Ebibuuzo Kuruga Omu Bashomi
Ekicweka ‘Eiziina Ryawe Ka Ryezibwe’ omu Omunaara gw’Omurinzi ogwa Gyuni 2020, kikahinduramu kita omu nyetegyereza yaitu aha bikwatiraine n’eiziina rya Yehova n’okuba ohikire kutegyeka byona?
Omu kicweka ekyo, tukeetegyereza ngu hariho enshonga nkuru erikukwata aha bihangirwe byona, ey’okweza eiziina rya Yehova. Yehova okuba ohikire kutegyeka byona, n’abantu okuguma bari abeesigwa ahariwe, ni bimwe aha birikutwarirwa omu nshonga egyo enkuru.
Ahabw’enki nitugira ngu enshonga nkuru neekwata aha iziina rya Yehova n’okuryeza? Ka tushwijume enshonga ishatu.
Sitaane atwire naashiisha eiziina rya Ruhanga kuruga obu haabaho obugomi omuri Edeni
Ey’okubanza, omu musiri Edeni, Sitaane akashiisha eiziina rya Yehova, nari orikujwekyera eiziina eryo. Ekibuuzo eki Sitaane yaabuurize Haawa kikaba nikyoreka ngu Yehova ni Ruhanga orikweyendeza kandi orikuteeraho abu arikutegyeka amaremesa. Sitaane omu kukora atyo akahakanisa ebigambo bya Yehova, yaamweta omubeihi. N’ahabw’ekyo akashiisha eiziina rya Yehova. Akahinduka “Omuregi,” ekirikumanyisa “omubeihi.” (Yoh. 8:44) Ahabw’okugira ngu Haawa akaikiriza ebishuba bya Sitaane, akagomera Ruhanga, n’obushoboorozi bwe bw’okutegyeka byona. (Kut. 3:1-6) Na hati, Sitaane naashiisha eiziina rya Ruhanga, arikumugambaho ebitahikire. Abarikwikiriza ebishuba bya Sitaane nibagomera Yehova. N’ahabw’ekyo abaheereza ba Yehova nibareeba ngu okushiisha eiziina rye eririkwera, tiky’oburingaaniza. Niyo nshonga ahabw’enki hariho oburemeezi bwingi omu nsi.
Eya kabiri, Yehova amaririire kweza eiziina rye, n’okuriihaho ekijumo kyona ahabw’oburungi bw’ebyahangirwe byona. Egyo n’enshonga nkuru ahari Yehova. N’ahabw’ekyo naagira ati: “Ninyija [kweza] eiziina ryangye erikuru.” (Ezk. 36:23) Kandi Yesu akooreka gye enshonga nkuru ei abaheereza ba Yehova baine kugambaho omu kushaba obu yaagira ati: ‘Eiziina ryawe ka ryezibwe.’ (Mat. 6:9) Emirundi mingi, Baibuli neegamba aha bukuru bw’okuhimbisa eiziina rya Yehova. Teekateeka aha by’okureeberaho bikye ebi: “Mugambe ku [Yehova] aine ekitiinisa ekishemereire eiziina rye.” (1 Bus. 16:29; Zab. 96:8) ‘Yeshongore eby’okuhimbisa eiziina rye.’ (Zab. 66:2) Ninyija kuha “eiziina ryawe ekitiinisa ebiro byona.” (Zab. 86:12) Gumwe aha mirundi obu Yehova yaagamba arikwema omu iguru, Yesu akaba ari Yerusaalemu omu hekalu ahu yaagambiire Ishe ati: “Taata, himbisa eiziina ryawe.” Yehova akagarukamu ati: ‘Naarihimbisa kandi ninyija kurihimbisa.’—Yoh. 12:28. a
Enshonga ya kashatu, ekigyendererwa kya Yehova kiine akakwate n’eiziina rye, nari orikujwekyera eiziina eryo. Teekateeka ahari eki: Niki ekiraakurateho bwanyima y’okugyezibwa okw’aha muheru aha kuhendera kw’Emyaka Rukumi y’Obutegyeki bwa Kristo? Mbwenu shi abantu na baamaraika nibaija kuguma beebaganiisemu aha nshonga nkuru y’okweza eiziina rya Yehova? Kubaasa kugarukamu ekibuuzo ekyo, ka tureebe enshonga ibiri, obwesigwa bw’abantu n’obushoboorozi bwa Yehova obw’okutegyeka byona. Kwonka shi abantu abaraabe boorekire ngu n’abeesigwa ahari Yehova nibaija kuguma nibagyezibwa kutamuhamiraho? Ngaaha. Nibaija kuba bahikiriire kandi bagyeziibwe ekirikumara. Nibaija kuba baine amagara agatahwaho. Mbwenu shi nitwija kuguma nitugamba aha nshonga erikukwata aha bushoboorozi bwa Yehova obw’okutegyeka, n’okwebaganisamu kw’ebihangirwe bye eby’obwengye? Ngaaha. Enshonga y’okugira ngu Yehova niwe ahikire kutegyeka byona neija kuba yaashobooroirwe. Kandi shi eiziina rya Yehova?
Eiziina rya Yehova niriija kuba ryeziibwe kimwe, obutagaruka kujumwa. Kandi, niriija kuguma riri rikuru aha baheereza be abeesigwa omu iguru n’omu nsi. Ahabw’enki? Nibaija kugumizamu nibareeba Yehova arikukora ebirikutangaaza. Teekateeka ahari eki: Ahabw’okugira ngu Yesu naaza kugarurira Yehova obutegyeki, naija “kuba byona ahari boona.” (1 Kor. 15:28) Bwanyima, abantu nibaija kwesiimira omu ‘busingye bw’abaana ba Ruhanga obw’ekitiinisa.’ (Rom. 8:21) Kandi Yehova naija kuhikiiriza ekigyendererwa kye eky’okuteeranira hamwe ebihangirwe bye eby’omu iguru n’omu nsi omu ka emwe ey’obumwe.—Efe. 1:10.
Empinduka ezo niziija kukwata zita aha bari omuka ya Yehova omu iguru n’omu nsi? Buzima, nituza kuba twine ekihika ky’okuguma nituhimbisa eiziina rye, Yehova. Daudi omuhandiiki wa zaaburi akahandiika ati: “[Yehova] asiimwe . . . eiziina rye ery’ekitiinisa risiimwe ebiro byona.” (Zab. 72:18, 19) Naitwe, nitwija kuba twine enshonga nsya kandi ezirikushemeza eziraatureetere kuhimbisa eiziina rye ebiro byona.
Eiziina rye Yehova, nirijwekyera byona ebirikumukwataho. Eiziina eryo niritwijutsya rukundo ei atwiniire. (1 Yoh. 4:8) Butoosha nitwija kuguma nitwijuka ngu rukundo niyo yaahigire Yehova kutuhanga, kuhayo ekitambo, n’okutaho omuringo gw’okutegyeka oguhikiriire. Kandi nitwija kugumizamu nitureeba rukundo ei Yehova ainiire ebihangirwe bye. Ekyo nikiija kutuhiga kuguma nitwirira haihi Tataitwe kandi tweshongore eby’okuhimbisa eiziina rye ery’ekitiinisa ebiro byona.—Zab. 73:28.
