Chai yachaipica tucui gentecuna, angelcunapish Jehová Diospaj shutita jatunyachina cashcatami yacharcanchij. Shinallataj Jehová Diospaj shutita jatunyachingapajca pai tucuimanta yalli alli mandaj cashcatami ricuchina can. Ashtahuanpish Diospaj shutita jatunyachingapajca paitami tucui shunguhuan sirvina canchij.

Cunanca Jehová Diospaj shutita imamanta jatunyachina cashcatami ricushun.

Edén huertapica Satanasca Jehová Diospaj shutitami mapayachirca. Satanasca Jehová Dios paicunaman mana tucuita cusha nishcata, sinchi mandashcacunata churashcatami Evataca crichirca. Qꞌuipacarin ‘Jehová Dios nishcacunaca mana ciertochu can’ nishpami yangamanta paita juchachirca. Chashnami Satanasca “Diablo” tucurca. Chai shutica “yangamanta juchachij” nisha ninmi (Juan 8:44). Cutin Evaca Diablopaj llullacunata crishpami Jehová Diostaca ña mana cazusha nirca (Génesis 3:1-6). Diabloca ‘Diosca mana alli dioschu’ nishpami paipaj shutita mapayachishpa caticun. Huaquin gentecunaca Diablo nishcacunata crishpami Jehová Diosta mana cazuncuna. Ashtahuanpish Diablopaj llullacunata crishcamantami cunan punllacunapica achca llaquicuna tiyan. Diosta sirvijcunaca Jehová Diospaj shutita Diablo mapayachicujta ricushpaca llaquillami sintirinchij.

Shinallataj Jehová Diosca jahua pachapi, cai Allpapi tucuicuna alli, tranquilo causachunmi munan. Chaimantami paica paipaj shutita jatunyachingapaj tucuita ruranga. Ezequiel 36:23-pica: “Ñuca jatun shutita yangata rurachishcataca jatunyachishami” nircami. Jesusca Jehová Diosta ima shina mañana cashcata yachachicushpaca “cambaj shutica jucha illaj nishca cachun” nishpami mañarca. Chashnami ñucanchijcunapish Jehová Diospaj shuti jucha illaj cachun nishpa mañana cashcata yachachirca (Mateo 6:9). Bibliapica Jehová Diospaj shutita jatunyachina cashcatami yachachin. Por ejemplo 1 Crónicas 16:29 y Salmo 96:8-pica, ‘Diospaj shutitaca pai munashca shinataj alli nichigari’ ninmi. Cutin Salmo 66:2-pica: ‘Diospaj shutita cantaichigari’ ninmi. Salmo 86:12-pipish, “Quiquinpaj shutitaca huiñaitami jatunyachisha” ninmi. Shinallataj Jesús templopi cashpa, “Yayitu, cambaj shutita jatunyachipai” nijpica, Jehová Dios “ñami jatunyachircani. Cutinpish jatunyachishami” nishcami uyarirca (Juan 12:28). a

Shinallataj Jehová Diosca paipaj shutimantami paipaj munaita pajtachinga. Por ejemplo, Jesús mil huatacunata mandashca qꞌuipaca shuj pruebami tiyanga. ¿Chai qꞌuipaca gentecunapish angelcunapish Diospaj shutimantaca imatataj yuyangacuna? Chai punllacunapica gentecuna Jehová Diosta shungumanta sirvisha nishcata  ricuchichunca ña mana minishtiringachu. Paicunaca huiñai huiñaitami causai tucungacuna. Shinallataj angelcunapish gentecunapish Jehová Dioslla alli mandaj cashcatami seguros cangacuna. Chaimantami macanacuicunaca ña mana tiyanga. ¿Pero Diospaj shutihuanca imataj tucunga?

Diospaj shutitaca ña mana pi yangapi churangachu. Diospaj shutica ima juchachina illajllami saquiringa. Ashtahuanpish jahua pachapi, cai Allpapi causajcunapajca Diospaj shutica tucuimanta yalli valishcami canga. Chaimantami paitaca jatunyachishpa catingacuna. Chai punllacunapica Jesusca Jehová Diosmanmi mandanata tigrachinga. Chaipimi Jehová Diosca pailla “tucuita mandanga” (1 Corintios 15:28). Chai qꞌuipami cai Allpapi causajcunaca, “Diospaj huahuacuna cashcamantami ismuna aichamanta cacharishca causangacuna” (Romanos 8:21). Chashnami jahua pachapi causajcunapish cai Allpapi causajcunapish shujlla familia shina Jehová Diosta sirvingacuna. Chaipimi Jehová Diospaj munaica pajtaringa (Efesios 1:10).

Jahua pachapi cajcuna cai Allpapi causajcuna shujlla familia shina Jehová Diosta sirvishpaca paitami huiñai huiñaita alabasha, jatunyachisha ningacuna. Rey Davidca ‘Mandaj Diospaj shutica alli nishca cachun. Paipaj sumaj shutica huiñaita alli nishca cachun’ nircami (Salmo 72:18, 19). David nishca shinaca Diosta sirvijcunaca huiñai huiñaitami Jehová Diosmanta yachashpa, paita jatunyachishpa causashun.

Diospaj shutica pai ima shina cashcatami ricuchin. Chaimantami paipaj shutipi yuyashpaca cꞌuyaj cashcata yuyarinchij (1 Juan 4:8). Huiñai huiñaita causacushpaca Jehová Dios ñucanchijta cꞌuyashcamanta ñucanchijta rurashcatami yuyarishun. Shinallataj ñucanchijta cꞌuyashcamanta paipaj Churi ñucanchijmanta huañuchun cachashcatami yuyarishun. Ashtahuanpish ñucanchijta cꞌuyashcamanta pailla alli mandaj cashcata ricuchishcatami yuyaipi charishun. Shinallataj chai punllacunapica Jehová Dios paita sirvijcunata ima shina bendiciajtami ricushun. Cada punllami paimanta yachashpa catishun. Chaimantami cantocunata cantashpa paipaj shutita alabanata munashun (Salmo 73:28).