Omu kicweka eki, tukeega ngu haroho ensonga enkuru muno erukukwataho abantu n’abamalaika. Ensonga enu niyo; kweza ibara lya Ruhanga erikuru. Ensonga erukukwata ha bulemi bwa Yahwe obuburaaba nubwo burukukirayo oburungi eri kicweka eky’ensonga enkuru muno ey’okweza ibara lya Yahwe. N’ensonga y’abantu kuba besigwa hali Yahwe nayo eri kicweka ky’ensonga enu enkuru.

Hati habwaki nitugamba ngu ensonga erukukirrayo kimu obukuru niyo erukukwataho ibara lya Yahwe n’okulyeza? Leka tubazeeho ensonga isatu.

Ey’okubanza, omu rugonjo rwa Adeni, Sitaani akasiiga ibara lya Yahwe enziro. Ekikaguzo Sitaani yakagwize Hawa kikooleka ngu Yahwe akaba aine ekyaimire Adamu na Hawa kandi ngu ekiragiro ekiyabahaire kikaba kitali ky’obwinganiza. Ekindi, Sitaani akahakaniza ebigambo bya Yahwe kandi omu mulingo ogu yamweta mubiihi w’ebisuba. Nahabweki akasiiga ibara lya Yahwe enziro. Ekyarugiremu akafooka “Diabolo” ekirukumanyisa ‘omubiihi w’ebisuba.’ (Kus. 12:9; Yoh. 8:44) Habwokuba Hawa akaikiriza ebisuba bya Sitaani, akajemeera Ruhanga kandi yayanga kuba hansi y’obulemi bwe. (Kub. 3:1-6) Kuhikya n’akasumi kanu, Sitaani nakyasiiga ibara lya Ruhanga enziro obu namubazaaho ebisuba. Abo abaikiriza ebisuba ebi, nibasobora kumalirra bajemiire Yahwe. Kusiiga ibara lye erirukwera enziro, abaheereza be bakirora nk’obutali bwinganiza oburukukirrayo kimu. Egi niyo ndugirro y’okubonabona n’ebintu byona ebibi ebiri omu nsi.

Ensonga eyakabiri, habw’okugonza kugasira ebyahangirwe byona, Yahwe acweriiremu kimu kweza ibara lye, aliiheho enziro zoona ezibalitaireho. Eki nikyo ekintu ekirukukirrayo kimu obukuru hali Yahwe. Nahabweki n’agamba ati: “Ndyeza ibara lyange erikuru.” (Ez. 36:23) Yesu akakyoleka kurungi ngu eki nikyo kisemeriire kuba kikuru omu saara z’abaheereza ba Yahwe abesigwa obuyagambire ati: “Ibara lyawe dyezebwe.” (Mat. 6:9) Baibuli ebazaaho muno obukuru obw’okuhaisa ibara lya Yahwe ekitiinisa. Wetegereze zimu ha nkarra ezirukwoleka ensonga enu: “Muhe [Yahwe] ekitinisa ekisemeriire ibaralye.” (1 Byom. 16:29; Zab. 96:8) “Zinira haiguru ekitinisa ekiibaralye.” (Zab. 66:2) “Ndanyumizaga ibara lyawe ebiro nebiro.” (Zab. 86:12) Gumu ha mirundi nke Yahwe wenyini obuyabalize kuruga omu iguru nubwo Yesu akaba ali ha yekaru omu Yerusalemu, kandi akagamba ati: “Isenyowe nyumiza ibara lyawe.” Kandi Yahwe akamugarukamu ati: “Nkalinyumiza, kandi ndigaruka okulinyumiza.”​—Yoh. 12:28. a

Ensonga eyakasatu, ekigendererwa kya Yahwe kiine akakwate n’ibara lye. Ekyokurorraho: Hanyuma y’okulengwa okw’okumalirra, hakumalirra kw’obulemi bwa Kristo obw’Emyaka Rukumi, kiki ekirihonderaho? Bamalaika n’abantu balyehurra bata ha nsonga enu enkuru ey’okweza ibara lya Yahwe? Kusobora  kugarukamu ekikaguzo kinu, leka tubazeeho ebintu bibiri ebiine akakwate n’ensonga enu kandi ebi nibyo obwesigwa bw’abantu hamu n’obusobozi bwa Yahwe obw’okulema obuhangwa bwona. Kasumi ako kiryetaagisa abantu kwikara nibooleka ngu besigwa hali Yahwe? Nangwa. Boona baliba bamazire kufooka abahikiriire kandi balengesiibwe ekirukumara. Baliba batungire obwomeezi obutahwaho. Ekindi, kiriba kitakyayetaagisa kukyoleka ngu omulingo Yahwe alema nugwo gurukukirayo oburungi. Kasumi ako ab’omu nsi n’omu iguru boona baliba bali omu bumu kandi boona balisagika obulemi bwa Yahwe. Baitu kandi kiki ekirihika ha ibara lya Yahwe?

Kasumi ako, ibara lya Yahwe niriija kuba limazire kwezebwa, kandi liihirweho kimu enziro zoona eziritairweho. Baitu ibara lya Yahwe lirigumizaamu kuba ekintu ekirukukirrayo kimu obukuru hali abaheereza be omu nsi n’omu iguru. Habwaki? Habwokuba baligumizaamu nibarora Yahwe nakora ebintu ebirukuhuniiriza. N’obwebundaazi Yesu aligarurra Yahwe obulemi nukwo Ruhanga “afooke byona hali boona.” (1 Kol. 15:28, NWT) Hanyuma, abantu boona omu nsi balyegondeza “omu bugabe bwekitinisa ekyabana ba Ruhanga.” (Bar. 8:21) Yahwe alihikiiriza ekigendererwa kye eky’okuteraniza hamu abaana be ab’omu nsi n’omu iguru kandi bafooke eka emu enyakuli omu bumu.​—Bef. 1:10.

Hanyuma y’ebintu ebi byona kubaho, ab’omu ka ya Yahwe omu nsi n’omu iguru balyehurra bata? N’omu kasumi ako tuliba n’ekyetaago eky’okukugiza ibara lya Yahwe erikuru. Omwoyo ogurukwera gukakonyera Daudi kuhandiika ati: “Ayebazibwe [Yahwe] Ruhanga . . . Nibaralye eryekitinisa likugizibwege ebiro byona.” (Zab. 72:18, 19) Hataroho kugurukyagurukya, tuligumizaamu twine ensonga ezirituleetera kukugiza ibara lya Yahwe.

Ibara lya Yahwe niritwarramu byona ebirukumukwataho. Ekirukukirayo obukuru, ibara lye litwijukya okugonza okwatwiniire. (1 Yoh. 4:8) Tuliikara nitwijuka ngu okugonza Yahwe okwatwiniire, kukamuleetera kutuhanga, kuhayo ekicunguro habwaitu kandi ngu obulemi bwe nibusigikirra ha kuhikirra n’okugonza. Tuligumizaamu niturora Yahwe nayoleka okugonza okwainiire ebyahangirwe byona. Habw’ebiro n’ebiro tulyeyongera kumwirra haihi nka Isiitwe kandi tuzine ebizina ebirukukugiza ibara lye ery’ekitiinisa.​—Zab. 73:28.