Vocipama caco, tua lilongisa okuti kuli ocitangi cimue ci kuete esilivilo lialua muna mua kongela omanu vosi kuenda ovangelo okuti: Oku sumbila onduko ya Yehova. Catiamẽla kuviali, ale onjila ya Yehova yoku viala okuti ya velapo, ocina cimue ci kuete elitokeko loku sumbila onduko ya Yehova. Cimuamue haico okuti, catiamẽla kekolelo omanu va lekisa, onepa yikuavo yoku sumbila onduko ya Yehova.

Momo lie ku lomboluiwila calua ocitangi cinene mu kongela onduko ya Yehova kuenda oku yi sumbila? Tu kũlĩhĩsa asunga atatu.

Tete, Satana wa sepula onduko ya Yehova, ale ekalo liaye vocumbo Cedene. Epulilo Satana a linga ku Adama la Eva lia eca elomboloko liokuti Yehova o Suku yimue okuti hukuacaliko kuenda o tumbika olonumbi vina okuti via tĩla. Eci Satana a popia ca litepele calua leci Yehova a popele. Ca kala ndu okuti eye wa tukula Yehova okuti ohembi. Eye wa vĩhisa onduko kuenda ekalo lia Yehova. Kuenje, wa linga “Eliapu,” ci lomboloka “ukualombonde.” (Yoa. 8:44) Omo okuti Eva wa tava kuhembi wa Satana, ci lekisa okuti ka pokuile ku Suku kuenda wa sinĩla uviali waye. (Efet. 3:1-6) Toke cilo, Satana o kasi oku amamako oku sandeka uhembi watiamẽla kekalo lia Yehova. Ocili okuti, vana va tava kuhembi waco va kasivo oku lekisa okuti ka va pokola ku Yehova. Pole, kafendeli va Suku, uhembi watiamẽla konduko yi kola ya Yehova, ci lekisa ekambo lialua liesunga. Eli olio esunga lieci ku kasilili ovitangi vialua kuenda ohali voluali koloneke vilo.

Vali, oco oviluvo viosi vi kuatisiwe, Yehova wa nõlapo oku kemãlisa onduko yaye kuenda oku yi yelisa kasepu osi. Eci oco ocina ca velapo vali ku Yehova. Eli olio esunga lieci eye a popela hati: “Ame ndi ka sivaya muẽle onduko yange yinene.” (Esek. 36:23) Yesu wa situlula ciwa ondaka ya sukilile oku velapo volohutililo viafendeli vosi vakuekolelo va Yehova eci a popia hati: “Onduko yove yi sumbiwe.” (Mat. 6:9) Embimbiliya li tukula olonjanja vialua esilivilo lioku eca ulamba konduko ya Yehova. Kũlĩhĩsa ovolandu amue: “Eci ku Yehova ulamba onduko yaye yi sesamẽla.” (1 Asa. 16:29; Osa. 96:8) “Imbili ovisungo viesivayo konduko yaye yulamba.” (Osa. 66:2) “Ndi ka sivaya onduko yove otembo ka yi pui.” (Osa. 86:12) Yimue pokati kolonjanja Yehova a vangula oku upisa kilu, ceci a tambulula ovina Yesu a popia vonembele ko Yerusalãi hati: “A Tate, muisa ulamba onduko yove.” Kuenje, Yehova wa tambulula hati: “Ame nda yi muisa ale ulamba kuenda ndi yi muisa vali ulamba.”—Yoa. 12:28. a

Tatu, ocipango ca Yehova olonjanja viosi ci ka likuata londuko yaye ale lekalo liaye. Sokolola ndoco: Nye ci ka pita noke lioseteko ya sulako kesulilo Liohulukãi Yanyamo Yuviali wa Kristu? Ovangelo kuenda omanu kotembo yaco va ka  liyeva ndati, catiamẽla konduko ya Yehova? Oco ci tu kuatise oku tambulula epulilo eli, tu ivaluki ovina vivali vi kuete elitokeko okuti ekolelo liomanu kuenda uviali wa Suku. Noke liohulukãi yanyamo, anga hẽ omanu handi va ka amamako oku liyaka lovitangi vi seteka ekolelo liavo? Sio. Momo ovo va setekiwa ale kuenda va lipua loku tambula omuenyo ka u pui. Eci otembo yaco yi ka pitĩla, anga hẽ uviali wa Suku u kamamako oku sepuiwa, ale oku tepiwa? Sio. Vosi va kasi kilu kuenda palo posi va ka likuata omunga loku kolela okuti onjila ya Yehova yoku viala ya velapo kuenda yesunga. Pole, onduko ya Yehova handi yi kamamako hẽ oku velapo vali kafendeli vaye?

Noke liohulukãi yanyamo, vosi va ka kũlĩha ocili catiamẽla ku Yehova kuenda onduko yaye yi ka sumbiwa la vosi. Pole, onduko ya Yehova yi kamamako oku velapo kafendeli vaye vosi kilu lo posi. Momo lie? Momo va ka mola okuti, Yehova o kamamako oku linga ovina vi komõhisa. Sokolola okuti: Noke lia Yesu lumbombe oku tiula uviali ku Yehova, Suku o kala “utue wovina viosi komanu vosi.” (1 Va Kor. 15:28) Kuenje, omanu palo posi va ka kuata “eyovo liulamba womãla va Suku.” (Va Rom. 8:21) Oku sulako, Yehova o ka tẽlisa ocipango caye ca velapo okuti oku kongela oviluvo viosi vio kilu kuenda vio posi vomunga yimosi ndepata.—Va Efe. 1:10.

Noke liovina viaco, epata lia Yehova kilu kuenda posi li ka liyeva ndati? Ocili okuti vosi yavo va ka kuata onjongole yalua yoku amamako oku sivaya Yehova. Ukualosamo wa vetiyiwa oku soneha hati: “Yehova Suku a sivayiwe . . . Onduko yaye yulamba yi sivayiwe otembo ka yi pui.” (Osa. 72:18, 19) Otembo yosi tu kamamako oku kuata ovina viokaliye kuenda asunga oku sivaya Yehova otembo ka yi pui.

Ocili okuti, onduko ya Yehova yi situlula ciwa eci eye a tuwa. Kuenje eci tu sokolola konduko yaye, haico tu ivaluka ocisola caye. (1 Yoa. 4:8) Otembo yosi tu ka ivaluka okuti Yehova wa tu lulika omo liocisola, wa eca ocisembi omo liocisola, o viala lesunga kuenda locisola. Kuenje, tu kamamako oku limbuka ocisola Yehova a kuetele oviluvo viaye. Omo liaco, tu ka kuata asunga alua oku amamako oku amela ku Yehova loku wimbila ovisungo viulamba wonduko yaye otembo ka yi pui.—Osa. 73:28.