Ki adaja statija doznajngjem ustvari kaj isi samo jekh sporno pučibe kova so vlijajnela upro manuša hem upro angelija — o slavibe e Jehovaskoro sveto anav. Jekh važno aspekti taro akava važno pučibe tano o pravo e Jehovaskoro te vladinel, javere lafencar dali o Jehova vladinela ko najšukar način so šaj. Panda jekh važno aspekti taro akava sporno pučibe tano dali ka ovel manuš so ka ačhol verno e Jehovaske.

Soske akana istakninaja kaj o sporno pučibe tano bašo e Jehovaskoro anav hem te ovel slavimo leskoro anav? Te dikha trin pričine.

Prvo, ki Edensko gradina o Satana kaljargja e Jehovaskoro anav, ili leskoro ugled. Ple pučibaja o Satana prevrtingja o čačipe, agjaar so čhivgja e Eva te mislinel peske kaj o Jehova nane darežlivo hem kaj čhivela ograničuvanja kola so nane razumna. Palo adava, o Satana vakergja nešto skroz javer taro adava so vakergja o Jehova. Adalea ov ustvari vakergja kaj o Devel tano hovavno hem agjaar kaljargja e Jehovaskoro anav. Agjaar ulo „Beng“, so značinela „klevetniko“ (Jovan 8:44). Adaleske so i Eva verujngja ko e Satanaskere hovajba, uli neposlušno e Devleske hem agjaar sikavgja kaj na mangela te ovel lakoro Vladeteli (1. Moj. 3:1-6). Taro adava dive o Satana kaljarela e Devleskoro anav agjaar so vakerela hovajba bašo adava savi ličnost tano o Jehova. Okola so verujnena ko asavko hovajba najverojatno ka ciden pe taro Jehova. Adaleske, e Devleskere narodoske adava soj tano kaljardo e Jehovaskoro sveto anav tani i najbari nepravda. Adaja tani i najbari pričina soske isi doborom mukhe hem lošnipe ko akava sveto.

Dujto, bašo šukaripe e manušengoro hem e angelengoro o Jehova tano odlučno te slavinel plo anav hem te čistinel le tari ladž so sine leske andi. Adaja tani i najvažno buti e Jehovaske. Adaleske ov vakergja: „Ka slavinav mlo baro anav“ (Ezek. 36:23). Isto agjaar, o Isus vakergja koja tani i najvažno buti baši koja so valjani te molinen pe e Jehovaskere sluge keda vakergja: „Te falinel pe tlo sveto anav“ (Mat. 6:9). Ki Biblija ko but thana tano istaknimo kobor tano važno te slavinel pe e Jehovaskoro anav. Na primer, ki late pišinela: „Den e Jehovaske i slava koja so pripadinela leskere anaveske“ (1. Let. 16:29; Ps. 96:8). „Giljaja falinen leskoro slavno anav“ (Ps. 66:2). „Ka slavinav tlo anav zasekogaš“ (Ps. 86:12). Ki jekh prilika keda o Isus sine ko hrami ko Erusalim ov vakergja: „Mo Dad, proslavin tlo anav“. Tegani o Jehova odgovoringja leske taro nebo: „Proslavingjum le hem ka proslavinav le“ (Jovan 12:28). a

Trito, e Jehovaskiri namera tani te slavinel pe leskoro anav ki celi večnost. Na primer, razmislin so ka ovel e Jehovaskere anavea keda ka završinel o posledno ispit ko krajo  taro e Hristoseskoro vladibe palo milja berša. So tegani ka mislinen o angelija hem o manuša bašo e Jehovaskoro anav? Te šaj te doznajna o odgovor, te setina amen ko duj aspektija kola soj tane povrzime e sporno pučibaja — i vernost e manušengiri hem o pravo e Jehovaskoro te vladinel. Dali o manuša kola so više dokažingje kaj tane verna e Devleske ponadari da ka valjani te dokažinen pli vernost? Na. Ola ka oven sovršena hem celosno ispitime. Ola ka dobinen o večno životo. Dali ponadari da ka kerel pe lafi bašo e Jehovaskoro pravo te vladinel, pa čak te ovel podelbe bašo adava? Na. Nikogaš poviše nane te ovel potrebno te dokažinel pe kaj o Jehova tano najšukar Vladeteli. Dži tegani, e Jehovaskoro anav celosno ka ovel slavimo hem celosno čistimo tari ladž so sine leske andi.

Sepak, e Jehovaskoro anav ponadari da ka ovel i najvažno buti leskere slugenge soj ko nebo hem ki phuv. Soske? Adaleske so ka dikhen sar o Jehova ponadari da kerela čudesna bukja. Razmislin bašo akava: Adaleske so o Isus ponizno ka iranel i celosno vlast e Jehovaske, o Devel „ka ovel sarinenge sa“ (1. Kor. 15:28). A palo adava, o manuša ki phuv „ka dobinen i slavno sloboda e Devleskere čhavengiri“ (Rim. 8:21). Agjaar o Jehova celosno ka ispolninel pli namera — leskere čhave soj ko nebo hem ki phuv te oven jekh bari familija soj ko jekhipe (Ef. 1:10).

Sar sa akala bukja ka vlijajnen upri e Jehovaskiri familija soj ko nebo hem ki phuv? Sigurno ka ovel amen bari želba ponadari da te falina e Jehovaskoro anav. O psalmisti o David sine pottiknimo te pišinel: „Neka ovel falimo o Jehova o Devel... leskoro slavno anav neka ovel falimo zasekogaš“ (Ps. 72:18, 19). Ki celi večnost ka arakha neve pričine te kera adava.

Ustvari, e Jehovaskoro anav sikavela amenge sa baši leskiri ličnost. Adaleske, keda razmislinaja bašo leskoro anav sar prvo setinaja amen ko leskoro mangipe (1. Jov. 4:8). Nikogaš nane te bistra kaj o Jehova stvoringja amen taro mangipe, kaj taro mangipe dengja amen i otkupno žrtva hem kaj taro mangipe pravedno vladinela. Ama adava nane sa, amen ponadari da ka dikha e Jehovaskoro mangipe. Ki celi večnost ka ova pottiknime te ova sa popaše amare nebesno Dadea hem te falina leskoro sveto anav gilencar (Ps. 73:28).