Dä pädihu̱ ge jabu̱ nꞌa rä asunto näꞌä xa di mportabi rä Zi Dada Jeoba ꞌne ge di debe xa dä mportabi tanto yä e̱nxe̱ ngu gatꞌho yä jäꞌi. ¿Te mä asuntoꞌä? ¡Dä tꞌaxki ꞌne drä nsundabi rä thuhu rä Zi Dada Jeoba! Durante nuꞌu̱ yä je̱ya xä mꞌu̱i yä jäꞌi, xä nja yoho yä duda nuꞌu̱ di debe drä resolbe. ¿Te mä dudaꞌu̱? 1) ¿Hage näꞌä rä modo de hanja di mända rä Zi Dada Jeoba, geꞌä mänꞌa xä ñho ꞌne pa mä ñhouihu̱? 2) ¿Hage dä thogiꞌä dä thogi yä jäꞌi, ma dä yꞌo̱te ꞌne ma dä me̱päbi rä Zi Dada Jeoba ko ngatꞌho yä koraso? Rä Zi Dada Jeoba xä do̱ꞌmi ndunthi yä je̱ya pa dä hyandi te ma dä desidi dä me̱fi tanto yä e̱nxe̱ ngu gatꞌho yä jäꞌi.

Nuꞌmu̱, ¿por hanja ha nunä imformäsio nubye̱ bi mhää ge mänꞌa xa di mporta dä tꞌaxki ꞌne drä nsundabi rä thuhu rä Zi Dada Jeoba? Ma gä handihu̱ hñuu yä raso.

Nꞌaa, ha rä jardin de Edén rä Zithu bi ñämäñꞌu̱ kontra rä Zi Dada Jeoba ꞌne njabu̱ bi tsꞌombäbi rä thuhu. Rä Zithu bi yꞌo̱tpäbi nꞌa rä ntꞌani Eva pa njabu̱ bi japi bi duda ꞌne bi deskomfia de rä Zi Dada Jeoba. Njabu̱, Eva bi hyandi Jeoba ngu nꞌa rä Zi Dada näꞌä rä yꞌu̱ya ꞌne xa rä exigente. ꞌNepu̱, rä Zithu bi ꞌñenä ge hingä mäjuäni näꞌä xki mängä rä Zi Dada Jeoba, pa njabu̱ xä thandi Jeoba ngu nꞌa rä kꞌuamba. Dende geꞌmu̱ nunä tsꞌo e̱nxe̱ bi gu̱tsꞌi yä nkꞌuamba kontra rä Zi Dada Jeoba hänge bi tꞌembäbi «Diablo». Nunä thuhu ri bo̱ni gu̱xä nkꞌuamba (Juan 8:44, TNM). Koꞌmu̱ Eva go bi gamfribi rä Zithu, bi desidi ya hindä yꞌo̱te rä Zi Dada Jeoba ꞌne bi u̱tsabi yä mhända (Gén. 3:1-6). Mäpaya, rä Zithu sigi xani yä nkꞌuamba pa njabu̱ japäbi yä jäꞌi dä mbeni ge rä Zi Dada Jeoba näꞌä nꞌa rä tsꞌomꞌu̱i. Ndunthi yä jäꞌi xä gamfri nuya yä nkꞌuamba hänge hinte ne dä bädi de rä Zi Dada Jeoba. Pe nuju̱ di pe̱päbihu̱ rä Zi Dada Jeoba, di handihu̱ ngu nꞌa rä injustisia gatꞌho näꞌä xä mhää kontra Geꞌä ꞌne rä thuhu. Po nuꞌu̱ yä nkꞌuamba xä mää rä Zithu, mäpaya ja yä sufrimiento ꞌne yä ntsꞌomꞌu̱i ha rä xiꞌmhai.

¿Ndaꞌä rä yoho rä raso de por hanja rä Zi Dada Jeoba ma dä japi dä tꞌaxki rä thuhu, ꞌne ma dä ꞌñudi ge puru yä nkꞌuamba näꞌä xä mhää de Geꞌä? Ma dä japi dä tꞌaxki rä thuhu, pa yä ñhoui tanto yä e̱nxe̱ ngu gatꞌho yä jäꞌi. Dä ꞌñudi ge hingä mäjuäni gatꞌho nuꞌu̱ yä nkꞌuamba xä mhää kontra Geꞌä ꞌne dä xu̱ki rä thuhu, geꞌä rä asunto mänꞌa xa tupäbi rä mu̱i rä Zi Dada Jeoba. Hänge Jeoba enä: «Xtä mää ge ma gä xu̱ki mä thuhu ꞌne hinto ma dä hñägägi» (Ezeq. 36:23). Ha näꞌä rä Padrenuestro, rä Hesu bi ꞌñenä: «Mä Zi Dadaꞌihe gi ꞌmu̱i mähetsꞌi, drä nsunda ri mäkä thuhu». Ha nunä sadi rä Hesu bi ꞌñudi po te mä asunto mänꞌa di debe gä tumämu̱ihu̱ (Mat. 6:9). Rä Mäkä Tꞌofo udi ge xa mähyoni gä nsundahu̱ rä thuhu rä Zi Dada Jeoba. Di tinihu̱ habu̱ enä: «Umbäbihu̱ Jeoba näꞌä rä nsunda ri ꞌñepäbi rä thuhu» (1 Crón. 16:29; Sal. 96:8). «Tutuäbihu̱ yä jähñä rä mäkä thuhu» (Sal. 66:2). «Ma gä nsunda ri thuhu pa nzäntho» (Sal. 86:12). Nꞌa rä pa nuꞌmu̱ rä Hesu mi yꞌo ha Jerusalén mbo ha rä templo, bi ꞌñembäbi rä Dada: «Japäbi dä nsunda ri thuhu». Rä Zi Dada Jeoba bi dädi ꞌne bi ꞌñenä: «Xtä japi xä nsunda, ꞌne gä japi dä nsunda mänꞌaki» (Juan 12:28, Ár ꞌRaꞌyo Nkohi Jö [RN]). a

¿Ndaꞌä rä hñuu rä raso de por hanja rä Zi Dada Jeoba ma dä japi dä tꞌaxki rä thuhu ꞌne ma dä ꞌñudi ge puru yä nkꞌuamba näꞌä xä mhää de Geꞌä? Ngeꞌä rä Zi Dada Jeoba ne ge rä thuhu drä nsundabi pa nzäntho ꞌne ya hinto dä mänchabi mänꞌaki. Ja ngu dä mäñhu̱ ri mu̱di, durante yä je̱ya xä nja yoho yä duda nuꞌu̱ di  debe drä resolbe: 1) ¿Hage näꞌä rä modo de hanja di mända rä Zi Dada Jeoba, geꞌä mänꞌa xä ñho ꞌne pa mä ñhouihu̱? 2) ¿Hage dä thogiꞌä dä thogi yä jäꞌi, ma dä yꞌo̱te ꞌne ma dä me̱päbi rä Zi Dada Jeoba ko ngatꞌho yä koraso? ¿Gi pädi? Xti uadi nuꞌu̱ nꞌa mꞌo nje̱ya de dä mända rä Kristo ꞌne xti thogi näꞌä rä gäxä prueba pa gatꞌho yä jäꞌi, ya hingä ma dä nja nuya yä duda. ¿Por hanja? Ngeꞌä gatꞌho nuꞌu̱ yä jäꞌi ma dä mꞌu̱hni, geꞌu̱ bi däpäbi näꞌä rä gäxä prueba ꞌne yä dyä perfecto. Nubye̱ hää, ¡yä jäꞌi ma dä za dä mꞌu̱i pa nzäntho! Tanto yä e̱nxe̱ ngu yä jäꞌi, ya hinte mä duda ma dä me̱ꞌtsi ge rä gobiernu rä Zi Dada Jeoba geꞌä mänꞌa xä ñho ꞌne gatꞌho ma dä mꞌu̱i dispuesto dä hyandi ngu rä gobernante. Pe xibye̱, ¿hanja ma dä gohi rä thuhu rä Zi Dada Jeoba?

Xti zo̱ho̱ näꞌä rä paꞌä, ante yä da yä e̱nxe̱ ꞌne yä jäꞌi, rä thuhu rä Zi Dada Jeoba ma dä tꞌaxki ꞌne ma dä gohi xä nsundatho. Hää, ya hinte mä nkꞌuamba nixi hinte mä duda ma dä nja näꞌä ma dä tsꞌombäbi rä thuhu. Pe hingä ho̱nse̱ꞌä, rä thuhu rä Zi Dada Jeoba ma dä sigi dä nheki xä nsunda ꞌne ma dä tꞌespäbi rä nsu po gatꞌho näꞌä ma dä hyoki tanto ha mähetsꞌi ngu ha rä Xiꞌmhai. Por ejemplo, xti uadi nuꞌu̱ nꞌa mꞌo nje̱ya de dä mända rä Hesu ꞌne xti goꞌspäbi rä Dada näꞌä rä autorida bi umbäbi, Jeoba mismo go geꞌä ma dä mända gatꞌho (1 Cor. 15:28). Mꞌe̱fa gatꞌho nuꞌu̱ ma dä ꞌmu̱i ha rä Xiꞌmhai «ma dä zo̱ho̱ dä ꞌmu̱i libre ngu yä bätsi Äjuä» (Rom. 8:21, TNM). Nubye̱ hää, rä Zi Dada Jeoba ma dä hyandi hanja tanto nuꞌu̱ yä bätsi bi ꞌmu̱i ha mähetsꞌi ngu nuꞌu̱ ma dä mꞌu̱i nuua ha rä Xiꞌmhai, ma dä mꞌu̱i unido ꞌne ma dä zo̱ho̱ dä nja nꞌadä rä familia (Efes. 1:10).

¿Te ma dä senti nunä däta familia po rä Zi Dada Jeoba? Kada nꞌaa, ko ngatꞌho rä koraso ma dä desia dä nsundabi ꞌne dä ꞌñeꞌspäbi rä nsu rä thuhu rä Zi Dada Jeoba. Rä rey David bi ꞌñenä: «Drä nsunda rä Zi Dada Jeoba. [...] Dä tꞌespäbi rä nsu pa nzäntho rä mäkä thuhu» (Sal. 72:18, 19). Mäske ma dä thogi yä je̱ya, yä mꞌotho yä je̱ya ꞌne yä miyontho yä je̱ya, pe kada nꞌa rä pa ma gä tinihu̱ ndunthi yä raso pa gä jamädibihu̱ rä Zi Dada Jeoba ꞌne gä nsundabihu̱ rä thuhu.

Ora tso ha mä mfenihu̱ rä thuhu rä Zi Dada Jeoba, jakägihu̱ gä beñhu̱ tenguꞌä rä mꞌu̱i. Pe de gatꞌho nuꞌu̱ yä hogä mꞌu̱i pe̱ꞌtsi, mänꞌa di beñhu̱ näꞌä rä mhäte pe̱skägihu̱ (1 Juan 4:8). Hänge po nzäntho ma gä benihu̱ ge po rä mhäte bi hyogägihu̱ ꞌne po rä mhäte bä pe̱hni rä Tꞌu̱ pa bi uni nꞌa rä njutꞌi po gekhu̱. Pe hingä ho̱nse̱ꞌä, nunka ma gä pumfrihu̱ ge po rä mhäte, rä Zi Dada Jeoba bi mꞌu̱i dispuesto dä esplika ꞌne dä ꞌñudi por hanja Näꞌä nꞌa rä hogä gobernante. Kada nꞌa rä pa ma gä handihu̱ hanja rä Zi Dada Jeoba ma dä ꞌñutkägihu̱ rä mhäte. Hää, mäske ma dä thogi yä je̱ya, yä mꞌotho yä je̱ya ꞌne yä miyontho yä je̱ya, pe kada nꞌa rä pa mänꞌa ma gä pädihu̱ tenguꞌä rä mꞌu̱i rä Zi Dada Jeoba ꞌne geꞌä ma dä jakägihu̱ gä mädihu̱ ꞌne gä nsundabihu̱ rä mäkä thuhu (Sal. 73:28).