Ки адаја статија дознајнѓем уствари кај иси само јекх спорно пучибе кова со влијајнела упро мануша хем упро ангелија — о славибе е Јеховаскоро свето анав. Јекх важно аспекти таро акава важно пучибе тано о право е Јеховаскоро те владинел, јавере лафенцар дали о Јехова владинела ко најшукар начин со шај. Панда јекх важно аспекти таро акава спорно пучибе тано дали ка овел мануш со ка ачхол верно е Јеховаске.

Соске акана истакнинаја кај о спорно пучибе тано башо е Јеховаскоро анав хем те овел славимо лескоро анав? Те дикха трин причине.

Прво, ки Еденско градина о Сатана каљарѓа е Јеховаскоро анав, или лескоро углед. Пле пучибаја о Сатана превртинѓа о чачипе, аѓаар со чхивѓа е Ева те мислинел песке кај о Јехова нане дарежливо хем кај чхивела ограничувања кола со нане разумна. Пало адава, о Сатана вакерѓа нешто скроз јавер таро адава со вакерѓа о Јехова. Адалеа ов уствари вакерѓа кај о Девел тано ховавно хем аѓаар каљарѓа е Јеховаскоро анав. Аѓаар уло „Бенг“, со значинела „клеветнико“ (Јован 8:44). Адалеске со и Ева верујнѓа ко е Сатанаскере ховајба, ули непослушно е Девлеске хем аѓаар сикавѓа кај на мангела те овел лакоро Владетели (1. Мој. 3:1-6). Таро адава диве о Сатана каљарела е Девлескоро анав аѓаар со вакерела ховајба башо адава сави личност тано о Јехова. Окола со верујнена ко асавко ховајба најверојатно ка циден пе таро Јехова. Адалеске, е Девлескере народоске адава сој тано каљардо е Јеховаскоро свето анав тани и најбари неправда. Адаја тани и најбари причина соске иси добором мукхе хем лошнипе ко акава свето.

Дујто, башо шукарипе е манушенгоро хем е ангеленгоро о Јехова тано одлучно те славинел пло анав хем те чистинел ле тари лаџ со сине леске анди. Адаја тани и најважно бути е Јеховаске. Адалеске ов вакерѓа: „Ка славинав мло баро анав“ (Езек. 36:23). Исто аѓаар, о Исус вакерѓа која тани и најважно бути баши која со ваљани те молинен пе е Јеховаскере слуге кеда вакерѓа: „Те фалинел пе тло свето анав“ (Мат. 6:9). Ки Библија ко бут тхана тано истакнимо кобор тано важно те славинел пе е Јеховаскоро анав. На пример, ки лате пишинела: „Ден е Јеховаске и слава која со припадинела лескере анавеске“ (1. Лет. 16:29; Пс. 96:8). „Гиљаја фалинен лескоро славно анав“ (Пс. 66:2). „Ка славинав тло анав засекогаш“ (Пс. 86:12). Ки јекх прилика кеда о Исус сине ко храми ко Ерусалим ов вакерѓа: „Мо Дад, прославин тло анав“. Тегани о Јехова одговоринѓа леске таро небо: „Прославинѓум ле хем ка прославинав ле“ (Јован 12:28). a

Трито, е Јеховаскири намера тани те славинел пе лескоро анав ки цели вечност. На пример, размислин со ка овел е Јеховаскере анавеа кеда ка завршинел о последно испит ко крајо  таро е Христосескоро владибе пало милја берша. Со тегани ка мислинен о ангелија хем о мануша башо е Јеховаскоро анав? Те шај те дознајна о одговор, те сетина амен ко дуј аспектија кола сој тане поврзиме е спорно пучибаја — и верност е манушенгири хем о право е Јеховаскоро те владинел. Дали о мануша кола со више докажинѓе кај тане верна е Девлеске понадари да ка ваљани те докажинен пли верност? На. Ола ка овен совршена хем целосно испитиме. Ола ка добинен о вечно живото. Дали понадари да ка керел пе лафи башо е Јеховаскоро право те владинел, па чак те овел поделбе башо адава? На. Никогаш повише нане те овел потребно те докажинел пе кај о Јехова тано најшукар Владетели. Џи тегани, е Јеховаскоро анав целосно ка овел славимо хем целосно чистимо тари лаџ со сине леске анди.

Сепак, е Јеховаскоро анав понадари да ка овел и најважно бути лескере слугенге сој ко небо хем ки пхув. Соске? Адалеске со ка дикхен сар о Јехова понадари да керела чудесна буќа. Размислин башо акава: Адалеске со о Исус понизно ка иранел и целосно власт е Јеховаске, о Девел „ка овел сариненге са“ (1. Кор. 15:28). А пало адава, о мануша ки пхув „ка добинен и славно слобода е Девлескере чхавенгири“ (Рим. 8:21). Аѓаар о Јехова целосно ка исполнинел пли намера — лескере чхаве сој ко небо хем ки пхув те овен јекх бари фамилија сој ко јекхипе (Еф. 1:10).

Сар са акала буќа ка влијајнен упри е Јеховаскири фамилија сој ко небо хем ки пхув? Сигурно ка овел амен бари желба понадари да те фалина е Јеховаскоро анав. О псалмисти о Давид сине поттикнимо те пишинел: „Нека овел фалимо о Јехова о Девел... лескоро славно анав нека овел фалимо засекогаш“ (Пс. 72:18, 19). Ки цели вечност ка аракха неве причине те кера адава.

Уствари, е Јеховаскоро анав сикавела аменге са баши лескири личност. Адалеске, кеда размислинаја башо лескоро анав сар прво сетинаја амен ко лескоро мангипе (1. Јов. 4:8). Никогаш нане те бистра кај о Јехова створинѓа амен таро мангипе, кај таро мангипе денѓа амен и откупно жртва хем кај таро мангипе праведно владинела. Ама адава нане са, амен понадари да ка дикха е Јеховаскоро мангипе. Ки цели вечност ка ова поттикниме те ова са попаше амаре небесно Дадеа хем те фалина лескоро свето анав гиленцар (Пс. 73:28).