Itech nejon tamachtilis timomachtijkej ke tinochin, ángeles uan tejuan tiknekij maj mochipaua itokay Jehová. Mochipaua itokay Jehová keman moyekita ke tel kuali kemej taixyekana, uan no mochipaua keman tiknextiaj ke amo tikauaj.

Sayoj ke, ¿keyej motelneki maj mochipaua itokay Jehová uan kemej miakej kiitaj? Maj tikitakan eyi taman.

Yekinika, itech xochital Edén, Satanás kiixnamikik itokay Jehová oso kichiuak maj amo kuali kiitakanok. Tein Satanás kitajtanij Eva, kiteajsikamatiltij ke Dios amo yolkuali uan ke tein kinnauatijka amo kinkauaya maj kichiuakan tein kinekiaj. Satepan, Satanás kijtoj ke tein Jehová kijtojka amo melauak katka uan ijkon kitakajkayauilij ke katka se xolopij. Keman kichiuak nejin, peuak amo kuali kiitajok Jehová, ijkon Satanás mochiuak “Amokuali”, tein kijtosneki “tetakajkayauilijkej” (Juan 8:44). Uan kemej Eva kineltokak tein Satanás kikajkayauak, amo kitakamatikok Dios, uan ijkon kinextij ke amo kinekia maj kiixyekana (Gén. 3:1-6). Axkan Satanás kisentoka kiixnamiki itokay Dios, keman takajkayaua uan kichiua maj miakej kinemilikan ox Jehová yekmelauj yolkuali. Uan miakej akin kineltokaj tein takajkayaua amo kitakamatij Jehová. Yejua ika miakej itekitikauan Dios kiitaj ke tel amo kuali keman kitakajkayauiliaj Jehová uan kichiuaj maj amo kuali kiitakanok. Yejua ika tinochin titajyouiaj uan itech nochi taltikpak mochiua tein amo kuali.

Ojpatika, kemej kineki maj nochin kuali yetokan, Jehová kiixtalijtok kiueyitalis itokay uan maj kuali kiitakan. Yejua kiita ke nejin yejua tein okachi moneki ke okseki taman. Yejua ika kijtoua: “Yekmelauj nikueyitalis notokay” (Ezeq. 36:23). Keman Jesús kinnextilij imomachtijkauan keniuj motataujtiskej, kijtoj: “Maj nochin kiitakan ke motokay semi ueyi”. Ijkon kinextij toni okachi moneki titajtaniskej keman timotataujtiskej tiitekitikauan Jehová (Mat. 6:9). Biblia miakpa kinextia keyej moneki maj tikueyitalikan itokay Jehová. Maj tikitakan seki taman. “Xikueyitalikan Jehová kemej kinamiki itokay” (1 Crón. 16:29; Sal. 96:8). “Ximokuikatikan para nakiueyitaliskej itokay” (Sal. 66:2). “Nikueyitalis motokay nochipaya” (Sal. 86:12). Jehová kemansa ualtajtouaya desde iluikak. Uan se tonal keman ualtajtoj, Jesús yetoya itech templo ompa Jerusalén uan kiluij iTajtsin: “Xikueyitali motokay”. Jehová kinankilij: “Nikueyitalijya uan oksepa nikueyitalis” (Juan 12:28). a

Expatika, ika tein Jehová kichiuani, nochipa kitemoua maj moueyitali itokay tein yektik. Maj tiknemilikan keniuj nochin kuali kiitaskej Jehová satepan ke Cristo taixyekanas  mil xiujmej. ¿Keniuj momachiliskej akin nemiskej nikan taltikpak uan ángeles keman nochin kuali kiitaskejya Jehová? Maj achto tikitakan ome taman tein mochiuasya: monextisya ke Jehová okachi kuali taixyekana, uan ke amo tikauaj yejuatsin. Amo monekisok maj tiknextikan ke amo tikauaj Jehová. ¿Keyej? Porin amo tikpiaskejok tajtakol uan ipa tiknextijkajya ke amo tikauaj yejuatsin. Uan uelis tinemiskej nochipaya. Amo no monekisok monextis ke yejua Jehová akin okachi kuali taixyekana. Ijkuak nochin akin nemij nikan taltikpak uan ángeles mokauaskej maj kinixyekana. Sayoj ke, ¿kisentokaskej itekitikauan Jehová kiueyitalijtoskej yejuatsin?

Itokay yeski chipauakya, uan nochin kimatiskej akoni Jehová. Itekitikauan kisentokaskej kiueyitaliskej itokay yejuatsin, ne iluikak uan nikan taltikpak. ¿Keyej? Porin kiitaskej ke Jehová kisentoka kichiua miak taman tein tel kualtsin. Kemej Jesús yolyemanik, oksepa kimakas tanauatil iTajtsin, yejua ika Dios “kiixyekanas nochi” (1 Cor. 15:28). Satepan, akin nemiskej nikan taltikpak yolpakiskej porin “yeskij kemej ikoneuan Dios akin amo yetokej temako” (Rom. 8:21). Uan Jehová kinpias ikoneuan ompa iluikak uan nikan taltikpak kemej ichankauan akin kuali mouikaskej, ijkon kemej kiixtalijtok (Efes. 1:10).

¿Keniuj momachiliskej ichankauan Jehová keman mochiuas nochi nejin? Nochin ne iluikak uan nikan taltikpak kinejnekiskej kiueyitaliskej itokay Jehová tein semi kualtsin. Salmista David kijkuiloj: “Maj moueyitali Jehová Dios […]. Maj moueyitali itokay nochipaya porin ueyi” (Sal. 72:18, 19). Nochipa tikajsiskej miak taman tein technextilis keyej moneki tikueyitaliskej itokay Jehová.

Tein melauj, itokay Jehová kiixnextia yejuatsin. Yejua ika, keman itech titanemiliaj itokay, tikelnamikij ke yejuatsin semi tetasojta (1 Juan 4:8). Nochipa tikelnamikiskej ke Jehová techchijchiuak porin techtasojta, ke kitemakak ikonetsin para techmakixtis porin techtasojta uan ke kinextij ke yejua kuali taixyekana porin techtasojta. Uan tikitaskej keniuj ika miak taman Jehová kinextis ke techtasojta. Nochipaya tikajsiskej keyej moneki okachi timotokiskej iuan toTajtsin uan timokuikatiskej para tikueyitaliskej itokay tein ueyi (Sal. 73:28).