Ipan yejon tlamachtijli, otiuelkej ika akin tichantij nikan ipan tlaltikpaktli niman nochimej iluikaktekitkej san noneki titlapaleuiskej manoyekteneua itoka Jehová. Kuakon, tla tiknekij titlapaleuiskej tikchipauaskej itoka toTajtsin noneki tikteititiskej ika san yejua kinamiki matlayekana niman noneki itech timelajkanemiskej.

San ika, ¿tleka tikijtouaj aman ika más ueyi kijtosneki manochipaua itoka Jehová? Matikitakan.

Kachtopa, ipan xochitlalpan Edén, Satanás okixnamik itoka Jehová noso okiteasikamachilti ika xkuajli tlen kichiujtoya. Ika tlen Satanás okitlajtolti Eva, okiteasikamachilti ika toTajtsin xkipiya kuajli iyojlo niman ika melak ouijtika tlen okimijli makichiuakan. Sakin, Satanás okijto ika Jehová san tlakajkayaua pampa xmelauak tlen okijto. Ijkuak ijkon okijto, Satanás okitlajtolchijchiuili Jehová. Ijkon, Satanás onochiuj Diablo, tlen kijtosneki “tetlajtolchijchiuilijketl” (Juan 8:44). Pampa Eva okineltokili Satanás, xokitlakamat toTajtsin niman okiteititi ika xkinekiya makiyekana (Gén. 3:1-6). Ipan yejuin tonaltin, Satanás ok kixnamiki itoka toTajtsin. Ika itlakajkayaualisuan, kichiua ika oksekimej makinemilikan tlen xkuajli itech Jehová. Niman akin kineltokaj tlen Satanás kijtoua kanaj más ouijtika kitaj kitlakamatiskej Jehová. Ika yejon, akin tiktekichiuiliaj toTajtsin melak techkualania ijkuak tikitaj kenon kitsokuijlotiaj itoka. Itlakajkayaualisuan Satanás kichiua matitlajyouikan niman manochiua tlen xkuajli.

Ika ome, Jehová kinektok kichipauas itoka ipampa nochi tlen yokichijchiuj. Yejua kita ika melak ueyi kijtosneki kichipauas itoka. Yejua ika, kijtoua: “Nejua nikteititis ika niyektli” (Ezeq. 36:23). Ijkuak Jesús otechmachti kenon noneki tikchiuaskej teoyotl, okijto: “Ma mitsyekteneua nochi tlakatl”. Ijkon okiteititi ika itekipanojkauan Jehová noneki kitlajtlaniskej manochipaua itoka toTajtsin ijkuak kichiuaskej teoyotl (Mat. 6:9). Biblia melak miyekpa kijtoua ika noneki ijkon matikchiuakan. Matikinteneuakan seki tlaxeloltin. “Xmakakan toTEKO on tlakaitalistli yejuan kinamiki” (1 Crón. 16:29; Sal. 96:8). “Xkuikatlalikan ikan yekteneualistli” (Sal. 66:2). “Nochipa nikueyiteneuas moyektokatsin” (Sal. 86:12). Sejpa, Jesús nemiya teopan ne Jerusalén niman okitlajtlanili iTajtsin: “Xchiua para ma mitsueyilikan”. Jehová okuajnankili desde ne iluikak: “Yonikchiu para ma nechueyilikan, niman oksejpa nikchiuas para ma nechueyilikan” (Juan 12:28). a

Ika yeyi, Jehová kineki ika nochipa makiueyichiuakan itoka. Matikonnemilikan tlenon panos ika itoka Jehová ijkuak Cristo tlamis tekiuajtis Mil xiuitl niman ijkuak sa ika tlami techtlatlataskej. ¿Tlenon kinemiliskej tlaltikpakchanejkej niman iluikaktekitkej itech itoka Jehová? Para tikmatiskej, matikilnamikikan ika para tikchipauaskej itoka toTajtsin noneki timelajkanemiskej niman tikteititiskej ika san yejua kinamiki tlayekanas.  Tlaltikpakchanejkej xok kintlatlataskej. ¿Tleka? Pampa xok tlajtlakolejkej yeskej niman kiteititiskej ika melajkanemij ijkuak sa ika tlami kintlatlataskej. ¡Uelis nochipa nemiskej! ¿Ok nonekis noteititis ika san Jehová kinamiki matlayekana? Ka, xok yakaj ometlamatis itech yejuin. ¿Tleka? Pampa nochimej ikimatstoskej ika san Jehová kuajli tlayekana. Nochimej, tlaltikpakchanejkej niman iluikaktekitkej xok ometlamatiskej itech yejon. Kuakon, ¿tlenon panos ika itoka Jehová?

Ijkuakon, xok yakaj kijtos noso kichiuas itlaj tlen makitsojkuilo itoka toTajtsin. Nochimej akin kitekichiuiliaj, ne iluikak niman nikan ipan tlaltikpaktli, kasikamatiskej ika melak ueyi kijtosneki itoka pampa kitaskej ika Jehová ok kichiujtok tlen temojkatlachialti. Ijkon tikijtouaj pampa Jesús ika yolyemanilistli kimaktilis iTaj nochi tlen kiyekantoya. Ijkon, “Dios kuajli kimandaros nochi san se ueyi” (1 Cor. 15:28). Sakin, akin chantiskej ipan tlaltikpaktli nomanauiskej “ijkon ken ikoneuan Dios no nomanauiskej” (Rom. 8:21). Ijkon nochiuas tlen Jehová desde yeuejkaui kinekiya, kichiuas ika tlaltikpakchanejkej niman iluikaktekitkej san sekan makitekichiuilikan (Efes. 1:10).

¿Niman kenon nomachiliskej ichanejkauan Jehová ijkuak panos nochi yejuin? Nochimej akin nemij ne iluikak niman nikan ipan tlaltikpaktli ika nochi inyojlo kinekiskej kiueyichiuaskej itokatsin Jehová. Salmista David ijkin okijkuilo: “¡Ma tikyekteneuakan toTEKO! [...] Nochipa ma tikyekteneuakan iyektokatsin” (Sal. 72:18, 19). Pampa tikpiyaskej nemilistli tlen xkeman tlamis, nochipa tiknextiskej tlen techyolmapeuas matikueyiteneuakan itoka Jehová.

Matikilnamikikan ika itoka Jehová kiteititia kenon yejua. Ika yejon, ijkuak titlanemiliaj itech itoka, noijki tikilnamikij ika yejua melak techtlasojtla (1 Juan 4:8). Nochipa tikilnamikiskej ika pampa Jehová techtlasojtla otexchijchiuj niman okitemakak iKonetsin. Noijki, pampa techtlasojtla, kineki kiteititis ika san yejua akin kuajli techyekanas. Niman tikitaskej kenon Jehová kinteochiua akin kitekichiuiliaj pampa kintlasojtla. Nochipa tiknextiskej itlaj tlen techyolmapeuas más matiknisiuikan toTajtsin akin nemi iluikak niman nochipa tijkuikatiliskej (Sal. 73:28).