Chay yachachikuypim yacharqanchik angelkunapaqpas hinaspa runakunapaqpas Jehova Diospa sutin chuyanchay aswan allin kasqanta. Sutin chuyanchasqa kaptillanmi yachakunqa Jehova Dioslla allin kamachiq kasqanqa. Chay kaptillantaqmi yachakunqa imaña kaptinpas runakunaqa payman sunqu kay atisqanchikpas.

Chaynaqa, ¿imanasqataq kunanqa ninchik Jehova Diospa sutinta chuyanchay imamantapas aswan allin kasqanta? Chaymantayá qatiqninpi yuyariykusun.

Eden huertapim Diosninchikmanta satanas llullata rimarqa. Chaywanmi sutinta pinqaypi churarqa. Satanasmi Evata piensarachirqa Diosqa maqlla kasqanta, chaynataq allin hinaspa libre kawsakunankutapas mana munasqanta. Chaymantam ichaqa clarotaña nirqa Jehova Diosqa llullakusqanta. Chaynata nispanmi Jehova Diospa sutinta pinqayman churachkarqa. Chaymantapacham satanasqa rikurirurqa “diabloña”. Chay ninanqa “yanqamanta tumpaq” ninanmi (Juan 8:44). Evam satanaspa llulla rimasqanta creerurqa, hinaspam Diosta manaña kasukurqachu. Satanaspa nisqanta kasusqanraykum piensayta qallaykurqa Diosqa mana allin kamachiq kasqanta (Gen. 3:1-6). Kunan tiempopas satanasqa Diosmantam llulla rimaykunata rikurichichkan. Chaywanmi runakunata piensachin Diosqa mana allin kasqanta. Chaymi satanaspa nisqanta creeq runakunaqa Jehova Diostaqa manaña kasukuyta munankuchu. Diosninchikmanta chayna llullakunata rimasqankuwanmi sunqunchikpas nanawanchikraq. Satanas llullakusqanraykum ñakariykuna kachkan hinaspa runakunapas mana allinllataña ruwachkanku.

Jehova Diosqa tantiakurunmi sutinta chuyanchananpaq tukuy imata ruwananpaq, chaynapi llapallan unanchasqankuna allinlla kawsakunapaq. Chaytam kikinpuni palabranpi niwanchik: “Ancha riqsisqa sutiyta huklaw nacionkunapi pinqayman churasqaykichikraykum chuyanchasaqpuni”, nispa (Ezeq. 36:23). Jesusmi yachachiwarqanchik “sutikiyá chuyanchasqa kachun” nispa Diosninchikta mañakunapaq. Chay nisqanwanmi yachachiwarqanchik Jehova Diospa sutin chuyanchasqa kananpaq mañakuyqa imamantapas aswan allin kasqanta (Mat. 6:9). Bibliapipas achka kutitam rikurin Diospa sutinta hatunchanamanta. Wakin textokunapim nin: “Jehova Diospa sutintayá hatunchaychik”, nispa (1 Cron. 16:29; Sal. 96:8). “Ancha riqsisqa sutintayá takispa hatunchaychik”, nispa (Sal. 66:2). “Sutillaykitam wiñaypaq hatunchasaq”, nispa (Sal. 86:12). Huk kutipim Jerusalen templopi kachkaspan Jesusqa taytanta kaynata mañakurqa: “Taytalláy, sutikitayá hatunchay”, nispa. Hinaptinmi Diosñataq nimurqa: “Hatuncharuniñam, chaywanpas huktawanraqmi hatunchasaq”, nispa (Juan 12:28). a

Jehova Diosqa munachkan sutin wiñaypaq hatunchasqa kanantam. Piensarisun waranqa wata kamachiyta Jesus tukuruptin satanaspas, mana allin runakunapas wiñaypaq chinkachisqa kaptin Jehova Diospa sutin chuyanchasqaña kananpi. Chay tiempoqa, ¿imaynatañam angelkunapas, runakunapas Jehova Diospa sutinta qawanqaku? Allinpaqñam. ¿Imanasqa? Waranqa wata pasaytaqa manañam  pipas nitaq imapas sasachawasunchu Diosman sunqu kanapaqqa. ¿Imanasqa? Chay tiempoqa mana pantaqñam kasun. Satanaswan mana allin runakunapas chinkachisqañam kanqaku, hinaptinmi allin runakunallaña wiñaypaq kawsakusun. Chaymantapas, ¿yaqachu chay tiempoqa pillapas Dios allin kamachiq kasqanmanta iskayrayanqaraq? Manañam. ¿Imanasqa? Chay tiempopaqqa runakunapas, angelkunapas yachanqakuñam Dioslla pimantapas aswan allin kamachiq kasqanta. Chaywanmi llapallanchikpas ancha kusisqa tarikusun.

Chay tiempopaqqa, ¿Diospa sutinqa chuyanchasqañachu kanqa? Arí. Chay tiempopaqqa Diosmanta tukuy imaymana llulla rimasqankuqa yanqa kasqanmi yachakunqa. Hanaq pachapipas, kay allpa pachapipas Jehova Diospa sutintam wiña-wiñaypaq anchata respetanqaku. ¿Imanasqa? Jehova Diosqa hinallam churinkunapaq mana piensasqanchik kaqkunata suma-sumaqta ruwapuwasun. Chay tiempoqa Jesuspas humilde kasqanraykum taytanpa makinmanña tukuy ima qusqanta churaykunqa, chaynapi ‘Diosña lliwta kamachinanpaq’ (1 Cor. 15:28). Hinaptinmi, kay allpa pachapi ‘Diospa churinkunapas’ manaña huchapa munaychakusqan kasqanchikrayku “libreña”, suma-sumaqña kawsakusun (Rom. 8:21). Hanaq pachapi angelkunawanpas huk familia hinallañam kawsakusun. Chaytamá Diosqa qallariymantapacha munarqa (Efes. 1:10).

Chaymantaqa, ¿imaynañam Diospa churinkunaqa tarikusun? Hanaq pachapipas, kay pachapipas Jehova Diospa sumaq sutintam wiña-wiñaypaq hinalla hatunchayta munasun. Chayna kananmantam David nirqa: “Jehova Diosyá hatunchasqa kachun. […] Wiña-wiñaypaqyá paypa sutinqa hatunchasqa kachun”, nispa (Sal. 72:18, 19). Wiñaypaq kawsakuspaqa Diosninchik imayna kasqanta hinaspa imamantapas astawan yachaspanchikchá sutinta wiñaypaq hinalla hatunchasun.

Jehova Dios imayna kasqantamriki sutinqa qawachin. Chaymi paymanta rimaspanchikqa kuyakuq kasqanpi piensanchik (1 Juan 4:8). Manamá haykaqpas qunqasunchu Diosqa kuyawasqanchikrayku unanchawasqanchikta, kuyawasqanchikrayku churin Jesucristota kachamusqanta. Manataqmi qunqasunchu kuyawasqanchikrayku allin kamachiq kasqanta yachananchikpaq tukuy ima ruwasqantapas. Qawasuntaqmi Jehova Diosqa kuyawasqanchikrayku achkallaña bendicionkuna chaqchurimuwasqanchiktapas. Wiñaypaq kawsakuspaqariki Diosninchik tukuy imata ruwapuwasqanchikraykum astawan asuykuyta munasun, hinaspapas sumaq sutinraykum takipuyta munasun (Sal. 73:28).