Esihlokweneso, safunda ukuthi kunento yinye ethinta boke abantu neengilozi: kucwengiswa kwegama lakaJehova elikhulu. Indaba yobukhosi—okuyindlela kaJehova yokubusa ephuma phambili—ihlobene nokucwengiswa kwegama lakhe. Ngendlela efanako, nokuthembeka kwabantu kuhlobene nokucwengiswa kwegama lakaJehova.

Kubayini nje sigandelela ukuthi indaba eqakathekileko, ligama lakaJehova nokucwengiswa kwalo? Akhesihlole amabanga amathathu.

Kokuthoma, uSathana wasahlela igama lakaJehova namkha ubuntu bakhe, esimini ye-Edeni. Umbuzo uSathana awubuza u-Eva bewutjengisa ukuthi uJehova akanamusa neenqophiso azinikela u-Adamu no-Eva bezigandelela. USathana watjho okuphambene nalokho uJehova akutjhoko, wathi uZimu unamala. Ngokwenza lokho walikhuluma kumbi igama lakaJehova. Waba ‘nguDeveli’ okutjho ukuthi “umleyimala.” (Jwa. 8:44) Ngebanga lokuthi u-Eva walalela amala kaSathana, akhenge amlalele uZimu, watjengisa ukuthi akafuni ukubuswa nguZimu. (Gen. 3:1-6) Nanamhlanjesi uSathana usaragela phambili alikhuluma kumbi igama lakaJehova, arhatjha amala ngaye. Labo abakholelwa amala la, kubulula ukuthi bangamlaleli uJehova. Ebantwini bakaZimu, ukuleya amala ngegama lakaJehova elicwengileko yinto embi khulu. Kungebangelo kunomtlhago omkhulu kangaka nobumbi ephasini.

Kwesibili, bona kuzuze yoke indalo, uJehova uzokuhlwengisa igama lakhe asuse loke ihlazo kilo. Lokho ngilokho okuqakatheke khulu kuJehova. Yeke uthi: “Nakanjani ngizokucwengisa igama lami elikhulu.” (Hez. 36:23) NoJesu wakwenza kwakhanya ukuthi khuyini okufuze ibe ngeqakathekileko emithandazweni yeenceku zakaJehova nakathi: “Igama lakho alicwengiswe.” (Mat. 6:9) Kanengi iBhayibheli ligandelela ukuqakatheka kokuphazimulisa igama lakaJehova. Cabanga ngeembonelo ezimbalwa: “Nikelani uJehova iphazimulo efanele igama lakhe.” (1 Kron. 16:29; Rhu. 96:8) “Bhinelani igama lakhe eliphazimulako iindumiso.” (Rhu. 66:2) “Ngizokuphazimulisa igama lakho ngokungapheliko.” (Rhu. 86:12) Esinye isenzakalo lapho uJehova akhuluma khona asezulwini senzeka ethempelini eJerusalema lapho uJesu athi: “Baba, phazimulisa igama lakho.” UJehova wamphendula wathi: “Ngiliphazimulisile begodu ngizoliphazimulisa godu.”—Jwa. 12:28. a

Kwesithathu, umnqopho kaJehova uzokuhlala uhlobene negama lakhe namkha ubuntu bakhe. Cabanga ngalokhu: Ngemva kokulingwa kwamaswaphela ekupheleni kwemiNyaka eyiKulungwana yokuBusa kwakaKrestu kuzokulandelani? Iingilozi nabantu bazozizwa njani ngegama lakaJehova ngesikhatheso? Bona siphendule imibuzo le, asikhumbule izinto ezimbili eziqakathekileko —ukuthembeka kwabantu nobukhosi bendawo yoke. Ngesikhatheso angekhe kusatlhogeka bona abantu batjengise ukuthembeka kwabo. Bazabe banganasono, balingwe ngokupheleleko. Bazokufumana ukuphila okungapheliko. Inga-kghani ubukhosi bendawo yoke buzokuragela phambili buyinto ekukhulunywa ngayo, ehlukanisa phakathi abantu? Awa. Ngesikhatheso boke ezulwini nephasini bazabe babumbene begodu bazokwamukela ubukhosi bakaJehova. Kuthiwani-ke ngegama lakaJehova?

Ngesikhatheso woke umuntu uzabe azi iqiniso ngoJehova negama lakhe lizokucwengiswa ngokupheleleko. Nanyana kunjalo, igama lakaJehova lizokuragela phambili liyinto eqakathekileko kizo zoke iinceku zakhe ezulwini nephasini. Kubayini? Ngebanga lokuthi bazokubona uJehova aragela phambili enza izinto ezihle. Cabanga ngalokhu: Ngebanga lokuthi uJesu uzokubuyisela boke ubukhosi kuJehova, uZimu ‘uzokuba zizinto zoke kiwo woke umuntu.’ (1 Kor. 15:28) Ngemva kwalokho abantu ephasini bazokuthabela ‘itjhaphuluko ephazimulako yabantwana bakaZimu.’ (Rom. 8:21) UJehova uzokuzalisa umnqophwakhe wokuba nomndeni obumbeneko owakhiwa bantwana bakhe bezulwini nebephasini.—Efe. 1:10.

Ngemva kwazo zoke izintwezi umndeni kaJehova wezulwini newephasini uzozizwa njani? Kuliqiniso ukuthi sisazokuba nesifiso esinamandla sokudumisa igama lakaJehova elihle. Umrhubi uDavida waphefumulelwa bona atlole athi: “Kwanga uJehova uZimu angadunyiswa . . . Kwanga igama lakhe eliphazimulako lingadunyiswa isiphelani.” (Rhu. 72:18, 19) Sizokuragela phambili sifumana izinto ezitja nezikarisako zokuthi sikwenze lokhu ngokungapheliko.

Igama lakaJehova lijamele koke ngaye. Nasicabanga ngegama lakaJehova, sikhumbula indlela asithanda ngayo. (1 Jwa. 4:8) Sizokuhlala sikhumbula ithando uJehova asitjengise lona lokha nakasibumbako nokusilungiselela kwakhe isihlengo. Sizokuhlala sikhumbula ukuthi indlelakhe yokubusa ilungile begodu inethando. Kodwana sizokuragela phambili sibona indlela uJehova asithanda ngayo ngokungapheliko. Ukuphila kwethu koke, sizokutjhidela kuye khulu njengoBabethu begodu sizokubhinela igama lakhe eliphazimulako iindumiso.—Rhu. 73:28.