Informasaun neʼe fó sai katak iha asuntu importante ida neʼebé kona ema no anju hotu. Neʼe mak kona-ba atu halo santu Jeová nia naran. No asuntu kona-ba Jeová nia direitu atu ukun no ema nia laran-metin ba Jeová liga malu ho asuntu importante neʼe.

Tanbasá ita tau fokus liu ba halo santu Jeová nia naran? Mai ita haree razaun tolu.

Primeiru, iha jardín Eden, Satanás koʼalia aat Jeová nia naran ka reputasaun. Liuhusi ninia pergunta ba Eva, Satanás duun katak Jeová la laran-luak no Jeová nia matadalan sira mak la justu. Tuirmai Satanás koʼalia kontra Jeová nia liafuan no duun katak Jeová bosok-teen. Neʼe hafoʼer duni Jeová nia naran. Tan neʼe nia sai nuʼudar “Diabu”, neʼebé signifika “ema neʼebé bosok hodi hafoʼer ema seluk nia naran”. (João 8:44) Eva tau fiar ba Satanás nia lia-bosok, tan neʼe nia la halo tuir Maromak no neʼe hatudu katak nia lakohi Maromak sai nuʼudar ninia ukun-naʼin. (Gén 3:1-6) Toʼo agora, Satanás kontinua hafoʼer Maromak nia naran hodi habelar lia-bosok oioin kona-ba Jeová nia hahalok. Baibain, ema neʼebé tau fiar ba lia-bosok sira-neʼe, la halo tuir Jeová. No Satanás nia hahalok aat neʼe mak hun ba situasaun aat hotu neʼebé akontese iha mundu. Tan neʼe ba Jeová nia povu, halo santu Jeová nia naran mak importante tebes.

Segundu, Jeová sei halo santu ninia naran no neʼe sei lori benefísiu ba anju no ema hotu. Halo santu Jeová nia naran mak buat neʼebé importante liu ba Jeová. Tan neʼe nia hatete: “Haʼu sei halo duni haʼu-nia naran neʼebé boot sai santu.” (Eze 36:23) No Jesus mós fó sai ho klaru kona-ba buat neʼebé tenke sai importante liu iha ita-nia orasaun bainhira nia hatete: “Halo Ita-nia naran sai santu.” (Mt 6:9) Bíblia fó sai beibeik katak importante atu Jeová nia naran hetan glória. Haree toʼok ezemplu balu tuirmai: “Fó glória ba Jeová tanba ninia naran.” (1 Krón 16:29; Sal 96:8) “Kanta knananuk hahiʼi nian ba ninia naran neʼebé kmanek.” (Sal 66:2) “Haʼu sei fó glória ba Ita-nia naran ba nafatin.” (Sal 86:12) Loron ida, kuandu Jesus iha templu iha Jeruzalein, nia dehan: “Aman, fó glória ba Ita-nia naran.” No Jeová hatán hodi dehan: “Haʼu fó glória tiha ona no haʼu sei fó glória tan.”​—João 12:28. a 

Terseiru, Jeová nia hakarak sempre iha ligasaun ho ninia naran ka reputasaun. Hanoin toʼok: Kuandu Jesus nia Ukun ba Tinan Rihun Ida remata, ita sei hetan koko ba dala ikus. Tuirmai saida mak sei akontese? Anju no ema hotu sei sente oinsá kona-ba Jeová  nia naran? Atu hatán ba pergunta neʼe, mai ita hanoin fali kona-ba asuntu rua neʼebé liga malu, neʼe mak ema nia laran-metin no Jeová nia direitu atu ukun. Iha tempu neʼebá, ema la presiza tan prova katak sira laran-metin ba Maromak. Sira perfeitu ona no liu ona koko ba dala ikus. Sira sei simu moris ba nafatin. Ema no anju sira mós sei la duvida tan kona-ba sé mak iha direitu atu ukun. Kriasaun hotu sei iha unidade no simu Jeová nuʼudar Ukun-Naʼin neʼebé diʼak liu. Maibé oinsá ho Jeová nia naran?

Jeová nia naran sei sai santu iha dalan neʼebé kompletu. Maski nuneʼe, ninia naran sei nafatin sai nuʼudar buat neʼebé importante liu ba ninia atan sira. Tanbasá? Tanba Jeová sei kontinua halo buat furak oioin. Hanoin toʼok: Jesus hatudu haraik an hodi entrega fali ukun ba Jeová, tan neʼe “Maromak sei sai Ukun-Naʼin ba buat hotu”. (1 Kor 15:28) Tuirmai, ema hotu iha rai sei haksolok tanba “hetan liberdade neʼebé furak nuʼudar Maromak nia oan sira”. (Rom 8:21) No Jeová sei kumpre ninia hakarak iha dalan neʼebé kompletu atu halo kriatura hotu iha rai no lalehan sai família ida deʼit neʼebé unidade.​—Éf 1:10.

Depois buat hotu neʼe akontese, Jeová nia família iha lalehan no rai sei sente oinsá? Ita bele fiar katak ita sei nafatin hakarak tebes atu hahiʼi Jeová nia naran. Jeová dirije David atu hakerek: ‘Haʼu harohan katak Maromak Jeová, sei simu hahiʼi. Haʼu harohan katak ninia naran neʼebé kmanek sei simu hahiʼi ba nafatin.’ (Sal 72:18, 19) Ita sei nafatin iha razaun barak atu halo nuneʼe.

Buat hotu neʼebé Jeová halo liga ho ninia naran. Bainhira ita hanoin kona-ba Jeová nia naran, ita hanoin kona-ba ninia domin. (1 João 4:8) Ita sei sempre hanoin-hetan katak Jeová hadomi ita, tan neʼe nia kria ita no fó Jesus nuʼudar sakrifísiu. Ita nunka haluha katak nia sempre ukun ho justisa no domin. Ita mós sei kontinua sente Jeová nia domin ba nafatin. Ita sei kontinua hakbesik ba nia nuʼudar ita-nia Aman no kanta hodi fó glória ba ninia naran.​—Sal 73:28.