Mwa yoosoma ele, naahixuttera weera yookhala etthu yoootthuneya enaavara atthu ootheene ni malaika: otteelihiwa wa nsina na Yehova ni owera wawe naari neere olamulelo wa Yehova tori wooreera. Ni eyo ennahela mpuwa otteelihiwa wa nsina na Yehova, emoha-moharu ororomeleya waatthu, etthu ekina enhela mpuwa ororomeleya wa Yehova.

Mwaha wa heeni nniilipiheraahu onvuwiha Yehova ni otteliha nsina nawe? Nrowe noone mathowa mararu.

Nthowa noopatxera, Satana aaveehalaawe nsina na Yehova naari neere ovuwa wawe, waari oJardim ya w’Éden. Ni nikoho Satana aapakenlaawe Adamu ni Heva, aatthuna owuupuweleliha weera Yehova Muluku oohireera murima nave tho weera Muluku khaiyono namalamulela oreera murima. Satana aahima etthu yoovirikana ni ele Yehova aalenlaawe Adamu ni Heva. Satana aamwiitthana Yehova okhala namootha, owo aaveeha nsina na Yehova ni ovuwa wawe. Nto ti vaavo aathatunwaawe “Diabo” ontaphulela ‘Namootha.’ (Yoh. 8:44) Eva ahaakhulela soowootha sa Satana ohiyaka omwiiwlela Yehova. (Eph. 3:1-6) Mpaka olelo va, Satana onnavirelela ohima itthu soowootha woohima sa Yehova. Moohihovela atthu ale enaakhulela soowootha iyo, ennahiya omwiiwelela Yehova. Mene nto wa atthu a Muluku, soowootha sinhela mpuwa nsina nootteela na Yehova, etthu yootepaxa onanara mwaha wooweera maxupo ootheene ninvirihaahu olelo va, mwaha wa yoowootha ya Satana.

Nthowa nanaaveeli, mwaha wa soopattuxiwa sawe, Yehova oolakela okoosoopa nsina nawe ni otteeliha mwa soowootha sootheene. Eyo teri etthu yootepa otthuneya wa Yehova, ni eyo ennooneya vaavo aahimmaawe ha: “Kini kittelihe nsina naka.” (Ez. 36:23) Ni Yesu aahima etthu yootepa otthuneya emaara nimpakaahu mavekelo, owo ohimme ha: “Nsina ná nttelihiwe.” (Math. 6:9) Biblya tho ohoonihera ikwaha sintxipale mwaha wa heeni oraaya wootthuneya ovuwiha nsina na Yehova. Mwa ntakihero: “Mmukumihere Yahvéh ovuwa wa nsina nawe.” (1 Sow. 16:29; Nsal. 96:8) “Mòpele ekoma ovuwa wa nsina nawe.” (Nsal. 66:2) “Kini kìnnuwihe nsina nanyu mwa mahiku othene.” (Nsal. 86:12) Ikwaha ikina Yehova uulummawe ooreene wiirimu, emaara aakhulaawe etthu Yesu uulummaawe otemplu oYerusalemu eeraka: “Tithi, ovuwihe nsina ná.” Vaavo Yehova omwaakhula enre: “Anyi, kòvuwiha ni kini kivuwihe tho.” — Yoh. 12:28. a

Nthowa nanaararu, Yootthuna ya Yehova ikwaha sootheene onnahela mpuwa nsina na Yehova, naari ovuwa wawe. Nkuupuwelani ha: Noomala Yesu olamulela mwa iyaakha mili, etthu heeni enrowa weereya? Neereke malaika ni atthu eneereke ovirelela okawanyeiya mwaha wa otteelihiwa wa nsina na Yehova? Weera naakhule nikoho nna, nrowe nuupuwelele itthu piili — Ororomeleya wa atthu ni ovuwa wawe. Noomala iyaakha  miili neereke atthu enaatthuneyeke weereriwa nroromelo naya? Hooye. Atthu eneereke yeererinwene moomalela, opwaha mwa yeeyo atthu oneereke ekhanleene oomalela weera evahiwe ekumi yoohimala. Yaphiya etempu eyo neereke Ovuwa wa Yehova oneereke ovaanyihiwa, naari neere atthu enookawanyeya? Hooye, mwaha wooweera ootheene a wiirimu ni a elapo ya vathi, enookhala oowiiraana ni eroromelaka weera olamulela wa Omwene wa Muluku tori wooreera ni waxariya. Mene nto neereke mwa etempu eyo, nsina na Yehova nneereke okhala etthu yootthuneya wa atthu awe?

Noovira iyaakha miili nsina na Yehova oneereke ottelihinweene moomalela. Nnaamweera vareene hiiho, wa arumeyi awe a wiirimu ni a valaponi nsina na Yehova oneereke okhala etthu yootepa ootthuneya. Mwaha wa heeni? Mwaha wooweera awosa eneereke woona itthu sootikiniha Yehova onrowaawe opaka. Nkuupuwelani ha: Emaara Yesu onrowaawe otthikihera Omwene wa Yehova, neereke Muluku onookhala “sothesene mwa sothesene.” (1 Akor. 15:28) Avinyaka atthu a elapo ya vathi eneereke opuha “onethi wa ovuwa wa anamwane a Muluku.” (Arom. 8:21) Ni mpaka vawo Yehova onookwanihera yoolakela awe yoothukumanya emusi awe ya wiirimu ni ya elapo ya vathi weera ekhale yoowiirana. — Aef. 1:10.

Noomala itthu sootheene iya weereya, emusi ya Yehova ya wiirimu ni ya elapo ya vathi enrowa woonelaka hayi? Moohihovela ootheene aya enookhalano ntthuno noonvuwiha Yehova. Ni mwene Davidi aahuupuxeriwa olepa masu aneera: “Attottopeliwe Yahvéh Muluku . . . Nittottopeliwe tho nsina nawe n’ovuwa wa mahiku othene.” (Nsal. 72:18, 19) Mwa mahiku ootheene hiyo nneereke okhalano mathowa enrowa oneeriha ovirelela onvuwiha Yehova.

Moohihovela nsina na Yehova ninnoonihera moota owo oraawe. Ni emaara nnuupuwelelaahu nsina nawe, hiyo ninnuupuwelela nsivelo nawe. (1 Yoh. 4:8) Hiyo ikwaha sootheene nneereke wuupuwelela weera Yehova onipattunxe mwaha wa nsivelo, ni mwaha wa nsivelo oonivaha mukuttho weera anoopole opwaha mwa yeeyo Omwene awe onnalamulela mwa xariya ni nsivelo. Nneereke ovirelela woona nsivelo Yehova okhalannaawe ni itthu opattunxaawe. Mwa mahiku ootheene nneereke okhalano mathowa mantxipale enrowa oneeriha omwaattamela Yehova ni omwiipela itxipo sinvuwiha nsina nawe. — Nsal. 73:28.