Mucibalo eciya, twakaiya kuti kuli makani aayandika kapati aabajatikizya bangelo alimwi abantu boonse. Nkokuti kusalazyigwa kwazina lya Jehova lipati. Kufwumbwa naa bantu balazumina naa pe, nzila ya Jehova yakweendelezya njeyiinda kubota alimwi iliswaangene akusalazyigwa kwazina lyakwe. Mbubwenya buyo, tacikwe makani naa muntu wazumanana kusyomeka kuli Leza naa pe, eeci ciliswaangene amakani aayandika kapati aakusalazyigwa kwazina lya Jehova.

Nkaambo nzi lino ncotwaambila kuti makani mapati ajatikizya kusalazyigwa kwazina lya Jehova? Atulange-lange twaambo totatwe.

Kusaanguna, Saatani wakalinyonganya zina lya Jehova mumuunda wa Edeni. Mubuzyo Saatani ngwaakabuzya Eva wakali kutondezya kuti Jehova tali mwaabi alimwi akuti malailile ngaakapa Adamu a Eva tanaakali kabotu pe. Kumane Saatani wakaamba cintu ciimpene aceeco Jehova ncaakaamba. Wakamwaamba kuti mubeji. Kwiinda mukucita boobo wakamubejekezya Jehova mpoonya wakaba “Diabolosi” icaamba “sikubejekezya.” (Joh. 8:44) Akaambo kakuti Eva wakamusyoma Saatani, tanaakamumvwida Jehova calo citondezya kuti wakabukaka bweendelezi bwakwe. (Matl. 3:1-6) Kusikila mazuba aano, Saatani wazumanana kulisampaula zina lya Leza akwaamba makani aakubeja kujatikizya nguwe. Aabo ibasyoma makani aaya aakubeja balalangilwa kutamumvwida Jehova. Aboobo kubantu ba Leza, makani aaya aajatikizya kusampaula zina lya Leza lisalala, abonwa kuti nkutalulama kwini-kwini. Bubeji oobu mbobupa kuti kakuli mapenzi manji munyika.

Kabili, kutegwa zigwasyigwe zilenge zyoonse, Jehova ulikanzide kuyoolisalazya zina lyakwe kumasampu oonse. Eeco ncecintu ciyandika kapati kuli Jehova. Nkakaambo kaako ncaakaambila kuti: “Ndiyoolisalazya zina lyangu lipati.” (Ezk. 36:23) Awalo Jesu wakaamba cakusalazya icintu cipati ncobeelede kubikkila maano babelesi ba Jehova boonse naakati: “Alisalazyigwe zina lyako.” (Mt. 6:9) Bbaibbele cakwiinduluka-induluka lilakankaizya kaambo ncociyandika kapati kulemeka zina lya Jehova. Amubone buyo zikozyanyo eezyi zisyoonto: “Amupe Jehova bulemu bweelede izina lyakwe.” (1Mak. 16:29; Int. 96:8) “Amwiimbe nyimbo zyakutembaula zina lyakwe lilemekwa.” (Int. 66:2) “Ndinoolemeka zina lyako lyoonse mane kukabe kutamani.” (Int. 86:12) Ciindi cakusaanguna Jehova naakaambaula kuzwa kujulu cakacitika kutempele mu Jerusalemu ciindi Jesu naakaamba kuti: “Taata, kopa kuti zina lyako lilemekwe.” Kumane Jehova mukwiingula wakati: “Ndakalipa kale kuti lilemekwe alimwi ndiyoopa kuti lilemekwe alimwi.”—Joh. 12:28. a

Katatu nkakuti, makanze aa Jehova lyoonse anoswaangene azina lyakwe. Amubone mbolinooyandika zina lya Jehova waakwiinda musunko wamamanino kumamanino aa Bulelo bwa Kristo bwa Myaka Iili 1,000. Sena bantu alimwi abangelo bayoozumanana kwaandaana kujatikizya makani mapati  aakusalazyigwa kwazina lya Jehova? Kutegwa twiingule mubuzyo ooyu, atuyeeye makani amwi aayandika kapati, nkokuti kusyomeka kwabantu alimwi abweendelezi bwa Jehova bwakoonse-koonse. Aciindi eeco, bantu kunyina nobayooyandika kulitondezya kuti balasyomeka, nkaambo banoolondokede alimwi banooli bakasunkwa kale. Banootambwide kale buumi butamani. Sena makani aabweendelezi bwa Jehova bwakoonse-koonse, ngaanooli makani anoobandikwa mane buya akuleta lwaandaano akati kabantu alimwi abangelo? Peepe. Aciindi eeci, makani aajatikizya bweendelezi bwa Jehova kuti buliluzi, anoosalazyidwe mane kukabe kutamani. Pele mbuti kujatikizya zina lya Jehova?

Aciindi eeco, zina lya Jehova linoosalazyidwe cakumaninina alimwi kunyina uyoolisampaula kabili. Nokuba boobo, zina lya Jehova liyoozumanana kuba cintu ciyandika kapati kubabelesi bakwe boonse. Nkaambo nzi? Nkaambo bayoolibonena Jehova kazumanana kucita zintu zikkomanisya. Amubone kaambo aaka: Akaambo kakuti cakulicesya Jesu uyoopilusya bwami kuli Jehova, nkokuti Leza uyooba “mweendelezi wazintu zyoonse.” (1Kor. 15:28) Kumane, bantu boonse bakkala anyika bayookkomana “alwaanguluko lwabulemu bwabana ba Leza.” (Rom. 8:21) Aboobo Jehova uyakwaazuzikizya makanze aakwe aakaindi aakukamantanya bana bakwe bakujulu alimwi aanyika kuti babe mukwasyi mupati omwe.—Ef. 1:10.

Ino bana ba Jehova bakujulu alimwi aanyika bayoolimvwa buti zintu eezyi zyaakucitika? Mubwini, tuyoozumanana kuba aluyandisisyo lutalivwulili lwakutembaula zina lya Jehova. Sintembauzyo Davida wakasololelwa amuuya kulemba kuti: “Aatembaulwe Jehova Leza. Alitembaulwe zina lyakwe lilemekwa lyoonse mane kukabe kutamani.” (Int. 72:18, 19) Ciindi coonse ncotunoopona mane kukabe kutamani, tuyoozumanana kuba atwaambo tunji twakumutembaula Jehova.

Zina lya Jehova liiminina zyoonse zijatikizya nguwe. Twayeeya kujatikizya zina lya Jehova, tuyeeya kujatikizya luyando lwakwe. (1Joh. 4:8) Lyoonse tunooyeeya kuti Jehova wakatulenga akaambo kaluyando lwakwe, wakatupa cipaizyo cacinunuzyo akaambo kaluyando lwakwe alimwi akuti nzila yakwe yakweendelezya ililuzi alimwi njaluyando. Tuyoozumanana kubona Jehova mbwanooziyanda zilenge zyakwe. Tuyoozumanana kuswena kuli Jehova kali Taatesu alimwi akulitembaula zina lyakwe libotu.—Int. 73:28.