اہم سوال
اُردو زبان چ جون 2020 دے ”مینارِنگہبانی“ چ مضمون ”تیرا نام پاک مانا جائے“ توں تُسی یہوواہ دے ناں تے اوہدے حکومت کرن دے اِختیار بارے کیہڑیاں گلاں سمجھ گئے او؟
اوس مضمون چ اَسی سکھیا سی کہ اِک معاملہ کائنات چ سب توں اہم اے جدا سارے فرشتیاں تے انساناں تے اثر پیندا اے۔ ایہہ معاملہ اے یہوواہ دے ناں دا پاک ثابت ہونا۔ ایس معاملے چ ایہہ وی شامل اے کہ ایہہ ثابت ہوئے کہ یہوواہ دا حکمرانی کرن دا طریقہ بہترین اے۔ ایسے طرحاں یہوواہ لئی انساناں دی وفاداری دا وی ایس اہم معاملے نال گُوڑھا تعلق اے۔
ہُن اَسی ایس گل تے کیوں زور دینے آں کہ سب توں اہم معاملہ یہوواہ دے ناں دا پاک ثابت ہونا اے؟ آؤ ویکھنے آں کہ کیہڑیاں تِن گلاں دی وجہ توں اَسی ایہہ گل کہنے آں۔
شیطان باغِعدن توں لے کے ہُن تک خدا دے ناں دی بدنامی کر رہیا اے۔
سب توں پہلی گل ایہہ وے کہ شیطان نے باغِعدن چ یہوواہ دے ناں دی بدنامی کیتی۔ اوہنے حوا کولوں جیہڑا سوال کیتا اوہدے توں اوہنے ایہہ ظاہر کرن دی کوشش کیتی کہ یہوواہ کُھلے دل والا نئیں اے تے اوہنے آدم تے حوا اُتے ناجائز پابندیاں لائیاں ہوئیاں نیں۔ فیر شیطان نے سِدھا سِدھا یہوواہ اُتے ایہہ اِلزام لایا کہ اوہ جھوٹھا اے۔ ایس طرحاں اوہنے یہوواہ دے ناں دی بدنامی کیتی۔ اِنج کرن نال اوہ اِبلیس بن گیا جدا مطلب اے ”بدنامی کرن والا۔“ (یوحنا 8:44) کیونکہ حوا نے شیطان دے جھوٹھ تے یقین کر لیا ایس لئی اوہنے یہوواہ دی نافرمانی کیتی تے اوہدی حکمرانی دے خلاف بغاوت کیتی۔ (پیدایش 3:1-6) اوہدوں توں لے کے ہُن تک شیطان یہوواہ بارے جھوٹھ پھیلا کے اوہدی بدنامی کر رہیا اے۔ جیہڑے لوک اوہدے جھوٹھ تے یقین کر لیندے نیں، اوہ شاید یہوواہ دی نافرمانی کر بیٹھن۔ ایس لئی یہوواہ دے بندیاں لئی اوہدے پاک ناں دی بدنامی سب توں وڈی ناانصافی اے تے دُنیا چ ہون والی بُرائی تے مشکلاں دی جڑ اے۔
دُوجی گل ایہہ وے کہ اپنی مخلوق دے فائدے لئی یہوواہ نے اپنے ناں نُوں پاک ثابت کرن دا عزم کیتا ہویا اے۔ یہوواہ دی نظر چ اپنے ناں نُوں پاک کرنا سب توں اہم اے۔ ایس لئی اوہنے کہیا اے: مَیں ضرور اپنے عظیم ناں نُوں پاک کراں گا۔ (حِزقیایل 36:23) تے یسوع نے وی ایہہ گل واضح کیتی کہ یہوواہ دے بندیاں دِیاں دُعاواں چ سب توں خاص تے پہلی گل کیہہ ہونی چاہی دی اے۔ اوہنے کہیا: ”تیرا ناں پاک منیا جائے۔“ (متی 6:9) بائبل چ وار وار ایس گل تے زور دِتا گیا اے کہ یہوواہ دے ناں دی وڈیائی کرنا کِنّاں ضروری اے۔ ایہدیاں کجھ مثالاں ایہہ نیں: یہوواہ دے ناں دی وڈیائی کرو جدا اوہ حق رکھدا اے۔ (1-تواریخ 16:29؛ زبور 96:8) اوہدے جلالی ناں دی تعریف چ گیت گاؤ۔ (زبور 66:2) مَیں ہمیشاں تیرے ناں دی وڈیائی کراں گا۔ (زبور 86:12) اِک وار یسوع جدوں ہیکل چ سی تے اوہنے دُعا چ یہوواہ نُوں کہیا:اَے باپ، اپنے ناں دی وڈیائی کر۔ یہوواہ نے اوہنوں اسمان توں جواب دِتا: مَیں ایہدی وڈیائی کیتی اے تے دُبارہ وی کراں گا۔—یوحنا 12:28۔ a
تیجی گل ایہہ وے کہ یہوواہ دے ناں دے نال اوہدا مقصد جُڑیا ہویا اے۔ ذرا سوچو کہ جدوں یسوع دی ہزار سالاں حکمرانی دے بعد آخری اِمتحان ہوئے گا تے اوس ویلے انساناں تے فرشتیاں لئی یہوواہ دے ناں دی کیہہ اہمیت ہوئے گی؟ ایس سوال دا جواب جانن لئی آؤ ایس معاملے نال جُڑے ہوئے دو اہم معاملیاں تے غور کرنے آں: یہوواہ لئی انساناں دی وفاداری تے یہوواہ دا حکمرانی کرن دا حق۔ جیہڑے لوک یہوواہ دی حکمرانی لئی اپنی حمایت ثابت کر چُکے ہون گے، کیہہ اوہناں نُوں فیر توں ایہنوں ثابت کرنا پووے گا؟ نئیں کیونکہ اوہ بےعیب ہون گے تے یہوواہ لئی وفاداری ثابت کر چُکے ہون گے۔ اوہناں نُوں ہمیشاں دی زندگی مل چُکی ہوئے گی۔ ایہدے علاوہ ایہہ وی ثابت ہو چُکیا ہوئے گا کہ یہوواہ ای بہترین حکمران اے۔ اوس ویلے اسمان تے زمین دی ساری مخلوق اِک مُٹھ ہو چُکی ہوئے گی تے ہمیشاں لئی یہوواہ نُوں اپنا حکمران تسلیم کرے گی۔ کیہہ اوس ویلے وی اوہناں لئی یہوواہ دا ناں اہم ہوئے گا؟
یہوواہ دا ناں اوس ویلے پوری طرحاں پاک ثابت ہو چُکیا ہوئے گا۔اوس ویلے وی اسمان تے زمین اُتے رہن والے اوہدے بندیاں لئی اوہدا ناں سب توں اہم ہوئے گا۔ پر کیوں؟ کیونکہ اوہ یہوواہ دے شاندار کماں نُوں ویکھدے رہن گے۔ ذرا سوچو کہ یسوع بڑی خاکساری نال اپنی ہزار سالہ حکمرانی دے بعد سارا اِختیار باپ نُوں دے دَوے گا۔ (1-کُرنتھیوں 15:28) ایس توں بعد زمین تے انسان خدا دی اولاد دی شان دار آزادی دا مزہ لین گے۔ (رومیوں 8:21) اوس ویلے یہوواہ دا ایہہ مقصد پورا جائے گا کہ اسمان تے زمین دی ساری مخلوق اِک خاندان بن جائے۔—اِفسیوں 1:10۔
ایہناں ساریاں کماں دا یہوواہ دے خاندان تے کیہہ اثر ہوئے گا؟بےشک اوس ویلے وی ساڈے اندر خدا دے ناں دی وڈیائی کرن دی شدید خواہش ہوئے گی۔ داؤد نے اِک زبور چ لکھیا سی: یہوواہ دی وڈیائی ہوئے، اوہدے جلالی ناں دی وڈیائی ہمیشاں تک ہوندی رہوے۔ (زبور 72:18، 19) اَسی ہمیشاں تک ایہو جہیاں چیزاں ویکھدے رہواں گے جنہاں دی وجہ توں اَسی یہوواہ دی وڈیائی کراں گے۔
یہوواہ دا ناں اوہدے بارے سب کجھ دَسدا اے۔ اوہدے ناں توں سانوں خاص طور تے اوہدی محبت بارے پتہ چلدا اے۔ (1-یوحنا 4:8) سانوں ہمیشاں تک ایہہ یاد رہوے گا کہ یہوواہ نے سانوں محبت دی وجہ توں بنایا اے۔ اوہنے محبت دی وجہ توں فدیے دا بندوبست کیتا اے۔ اوہدا حکمرانی کرن دا طریقہ بالکل صحی اے تے اوہ پیار نال اِنج کردا اے۔ اَسی ہمیشاں تک یہوواہ دی محبت نُوں محسوس کردے رہواں گے۔ اَسی اپنے اسمانی باپ دے نیڑے ہوندے جاواں گے تے اوہدے جلالی ناں دی وڈیائی کر دے رہواں گے۔—زبور 73:28۔
a بائبل توں ایہہ وی پتہ چلدا اے کہ یہوواہ اپنے ناں دی خاطر بوہت کجھ کردا اے۔ مثال لئی اوہ اپنے بندیاں دی رہنمائی کردا اے، اوہناں دی مدد کردا اے، اوہناں نُوں مصیبتاں چوں کڈھدا اے، اوہناں نُوں معاف کردا اے تے اوہناں دی جان بچاندا اے۔ یہوواہ ایہہ سب کجھ اپنے عظیم ناں دی خاطر کردا اے۔—زبور 23:3؛ 31:3؛ 79:9؛ 106:8؛ 143:11۔
