Еци статьяйӕй куд базудтан, уотемӕй, ӕгас изӕдтӕмӕ дӕр ӕма адӕнмӕ дӕр ка хауй, уӕхӕн дзурддаг фарста ӕрмӕстдӕр еунӕг ес. Еци фарста баст ӕй Йегови кадгин ном исрохс кӕнуни хӕццӕ. Фал ма еци фарстамӕ дууӕ фӕззелӕни дӕр хаунцӕ. Фиццаг: Йегови хецаудзийнадӕ ӕцӕгӕйдӕр тӕккӕ хуӕздӕр ӕй? Дуккаг: адӕн Хуцаубӕл еузӕрдон уодзӕнцӕ?

Уотӕ зӕгъӕн цӕмӕн ес, ӕма Йегови ном исрохс кӕнун тӕккӕ ӕхсидзгӕдӕр фарста ӕй? Ӕркӕсӕн ӕртӕ гъуддагемӕ.

Фиццаг: Едеми дзӕхӕрадони Сайтан Йегови хуарз ном фегадӕ кодта. Сайтан ци мӕнгард фарста равардта, уомӕй уотӕ уадӕй, цума Йеговӕ адӕнӕй хуарз цидӕр римӕхсуй ӕма Адам ӕма Еви сӕребарӕдзийнадӕн ӕгӕр унгӕг арӕнтӕ ӕрӕвардта. Уой фӕсте ба Йегови уӕхӕн бунати исӕвардта, цума мӕнгӕттӕ дзорагӕ ’й. Гъе уотемӕй Сайтан иссӕй Ибилис, гъома фудкойгӕнӕг (Иоан. 8:44). Евӕ Сайтани мӕнгӕттӕбӕл ке баууӕндтӕй, уомӕ гӕсгӕ Хуцаумӕ нӕбал игъуста ӕма ӕ нихмӕ рацудӕй (Райд. 3:1–6). Уӕдӕй фӕстӕмӕ Сайтан Йегови ном ӕгадӕ кӕнуй, аллихузи мӕнгӕттӕ ибӕл ке имисуй, уомӕй. Адӕймаг еци мӕнгӕттӕбӕл ку ӕууӕнда, уӕд Йеговӕн дӕр коммӕгӕс нӕ уодзӕй. Гъе уомӕ гӕсгӕ Хуцауи адӕн тӕккӕ устурдӕр хӕранбӕл нимайунцӕ, Сайтан Йегови номбӕл цъифкалӕн дзубандитӕ ке кӕнуй, уой. Сӕйрагидӕр уой туххӕй цӕунцӕ гъе уойбӕрцӕ фидбилизтӕ ӕма гъезӕмӕрттӕ.

Дуккаг: Йеговӕ ӕ кадгин ном искӕдзос кӕндзӕй аллихузи цъифкалӕнтӕй, ӕма е пайда ӕрхӕсдзӕй изӕдтӕн дӕр, удта адӕнӕн дӕр. Йеговӕн ӕ ном искӕдзос кӕнунӕй ӕхсидзгӕдӕр неци ес. Уомӕ гӕсгӕ загъта: «Ӕз исрохс кӕндзӕн ме ’стур ном» (Йез. 36:23). Киристе дӕр ӕй бавдиста, Хуцауи еузӕрдон лӕггадгӕнгутӕн сӕ кувдтити фиццаг бунати ци гъӕуама уа, уой: «Исрохс уӕд дӕ ном» (Матф. 6:9). Библий еу ӕма дууӕ хатти финст не ’рцудӕй, Йегови ном кадгин кӕнун куд ӕхсидзгӕ ’й, е. Ӕрхӕссӕн цалдӕр цӕветтони. «Исбӕрзонд кӕнтӕ Йегови, ӕ номи аккаг кадӕ ин искӕнтӕ» (1 Анз. 16:29; Пс. 96:8). «Заретӕ ӕ номи кадӕн» (Пс. 66:2). «Дӕ ном дин ӕносмӕ бӕрзонд кӕндзӕн» (Пс. 86:12). Йеговӕ ӕхуӕдӕг дӕр уӕлӕрвтӕй фӕдздзоридӕ. Зӕгъӕн, Киристе Йерусалими ковӕндони ку адтӕй, уӕд искувта: «Мӕ Фидӕ, искадгин кӕнӕ дӕ ном». Йеговӕ ин исдзуапп кодта: «Искадгин ӕй кодтон, ӕма ма ’й никкидӕр искадгин кӕндзӕн» (Иоан.12:28) a.

Ӕртиккаг: Йегови фӕндон ке исӕнхӕст уодзӕй, е баст ӕй, ӕ ном ке гъӕуама искӕдзос уа, уой хӕццӕ. Гъӕйдӕ расагъӕс кӕнӕн: Киристей Минанзон хецаудзийнадӕ ку фӕууа ӕма адӕн фӕстаг фӕлварӕни сӕрти ку рахезонцӕ, уӕд ци уодзӕй? Еци рӕстӕг ӕгас изӕдтӕ дӕр ӕма адӕн дӕр Йегови номмӕ ци зӕрдӕ дардзӕнцӕ? Цӕмӕй аци фарстабӕл дзуапп базонӕн, уой туххӕй расагъӕс кӕнӕн, Йегови ном исрохс кӕнуни хӕццӕ  ци дууӕ фӕззелӕни баст ӕнцӕ, уонӕбӕл: адӕн Хуцаубӕл еузӕрдон уодзӕнцӕ ӕви нӕ ӕма Йегови хецаудзийнадӕ ӕцӕгӕйдӕр тӕккӕ хуӕздӕр ӕй? Цума ма адӕн фӕлварӕнтӕбӕл ӕмбӕлдзӕнцӕ, цӕмӕй ӕй бавдесонцӕ, Хуцаубӕл еузӕрдон ӕнцӕ ӕви нӕ? Нӕъ. Етӕ ӕнхӕст адӕн исуодзӕнцӕ ӕма фӕстаг фӕлварӕн дӕр фӕййевгъуйдзӕй. Сӕ разӕй уодзӕй ӕносон цард. Йегови хецаудзийнадӕ тӕккӕ хуӕздӕр ке ӕй, уой исбӕлвурд кӕнун ба ма гъӕудзӕй? Нӕъ. Еугур изӕдтӕ дӕр ӕма адӕн дӕр уодзӕнцӕ Йегови хецаудзийнади дӕлбарӕ ӕма ин еу бийнонти хузӕн цийнӕгӕнгӕй лӕггадӕ кӕндзӕнцӕ. Йегови номи туххӕй ба ци ес зӕгъӕн?

Еци рӕстӕг еугурӕйдӕр Йегови туххӕй рӕстдзийнадӕ зондзӕнцӕ ӕма ӕ ном ӕгас цъифкалӕнтӕй дӕр искӕдзос уодзӕй. Фал уӕддӕр ӕгасемӕндӕр, уӕлӕрвти дӕр ӕма зӕнхӕбӕл дӕр, сӕ царди фиццаг бунати уодзӕй Йегови ном кадгин кӕнун. Цӕмӕн? Уомӕн ӕма ’й уиндзӕнцӕ, Йеговӕ идарддӕр дӕр дессаги гъуддӕгтӕ ке кӕнуй. Киристе сӕрниллӕгӕй ӕгас бартӕ дӕр Йегови барӕ бакӕндзӕй, «цӕмӕй алкӕмӕндӕр Хуцау уа ӕ еунӕг Хецау» (1 Кор. 15:28). Уой фӕсте ӕгас адӕнӕн дӕр фӕззиндзӕй, «Хуцауи сувӕллӕнттӕн ци дессаги сӕребарӕдзийнадӕ ес, уӕхӕн сӕребарӕдзийнадӕ» (Ром. 8:21). Гъе уотемӕй Йегови фӕндон исӕнхӕст уодзӕй – изӕдтӕ дӕр ӕма адӕн дӕр исуодзӕнцӕ еу устур, ӕнгом бийнонтӕ (Еф. 1:10).

Ӕгас еци хабӕрттӕ Йегови устур бийнонтӕбӕл куд рабӕрӕг уодзӕнцӕ? Ке зӕгъун ӕй гъӕуй, не ’гасейдӕр фӕнддзӕй Йегови ном идарддӕр дӕр рохс кӕнун. Псаломзаргӕнӕг Давид Хуцауи разамундӕй уӕхӕн дзурдтӕ ниффинста: «Табу Йеговӕ Хуцауӕн... Табу ӕ кадгин номӕн ӕносмӕ» (Пс. 72:18, 19). Ӕности дӕргъи дӕр Йеговӕ хъӕбӕр берӕ дессӕгтӕ кӕндзӕй. Ӕма нӕ еци дессӕгтӕ уингӕй ӕ ном кадгин кӕнун куд нӕ фӕнддзӕй!

Йегови ном ӕргом кӕнуй, цӕхуӕн Хуцау ӕй, уой. Ӕ номбӕл ин ку фӕссагъӕс кӕнӕн, уӕд, ӕвӕдзи, фиццагидӕр нӕ зӕрдӕбӕл ӕрлӕууй ӕ уарзондзийнадӕ (1 Иоан.4:8). Мах ӕй некӕд феронх кӕндзиан, ци уарзондзийнадӕ нӕмӕ бавдиста, ку нӕ сфӕлдиста, ахӕсти аргъ ку бафиста ӕма ӕ хецаудзийнадӕ тӕккӕ хуӕздӕр ке ӕй, уой ку исбӕлвурд кодта, уӕд. Фал ма ин ӕ уарзондзийнадӕ идарддӕр дӕр уиндзиан. Махӕн хъӕбӕр ӕхцӕуӕн уодзӕй ӕности дӕргъи дӕр нӕ уӕларвон Фидӕмӕ хӕстӕгдӕр кӕнун ӕма ин ӕ дессаги ном кадгин кӕнун (Пс. 73:28).