I te mataupu tenā, ne tauloto tatou ki te kinauga tāua e tasi fua telā e pokotia i ei a tino katoa mo agelu: ko te faka‵maluga o te igoa sili o Ieova. A te mataupu ki te pulega sili—telā ko te ‵toe pulega tafasili i te ‵lei a Ieova—se vaega e tasi o te kinauga sili tenā. I se auala tai ‵pau, a te mataupu ki te fakamaoni o tino ko te suā vaega o te kinauga tenā.

Kaia ko faka‵mafa ne tatou i te taimi nei me i te kinauga sili tenei e fakasino tonu ki te igoa o Ieova mo te faka‵maluga o tena igoa? Ka suke‵suke nei tatou ki pogai e tolu.

Muamua la, ne ‵teke atu a Satani ki te igoa o Ieova, io me ko tena tulaga, i te fatoaga o Etena. Ne fakaasi mai i te fesili takolekole a Satani ki a Eva me i a Ieova se Atua kaiu telā ne tuku atu ne ia a fakataputapuga sē ‵tau ki a Atamu mo Eva. Tenā, ‵fuli fakakotua ei ne Satani a pati a Ieova, mai te taku ne ia e pelā me se Atua loi. Tela la, ne taku fakamasei ne ia te igoa o Ieova. Ne fai a ia mo fai “te Tiapolo,” telā e fakauiga ki te “tino fatufatu.” (Ioa. 8:44) Ona ko te talitonu o Eva ki loi o Satani, ne seki fakalogo tou fafine ki te Atua, ‵teke atu ei ki tena pulega sili. (Kene. 3:1-6) Ke oko mai ki aso nei, koi fakamasei eiloa ne Satani te igoa o te Atua, mai te fakasalalau atu a loi me ko Ieova se vaegā Tino pefea. A latou kolā e tali‵tonu ki vaegā ‵loi penā e se fia faka‵logo eiloa ki a Ieova. Tela la ki tino o te Atua, a te fakamasei o te igoa tapu o Ieova se faifaiga sē fakamaoni kae matagā. Ko te māfuaga o logo‵maega mo mea ma‵sei katoa i te lalolagi.

Te lua, ke maua ne tino mo agelu a mea aoga, ko oti ne fakaiku aka ne Ieova ke fakamaluga tena igoa, ke faka‵ma mai fakamaseiga katoa ne fai ki ei. Tenā eiloa te ‵toe mea tāua ki a Ieova. Tenā te pogai ne fai mai a ia: “Ka faka‵malu eiloa ne au toku igoa sili.” (Eseki. 36:23) Kae ne fakaasi manino mai ne Iesu a mea e ‵tau o fakamuamua ne tavini fakamaoni katoa a Ieova i olotou ‵talo i ana pati: “Ke tapu tou igoa.” (Mata. 6:9) E faka‵mafa mai faeloa i te Tusi Tapu a te tāua ke faka‵malu te igoa o Ieova. Mafaufau ki nāi fakaakoakoga: “Tuku atu ki a Ieova a te ‵malu e ‵tau o tuku atu ki tena igoa.” (1 Nofo. 16:29; Sala. 96:8) “Usu atu a vikiga ki tena igoa ‵malu.” (Sala. 66:2) “Ka faka‵malu ne au tou igoa ki te se-gata-mai.” (Sala. 86:12) Tasi o taimi ne faipati mai eiloa a Ieova mai te lagi ko te taimi i te faletapu i Ielusalema, telā ne fai atu ei a Iesu, penei: “Toku Tamana, faka‵malu tou igoa.” Tenā, tali atu ei a Ieova: “Ko oti ne faka‵malu ne au kae ka toe faka‵malu foki ne au.”—Ioa. 12:28. a

Te tolu, e isi faeloa se sokoga o te fuafuaga a Ieova ki tena igoa, io me ko tena tulaga. Mafaufau la: Kafai ko oti te ‵toe tofotofoga mai tua o te Afe Tausaga o te Pulega a Keliso, se a te mea ka ‵tao mai tua? E mata, ka tumau eiloa a tino katoa mo agelu i te ‵nofo mavae‵vae ona ko te kinauga tāua tenei, ki te faka‵maluga o te igoa o Ieova? Ke fesoasoani mai ke tali te fesili tenā, ke mafau‵fau nei tatou  ki vaega tāua e lua konei—te fakamaoni o tino mo te pulega sili i te iunivesi. E mata, koi ‵tau o tausi ne tino kolā ne fakamaoni faeloa a te lotou fakamaoni? Ikai. Ko oti ne tofotofogina latou kae ko ‵lei katoatoa. Ka maua ne latou a te ola se-gata-mai. E mata, koi ‵tau o sau‵tala faeloa ki te pulega sili i te iunivesi, io me fai mo fai se mea e fakamavae‵vae i ei a tino mo agelu? Ikai. I te taimi tenā, ka ‵kau fakatasi a te kau o te lagi mo tino i lalolagi nei kae ka talia ne latou a te pulega fua a Ieova. Kae e mata, koi fai eiloa te igoa o Ieova pelā me ko te ‵toe mea tāua ki ana tino?

Tenā eiloa te taimi ka faka‵malu katoatoa i ei a te igoa o Ieova, kae saoloto katoatoa mai fakamaseiga. Kae ka fai eiloa te igoa o Ieova pelā me ko te ‵toe mea tāua ki ana tavini fakamaoni katoa i te lagi mo te lalolagi. Kaia? Me ka lavea ne latou a mea fakaofoofogia katoa ka fai faeloa ne Ieova. Mafaufau la: Me ka fakafoki atu ne Iesu mo te loto maulalo a te pulega kātoa ki a Ieova, kae ka “pule katoatoa te Atua ki mea katoa.” (1 Koli. 15:28) Mai tua ifo, ka maua eiloa ne tino i te lalolagi “a te saolotoga ‵malu o tama a te Atua.” (Loma 8:21) Kae ka fakataunu katoatoa ei ne Ieova a tena fuafuaga i te kamataga ke fakamaopoopo fakatasi mai a mea i te lagi mo mea i te lalolagi nei, e pelā me se kaukāiga fealofani.—Efe. 1:10.

Ka aoga pefea ki te kaukāiga o Ieova i te lagi mo te lalolagi a mea konei ka ‵tupu? E mautinoa eiloa me ka ma‵nako malosi tatou o ‵viki atu faeloa ki te igoa sili o Ieova. Ne fakaosofia te faisalamo ko Tavita ke tusi mai: “Ke vikia a Ieova te Atua . . . Ke vikia tena igoa ‵malu ki te se-gata-mai.” (Sala. 72:18, 19) Ka tumau eiloa tatou i te ‵sala atu ki pogai ‵fou kae ‵gali ke fai penā ke oko eiloa ki te se-gata-mai.

A te igoa o Ieova e sui ne ia a mea katoa e uiga ki a ia. Kae ko te ‵toe mea tāua, me e fakamasaua mai i tena igoa a tena alofa mō tatou. (1 Ioa. 4:8) Ka masaua faeloa ne tatou me ne faite ne Ieova tatou ona ko te alofa, ne tuku mai ne ia te taulaga togiola ona ko te alofa, kae ne fakaasi mai te amio‵tonu o ana auala ona ko te alofa. Kae ka tumau eiloa i te lavea ne tatou a te auala e fakaasi mai ei ne Ieova tena alofa ki ana mea katoa ne faite. Ka fakamalosigina eiloa tatou ke fakapili‵pili malosi atu ki a ia e pelā me ko te ‵tou Tamana kae usu atu a pese o vikiga ki tena igoa ‵malu, ki te se-gata-mai.—Sala. 73:28.