Domande dei Letori
Come che el stùdio “Santificà sia el to nome” nela Sentinela de giugno de 2020 ne giuta a capir meio quel che credemo sora el nome de Geovà e sora el so dirito de governar?
In quel stùdio, ghemo imparà che la santificassion del nome de Geovà la ze la roba pi importante che ghen’è, e la pol cambiar la vita de tute le persone e dei àngeli. El nome de Geovà el sarà santificà quando tuti i saverà che lu l’è el meio governante che ghen’è. Anca noantri podemo santificar el so nome se seitemo fedeli a lu.
Parché che semo drio dir che la santificassion del nome de Geovà la ze la roba pi importante?
Del giardin del Èden fin ancoi, Sàtana l’è drio contar busie sora el nome de Geovà
Prima, nel giardin del Èden, Sàtana el ga parlà contra el nome de Geovà. La domanda che lu el ghe ga fato a Eva la fea creder che Geovà l’era massa duro e no’l ghe dea mia robe bone ai so servi. Cossita, Sàtana l’è deventà “el Diaol”, che vol dir “caluniador”, parché el ga parlà contra Geovà e el ga dito che lu l’è un busier. (Gio. 8:44) Alora, Eva la ga credesto nela busia de Sàtana e la ga desobedio a Geovà. Cossita, ela la ga mostrà che no la volea pi che Dio el fusse so governante. (Gén. 3:1-6) De là in qua, Sàtana l’è drio contar busie sora Geovà, e quei che i ghe va drio quasi sempre i desobedisse a Dio. Magari, par quei che i serve a Dio, queste busie le ze la roba pi bruta che ghen’è. Par causa de queste busie, ghen’è tanta gente rugna e sofrimento nel mondo.
Seconda, par benedir tuta la so creassion, Geovà l’è dessidio de contarghe a tuti la verità sora so nome e santificarlo. Come questa la ze la roba pi importante par Geovà, lu el ga dito: “Sicuro che mi vao santificar el me grando nome.” (Eze. 36:23) Anca Gesù el ga mostrà che la roba pi importante de far quando preghemo l’è domandar che el nome de Geovà el sìpia santificà. Lu el ga dito: “Santificà sia el to nome.” (Mat. 6:9) Nela Bìblia, catemo tanti testi che i mostra che l’è importante glorificar el nome de Geovà. Par esémpio, 1 Cróniche 16:29 e Salmo 96:8 dise: ‘Deghe a Geovà la glòria che lu el mèrita.’ El Salmo 66:2 dise: ‘Canté lodi al so glorioso nome.’ E Salmo 86:12 dise: “Vao dar glòria al to nome par sempre.” Una volta Gesù el ga dito a Geovà: ‘Pare, glorifica el to nome.’ E del cielo, Dio el ghe ga rispondesto: ‘Mi lo go glorificà e vao glorificarlo nantra volta.’ — Gio. 12:28. a
Tersa, Geovà el vol che so nome el sìpia lodà par sempre. Dopo del Regno de Mila Ani de Cristo, tuti i podarà mostrar se i ze leai a Geovà o nò. Cossa che i àngeli e le persone i ndarà pensar sora el nome de Geovà? Par saver la risposta ghemo de ricordarse dela nostra lealtà a Dio e del so dirito de governar. Dopo dei Mila Ani, sol quei che i ze stati leai a Geovà i seitarà a viver in Paradiso. Lori i sarà belche perfeti e i gavarà la vita eterna. Alora, queste persone no le gavarà pi de mostrar se le ze pròpio leai gnanca che la maniera de Geovà governar la ze la meio. Tuti nel cielo e nela Tera i sarà unidi e i ndarà acetar a Geovà come so governante. Ma sarà che el nome de Geovà el seitarà a esser la roba pi importante?
Dopo i mila ani, tuti i saverà la verità sora Geovà e el so nome el sarà santificà del tuto. Ancora cossita, el nome de Geovà el seitarà a esser la roba pi importante parché lu el seitarà a far robe maraveiose. Gesù el ghe darà indrio el Regno a so Pare, e Dio el sarà “tute le robe par tuti”. (1 Cor. 15:28) Alora, le persone nela Tera le gavarà la “gloriosa liberassion dei fioi de Dio” e le sarà pròpio felice. (Rom. 8:21) Cossita, la volontà de Geovà la sarà fata e tuti nel cielo e nela Tera i sarà una granda fameia unida. — Efe. 1:10.
Alora, dopo de suceder tute queste robe, come che le persone e àngeli i ndarà sentirse? Sicuro che gavaremo tanta voia de lodar el bel nome de Geovà. Compagno el salmista Davi el ga scrito: ‘El nome de Geovà el ga de esser lodà. So glorioso nome el ga de esser lodà par sempre.’ (Sal. 72:18, 19) Alora, seitaremo a imparar sora Geovà e volaremo lodar el so nome par sempre.
El nome de Geovà el ne giuta a capir come che lu l’è. Lu el governa con giustìssia parché el ne ama, e el ga mostrà amor anca quando el ne ga fato e quando el ga mandà Gesù vegner ala Tera. Alora, sempre ndaremo ricordarse del grando amor de Geovà quando pensemo nel so nome. (1 Gio. 4:8) Noantri anca seitaremo a sentir el so grando amor. Cossita, volaremo restar cada volta pi darente de nostro Pare e lodar el so glorioso nome par sempre. — Sal. 73:28.
