Tepet na Saray Manbabasa
Anton punto so idadanet na artikulon “Napasanto Komon so Ngaran Mo” ed Hunyo 2020 ya isyu na Say Panag-bantayan?
Diad satan ya artikulo, naaralan tayo ya walay saksakey tan sankaimportantian ya isyu ya aarapen na amin ya anghel tan totoo: say pamasanto ed ngaran nen Jehova. Nalalanor ed satan ya isyu so inkasoberano to—no kasin say uley to so sankaabigan. Nalalanor met ed satan ya isyu so katooran na saray totoo.
Akin et panisiaan tayo ya say sankaimportantian ya isyu et say pamasanto ed ngaran nen Jehova? Nengnengen tayoy taloran rason.
Dineralan nen Satanas so ngaran nen Jehova diad hardin na Eden tan dederalan to ni itan anggad natan
Unona, dineralan nen Satanas so ngaran o reputasyon nen Jehova diad hardin na Eden. Nen tinepetan nen Satanas si Eva, pinapaway to ya masiblet ya Dios si Jehova tan istrikto kunon maong ed saray sakop to. Insan walay imbaga tod si Eva ya kabaliktaran ed imbaga nen Jehova. Kanian singa met la imbaga nen Satanas ya matila so Dios. On, pinauges toy Jehova, kanian nagmaliw ya “Diablo,” ya say labay ton ibaga et “managpauges.” (Juan 8:44) Anisia si Eva ed si Satanas kanian agto la inunor so ganggan na Dios. Lapud impanrebelde nen Eva, mapatpatnag ya agto labay so manpasakop ed uley nen Jehova. (Gen. 3:1-6) Anggad natan et papaugesen nin siansia nen Satanas so ngaran na Dios. Titilaan to iray totoo pian aliwliwa so pakanengneng dad si Jehova. No napanisia to ra, baleg so posibilidad ya agda met la unoren si Jehova. Importantin maong ed sikatayo so ngaran nen Jehova. Kanian say panederal ed masanton ngaran to so ituturing tayon sankaugesan lan krimen. Atan so sengegan na amin ya problema tan kaugsan ed mundo.
Komadua, parad pankaabigan na amin a pinalsa, pasantosen tan linisan nen Jehova so ngaran to. Desidido si Jehova ya gawaen itan. Kuan to: “Pasantosen ko so maglorian ngaran ko.” (Eze. 36:23) On, importantin maong itan ed si Jehova. Nanengneng met ed samay pikakasin imbangat nen Jesus no anto dapat so sankaimportantian ya ipikasi tayo. Oniay imbaga to: “Ama mi a walad tawen, napasanto komon so ngaran mo.” (Mat. 6:9) Dakel nin teksto ed Biblia so mangipapanengneng ya importante so pangigloria ed ngaran nen Jehova. Nia ray pigaran alimbawa: “Iter yod si Jehova so gloria a manepeg ed ngaran to.” (1 Awa. 16:29; Sal. 96:8) “Kansionan yo na panangidayew so maglorian ngaran to.” (Sal. 66:2) “Igloriak so ngaran mo ya anggad angga.” (Sal. 86:12) Diad taloran rekord ed Ebanghelyo ya nansalitan mismo si Jehova manlapud tawen, say sakey et agawa nen walad templo ed Jerusalem si Jesus tan imbaga ton: “Ama, igloriam so ngaran mo.” Oniay inyebat nen Jehova: “Inggloriak itan tan igloriak lamet.”—Juan 12:28. a
Komatlo, say gagala nen Jehova et tuloytuloy ya narayew so masanton ngaran to diad andi-anggaan. Isip mo pa: Kayari na Sanlibon Taon ya Uley nen Kristo tan asumpal lay unor ya subok, wala ni kasi anghel o too ya aliwa nin malinew ed sikato so sankaimportantian ya isyu—say pamasanto ed ngaran nen Jehova? Pian naebatan tayo itan, pawilen tayo pa may duaran nalalanor ya isyu—say katooran na too tan say inkasoberano na Dios. Kasin saramay nanmatoor ed unor ya subok et nakuestion ni so katooran da tan kaukolan da nin patunayan itan? Andi la. Perpekto la ra tan alampasan da lay unor ya subok. Awaten da lay premyo da ya bilay ya andi-anggaan. Kasin aliwa nin malinew ed saray totoo tan anghel no siopay makanepegan ya manuley ed uniberso? Malinew la. Ta diad satan ya panaon, amin ya walad tawen tan dalin et manpapasakop la ed uley nen Jehova. Say ngaran nen Jehova balet ey?
Diad satan ya panaon, apasanto lay ngaran nen Jehova tan anggapo lan balot so manederal ed ngaran to. Anggaman ontan, atan nin siansia so sankanonot tan walad puso na amin ya lingkor to ed tawen tan dalin. Akin ey? On ta dakdakel ni nanengneng dan makapakelaw ya gawaen nen Jehova. Isipen pa: No ipawil la nen Jesus so amin ya pakauley ed si Jehova, “say Dios so magmaliw ya alenleneg a Manuley na amin.” (1 Cor. 15:28) Panliketan la na amin ya totoo so “maglorian kawayangan bilang ananak na Dios.” (Roma 8:21) Ditan la nagawa imay gagala nen Jehova ya magmaliw lan saksakey ya pamilya so amin ya ananak to ed tawen tan dalin.—Efe. 1:10.
No nagawa la irayan amin, antoy epekto to ed saray anghel tan totoo? Seguradon agtayo napigilan so sarili tayo ya irayew so maglorian ngaran nen Jehova. Oniay insulat nen salmistan David: “Narayew komon si Jehova a Dios . . . Narayew komon ya anggad angga so maglorian ngaran to.” (Sal. 72:18, 19) Anggano manbilay tayo ni na andi-anggaan, agtayon balot naupotan na rason pian irayew so ngaran nen Jehova!
Diad tuay tua, irerepresenta na ngaran nen Jehova so amin ya tungkol ed sikato. No nabitla itan ya ngaran, say naisip tayon tampol et no anton klase na Dios si Jehova. Ipapanonot sirin na ngaran to so manunan kualidad to, say aro. (1 Juan 4:8) Diad balon mundo, agtayon balot nalingwanan iray ginawa nen Jehova lapud inar-aro to tayo. Pinalsa to tayo, inter toy dondon, tan pinatunayan to ya sikato so sankaabigan ya manuley. Pero diad kada agew ed balon mundo, tuloytuloy tayo nin nalikna so panangaro nen Jehova. Diad andi-anggaan et lalon onapit so liknaan tayod Ama tayo tan napakilos tayon mangansion na panangirayew lapud maglorian ngaran to.—Sal. 73:28.
