Kpuya Mɔɔ Vi Kengavolɛma Ɛkɛ
Kɛzi edwɛkɛ, “Wɔ Duma Nwo Ɛde” mɔɔ wɔ June 2020 Ɛzinzalɛ Arane ne anu la kilehile yɛ diedi mɔɔ fale Gyihova duma ne nee ye tumililɛ ne anwo la anu ɛ?
Wɔ edwɛkɛ zɔhane anu, yɛzukoale kɛ edwɛkɛ titili kokye ala a alesama nee anwumabɔvolɛma amuala anwo wɔ nu a: yemɔ a le Gyihova duma kpole ne mɔɔ bɛte nwolɛ la. Tumililɛ nwo edwɛkɛ ne—mɔɔ kile kɛ adenle mɔɔ Gyihova dua zo di tumi la a le kpalɛ la—le edwɛkɛ titili ɛhye foa ko. Yɛɛ alesama nɔhalɛlilɛ nwo edwɛkɛ ne noko le ye foa ko.
Duzu ati a ɛnɛ yɛsi zo kɛ edwɛkɛ titili kpalɛ ne a le Gyihova duma ne nee kɛzi bɛte nwolɛ la ɛ? Maa yɛzuzu ninyɛne nsa anwo.
Ɔvi Yidɛn atuadelɛ ne azo mɔɔ ba la, Seetan tɛkɔ zo tɛsɛkye Nyamenle duma
Mɔɔ limoa, Seetan dwazole tiale Gyihova duma ne wɔ Yidɛn tola ne anu. Seetan mɛlɛbɛla kpuya ne mɔɔ ɔbizale Yive la maanle ɔyɛle kɛ Gyihova le Nyamenle atisesebɛ mɔɔ ɔdi mɛla kyengye ɔmaa bɛdabɛ mɔɔ ɔdi bɛ nwo zo tumi la. Akee Seetan hakyile edwɛkɛ mɔɔ Gyihova hanle la, wɔ adenle bie azo ɛnee ɔlɛka kɛ Nyamenle le adalɛ. Ɔti ɔzɛkyele Gyihova duma. Ɔrayɛle “Abɔnsam,” mɔɔ kile “dumasɛkyevo.” (Dwɔn 8:44) Kɛmɔ Yive liele Seetan adalɛ edwɛkɛ ne lile la ati, yeandie Nyamenle, ɔdele ye tumililɛ ne anwo atua. (Gyn. 3:1-6) Badwu ɛnɛ, Seetan tɛsɛkye Nyamenle duma, ɔka kɛzi Gyihova de la anwo adalɛ edwɛkɛ. Bɛdabɛ mɔɔ bɛdie adalɛ edwɛkɛ ɛhye mɔ bɛdi la noko ɛnrɛdie Gyihova. Ɔti wɔ Nyamenle menli anye zo, Gyihova duma nwuanzanwuanza ne mɔɔ bɛzɛkye ye la ɛnle debie kpalɛ fee. Na yemɔ a ɛmaa amaneɛnwunlɛ nee amumuyɛyɛlɛ ɛbu ewiade a.
Mɔɔ tɔ zo nwiɔ, ɔlua abɔdeɛ amuala boɛyɛlɛ ti, Gyihova ɛbɔ kpɔkɛ kɛ ɔbade ye duma nwo, ɔbaye debie biala mɔɔ gua nwolɛ evinli la yeavi ɛkɛ. Ɛhye a hyia Gyihova kpalɛ a. Ɛhye ati a ɔhanle kɛ: “Nɔhalɛ nu, mebade me duma kpole ne” anwo la. (Yiz. 36:23) Eza Gyisɛse maanle yɛnwunle debie mɔɔ ɔwɔ kɛ nwolɛ kyia Gyihova azonvolɛ nɔhavoma kɔsɔɔti kpalɛ wɔ bɛ asɔneyɛlɛ nu, wɔ mekɛ mɔɔ ɔhanle kɛ, “Wɔ duma nwo ɛde” la. (Mat. 6:9) Baebolo ne si kɛzi ɔhyia kɛ bɛwula Gyihova duma ne anyunlunyia la azo fane dɔɔnwo. Suzu neazo ekyi anwo: “Bɛva anyunlunyia mɔɔ fɛta Gyihova duma ne la bɛmaa ye.” (1 Ek. 16:29; Edw. 96:8) “Bɛdo ayɛlɛyelɛ edwɛne bɛwula ye duma ne anyunlunyia.” (Edw. 66:2) “Mebawula wɔ duma ne anyunlunyia dahuu.” (Edw. 86:12) Mekɛ mɔɔ Gyihova mumua ne dendɛle vile anwuma la anu ko zile wɔ Gyɛlusalɛm ɛzonlenlɛsua ne anu, ɛleka mɔɔ Gyisɛse hanle kɛ, “Egya, wula wɔ duma anyunlunyia” la. Gyihova noko buale ye kɛ: “Mewula ye anyunlunyia, na mebawula ye bieko.”—Dwɔn 12:28. a
Mɔɔ tɔ zo nsa, bodane mɔɔ Gyihova lɛ ye dahuu la fale ye duma ne anwo. Wɔmɔ suzu nwolɛ nea: Saa sɔnea mɔɔ li awieleɛ wɔ Kelaese Ɛvolɛ Apenle Ko Tumililɛ ne anzi la ba awieleɛ a, duzu bieko a bazi a? Asoo edwɛkɛ titili ne, mɔɔ le Gyihova duma ne mɔɔ bɛte nwolɛ la, bahɔ zo ava mgbakyemgbakyenu ara anwumabɔvolɛma nee alesama anu ɔ? Amaa yɛabua kpuya zɔhane la, maa yɛnlea edwɛkɛ titili zɔhane afoa nwiɔ ne mɔ—alesama nɔhalɛlilɛ nee aleɛabo amuala tumililɛ ne bieko. Mekɛ zɔhane, asoo alesama mɔɔ lile nɔhalɛ la bahɔ zo ayia bɛ nɔhalɛlilɛ ne anwo sɔnea bieko ɔ? Kyɛkyɛ. Ɔluakɛ ɛnee bɛzɔ bɛ bɛnlea bɔkɔɔ na bɛli munli. Bɛbadɛnla aze dahuu. Asoo anwumabɔvolɛma nee alesama bahɔ zo aha aleɛabo amuala tumililɛ ne anwo edwɛkɛ bieko, na bɔbɔ yeava mgbakyemgbakyenu yeara ɔ? Kyɛkyɛ. Mekɛ zɔhane, ɛnee awie biala mɔɔ wɔ anwuma nee aze la ɛnwu kɛ, adenle mɔɔ Gyihova dua zo di tumi la ala a le kpalɛ a. Na Gyihova duma ne noko ɛ?
Mekɛ zɔhane, ɛnee bɛde Gyihova duma ne anwo bɔkɔɔ na awie biala ɛnwu nɔhalɛ ne. Noko Gyihova duma ne bahɔ zo ayɛ debie mɔɔ nwolɛ hyia ye azonvolɛ nɔhavoma kɔsɔɔti mɔɔ wɔ anwuma nee azɛlɛ ye azo la kpalɛ a. Duzu ati ɔ? Ɔluakɛ bɛbanwu kɛ Gyihova ɛlɛkɔ zo ayɛ ninyɛne mɔɔ yɛ nwanwane la. Suzu nwolɛ nea: Kɛmɔ Gyisɛse babɛlɛ ɔ nwo aze ava tumililɛ kɔsɔɔti amaa Gyihova la ati, Nyamenle bali “ninyɛne kɔsɔɔti azo tumi.” (1 Kɔl. 15:28) Yemɔ anzi, alesama mɔɔ wɔ azɛlɛ ye azo la banyia “anyunlunyia fanwodi ne mɔɔ Nyamenle amra lɛ la bie.” (Wlo. 8:21) Akee Gyihova bamaa bodane mɔɔ ɔlɛ kɛ ɔka ɔ mra mɔɔ wɔ anwuma nee azɛlɛ ye azo la kɔsɔɔti yeabɔ nu yeayɛ bɛ abusua kpole ko mɔɔ koyɛlɛ wɔ bɛ avinli la ara nu bɔkɔɔ.—Ɛfɛ. 1:10.
Saa ninyɛne ɛhye mɔ sisi a, kɛzi ɔbaha Gyihova abusua ne anu amra mɔɔ wɔ anwuma nee azɛlɛ ye azo la ɛ? Nɔhalɛ nu, yɛbahɔ zo yɛanyia ɛhulolɛ kpole kɛ, yɛbaye Gyihova duma ne ayɛlɛ dahuu. Sunsum ne hanle edwɛndolɛnli Devidi maanle ɔhɛlɛle kɛ: “Ayɛlɛyelɛ ɛha Gyihova Nyamenle, . . . Bɛye ye anyunlunyia duma ne ayɛlɛ dahuu.” (Edw. 72:18, 19) Dahuu yɛbanwu ninyɛne fofolɛ nee ninyɛne mɔɔ yɛ anyelielɛ mɔɔ ɔti ɔwɔ kɛ yɛkɔ zo yɛye ye ayɛlɛ la.
Ɔluakɛ Gyihova duma ne gyi ɛkɛ ne maa sonla holɛ mɔɔ ɔdaye mumua ne ɔde la. Titili, ɔmaa yɛkakye ye ɛlɔlɛ ne. (1 Dwɔn 4:8) Dahuu yɛbahakye kɛ, ɛlɔlɛ ti a ɔbɔle yɛ a, ɛlɔlɛ ti a ɔvale ɛkpɔnelɛ afɔle ne ɔmaanle yɛ a, yɛɛ ɛlɔlɛ ti a ɔdi tumi wɔ tenleneyɛlɛ nu a. Noko yɛbahɔ zo yɛanwu kɛzi Gyihova bala ye ɛlɔlɛ ne ali yeahile ye abɔdeɛ la kpole. Yɛbabikye ye kɛ yɛ Ze na yɛado ayɛlɛyelɛ edwɛne yɛamaa ye anyunlunyia duma ne wɔ mekɛ mɔɔ ɛnlɛ awieleɛ.—Edw. 73:28.
