di khoena ǁîb di ǃanu ǀons ga ǃkhāǃkhāhe o ǁnāsa kaise ǁgai xū-i ase ra mû. Hoa ǁgai xūn hîna ǃhūbaib ai ra īn ge ǁnās xa ǃaromahe hâ.

ǀGamǁîse, hoa kurus di ǃgâib ǃaromab ge Jehovaba ǁîb di ǀonsa nî ǃanuǃanu. ǁNā i ge Jehovaba hoa xūn ǂam-ai a ǂhâǂhâsaba. ǁNā-amagab ge ra mî: ‘Tita ge ti kai ǀonsa nî khai.’ (Ese. 36:23) Jesub tsîn ge ge ǃgāsa kai mâ ǂhâǂhâsa xū-i ǃaroman Jehovab di ǃoaba-aon hoana nî ǀgoresa mîb ge o: “Sa ǀonsa as khaihe re.” (Mateub 6:9) Elobmîs ge ǂgui ǃnāde Jehovab di ǀons nî khaihesa ra ǁguiǃā. ǀNî aiǁgaude kō re: ‘Koare Jehovab di ǂkhaisa ǀonsa.’ (1Kro. 16:29; Psa. 96:8) “ǃGôasib ǁîb ǀons diba ǁnaeba re.” (Psa. 66:2) “Kare . . . tsî ta ge ǀamose sa ǀonsa nî kaikai.” (Psa. 86:12) ǀGuiǃnās aib ge Jehovaba aitsama ǀhomma xu ge ǃhoa. Jesub ge tempeli ǃnâ Jerusalems dawa hâ io, tsîb ge ǁîba ge mî: “Ti Îtse sa ǀonsa ǂkhaiǂkhai re” Jehovab ge ǃeream tsî nēti ge mî: “ǀNai ta ge go ǂkhaiǂkhai si tsî ta ge ǁkhawa nî ǂkhaiǂkhai si.”—Jhn. 12:28. a

ǃNonaǁîse, Jehovab di ǂâibasens ge ǁîb di ǀons ǀkha ǃgaeǁaresa ūhâ, Nēs xa ǂâi re: ǀUnîga ǃâitsâb hîna Jesub di duisend kurigu di ǂgaeǂguisa nî saogu khaoǃgâ, tae-e nî ī? ǀHomǃgān tsî khoen tsîna mati ǁnā ǁaeb ai Jehovab di ǀons xa nî tsâ? ǁNā ǃereamsa  hōs ǃaroma hā re î da ǀgam ǂhâǂhâsa xūna kē, khoesib di ǂhauǃnâsib tsî Jehovab di ǂhanu-aisib ǂgaeǂguis ǃaroma. Khoen hîna ge ǂgomǂgomsase a hâna noxoba ǃâitsâba ǁîn di ǂhauǃnâsib ǃnâ nî hōǃâ? Hî-î ǁîn ge nēsi ǀoasa kurusa nî ūhâ, ǀoasasen ge ǃâitsâhe amaga. ǀAmo ûiban ge nî māhe. ǁNās xōǀkhā i ge ǁgauǁgau-e ǂhâbasa tama hâ, ǁgausa Jehovab a ǂhanu-ai ǂgaeǂgui-ao amaga. ǁNā ǁaeb ain ge ǀhommi tsî ǃhūbaib ai hân hoana nî ǀguiǃnâxa tsî Jehovab ǂgaeǂguisa nî ūǃoa. ǁNā ǁaeb ais tsîna i Jehovab ǀonsa ǁîb ǃoaba-aon ǃaroma hoa xūn ǂamai nî ǂhâǂhâsa?

ǁNā ǁaeb ain ge hoa khoena, Jehovab ǀons xa amaba nî ǂan tsîs ge ǁîb ǀonsa nî ǃanuǃanuhe. Xawe Jehovab ǀons ge ǁîb di ǂgomǂgomsa ǃoaba-aon ǃaroma nî ǂhâǂhâsa. Tae-i ǃaroma? Aiǃgû tsîn Jehovab nî dī ǂoaǂamsa xūna nî mû amaga. ǂĀi re: Jesub ga hoa ǂgaeǂguisa Jehovaba mā-oa, ob ge Eloba “hoan ǂama nî ǀhonkhoe.” (1Kor. 15:28) ǁNās khaoǃgân ge ǃhūbaib ai hâ khoena ‘Elob oan di ǃnorasasib xa nî ǃgâiaǂgao.’ (Rom. 8:21) Tsî i ge Jehovab di ǂâibasensa nî dīǀoaǀoahe, î-i ǁîb di ǀgôan hîna ǀhommi tsî ǃhubaib ai hân hoana ǀguiǃnâxa omaris ase i.—Efe. 1:10.

Nē xūn hoan ga i toa o, mati i Jehovab di omaris hîna ǀhommi tsî ǃhūbaib ai hân hoana nî tsâ? Ama as ge ǀgaisa turaba da nî ūhâ ǀgarasa, Jehovab di îsa ǀonsa koasa. Psalmdi xoa-aob Davib ge nēti ge xoa: ‘Ab Jehova Eloba karehe . . . Ab ǁîb ǂkhaisa ǀonsa ǀamose koahe.’ (Psalmdi 72:18, 19) ǀAmosib kōse da ge ǀasa tsî ǂoaǂamsa ǀgauga nî hō, î da ǁnāsa dī ǁkhā.

Jehovab ǀons ge ǁîb xa hoana ra mîba da. Jehovab di ǀons xa da ga ǂâi, o da ge ǀnammi xa ra ǂâi. (1Jhn. 4:8) Hoaǁae da ge nî ǂâihō Jehovab ge ǀnammi ǀkha a kurudasa. Tsîb ge Xoremariba ǀnammi ǃaroma a mādasa, tsîb ǁîb di ǂgaeǂguis di ǂhanu-aisiba ǀnammi ǃnâ-ū a ǁgausa. Tsî da ge aiǃgû tsî nî mû Jehovab mati ǁîb di kurusa ǀnammi ǀkha ra ǀkhaesa. ǀAmosib kōse da ge sada di ǀhomsi ǁGûba ǃoa nî ǀgū. Tsî ǁîb di ǀonsa koa ǁnaetsanade nî ǁnaeba.—Psa. 73:28.